BIAKNA LEH NGEINA. [ iii ]

ZOMITE KUMSIM GUALNOPNA PAWITE.

Note: Pawi cihpen Zokam hilo hi. Kawlkam aa kingah ahi hi. Khangluimi zawdeuhte in Pawi cilo hi. Mopi, Mosagawh, Omkhawm, Ankuang-umkhawm cih bangin kizang zaw hi. Sih ciangin Sihpawi cilo-a, Siphual, Simun peuh kici zaw hi. Khuado-pawi, Sialsawm-pawi kicilo-a, Khuad Lawmanne, Sialsawm-Lawmanne kici hi.

Zomite in kumsimin Gualnopna-pawi pelhlo-in nihvei kinei hi. Khuad-Lawmanne leh Sialsawm-Lawm anne kici hi. Hih Lawmanneekna pen Sanggam kikaihkhopna hunhoihpen hi-a, Ngeina limci-ngeina hoih mahmah ahi hi.

Tualbawl kici Tualbiakna.

Khuasaat ciangin, kimawksaat lo hi. Siampi, Hausa, Taangko, Tuinaakkhuat, Tualteek, Tualtanu, Siikseek leh Khuangtum a omlohin khua kisaat ngeilo hi. Tuikhuukkhuatte kisawl masa a, tuihoih tuilim amuh ciangin khuasaat kipan uh hi. Amasa penin Khuasiam ding, ahuu akeem ding sapna kibawl a, tua pen Tualbawl, Tualbia kici hi.

Tualbiakna dingin vok zang uh hi. Tualbiakna pen Khuataangpi aa hi-a, lawhta-in zu kidong hi. Tualbawlna Vok leina ding lawhta mahin an dong uh hi. A beikhempeuh taangpi sikh ahi hi.

Khua dingin gamtak leihoihna kizuan a, a lauhuai sapite leh dawi leh kau , gulsia tangsiate , ngia leh vompi sahangte, pulnatna tuamtuamte nawkkhakna panin ahung-akeem dingin Asiam ahi Khuasiam khai masa hi. Khai cihpen bia, lungkimsak, thoih cihna hi. Tua pen Tualbiak-pawi kici hi. Tualbiak nasep leh Sialsawm Lawmanneek kizom tawntung hi.

Tua Biakna ah khuamite cidamna dingleh kithutuahna ding, guahtui hoihna ding, ankung sisia thei lungnote a omlohna ding, gah leh paak hoihtak aneihna dingin kingen hi.

Zehtang.

Tualbiakni zingciangin Zeh tang uh hi. Lo kikuansak lo hi. Leigil suaksak lo hi. Singno leh lopahing sisuah lo hi. Kahna leh gamlumna bawllo hi. Kahna cih ciangin misi aneih uleh tuani-in guilo hi. Gualnopna khuang leh zam gingsak lo hi. Zehphi ci-in thukham palsat a om ciangin guahtuiluan hoihlo hi. Ngalhawk in lolai ankungte nawksia thei hi. Khuasung thusia-lasia piang thei hi. Pulnatna tuamtuam in nawk thei hi. Tua ahih ciangin Zehphi a omleh a beikhempeuh loh sak hi. Tualbiakna bawlpha kik hi.

Tualbawl-khasung or Sialsawm-lawmanneek kha huamsungin samante pen Sawngman kici hi. Sawngzu luup hi. Sawngla sa-in laam uh hi. Siampipa in tuiphih aa, Sawngmanpa leh khua-leh-tui daupaina dingin Khuasiam tungah ngen uh hi. Hun ciangtan sungin Sawngman a omleh Khuasiam lungdam hi, ci-in um uh hi.

Sialsawm Lawm-an.

Nidanglai-in Sialsawm Lawm-an pen lopawi man ciangin kihih tawntung hi. Guahtui luandan zui-in lopawi ahihmanin kumkhat leh kumkhat kibanglo thei hi. Bekthamlo-in Simlam leh Zolam aa teengte khuahun paidan kibanglo aa, khua khatleh khat kituak theilo hi. Ahih hangin Khangthakte in kumpi naseemte leh sangnaupangte kimhun tawh kituak dingin April kha kipatlam hih dingin kipsak uh hi.

Khuado Lawm-an.

