KUM-100 A PHA MISSION

KUM-100 A PHA MISSION

Mission
Mission cihpen USA leh Europe gam a om Pawlpi a kipsate in, " Tawntung Lungdamnathu " ahi vantungmi-3 taangkona pen amau nasep hi, ci-in teltakin thei uh ahihmanin, kipum aapin piakkhiatna tawh , neihsa sum leh thatang kaikhawmin naseem ding paisak(puak) uh hi. Mission pen naseem ding aa a kipuak or a kipaisakte cihna ahi hi.

Conference khempeuh in amau tithesharing a puak uh, adawl adawl aa paitoto sumte GC panin hong kizek kikkik ahi hi. Tithe sharing bek hilo-in conference tuamtuamte in amau septheihna lampi tuam tek tawh Missionary paisakin "mission" phut uh hi.

Gamthak phuutna ding kipawlna khempeuh "Mission" kici ahi hi.Mission khempeuh pen conference status a phak dongaa kalsuan ding hi. Gampua pai ding missionary a puakzo kei zongin, selfsupport tawh dingzo hamtang ding hi. Selfsupport tawh ding khempeuh Conference Status a tungzo ahi hi.

Mission masuan
* SDA Pawlpi in Christ hong piak ahi " Note pai unla, leitung aa om nuntakna nei khempeuh tungah hih lungdamnathu hilh un," acih nasep pen nakpi takin thupiseh hi. Mark 16:15.

*Amaute in, Rev 14:6-12 sunga Remnant Church nasep " Vantungmi-3 taangkona pen a taangko dingin, SDA te hong kisamkhia hi, ci-in um uh hi.

* Leitung-a teng gamkhempeuh, pawlkhempeuh, namkhempeuh, paukhempeuh leh mikhempeuh tungah " Tawntung Lungdamna" thupuak pen nasep poimawh hi, ci-in ngaihsun uh hi. Hihthu hangin pumpi thatang neihsa sum leh pai zangin leitungbuppi naseem dingin kipia uh hi.

* SDA missionary nasep pen nasep behlapnamawk bangin ngaihsun lo hi. Hih bekmah Pawlpi nasep hi, ci-in ngaihsun hi. Leitung buppi pen amaute lokhawhna mun ahi hi. Leitung beihun ding pen amaute kipiakzawhna tung tampi kinga hi, ci-in um uh hi. Matt 13:18. 24:14.

*SDA Mission nasepna pen leitung gam 204 pha hi.
* Kamnam 687 tawh thu kihilh hi.
* Kamnam 190 tawh laibu kibawl hi.
* Kumsimin mi-304 bang missionary kipuak hi.
* Leitungbupah sumpi $ 48, 167, 156/- kizeek khia hi.
[ Seventh-day Adventist Encyclopedia Vol 11, pgg 101.]

Mission's aim and object.
Mission dinmun tawh omcip ding ngimna GC in neilo hi. Mission in a puanbuuk khan ding hi. Gamkekin pawlpi tampi phut ding hi. Pawl khempeuh namkhempeuh kiang lut ding hi. Pawlpi khempeuh Conference Status atun dong kalsuan ding hi. General Conference of SDA kici kipawlna sungah REPRESENTATIVE SYSTEM tawh kizom ciat ding hi. US ah mission kici khatzong omlo hi. Mipum khatzong conference tawh kizomlo omlo hi.

GC piak appropriation bek ngaklo-in amautha tawh a dingzo dingin kipantah ahi hi. Tua banah US mah bangin missionary puaksawnin Mission Station phut kawikawi ding pen MISSION NASEP ahi hi. Kum-100 pha napi ding theilo pen mipoi mihem leh damlo ahi hi. GC in zatui tuamkhat a zon kul ding hi.

Myanmar Union buaipih pen GC sumlut tamlua ahihmanin naseem nuamlo uh hi. GC fund pen Blackmarket tawh khekin hau uh hi. Khasum khankhan uh a, workers naseem omlo hi. Appropriation Fund khaktan leh bukanin an hong zong ding uh hi. Sum kicinglua ahihmanin paikhia lo hi. Muvanlai inzong bukan nuamlo a tate a bu panin sawnkhia hi. An vapuak nawnlo hi. Leen kisin sak hi. A kha zaapsak hi. GC panin appropriation fund a khawl matengin tua natna dam ngeilo ding hi.

GC fund kicinglua ahihmanin sumngah source bulpi ahi member te thusimlo uh hi. Member te keemin khoi ngeilo uh hi. Myanmar Union of SDA natna a thei ding Specialist GC pan kisam hi. Tua lo-in tunglam pan aa kipuak sumtawh kivak dingbek ngaihsun uh hi.

