ZOMITE CIIN THUCIN-THUTANG. [ iv ]

LAUMAN MAW, SIKHA TAKTAKMAH MAW.

Mihing maw sikha.

Pumpi pen nucia-pacia kipha ta hi. Nu leh Pa in ahihleh omdan luheekdan enin lametna lianpi tawh hong mitsuan uh hi. Mawkvakvak hun in hong khengpian ta hi. Bangkhat peuh sephun tung hi. Kilungtuakpih numei khat peuh omkha leh, bang masuanin nungta ding, ci-in lungsim gim hi. Sumzon sin dingin kakuan khia hi. Sumzian neilo kahih ciangin vokmul kaikhawmin kakholkhol hi. Khi-awhlai suutin kizuak hi. Tua bang nengtawh kipanin kazin khia hi.

Lomzaang khua-ah vanzongin kapai a, meeltheihte khat na om hi. Zingan nekhin phet sunsiah pheel tunin kapaikhia hi. Lomzaang khuakhung mualvuum kakhum phei hi. Kadaak ciangin Tedim-Tonzaang mawtawlam kaang heethaat kamu a, " hipan paisuk leng, mawtawlam kiman pak ding hitah," ci-in mualdung zui-in lozau kantanin kapai hi. Ka upmawh bang lo hi. Mawtawlam na gamla mahmah hi. Tualzaang mawtawlei katunleh ni mualah kinga suk lian hi. Kagilkial lua ahihmanin ka anphel hongin Zalui-tui tawh kameh hi. Tualai katun phetleh pasal kum-30 gualpawl ding khat, kapam aa khawlmunah, theikung kisaatliam lipliap nuai ah, tuipuan-ip menglipliap khat kuahin hong khawl hi. A thungsung veelveel a, kei hong en nuamlo hi.

Anne kaman ciangin kavan kisuanin kadin leh amah zong hong ding pah hi. Kei kapai ciangin amah zong kamai-ah napai hi. Laam-10 hal khawngin kamai-ah napaipai hi. Khuamui hong kipan hi. Lei keu mahmah ahih ciangin khua khalvakin taang heha lel hi. Tua bangin kapaipai uh hi. Amah mawtawlam zuizui-in pai a, lamdawt lampelh kaphak ciangin kei katotai hi. Mawtawlam kamat toh ciangin kamai-ah laam-10 hal mahin napai hi. Mawtawlam leh lamdawt pen gamla mahmah kikhai hi a, bang hangin kamai natung thei mawk hiam, ci-in lamdang kasa hi.

Ama nung kazuizui hi. Khua khalvak sung ahih ciangin vommelmel bekin kimuthei ta hi. Ngalhawk luanna hawkguam luino khat kaphaak laitakin, guamsung panaa poto singsaang hong kising ziahziah hi. Mupi khawng leengkhia hiding hi, ci-in ka thudon keileh, abul panin hong lok ziahziah hi. Keizong kadeekmul hong tho a, kakhuasikmul tho-in, " mihing nahihleh si o, sikha nahih leh si o," ci-in mikaangte khol suangtum kiciang tawikhopkhop tawh khuah sukin a kiim a paam teng kadeng phial mang hi.

Tua khit ciangin, kalu beemcia mahmah a phatawh kibang a, kalau mahmah hi. Tualzaang lam tawnin kapial hi. Tualzaang phakma ka khangzaang Ciktui geiah khuahaang meide thum kualpampamin kidelh uh hi. Lutang khuttum ciacia tolkeukeu ngentang ahi hi. Leisungah tumdaudau zel, hong pusuakin Cik kiimah kidelh zel uh hi. Suangtum la-in den kasawm a, hong heh zenzen leh, khua tungman kei kha ning, ci-in Tualzaang kadelh hi.

Lawm anneek laitak tawh kituak a, zunungin gamlum mahmah uh hi. Migamlumna innkhat ah kalut hi. Keipen sikha kihta aa lambaang kahi hi. Zukhamsulin hong ngaai petmah uh hi. Ka luksaih hong saang a, innsunglam ah tumpih hi. Kei zu hong suahin an hong pia uh hi. " Nataam dia," hong cih ciangin " paisuak ning" cikhamawk kahih ciangin, anneek khit ciangin laupipi in kapaisuak hi.

Tua zan pen mawtawlam lianlua a, kei neulua ka kisa hi. Zan khuamial sungah laupipi a, tangkhatguak pai taitai pen lamsau tuatan kamangngilh thei kei hi. Zingsang nai-3 Lawibual aa Bu Kap Za Thang innsaap katupa kiang katung hi. Sun tawlnga-in Tedim khuasung kavak hi.

Lusei tapong ten Tedim hong lakni zan ahi hi. Tuni dongin mihing hiam sikha hiam, katelzo kei hi. Kahanlohman hiding hiam, lau acihin kalau hi. Meidee kamuh a lu khuttum cia pha a, aktui bang aa tolkeukeu pen Cik sungah lutsek pusuak sek, Cik kiimkot aa taikaukau pen zong kamitkha ah mang ngeilo hi.

Ahih hangin tuhunin hibangdan tawm mahmah ta hi. Banglam zangin mihingte khem ahitam mailam ah kikumkum ding hihang.

Sikha taauu.

Japan gaalven khit ciangin, Phalbi hunsung innnuai ah sikha tau den hi. Khatveivei, ka pii Song Dim innnuai ah taauu thei zel hi. Nupi taimate in zan 12 dongdong tu-in khaukheek uh hi. Khuata khuaneu te ah nai-9 in mi gamdai mahmah ta hi. Sikha taauu pen nai-10 pawlin kipan hi.

A kipatcilin dammawhgim bangin neukhakha-in taauu tihtih a, a sawt ciangin guultawng thawn auau-in taauu hi. Innsual zui-in kheng ngamngam hi. Ka pii un, meilahciim khat de-in niinphiatna awngvangsin hongkhia sai-in, meikuang khesuk hi. A et ciangin voktal thau mahmah khanglam nga aa tu kamu hi, ci hi. Amau khawi pen vokkhial neu khiukheu khat ahi hi. Tangvalte tho khengkhangin a nawh uh ciangin, a phaitamtual ah voknophei minsa lumlatlatin hong kia, ci uh hi. Amau lau-in tawm ngamlo uh hi.

Khanglui papiten a gen ciangin ih biak Pusa in biakding hong ngen hi, ci uh hi. Ih Pu ih Pate biak dawituamtuamte pen namtuamtuamin kihil thei hi. Bia nuam kei leng a taimang ding hilel hi.

Sikha taauu pen ageinai veneh leng gamlapi hizel, paikhia leng innnuai mah hizel a, asawtlo-in deekmul tho a, lauloh phamawh hi. Tuhun ciangin kiza nawnlo hi. Dawi mah hizel leng ding hi. Biciing ah naak thei hi. Lampai laitakin liangko khawngah naak thei hi.