Khuado Lawm-an pen anlak khit ciangin kibawl hi. Khawhsa kaikhawm khinphet ahih ciangin zu leh sa tawh kidiah pikpeekin kibawlzo hi. Kumpi naseemte leh sangnaupangte kimhun October sangkhak sung kingim hi.

Ih Pu ih Pate pen Biakna leh Ngeina tawh tonkhawmin nakalsuan uh hi. Ahih khempeuh pen Biakna tawh kitukkalh saklo uh hi. Asiam leh a Biakna mangngilh ngeilo uh hi. Khuado Lawm-an pen Sialsawm Lawm-an mah tawh a paidan kibang hi.

Meilah saatni.

Khuado Lawm-an kiginni pen Meilah saatni or Dai-an bawlni ci uh hi. Zununsung or omkhop hunsung zat ding meilah pua hi. Tuinak kipuah hi. [Han,than, san,khan] Han kipuah aa Khasapna kinei hi. " A si kha hong ciah un, a hing kha hong ciah un, zu leh sa neding hihang," ci-in lobuuk suangthute saatpai-in khasam uh hi.

Khuailaa, Tang'suak.

Khangluite in Khuai pen thupiseh mahmah hi. Khuaipi leh khuaivahte a zu kine hi. Khuaivom, khuaingo cihte zong singheng sungah kua a, laa-in innah khawi uh hi. Tuate zong a zu kinenam mah ahi hi. Tunpi, ngalthen pen a no kine hi. Tua khuai a mute in lopadawn tumzial vilvel a, ciangkang khattawh kawksakin ciamteh hi. Kuaman suksak ngamlo hi. Khuaino pen Khuado-hunin taksa-in pikim a, neektak cing mahmah hi.

Khuaihawite in lakleh aih thuah thei uh hi. Khuai-aite asih ciangin siluangbawk thote pen khuai in bengkhiat sak hi, ci uh hi. " Kha kapham ciang vaitho hung ding vahkhuai nangma thu hi aw," ci-in Khuaila nangawnin nei hi.

Khuai-ai nuamte in Khuado Dai-an bawlni ta-in khuaila uh hi. Khuamial khit ciangin kilangam panbek hi. A ainuam aa khuaila ahihleh, khuang,zam, daktal phiit, leh Khangno Taangsuak ding honkhat tawh kuanpah hi. Khuaikhau ci-in khauhual saumahmah pua uh hi. Khuangmai aa daktal tumpa, zaamzawngte leh khuangtumpa longal khuaikhau lenin pai uh hi. A kihalna kibangin len uh a, a khut langkhat ah meilah dekim uh hi. Guideudeu-in meide-in pai uh hi. Phiitlem kawmin khuang leh zam tawh innlamzuanin ciah uh hi. Khuasung gamlum suah mahmah hi.

Inn ngakte in zubeel gual aa, tuileihsa-in nangak uh hi. Zu taksa pawlkhat zong taubeelpi sungah khol hi. Khuaino puapa a mai-ah hong masa hi. Zamzawngte in zom hi. Daktal tumpa in zom leuleu hi. Tua khit ciangin khuangtumpa leh mipi in hong zom hi. Innngakte in a tungmasasa-in zu natulh hi. Inntual kimkot tuangdung dongin laamsum pimpemin laam uh hi. Zanthapai-in khangnote gualnopa tua hunbekmah om a, Khuado hun a tunkaal kingaklah mahmah hi.

Khuangtumpa mai-ah pasalno khat in daktal mong,mong,mong, ci-in ging vangvangin tum hi. Daktal-ging zaksimin Khuado kiphawk mahmah hi. Khualai-ah a veng a vengin Khangnote giahna Sawm kinei hi. A nopcipen munah kituah uh hi. Zanthapai-in Khuado-la leh Khuai-la sa in khangnote gualnuam mahmah hi. Khuasungbup gamlum hi.

Kauhawl.

Pansikni or Neekpini zingsangin kau hawl uh hi. " Dawihaang ciah oo, kauhaang ciah oo, nazun na-eek namsia ei, nani cing ei, nakha cing ei, nakhualam zuan oo" ci-in tuga heiga tawh bangsak bangkhang saatin hawl uh hi. Kongbiang a tun ciangin a tuga tawh pheiden ek mawk hi. Thau neite in thau tawh kaap uh hi.