Neihman hilo kipiaknopman.
Generak Conference in sumbawlna set neilo hi. Thu-umte piakkhiat sumpi bektawh naseem uh ahi hi. A piakhiate inzong sum a haulua hituanlo uh hi. Piaknopman bek mah ahi hi. Ka omna khua pen pawlpi gollua lo hi. Member 160-200 kiikpawl hibek hi. High School khat nei uh hi. Tua banah gamthal phu dingin India gam pai uh hi. Khangno tawm leh Elder pa paisak uh hi. Tua huhna dingin sumpi kidong den hi. Mattang aa kipan kipia hi. Effort budget cin liailiai uh hi.

Follow-up kisamlai hi. Biakinn leh leitang kisam hi. Piakzawh zahzah lawptakin kipia hi. A tawpna ah khangham lamte hong diang uh hi. A vanluite uh Yardsale ci-in innmai-ah hong zuak uh hi. Sabuailui, laibului, puansilhlui cihbang, zuak theih khempeuh a ngah zahzah tawh zuak uh hi. Lo leh leitang zuak uh hi. Khanghamte in a omna inn zuakin Nursinghome zuan uh hi.

Conferenc status tawh ding cihpen sumhau luatman zong nahi tuan kei mawk ei, upna tawh kipiakhia ngam hizaw mawk ei, ci-in kakhitui hong sum pelhpalh hi. Nalianpi a semte haulua nei lua sa kei ni. Kipia khia hilel hi. Dangka bebek paulam pen uplahna namkhat ahi hi. Minamdang khat neumuh luat lawmlawm lah uplahna leh spiritual leader cinlohna namkhat ahi hi.

Kum-100 cin Golden Jubilee
Thandaung Myothit ah kum-100 cinna Golden Jubilee pawikham uh hi. Leitung mihing kum-100 cingte khankhin hi-a mainawt nading lametna khempeuh tawpna ahi hi. SDA kum-100 cinpawi cihpen bel kha lamah khangcing mahmah leh kilawm hi. Report tuamtuamte pen Pawlpi deihna tawh hong ki-elpuak simsim hi. Union Mission secratary pa in , " No, Zomite hong kihta keng, worker lakah mi nei ingh. Layman lakah zong mi nei ingh," cita mai hi. Kawlgambup minamte tungah thupha puak ding tavuan kisuan Union officer khat kampau ahi hi. Hong to ahi hi. Zomite aading lamet omlo hi.

UMM ii sep khantohna khempeuh suksiat sawm ngiau hi. Khantohna khempeuh Karen minam makaite langpanna danin ngaihsun ngiau hi. Zomite tungah war-delare bang lianin, " No Zomite hong kihta keng," cih kammal hong pusuak ahi hi. Zomite nengcip ding aa hong paukhiat ni pen a sungah dawi a lut ni ahi hi. Khantohnate hong lungdam pih pen ding aa kilawm hinapi! A hehpen Pu Satan longal kua hiding hiam? Christian makai khat kampau dingin khasiathuai kasa mahmah hi. Kilemna bawl dingte in migilo teng kaikhawmin kivat sak hi. A domto dingte leh a lamto dingte in susia uh hi. Gitlohna leh thumanlohna khempeuh a pantah Myanmar Union ulianpi te ahi hi.

Zomite zong Jesu sisan mahtawh kileisa ahi hi. Union power lelngel tawh minam hong sukmai ding lauluat zong kullo hi. Lawkite leh milim bia mite sepngamloh, ngoltol tak aa semngam ding mihonkhat hong cial uh hi.Position khan uh hi. Motor cycle pia uh hi. Golhsum ding dangka puasak kangkang uh hi. Mittawsa in bangbang hileh semngam takpi mawk hi. Hong cing Pasian omlo hileh lauhuai takpi mah ahi hi.

SDA Golden Jubilee pen Zomite aadingin khimzing hi. Zomite aadingin maizumna leh dahna-ni ahi hi. Karen neihtuam nationalday tawh kibang hi. Ahi zongin Jesu sisan tawh hong kileisa eite aadingin lainang omlo hi. Samzang khat zong kialo ding hi. Kawlgam in kum-100 sung ih kaikhop thupha pen tu-a ih zakteng himai zen hi.

SDA session reports
Philipin mission pen 1908 kum pawlin kiphut hi. Kum-20 zong cinglo-in 1926 kimpawlin Conference tawh dingzo uh hi. Makaite in tawsawn uh hi. Nakpi takin Lungdamnathu taangko hi. Mizo mission zong conference din a sawm ciangin , union leh division ten thapia hi. Ding un, hong huh ding hi ungh, ci zawsop hi. Pawlpi mite lawpna ding report hoihnono kipia hi.