Kha gilo

Khampat Church pastor kasep laitak ahi hi. Tuikhal ah Hang Khan Zam kici naupang khat om hi. A nu pen meigong hi-a amah bek ta nei hi. Khagilo in a omna peuh kawizuihin gamtaang hi. Logiak buuksungah ihmu laitakin buukkongpua aa kikoih baalke tawh dengdeng hi. A ciah ciangin lamtawntungah suang tawh deng leipiil theh a nongkaisak mahmah hi. Khatveivei anbeel sungah eek nakoih hi. Hang Khan Zam omna khempeuh tua bangin gamtang hi.

Pawlpi tuamtuam panin Dawi hawlkhia dingin pai uh hi. Bangmah lawhzolo uh hi. AG siate khat nipikhat sung antangin thungen hi. Tua khit ciangin dawi hawlkhia dingin vakuan hi. Vaimim kung tawh nadeng hi. Sawbua panin khangno pawlkhat va kisin uh hi. Antangin thungetsak hi. Kilamdang tuanlo hi.

Kei hong sam a, zankhat giakin katam hi. Hunbawlin thungetna kanei uh hi. Tua laitakin Hang Khan Zam pen kagei-ah katusak hi. Ngawngkawi kawmsa-in lasa-in thu kangen uh hi. Tua laitakin meikhuk a, singkhuah-amtumtawng khat hong leeng a, Upapa ngawngzang khaphei hi. Hunman lian leh, tuibeel tungaa kikoih gaalkaphai tuihaidim tawh hong leengphei leuleu a, Kham Hau paangguh hong khaphei leuleu hi. Ciah dingaa kapaikhiat ciangin, innmai bikhanuai aa om tuikoihna kuangzawn khat hong kilawn leuleu a sualtung hongtuto daap hi.

Ameel muhtheih hilo a gamtatnate lauhuai thei mahmah hi. Keizong bangmah lawhzo lo-in kaciah hi. Kapteel khua ah tua bangmah piangngei ci-in kaza hi. " Inntual aa navok lian pen tawh hong bia in," ci-in kihil hihtuak hi. Khanghamlam ten Pusadawi kitom hi, ci uh hi. Tua dawi pen khatbek hinapi, tulnih bang pha thei hi, ci-in gen uh hi.

Satan Dawimangpa inbel ama tactic hong kheeltoto ding hi. Lawkihun aa tactic pen tuhunin muibun nawnlo hi. Kamsaang peuh hong kineih ding hi. Sawlna ngah ing ci-in mikhat peuh gim hong pia ding hi. Kidawm ni.

Thang Siangh. zogampalpi@yahoo.com

ZOMITE CIIN THUCIN-THUTANG. [ iii ]

SIKHA PEN SAHING MAW, DAWI MAW.

Sikha, sitha,

Neutung aa kipan sikha tawh hong kikhem a, tudongmah kalau lai hi. Khuazing sungah gamtang leh kilawm ahih ciangin khuaziing kikihta mahmah hi. Sikha kihta khempeuh in khuazing kihta pahmawk uh hi. Leitung mihing aa piang khempeuh in sikha neilo omlo ding hi. Sikha pen misite kha hidingin ki-ummawh hi. Tuamanin sikha kici ahi hi.

Ka tangvalcilin Bu Lian Tual kiangah kahawh ngei hi. Ama tuahkhak sikha-thu hong gen pih pih hi. Laukawmkawm sitawh zaknop thei mahmah a, Dawwikheekhaa-in kangaai hi. Ama hong gente lakah,

A galkap tumpih lawmte khat si hi. A zanhak nitaakin amah zong thukhual takin va-uap hi. Khua zaan semsem a, kuamah zankhak lo-in ciahciah uh hi. Zingsanglam 12:00 pawlin leengla amahguak omlai a, a lawmte zangiak ding vive nahi khong hi. Misipa lah khalaanglua kisa-in vok nawt zel, bawng khawng sial khawng patau-in kinawt ziahziah hi. Ciah lengbel hong zui ngeiingeii ding hitah, ci-in khalau mahmah hi.

Meilah ciimlualo lomkhat dee-in ciahkhia hi. A meidet pen mitzel puakphakh phakh-in kuang zel hi. Meilah saangdet veva a, siphual panin laukhinsa-in paikhia hi. Lampi pen to mahmah a, Z [ zigzag ] daan a, kikha to ahi hi. Kawi thumna atun laitakin huihuut tawh aw-thum kihualvalvalin, " Lian Tuaal" ci-in sam hi. A meidet lah kiciat lo, puaklaplap-in mitzel kuangzel hi. Kawi lina ciangin, ama aw taktak tawh " lian tual, ha ha ha " hongcih ngawngaw ciangin, thuakzo nawnlo-in kamei detlai tawh lehdenin sialbawhsa-in katotai hi, ci hi.

Mualdawn a khapi suak in, a kongbiang dong na taan khin lela a, keelkong kankhat suah phei-in kongbuuk sung kidenna hi. " Kangaih gige leh puakdapdap aa hong delh ging kaza", ci hi. Kongbuuk bikha liahin kongvang zinglile hongin a et ciangin, khataangah tal-devangvangin hong lutphei takpi a, keelkong hong palphei hi. Kongkhak neukha a etna ding vangsakin napang hi. Kongbuuk kahlei sikin hong lutto zaza takpi zen a, kongkhak lawng dinga a kisak laitak, " Hawk" ci-in a phawn leh konglamah, dap,dap dap ci-in leengmang hi. Lau taktak ing ei, ci hi.

Sahing maw, Dawi maw, Sikha maw.

Nidangin Simzang khua Sangno [ Thangno ] tawh kikhawlin thucin-thutang kagengen uh hi. Ama gente lakah lamdang kasak khat hong gen leng. Simzang khua-ah Dawisa Siampi khat om hi. Kideihlua mahmah a, khuakiim khuapam in zang uh hi. Suangzangte khat in samin dawithoih uh hi. Siampute pen zukhum pen leh anlim neihsunsun kipia hi. Nilawh ci-in anlawhkhat, sikdam ci-in tuu, hei, tem khat peuhpeuh kipia hi.

Zu leh sa limtakin ne uh hi. Zukhum ahihmanin zu peenglopi-in nuasia ngamlo hi. Khua in zinnelh hi. Khuaziin madeuhin galgil panin sahang bangkhat hong leengkhia zeza a, aak kiphawng gawpin kawkeek ziahziah hi. A zon uh hangin bangmah ommeello zel hi.