Ih Pu ih Pate in Dawibia icih hangin Dawi hawlkhia thei mawk ahih ciangin amau lungsimtawngah dawi sangaa golzaw khat abia aa kinei hileh kilawm hi.

Lawm-an ne dingaa kikaihkhopna.

Lawm-an ne dingin mikhempeuh kikaikhawm uh hi. Abawngbawngin, a khil a khilin omkhawm uh hi. Dai-an bawlni zingtungin Uupipa or Bangkuapipa pen inntuamsa innlak sanggamte kiangah banhawh kawikawi a, thu-zasak hi. Sanggam bucingte pen nopci mahmah hi. Zing-an neek khit ciangin kikaikhawm uh a, an aneih bangbang tawiciat uh hi. Mihon tawmte in vok luangkhat a tampiante in luangnih bang go thei uh hi. Khuado-vok gul ding kiseh uh hi.

Ei Zomite ngeina-ah Zozu pen cikhum bawngnawi taangin kizang hi. Pawlkhat khaihin ne hi. Pawlkhatte pen pengbulhin ne hi. Anneekma sungteng khaihsa-in ne uh a, anneek khit gualnophun leh lasakhun ciangin beel angkuahin peengnek uh hi. A hawmmasak pen innkuan kim naungeek dongin tahn kipia hi. A nethei nailote in ama ngaih khat hawh hi. Tua pen zuhawh kici hi. Hawh cihpen ama neektangin nesak cihna hi. Amau mintapte hawhdiak uh hi. An a neek ciangin asasin sangoite kiciamkim sak uh hi. A ngahlo om hiam, ci-in kantel vilvel uh hi.

Anneek man ciangin Mokhak numeite amau-nualam ciatah ankhol-in vak tek uh hi. Nungak tangval lawmngaih neite Zawl-an kikhol sak hi. Ankhol aa vakkhiate hong tunkik hun khuamui kipan philhphelh pawl khawngin tangzang khat in beelpei sungah vut luakin dim a, innlim laizangah koihin meiphual sehin meilah vak hi. Khuang leh zam pusuahin lasak pan uh hi.

Sialsawm leh Khuado hunsungin sanggam ngaihna la, Nu leh Pa ngaihna la leh nungak tangval kilamnaihna zawlla ngentang sa uh hi. U-nau sanggam tengmah kikawi-in la kipaihpaih mai uh a, Ki-itna leh sanggam khualna khang mahmah hi.

Thang Ho leh Lian Do te hunlai-in Khuado omkhop ngeina neikhin uh hileh kilawm hi. Khuado madeuh-in Lian Do si hi. Thang Ho daihawhin pai hi. La khat suut a,

a. Do nalitlit do nalitlit e gual in kumkhua do nalitlit e [Do naliingliing do naliing ee ]
b. Gual in kumkhua do nalitlit e Do khan ah nau bang vakap ing e.

Mihing kikholhna tam leh kiphawkna kingaihna zong lian hi. Lawm-an pen sanggam kimuhna leh kikaihkhopna hoihpen ahi hi. Pakzat seemseem lozaw a, puahphat ding leh thupibawl kik dingin hoih mahmah hi. Tuhun pen omkhopna-hun haksa mahmah hi. Mikhempeuh tangpek nuam uh hi. Sanggam a omkhawm liailiaite pen a kingaite ahi uh hi.

Zomite zatdan tatdan ngeina pawlkhat.

Kawl huzaap tawh Pawi icih pen, Mizo huzaaplam aa omte in Lawmh cileuleu se hi. Zokam taktak tawh Ai kici hi. Zomi a tamzaw in Ai sangin Pawibawl, Lawmh ci uh hi. Zokam zong damdamin kinelhsiahin mangmang hi. Innthak ai cih sangin Innpawibawl ci uh hi. Molawm, innlawmh peuh cimai uh hi. Nauminphuak icih pen zong, naulawm, naupawi bawl ci uh hi. BA ai cilo-in BA lawmh ci sese uh hi. Midangte huzaap in hong zolua ta ahih manin ei kam pen a nuam nawnlo bang hong himawk hi.

Nauminphuak.