Tuhun aa Union Mission kikhop simloh abeisa hunte ah, SDA session a om ciangin report kipia in zaknop thei mahmah hi. Layman a lawpte paipih-in platform tungah teti pangsak hi. Circle leader ten lawptakin a nasepnate report pia hi. Local mission officer te in amau department ciat aa thupiang lawphuai nono report pia uh a, mitphia lo-in kingai hi. Session sungin mipite mai leh committee sungah, Union officer te in lungdam kohna, thapiakna, a hanciamte pahtawina pulak uh hi.

Sulwinning ngahte leh gamthak phutna thutuamtuamte report kipia hi. Pastor kipumpiakte ordained kipia hi. Gamthak phut nading geelnate leh hanthotnate kingai hi. Member tungpan kingah sumpi khantoh ziate kigen hi. Self-support tawh din zawh nading conference status tunzawhna ding bangzah kisamlai ci-in thapiakna kinei hi.

Meeting kah khempeuh lungdamtakin ciah uh hi. Lungsim khensatsa tawh Pasian nasem dingin ciah uh hi. SDA ahih khak pen-u kipak mahmah uh hi. Kisaktheih pih uh hi. Kisuanna omlo-in hangsan takin teti pan ding lawp uh hi. Ngakzolo zahin a lungsim in phu uh hi. Topa aadingin singam uh hi. Tua pen Christian thahatna leh nuntak zia ding ahi hi.

Union session ah bang kiza
California state cia phalo Kawlgam khutkuak cia pen, kum-100 sungin 75% in Vantungmi-3 tangkona za nailo uh hi. Tua in Union uliante lungsim sawkkha nailo hi. " Minam khempeuh tungah hih lungdamnathu" acih kammal in, a lungsim vut taktakin na um uh hiam? Platform tungah member te kihtak lohna kammal bek kiza hi. Moses zaluah makaipi ahihnate bek kiza hi. Evangelism hanthotna tawm mahmah hi.

GC leh Division personal a pai ciangin, nuntak haksatna gen hi. Datsiman khang leh vanman khang khang gen uh hi. Khasum hong khan un ci-in dahmai tak tawh pulak uh hi. GC piak dollar teng hong ne pihpiah ding uh hi. Sum lamsang adeihdeih un hong zek ding uh hi. Tu-a adra fund leh GC pan aa kipia dollar om zahzah Blackmarket tawh khekin hauhlawh mahmah uh hi. Amau mah in seem pah lai uh hi.

Court tungtang aa kizang sumte leh ADRA fund teng gamdangten nei leh gamthak phutna-in nei takpi ding uh hi. Junggle chapel lamsak ding uh hi. Pasiangam zai tuam mahmah ding hi.

Mission leh conference in policy tuamneihlo
Pawlpi church organization khat ahih leh policy zui-in kiphut hi. Tua pawlpi inzong church khat ii neih ding a kilawm right khempeuh nei pah hi. Minam deilo hi. Pau deilo hi. Mellehsa a vom a kaang deilo hi. Amun-agam deilo hi. Vantungtawh kizopna pen Organised church pan kipa hi. GC pan hilo hi. Division zong hilo hi. Union leh local mission zumpan hilo hi. Local Church pen power lianpen ahi hi.

Local mission, Union mission kikhopna khempeuhah ama Voice kiza tawntung ding hi. Churchboard thukhenna pen mannuel tawh kituak ahihlaiteng aana power zangin khatpeuh in phel theilo hi. Amau keem ding sia zong a deih teel thei hi. Tunglampanin zawhthawhna tawh a uk ding sia mawk koih theilo hi.

Working policy a tuam omlo hi. Ministries Manual a tuam kibawllo hi. Church manuel khempeuh leitungbup kibang hi.

Tulaitak eite hong dom hong tawsawn ding union pen a lauhuai pen hong suak khong hi. Pasian hehpihna lian mahmah ahihmanin hibangin ompaisuak lo kha ding hi. Kipuahkikna hunpha hong omlai kha ding hi. Kipuahphatna hong om zongin hih uliante tungpan hong piangzo-in ka um keiu hi. Amau naseppih sanggamte tung panin kikhelna hong pai-in ka um kei hi.

Ahih hangin Pasian in a zat ding mitampi omlai kha ding hi. Minambup lungtang puak ahihleh bel, Union Mission tungtawnin khanlawhna hun omlo ding ahihmanin MUC te Pasian in hong zat nang in, kiging tawntung ni. Ki-aap ni. Kiniamkhiat ni. Itna takpi tawh " Tawntung Lungdamnathu" taangko ni. Ei tha tawh kizolo ding hi. Sumhauhna tawh kizolo ding hi. Minam liante power zangin kizolo ding hi. "Thagum haatna tawh hilo, vangletna hang tawh hilo, Keima kha tawh nazo ding hi."

Pr Thang Siangh, zogampalpi@yahoo.com