Innteekte in, " Zu zong peengta, pu ciah hoh o, kongzing gamla lua, " ci-in meilah bawlin ciahsak hi. Innliim laizang a kikoih beelpei sung a mei kicih pen a singkhuah kuang kiaukiau lai a, innteek ten lupsan hi. Naikhat sawtta ihmusip ding aa kipan laitakin, " Natuibuuk hong pia o, ciah tong ei," ci-in a paukhat za hi. Ih pu a ciah sawtta hilo maw, cihleh paikhia-in a et hangin kuamah mulo hi. Lumsuk dingin a kithawi leh tua bangmahin zaleuleu a, a etkik hangin kuamah mulo hi.

Siampipa pen lam tawntungin sahing maw, dawi maw, sikha maw khat in zui-in khemkhem hih tuak hi. " Pasal khat minsial zakzak a kitom kaza uh hi," ci-in vagiah-omte in gen uh hi. Inn a tunloh ciangin khuazangin kithawi a, khuang tawh zam tawh thau tawh kuankhia uh hi. Tua sahang in zuizui a, lamphung panin bawh zel bawh zel hih tuak hi. Abawhna mun-4 bangah kimu hi. Atawpna ah mualbo pian lamkawi takah man hileh kilawm hi. A luang pen kaikawikawi a, a khangzang ngalbulo tungah nakoih hi. A khuttaklamah temtazum humsa-in nasi hi. A et ciangin a leii kipettan a, a mittang langkhat kikhelkhia hi. A khepi kipetliam hi, ci-in gen uh hi.

A luangkan mihonte pen laulua uh a, nihnih thumthumin kikawisa-in om uh hi. Siluang kiim-um pilpel uh hi. Tua laitakin a paam meivaang batkhopna ah misipa kha, amasilh dialsipuan mah silhin ding mikhempeuh in mu hi. Asihma-in thupiang ding khempeuh kihil kholzo hi, ci uh hi. A bawngpi uh gamsungah sapi in petlum a, a leii kipettanin a mittang langkhat zong kikhel sese hi. Gancing naupangte in ganhon kiphawng thei zel hi, lau ung ci uh hi. Pasal thautawi khatta kikhelin zuisak uh hi. Thakhatin ganhon kinawtkek a, thau tawh a delh kawikawi hangin mulo uh hi. Ciahnuamin gan kaikhawm a a omlaitak un, siampupa pen suangpi tungah ama dialsipuan silh aa om mu uh hi.

A sihkhit ciangin zong a kha laang mahmah a, a huansungah hamtomin taangtang ci uh hi. Akha paikhia lo hiding hi, ci-in um uh hi. Bawngkhat go-i biphuah khat zawngin guiphakik uh hi. Tua ciangin a meel amang kimu nawnlo hi, ci-in gen uh hi.

Zampite Nok Khan Pau.

Pauta kici Nok Khan Pau leh a khuapihte 4 tawh ka omkhawm ngei hi. Amaute pen Zampi hi-a gualnuam thei mahmah uh hi. Pauta zong pillah piltaklo, hai a gendingin lah haitaktak lo, kikholhpih dingin nuam mahmah hi. A neulai un aaigia baak dingin pai uh hi. Dawi ten kai a, mang hiau hi. A zong dingin khuazangin kihawkin kuan uh hi. Thaulawn tawh zamtum tawh kuan un, kuan un ci-in taangkoko uh hi.

Mipite in aaigia baakna kuam sungteng khuahto-in lumziahziah uh hi. " Pauta" ci-a a sap ciangin a paam diak ah " Hawi" ci-in nadawng hi. A sapkik ciangin gamlapi panin dawng leuleu hi. A awtna lam ngatin thau tawh kaap uh hi. " Manlangin khah un, " cia kitom tawh, a kapkap tawh, khasapna dawila sam aa khuangkhuang tawh kiciau ziazua hi. A sawt ciangin khuanawl a, sialleipi bulah na om hi. Denin nang koiah om, nang hong dawnglo na hiam, a cih ciangin, " nong nawkkha dekdek uh a, amau kakam hong humsak hi ," ci hi.

" Kalawmte pen nuam thei mahmah, kalung leeng keei" ci ngaungau hi. Aiigia lak nongzon laitak un, khatpan hopih leh a tem tawh aaigia phung khat pheivaat hong thuah a, kalawmte saatkha dektakin lau lua uh hi, ci hi. Kaban langtuakah hong man a, hong lenpih vingveng hi, ci hi. Tu a Sialleipi min baakin tamveipi katung uh hi, Sialleimin duh mahmah uh, ci hi.

Dawite pen a khe vasakhe tawh kibang hi, a meel pen ngaihbaang thei mahmah uh hi, ci hi. A muk zong khatveivei mupimuk tawh hong kibang zelzel hi, ci hi. Tawlpikhat sung lungleengin thuumthuum hi.

Dawite in bang ne hiam, mihingsa ne hiam, singmin suangmin ne hiam? Vantung aa Manna moh mah nene theilai hiam kitheizo lo hi. Sikha leh dawi kibang kawikawi mai hi.Satan khuak pen thukmahmah a mihing guak zawh ding hilo hi. A ban zopding tampi om hi.


Thang Siangh. zogampalpi@yahoo.com

ZOMITE CIIN THUCIN-THUTANG. [ ii ]

SUNGLUT, KAUNEI, DAWILAWMNEI.

Sunglutt.

Mikaangten Incarnation ci uh-a, sunglutt tawh kisai pen minam khempeuh in nei uh hi. Jesu pen Pasian mihingaa hong piang, ci-inb Laisiangtho in gen hi. Ei tualsuak kamtawh Sungluut ahi hi. Tua pen Pasian bekmah septheih hinapi, a peengtheithei dingin Satan inzong lampi tuamtuam zang hi.

Japangaal kici World War II lai-in Kapteel khua thaupi tawh hong kaap uh hi. Zingtungin gaaltai-in kisa kheukho hi. Pu Khan Tualte nupa galtai a sialkongmai atun laitakin thaupi in kha a, a sinlawt-in a ngawngzang zong kha hi. Pu Khan Tual in a zi khibah aatsat a, tuatawh a zi taisan tamai hi. Amau pen Thang Khawm nu, Thang Khawmpa ci-in kihopih hi.

Tua khuasung mah a, teeng ahi Suan Za Thang tanu a pautheih ciangin, keipen Thang Khawmnu kahi a, ci-in a thupiang khempeuh kicingtakin sutdeudeu hi. A diipnemah liamma letmat-4 sau khat om a, a ngawngah zong meimapawn lian simsim om hi. Thang Khawmnu sihhun leh huanu pianhun kituak sinsen selai hi.