Namdangte huzaap hong lutma-in, Zomite in Nausian kici hi. Tuhun ciangin naupawi-bawl cilel uh hi. Zomite nausuah ciangin bangkua-siampi zangin naumin pen tuiphih uh hi. Pasal ahileh pianna Pu tamsak hi. Numei ahihleh pianna Pii tamsak hi. Azomzomin pasallam leh numeilam kihawm suk ngiatngiat a, khangsimna-in kinei hi.

Naumin pen Mizote leh Kawlte bangin utpeuhpeuh phuak mawklo uh hi. Minnei dingte dong masa hi. Naumin phuahna[minlawhna] ganno khat bangkua siampipa go sak hi. Tua pen inntek khawisa ganno hi hamtang ding hi.

Tuiphih ding zu beelta-in luup hi. Siampipa in phuisam kawmkawmin zu leihleih hi. Zuleihna tui kitakpei leh, hoih ei, ih nau pen cidamin mapai ding hi, ci hi. Amin pulakin zu teepin tuiphih hi. Huihlak aa kiphihkhia hilel napi, a tuiphih-pai pailo cih theise uh hi. Minphuahna ganno go mleuleu a, a sihdan akeeng kisaan keuhkeuh , a sin leh a gilzangte kilamdan enin, naungeek mailam masuan ding theikhol genkhol thei hi.

Naumin tangte in Nausiatna [nausian] ci-in ak ahi-a, vok ahi zongin ahihzawh zahzah gan khat peuhpeuh zangin antawi pia uh hi. Nausian kici omkhopna pen a nuampen omkhopnanam ahi hi. Naumin phuahna munah gamlum lua kideihlo hi. Khuang leh zam tat nuamlo uh hi. Gamlum lua leh naukhaa lau kici hi. Naupang kilatin zawngkhal aa cidamlo hi, ci uh hi. Ih Pu ih Pate pen zehtan thukhamteah citak mahmah hi. A up leh a biak khatpeuh tungah paubanna neilo uh hi.

Min a phuah ciangin numei leh pasal hangin buailo hi. Amin kilawh phetin numeimin leh pasalmin kikhen pah sinsen hi. Amau phulkhak gentheihna leh nopsaknate naumin panin kimu khia thei hi. Tuang Hau acihleh minuamsa hi ei, ci-in kimu pah hi. Vung Dah Ciin acihleh hehlehdah thuak ngeite hi, ci'n kithei thei hi. Ciin Za Khup acih ciangin numei hi a, Cin Za Khup acih ciangin pasal ahi hi. Lia leh Taang tawh buai ngeilo hi.

Naucing Guai.

Tuhun bangin Nursinghome , Childcare cihte omlo hi. Inntuancil ahi lukhatlaite in innpi leh a Pute kiang khawngah nau kha uh hi. Sanggam haute in nau thum ciang bang cing thei hi. Bawngnawi cikhum cihte kigalmuh ngei nailo ahihmanin naungeek-anin kawlkai-em leh taangzuha kizang hi. Lawki-hunin neusen aa kipan Zozuha tawh kikhangkhia hi. Zu zong munkhempeuh ah siakhin lo hi. Zangsiam leeng zatui hoihpen leh anhoihpen ahi a, khengvalzat kha leeng a siahuai pen gal leh gu ahi hi. Pilna tawh zat kul hi.

Amau hunin zuha piazote hampha kisa mahmah hi. Naungeekte cidamin dawng tiltel hi. Kawlkaipi zong anhoih mahmah ahi hi. Neu ngaihsut huailo hi. Tua bang teng tawh naucingte in nau nakhoi uh hi.

Naucingte pen zahtakin mai-et mahmah kul hi. Nau ii nuntakna buppi a cingte khutah om hi. Neek leh dawn lim zawdeuh amuh ciangin naucingte ciamsak hamtang uh hi. Naucingte zong kisathei a, khasia-baih mahmah hi. Tuhunin zong Nuteek naucing naneih uleh neuseh kha kei un.

Naucing guaina pen anlim mawkmawk tawh hithei lo hi. Saseh, ak cihbang kizang ngamlo hi. Ganpum lakah a neupen vok tuli sangin neuzaw lo hi. Naukha khempeuh kikumin thakhatin naucing guai thei uh hi. Salim pen leh zukhum pen tawh naucing kiguai hi.