Nidang Christian hong tuncillai-in, Pasian naseem thuhilhsia, Sia Thang Gin pen Sukte gungal khempeuh khuavak puakmasa ahi hi. Pawigal kido lai hi. Gaalte hong pai a theih ciangin khinpi tungah bu hi. A gaalten mu uh a, teipak tawh dawt hi. Hong dawtlup phetin kalengkhia pah a, keima luang kamu hi, ci hi. Hong kigui ni, laangtungah hong kilaplap laitakin gawldawn panin ke-en hithiat hi, ci hi.

Miksi-in ka om hi. Vom, sazuk, ngal, cih khawng manin kazawng ngeingai uh hi. A pua panin enleeng miksi in khaupe a zawng peuh hilel, ci-in gen hi. Mihaute sung kilutzo lo hi. Sa mahmah hi, ci hi. Mizawngte sung pen votin nuam mahmah hi, ci-in gen hi.

Pawlkhatte in um phalo uh hi. Mihing sungah lut cibekleh uphuai ven, miksi suak, khaupe suak, mihau sungah lut, mizawng sungah lut cihpen tam kawmlua deuh, Budhist upna tawh kizawitawn aa hong mengmeng mawk ahi tam, a ci zong om hi. Ahi zongin lamdang kisa sim giugiau tek hi. A piangmah ding, a piang theimah maw? Tuni dongin kitelsiangzo lo hi.

Kaunei

Kauneite pen Lawkihun kilipkhap diak hi. Kaunei hi, ci-a a lamette uh, zi dingin kideihlo hi. Dawi nasepna namkhat mah hizel leng ding hi. A gen ciangin, zanin a pumpi panin leengkhia a, dumdepi bangin vaak thei hi. Naungeek khawng amau muhna-ah ompih nuam phalo uh hi. Naungeek limcite a kha man a, zanin nuisak lehlehin ne hi, ci uh hi.


Mi pawlkhat genna-ah, kauneite a luguak vaakkhia thei hi. Tua lutang a vaak laitak a pumpi kiheileh, lutang vaak hong ciah ciangin bulhkik theilo hi. Puakliapliapin bulh bulh hi. A bulh theihloh ciangin leengmang a, tua kaunei pen si hi, ci-in gen hi. Kau neite pen kitheihna nei uh hi. Kisungsia uh hi. Milakah om nuamsa lo uh hi, ci-in kigen hi. Khangluite'n kaunei kisungsia ci-in paunakin nei uh hi.

Kauneite kilipkhap mahmah ahi hangin a meelhoih nuam diak, a ci-asa zol diak, zong kamsiam diak uh cisawnsawn hi. Ka Nu leh ka Pa'n zong kaunei lipkhap mahmahlai uh hi. Ka tangval laitakin, " kaunei peuh hong tuak kha kei un maw," hong ci ngei uh hi. Kangaih tata kaunei ci-in min kihta henla, ken ngah leng ka ut veh, kacih leh, ka nu'n" nakam na lawl kidawm in" hong ci hi. Lau petmah hi.

Christian hong tam seemseem a, kuaman zong lipkhap nawn se lo uh hi. Khuata pawlkhat in gen theilai uh hi. Ahih hangin nidangzahin laang nawnlo hi.

Dawilawmnei

Nidang Lawkiphatlai-in khua khempeuhah dawilawmnei omkim phial hi. Dawilawmnei tawh a kineh mahmah, zuneeknamun khawng a, misite tawh a kimu thei, Vaankah kici pawlkhat om leuleu hi. Vaankahte pen misisate tawh kikhawl a, a nungtalaite kiangah amau omzia khempeuh gengen hi. Misi ten tua bang ci, ci-in a nungtate tungah gen hi. A nungtaten agennopte uh ama tungah sung uh hi. A kikaalah kamphen palaai seemin om hi.

Kanau Dim Suan Cing ithuai laitak hong si hi. Khuado hun hong tungaa Lawm-an ne-in ki omkhawm hi. Nitak anneek hun ciangin ka Papi vaankah hong kipan hi. " Dim Suan Cing a ni tawh hong ton ei, an napia vo, acih ciangin, ka Nu leh kasanggam numeite hong kap ngeingai uh hi. Ankuang luisak a, a keuding nih leh thum koihsak uh hi. Zu khawng suah uh hi. Nitak khuamui ciangin, " Ciahnuam ta uh hi, piaknop nanei uh hiam" acih ciangin, tuibuuk pia om, zateep zialsa aa pia om, zuhaapheeltuun a pia om, tanghopheel a pia tawh buai mahmah uh hi. Ka Nu bang lungkim peuhmah hi.

Vaankah cih kammal pen vantung pai, vantung vahawh cihna hidingin ka um hi. Dawi lawmnei acih uh ciangin dawitawh kikhawl thei, cihna ahi hi. Innbuuk leh Thuamvum mo kipi uh a, mokenin sakhikaang khat kipia uh hi. lampi-ah mikhat in naman a, ngahlo hi. Tua ciangin lungkimlo-in kisim uh hi, ci-in dawilawmnei ten gen hi. Tua kumin meiteigun nidang banglo-in khanggawp aa, suangtum golpipi taai hi. Innbuukmual dung aa singpi lian khempeuh kimutpai zihziah hi. Huihpi nasia lua ahih ciangin singtehte khutsung aa nuaizan bang hi. Innbuuk dawite pen a mitthuk, a nak sau, a mul sah a gol mahmah uh hi, cise hi. Gundawi pen a meelneu hi. San sehsawh uh hi. Ngaih huai thei mahmah hi. Gunlam veite pen lungleeng thei mahmah uh hi.

Kaneulai-in khuasungah dawilawmnei khat om hi. Tua bang a Dawilawmnei omhun pen Puulnatna a tun ciang hithei hi. " Tuanu, tuapa kaneeksa uh hi, si ding hi", ci-in genkhol a, zong sitakpi mawk hi. Misiphual khatah lasa lua kisa-in pasal khat eu kaka hi. Dawilawm neipa khat in, " huapa a hawm hi, a sungkua teng kaneeksa uh hi," cingiau mawk hi. Tua zawh kha-4 bang nungtalai hi.

Thawng Kim kici pasal thahaat mahmah khat om hi. " Lokuan ciah khuanawl hong tun laitak thaang kasiah uleh, hong tuuk a, dakkhawng in a temta hong vik leh, kalawmte a gilzang lawt tawh, a khut kitan tawh kamanzo kei uh hi," ci hi. Tuapa a dot uh ciangin, a pianzia khempeuh gen hi.

Dawi ten bang ne hi ding hiam? Mihing sa mah ne hiding hiam? Mihingte in kihta a ih biak theih naang a, miphial bawl ahitam, tua ten tu-in bang semsem hiding hiam kitheizo lo hi.


Thang Siangh. zogampalpi@yahoo.com

ZOMITE CIIN THUCIN-THUTANG. [ i ]

NGALKHAWHANG, KHUASIA MEIDE, PHEISAM.

Zomi ih Pu ih Pate khang aa kipan a kigen tawntung tudong aa kigen ahi, Ngalkhawhaang kici a lipkhaphuai mahmah khat om hi. Leitung minam khempeuh inzong nei hihtuak hi. Eitawh kinaipen ahi Kawl minam ten zong, Bilukyii ci-in kihtak gen mahmah uh hi. Mihing nethei danin kigenciat hi.

Eirope minamte inzong Ngalkhawhang taangthu sungah nakgen simsim uh hi. Amau Giants ci uh hi. Giant cihpen agol genna ahi hi. Lim abawl ciangin khetbuuk tawisak hamtang hi. Ama kivaakna hiam hisak hiam i thei kei hi. Amul sahin kingsak thelthal hi. Hapak neisak hi. Bangtak an-in ne a, bangtawh kivaak hiam ih thei kei hi. Dawi hiam, guh leh tangtawh nungta sahing hiam, kitheilo hi.

Minam khempeuh in Ngalkhawhaang taangthu tawmtawm genlo omlo hi. Laibu neunono, sungah kisimkha zel hi. Khamtungah laibu-in ih bawlzawhloh hangin, gamvaak sabengte leh khualzin zanpai mitampite in tatsat lo-in amau tuahkhak bangin gen tawntung uh hi. Amah pen mihinglim pua a golmahmah dawi bangpian hinapi thakhat-in a neuno suakpak thei hi. Khatveivei huih bekin kimu hi. Khatveivei gollua kisa alu singdawn ah dawkvava-in taai thei hi.

Kaneulai-in ka Pano in honggen ngei hi. Amah pen inntuancil hi-a dainawl innthak khat sungah teeng hi. Siakkhang or [ pangkhang] kongvang kibulhzo nailo ahih ciangin vang hiuheu-in kikoih hi. Khamtung pen munkham hi-a, pangkhanglam innkeng sang thei mahmah hi. Pi-7, 8 bang saang thei hi. Khuamphung panin dingto leeng siakkhang tawlet kibanzo lo hi.

Zankim ta hi. A lawmnu naksia daapdaapin ihmu khin hi. Tua laitakin pen khamawk laitak ahi hi. Innsungteng taang pempamin kamu, ci-in gen hi. Siakhang tawlet ka-etleh, migol mahmah kgat singkhuahtawng tawi-in hong dingto hi, ci hi. Innnuai aa vokte hamin gultawnglam kidenna uh hi. Tawlet ah hong lut a, mihing cia hong pha hi, ci hi. A singkhuah tawi tawh nakhempeuh, so, so ci-in kawk kawikawi hi, ci hi. Aman agen ciangin " Ngalkhawhang pau theilopi, so, so bek cithei hilo maw," cizawlai hi.

Tua laitakin kalawmnu aveih ciak deda-in hong pusuak a, laulua kisa ngum zeza-in tawlet panin leengkhia hi. Tua nungah khuamial lua, ziinglua kisa mal neiliang ve aw, ci-in gen hi. Amanbel, ngalkhawhaang natuak uleh veih peek peuh lecin lau-in leengmang pah ding hi, veih kihta mahmah, cilel mawk hi.

Khatvei kagangte khat vagiah-omin Ailaam mualah pai hi. A ciah ciangin Mualsuang kiphuhna khawlmun khatah zateepin khawl hi. A galmual ah meidee khat amalam naai a hongtai mu hi. A kuttsan leh amahzong, " nong ngak oo mataw, mataw ," cikik hi. A haatna pen mihing sangin haatzaw, a aw uunzaw ahihmanin a lungsim lawngpian hi. Mualsuang kiphut suangpeekpi beelin thau keksa-in napang hi. Taikhatna khawng panin a meidet kimu nawnlo hi. Tawmvei sungin nahthelhon leh singhiangdawn amalam naai-in huihpi in mut heethaat a, khengmai hi. Ciah kawmkawmin laulua ahih ciangin a thau keksa-in aging omna peuh ngat kawikawi a, naaklah liangin inn tung hi. Cikmah aa gamsung laungeilo pen tua ni-in khuasikmul tho laatlaat, lau buang ing ei, ci hi.

Gammi.
Gamtaak gamthuk singlianpipi lakah, ngalkhawhaang hiam, Ape kici zawng golmahmahte hiam, gammi mahmah hiam bel kitheilo hi. Sabengte leh sangnaupang Camp paiten mizelzel uh hi. Tua pen a omtakpi mah hiam, gamsate leh ganhing dangte mah bangin gamta takpi hiam, ci-in zongzong uh hi.

A muhngeina munte ah thaangsiah kawikawi uh hi. Khekhaapte en uh hi. Vompi lianmahmah khekhaap peuh nahi thei hi. Mihingtha tawh kizolo singmaam pheiciacia kikuaitan khawng , abawl a seemseem omtawh kibang singluang kikaikhawm khawng, manbu keeksa-in singtungah henin pang uh hi. An tah uh hi. Awging khempeuh man uh hi. Tudongin kimanzo lo hi. Among kimu lo hi.

Khuahaang meide or Khuasia meide.

Khuasia meide pen khuahaangmeide a ci zong om hi. Khuasiameide pen khat panin kikhen a, a utzahzah pha thei mawk hi. A gaalva panin enleeng mipum mahmah kimu hi. Tua pen dawi in ih mit hong bum hiam, a omtakpi mah hiam, ei theihzawh hilo hi. A zawdiakin Lawki dawibiak hunin a tamzaw tawh kibang hi.

Kum-10 pawl kaphaak laitakin ka-uu pen tangvalno hikhin a, a lawmpa khat tawh kisawm den hi. [ Kisawm cih ciangin giakkhawm cihna hi.] Ka innlak pute inn leh ko inn pen lui khat in hong hal a, kigaldot lianlian hi. Minutes 20, 30 sung bang kipai ding hi. Khuasia meidee pen nitak nai-9:00 pawlah hong kipan hi. A huansak luiguam ziinglile sungpanin dumdeepi khat hong pusuak hi. Gol tektekin meisel bangin hong taang beba hi. Hong kikhen zuaizuai in lii khawng hong pha leuleu hi. A meitaang tawh innbuppi kimu thei hi. A sawtlo-in mipum mahmah hong kilang hi. Meide kawmin sialkongah tuakin phaitam phungah kahkhiato uh hi. Pawlkhatte innsungah luutin innmai lamah pusuak hi. Tua pen leengtaitai-in gungal dong peuh vatung thei mawkmawk hi.

Lawmte tawh nihnih-thumthum tukhawmin innka pan ka-en thei uh hi. Ka uute lawmta saili tawi-in paisawm uh hi. Na en gige un, a phualah sim ding hi ung, ci uh hi. Ko, ka uu nungak tengtawh kavil gige uh hi. Pi-200 khawngpanin kimu lai hi, kanai semsem u ciangin hong neu semsem a, a phual katun u ciangin dumde bek leeng ciaiciai hi, ci-in dumde sinhing nihkhawng tawh hong ciah uh hi.

Tua hi-a, dumde pen dawinam aw, tua ahihkeileh dawipen dumde kineih maw, tudongin amaong kimanzo lo hi.

Pheisam.

Dawite zong minam tammahmah uh hi. Eurpe minam, Asia nam, Kalanam, cih bangmahin amau zong namtampi om hihtuak hi. Pheisam pen dawinamte lakah a neupen ahi hi. Ngalkhuahaang pen agolpen ahi hi. Amu a tauk tam mahmah hi. Khutdawh cia pha hi. Keng langkhat neilo hi. Khatveivei ciangkang, khatveivei siktuul kibulh hi. A khe kimlo ahih ciangin Pheisam min kipia ahi hi. Dawi dang banglo hi. Khat peuh in lampi khawngah tuak thei mawkmawk hi.

Amah pen dawidante tawh kibanglo hi. Pheisam-siam kici a, mite siam hi. Hausak thei hi. Khawhsa tungah siamnuam diak hi. Amah peen gamsa lian zaangsial khaat, ngalkhaat, cinghpi, a cingte dawi om hi. Tua pen Sakhaal ci uh hi. Sakhaal pen neumahmah a, pheisam bangmah ahi hi. Ahih hangin aman khekim nei hi.

A veengte anteng kaikhawmin a puute beem sungah sung thei hi. Pheisam siamte khang hanhan hi. Ahih hangin Pheisam siam ding ki-ut lua lo hi. A neekhun om a, innmang dongin nekik thei leuleu hi. A neeknop ciangin kiseel lua nawnlo hi. Beemkawm khawng khawngah tasuakin in kigawituptup hi. A khelkhelin kihil hi.

Nidangin Zampite tangvalno thum khawng in pheisam man ngei uh hi. Tua pen thutak maw a kimutmawk cih kathei kei hi. Kei zaakna ah, leithaang siah uh hi. Leithaang pen guamkaanin singmaam kikhung a, tua tungah thaangkhak uh hi, tua pen leithaang kici hi. A zawl kikhungzui a pai zusa vasate matna ahi hi. Pheisam in a thaang na vilsak a, manin a cilgetin khah uh hih tuak hi. Pheisam in lehet kikin nuihsan, ci bilbel hi. Tua tangvalte a si om, lukolh a cina om, ci uh hi. Tua bang aa cil kiget thei pen ganhing taktak hileh kilawm zel hi.

Tua ciangin Manglai tan-5 kasimlai-in lawm Tuan Do Kap leh lawmte pawlkhat Tuitawh pan sang hong kah uh hi. Tua ten zong pheisam manngei hihtuak hi. Hih pheisam pen ganhingnam maw dawinam maw tudongin a mong kithei zo lo hi.

Khanglui Zomite thuciin tuamtuam zomto zelzel ni.

Thang Siangh. zogampalpi@yahoo.com

ZOMI LAWKITE LEH KHANG KIDEMNA. [ v ].

A THAT A MANN KIDEMNA.

Taanglai ih Pu ih Pate hunin Athat-amann cihpen amau kidemna Sport thupipen leh a minthang pen ahi hi. Thautawi sabeng gamvaakte sangaa sport uthuaizaw amauhunin omlo hi. Saman-theite pen miminthang pente hipah hi. Pasal cingtaak pasal-muanhuai ci-in kipimuh hi.

Tuhunin US gamah kimawlsiamte in sum mu uh hi. Nungak meelhoih pente ngah uh hi. Nidanglai-in muinam neek ding haksa mahmah a, saben haatte pasal dingin kideih petmah hi. Zukhumpeen nesak a, pahtawina kipia hi. Zupi neekna munah amau kikai masa hi. Zucil leepsak hi. Laphuak siamte in,

a. Malgam taangah kawlciang leh paitem kuahte sangtam kaapte pawh a lawm ngelngel e.
b. Sang zuun siam leh kawlciang in van taang lawm a, laitam hente pawh a lawm ngelngel e. [ Ningzu aisa tawh a lawm ngelngel e.]

Saben uukte in zothau, saili, thaltang, vaaithang, tehlop thaang, zusa vasa a neupen pan kipan samatna namkim kin mahmah pah uh hi. Sakhau leh temta hiam kithuah den hi. Thaulawng leh thausialki kithuah den hi.

Tualkhaupuan sah mahmah a baansau-in khui uh hi. A khuk baan dektakin bawl hi. A aang hongsuak suk hi. Tua puan a silh ciangin apuan-aang paipehin a pumpi tuam a, savun kawnggaak tawh gaak a, bombi-sing teeng mahtawh kibang linlen hi. A puanpen guahtui in letzo mengmeng lo hi. To mahmah a, ling in a kaih ciangin doktat ngam lel uh hi. Lingkung kitat zaw vawt hi. Dial khim hi. Sakhau kuah hi. A thau liangpuakin kuan viauviau uh hi. Meisah ci uh a, siik letmatnih a sau, letmat-lang a sah leh thausuang khat tawh nahtangpaan ahi Lee tawm tawh, sing kibuptuah bawmtano khutdawh cia sungah a nello dingin guang aa vom tawntung hi.

Thautawi leh teitawi.

Sataang-pang leh Sataang-hawl kikhen uh hi. Sataang-pangte in thautawi uh a, Sataang-hawlte in temtawng khatciat keng uh hi. Sataangpang leh Sataanghawl pen Thautawi leh Teitawi kici hi. Nidangin tem kineizo kimlo a, tei, molh cihkhawng kizang hihtuak hi.

Sataang hoih amuh ciangin , Sataangpangte mapai khol a, sa suakna zawihoih omna tengah kigual uh hi. Teitawi pawl in sataang kuamsung teng a sing a suang lokin awng uh hi. Amau tuntunna kithei dingin gamtaangin awng awnguh hi. Tua hikeileh sapangte khutkhial thei uh hi.

Sabeng khempeuh in saman kimlo hi. Sa-aai neite bek in saman nuam diak hi. Gamsa a keem dawite pen sakhaal kici hi. Ahih keileh Gamngaak kici hi. Gamngaak a khaii [ abiak ] masak lohin tuahsia thei hi. Sa-aai neite kiang bekah sa suak hi. Sabeng minthang Pu Tun Thual in hibangin la phuak hi.

a. Sang a suahna laal a suahna simlei kankong om diam aw.
b. Nahsing nuai aa zinsiam lakmai sangmaang a kan kong hi e. ..naci hi.

Dawi tawh kop a, sa-aai neite bek in saman thei hi, ama kiang bekah sa suak hi.

Sa a kaap ciangin a lawmte masuan a suakte kaapsak lo uh hi. Thumanlo-in ngaihsun uh hi. Pawl dingin kideihlo hi. Pawl ngahzo lo hi. Sa pen khatvei-in tuukpahlo ahihmanin tua bang ciangin kaaphuan thei uh hi. Aman ding kituh thei ahih ciangin thau tawh sittel a buai mahmah thei zel hi.

Saman a om ciangin hanla sa-in awng pah ciaiciai hi. "Kabawl ee, kabawl ee, taang in e, lungtup ee, sangluang nau bang sial ing e, e " acih khit ciangin, " saman ing ei, hong pai vo" ci-in a lawmte sam hi. A gei tungmasa kidem a, gampa phul laaplaapin ku zakzakin delh uh hi. A tungmasate pen Saphuipua ci uh hi. A naakguh leh a pheisa kikaal a kawngguh pia hi. A nihnapa pen Samalman ci uh hi. Sanaak tangnih pia uh hi. Sakaappa or samanpa sihna khat nei zenzen leh a luang phaam masa ding himawk ahih ciangin Saphuipua kithupiseh mahmah hi.

Khuamual a tun ciangin, Sa mualsuah ci-inthau lawngkhat lawn masa hi. Mite khuadak tading hi, acih ciangin, a samat vom ahihleh "Vombuai ee, [ zangsa ngalpan e,] a let e, a let e, taang in e, ka kawlciang phung e, a let e a let e, hong kithangvai ciai e, tang in e, a lung duh e," acih khit ciangin amat vom hiam ngal hiam, kithei pah hi.

Tua khit ciangin minlawhna cileuleu hi. " Tak te, tak te Kapteel aami, Kapteel aa mi, Sukzo tu, Sukzo tu, Thawng Khaw Lian takte Thawng Khaw Lian tak te, " acih ciangin saman kua hiam kithei hi. Tanu tapa te in zubeel tawh a inn nazuan pah uh a, lumziahziah in omkhawm uh hi.

Zomite in Dah-hanla, [ minlo a kitom taang] nei a, saman-gaalman te hanla a tuamytuam nei uh hi. Sahangmante hanla kaphawklai khat, " Lentu sanglian e, a let e hong ki thangvai ciai e, a liat e hong ki thangvai ciai e, aw kanu aw kap tho rawh tho rawh sang minthang tuang hong tung e," ci hi.

Kapa Zangsial hanla," Thawm ii sawmsial hi e, a tatna ee kaangtui tualnuam e, simlei galkhua a dakna, thangvan lenmual saang hie, lungtup dawn bang tuak ing e, e."

Sahang, vom cihte pen sapi kici a, amat ciangin sagau tang hamtang uh hi. A hinglaite in a lawm zongin a gim sulzuih hi. Kamsia khatpeuh tawh kituak thei hi. Khanglui mite in vaikhempeuh mukimzo mahmah lel uh hi. Sapi acihte pen sasialne a lauhuai ganhingte gennuam hipha diak hi. Ei gamah humpi innsun kituah, sahang kamkei, sahang mualzul, cihte bek om hi. Sapi acih ciangin vompi leh sahang gennuam ahi hi.

Sapiman a om ciangin aihloh phamawh sak uh hi. A neizote in meipum bawng, sial zangin ai pah ziahziah hi. Ai cih sangin khiim ci uh hi. Ai cih ciangin kamkhauhlua sa uh hi.

a. Sang aw natun nangaih leh lakmai-ah kigual dial e.
b. Lal aw na zua nangaih leh khuamual ah alvan bawm e.

a. A mual kitawi tulliim liap peuh sangsawl kaphah na hi e
b. Lentu sungah hawkguam damtui sangluang kadiah na hie..

Leitung kilumlet aa gal leh sa ki-aai nawnlo hi. Pilna zonhun leh sumleh neihsa zonhun in hong khengpaih to hi. Ahih hangin US gamah mihau minuamsa dinmun saangte in saben gamvak pen Sport nuam mahmah in zanglai uh hi. Vice President Dick Cheney sabengin kuan hi. A lawmpa khat vasa sakha a, ngiimtete in kaap ek hi. Si lo hi. Comedy ciamnuih haat ten ciamnuihna-in nei zel uh hi.

Ei Zogam zong US gam mah hong bat hun ih ngaaklah mahmah hi. Khang bangzah ih ngaak diam? Electricity zang aa nasephun hong tung ding hi. Singkung lopa sulo liamsak lo a, nimdihdiah aa koih hun hong tung ding hi. Gamsate leh van aa leengthei vasate nangawn lauhetlo suakta tak a, mite tawh teenkhop theihhun hong tung ding hi.

US gambek hilo, gam thupite ah, saben hun kiciangtan hi. November khasung hinuam diak hi. Anu-apa a kizuihloh laitak ahi hi. Ganhingte cimanglo dingin nasia takin khaam uh hi. A citawmte leh a nute cikmahin kaapsak lo uh hi. Cimangzolo ding zah a tam, sazuknam, gamsial, gamlawi, gambawng cihte beng uh hi. Vamiim , buah, sai-aak cihte kaap thei uh hi. Hi ganhingte pen gam susiazo zahin tam hi. Ei gam zong tua bang dinmun hong tunkik nangin thungen ni.


Thang Siangh. zogampalpi@yahoo.com

ZOMI LAWKITE LEH KHANG KIDEMNA. [ iv ]

ZOMITE LEH MUALSUANG.

Zomi ih Pu ih Pate in Khangtaangthu ciamtehna laibu neilo uh hi. Laikawi khatzong tawh kinahvawh lo hi. Khangsawnte tungah humuapna namkim zangin ciamteh huai thukhempeuh hilh uh hi. A hilhnop thukhempeuh ciamteh ol dingin taangthu bangin gen uh hi. Paunak zangin a lungsim sung leh a sisan sungah tengtawntung dingin hilh uh hi. Amau gualzawhna ahi zongin kamsiatnate ahi zongin laphuakin khangsawnte sutsak kikkik uh hi. Amau nopsakna, gualzawhna hehna, tuahsiatna, khempeuh pen atu-atate min suaksak hi. Tua khempeuh pen laibu taangaa kizang Khangtaangthu ciaptehna ahi hi.

Mualsuang.

Leitungah Phawkna-Mualsuang phut masapen Jacob hidingin ka-um hi. A uupa innluahza be-meh kuangkhat tawh a khemkhit ciangin a Pu Laban kiangah galtai hi. Lampi ah khuamial a, gammaang singzing lakah suangpeek lukhamin ihmu hi. Amang sungah vantung kongkhak kihong a, kahlei khat ama lukham suangpeek sunin kikhungsuk mu hi. Vantungmi tampi kahto sek tuaksuk sek mu hi. Kahlei dawnah Pasian pau a, Abraham tungaa kamciam amah tungah kipaknathu gen hi. A khanlawh ciangin, " Hihmun in Pasian inn kongpi hilo hiam," ci-in a lukham suangpeek phut hi. Tua laimun pen Bethel ci hi. Tudongin omlai hi.

Moses in Santuipi a kaan ciang ahizongin, Jordangun a kaan ciang ahi zongin Israel phazah suangtum kaikhawmin mualsuang ciang uh hi. Tua thu khempeuh pen Israel mite khangtaangthu ciamtehna hipah hi. Tuhunin khuapiluite kito kik a, mualsuangte leh kawmpang tungaa lim kisunte tungtawnin amau nuntak sung nasepziate kimu thei hi.

Ih Pu ih Pate in mualsuang a phuh uh ciangin,

Gaalman-saman kidem hunlai-in pasal ngalhaatte in Mualbawlin, mualsuang phut hamtang uh hi. Tua mualsuang phuhnamun dingin vaikuante leh khualzin gamvakte aading khawlmun hoihna teel uh hi. Khawlna nuam theithei dingin phung ciangin suangpeek nopcitakin phah uh hi. A thah-amat khempeuh suangpeek tungah lim sunin suang uh hi. Khuang, zam, dakhangbu, aa kipan aneih-alam thupi zawdeuh suang uh hi. Sial, bawng aa kipan ganlian a khawite lim zong suang hi. Agawh-aluup limte zong suang hi.

Khawlmun nungah suangpeekte tangtakin phut phei dimdiam hi. Tua mualsuang nunglam totamin lei hoihtak maih hi. A samat zah suangciip la-in a dimin phut hi. Mipi khawlna niliap dingin mawngkung golpipite suan uh hi. Mualsuang a phuh ciangin Siampipa in phuisam a, taitehtui buakin phut hi. Mikhatpeuh in a suksiat leh cidam lo hi. Ama luang in sawng thei hi. Khe tawh mualsuang kimawk suih ngamlo hi. A tuante khekhultum veii-in si hi. Tua abng aa tasiate pen zawngkhalin khuasuaklo kici hi.

Mualsuang phuh pen Lawkite bektawh kisai kisa a, piangsual pawlkhatte in mualsuangte simmawhin heitawh saatliam, sukpai sak, cih bangin a tuamtuamin susia uh hi. Mualsuangte pen thupi mahmah hi. Laibu taangaa kizang Khangtaangthu ahi hi. Mualsuang phahte leh mawngkungpite pen mipite noptuam dingaa kibawl hi a, neu ngaihsut ding hilo hi. Tua susiate pen minambuppi leh khuabuppi phattuamna susia ahihmanin khautak a hilh ding kilawm hi.

Innteekte elnopna leh gamtat siatluat manin a liaap dihdiah khawlna nuam mahmah mawngkungpi peuh sattheu mawk uh hi. Suangphahte longkhia-in puamai uh hi. Mualsuang neite in pammaihsa-in ciliing lua uh ahih ciangin mipi phattuamna ding ngaihsun ngam nawnlo uh a, inntual khawngah tuahin phut uh hi. Christian pawlkhat in Lawkivai danin ngaihsun a, suangphahpeekin zang uh hi.

Hihte pen mitkeuh hun hong tun ciangin deihmahmah a zonhun hong tung ding hi. Pawlkhatte in Han ah lukhung suangin phut hi. Taangthu tampi gelh uh hi. Tua bangte nangawn saili [ sailung ] tawh kaappaat se uh hi. Nutumnalam mite in Han ah mualsuang nakphuh mahmah uh hi. Kumcin simin paakhoih mahmah tawh thaksuah sak zel hi. Kisuksiat sak mawk om nawnlo hi.

a. Ka khuamual a, lailu kasuan nun a meng nam veel veh aw,
b. A nun dawnglai pal abng kaban pal ahul kha ding hi e.

a. Pupa khuamual dai aa damsa lumsuang paallai suan ing e
b. Pupa khuamual dai aa damsa pupa khuamual a tulsa aw lailu a kapal sak e.

a. Sangkaap tek a laihen tek a, sing zuapan hen mual nei e dawh suangphah e.
b. Kei pawh lianu taangpa hileng kazua sangkap henmual neilo dawhsuang phahsak nuam ing e.

Tuni dongin lailam nasepna thaneem bek thamlo-in lailam kipawlna-kip kineizo nailo ahih ciangin Khangtaangthu kaikhopna zong kiptak khotak kineizo lo hi. Dawibiate ngeina ci-in kineu seh a, a banbanin mongbeibei lel hi. Ka innpi uh Tapidaw hong suah ciangin ka Pu uh nungtalai hi. A zitawh khahualna ahi a Songpi phukpai uh hi. Ka Pu hong pai a, a Songpi kawikawmin kap hi. " Kazi tawh kakhahualna hiven maw, nasa sing ei, ci-in tawlpikhat kap a, a kim aa om khempeuh kidiiklo khatbeek omlo hi.

Tuhun ciangin innphiat kici a, molhtum tawh a sing a suang vaatin dawihawlkhia uh hi. Api apu tuanna maante saatzan sak mawk uh hi. Zu-um sungah dawilut ci-in avang hu a, lokgawpin a that kineih mawk uh hi. Kamsang bangin kibawl a, pianna nu hawlkhia a, apuan-anik khempeuh haltumsak khong hi. Dawi icihpen vantung pan aa kihawlkhia vantungmite hi a, tua abng mawk a bawlthei nam hilo hi.

Amaute in singpilian beello hi. Uum leh beel lakah teenglo uh hi. Mihingte thahlup theih hilo hi. Khanglui vante ih suksiat manin dawite a tai ding hilo hi. Pianthakna pen bangkua kikhenna ding hilo hi. Nu leh Pa, Pi leh Pu tawh gaalsuahna hilo hi. Mipum tungaa Khazih silhna hi a, leitung nate in khaktan tuanlo hi. Pasian a biate in lungsim leh kha tawh bia dinbg ahi hi.

Khangluite in mualsuang a phuh ciangin amau hun a dawibiakna tawh kituakin seem uh hi. Tuhun mualsuang ih bawl ciangin Tapidaw upna zui-in thungetna tawh lungdam ko-in kiphut hi. Biakna leh Ngeina tonkhawm tawntung ding hi.


Thang Siangh. zogampalpi@yahoo.com