Pute Tukzukholh.

Ih Pu ih Pate in zahtak-tuakte zahtak a, pahtawi huaite pahtawi uh hi. Pute zahtak pen Pasian deihna tawh kituak ahih ciangin cidamin khansau hi. " Pute leh lamphung kineh zolo" cih Paunak om hi. Naupangte a damloh ciangin Pute kiangah hawhin an kinesak hamtang hi. Tua pen gau-an kha ci uh hi. Pute kisamsia nuamlo hi. Pute tawh thu kinei nuamlo hi. Pute kikhasia sak nuamlo hi.

Khawhsa an lakkhit phetin Pute Tukzu kikhol masa pen hi. Tuhun Christian te in Thanksgiving a bawl bang ahi hi. Taangzu, buhzu zukhum pen leh aneihleh sapum zong go uh hi. Tukzu pen kiim leh paam in zong pawm a, zupinung uh hi. Zutaak [zukhaih] a, zucil kaimasa pen dawh a, inntekpu piamasa hi. A zudawn masak pen valhpah lo hi. Zutui phihin phuisam hi. Tukzu khol a tutet thupha namkim ngetsak hi. Cidamin khansauna ding, sumnu-sumpa amuhna ding, bangkua kilemna dingin ngen hi. Hih omkhopna sungah Pute pahtawina la a tampen kisuut hi.

a. Kei ka Pute sen aa ka Pute ningzu bang khum thei naleng nuampeng phuh sak vang e
b. Nuampeng phuhsak vang heisa bang paal thei naleng kapaal losak vang e.


Thang Siangh. zogampalpi@yahoo.com

BIAKNA LEH NGEINA. ( ii )

ZOMITE KI-UAPNA THUKHUN.

Ki-uapdan panmun Sehna thukhun.

Sanggam Bul-leh-Teek, Sanggam-phamawh, Tanu-tapa ci-in a tuamtuamin kizang hi. Eimun ciatah zatdan lawhdan kilamdang kha ding hi. Nalungsim mitkha tawh thubulphuh enkawmsa-in natelsiam in!

Ei Zomite pen nopna-dahna-ah ki-uap diak minamte ihi hi. Ki-uapna thukhun kiptakin kinei hi. Ahau azawng omlo-in tua thukhun in huamkim hi. Panmun kisehna omdimdiam ahihmanin, a haute khengval theilo aa, a zawngte zong tasam tuanlo hi. Ih Pu ih Pate pen thukpil mahmah mawk uh hi. Panmun kisehna banah a haute pen a pualam panin a uap tamzaw deuh uh a, a zawngte tawmzaw deuh bek hi. Hauleh zawngleh panmun kisehna bangin zuih kul a, kuamah giautaulo-in tasam theilo hi.

Hih Ngeina leh Thukhunte pen Lawki Pupate khun ahihmanin Zu leh Sakuang tawh kizui den hi. Sanggambul leh sanggamdawn zui-in zu leh sa kihawm aa abullam kihamphat hi. Gamtatna-ah zong abulte liantatin adawnte neutat zaw pah hi.

Sanggam zondan.

Sanggam a kizon ciangin nNumeilam leh Pasallam kikhaikim dingin kigual hi. Tua panmunte pen Nopna leh Dahna munah awngkhong sak lo hi. Ahihtheih keileh amau taangin khatteitei cial uh hi. Ei taang-a dingte pen Puakdawn kici hi. Puakdawnte pen eitan taang zu leh sa kipia hi.

Pasallam pan.

Thalloh or Bangkuapi pen Phungsung leh Bangkuasung panmun lakpan vanlianpen kisuan ahi hi. Nopna, dahna, kolbulh-khauhen tuak-a zumkong mangkong phutna leh tuahsiatna khempeuh thuvaanpi ahi hi. Sanggamte taangin kikham tawntung hi. Tua ahih ciangin Innluahpipa kiseh hi. Uunau sungpan luangpham ding-a muanpipen ahi hi.

Ih Pu ih Pate in Tualgal do uh hi. Khat leh khat Phuu kila uh hi. A sanggamte Phuu a ladingin Uupipa sang-a, muanhuaizaw omlo hi. Kolbulh khauhen tuak a om ciangin suut' hi. Leiba alohzawh keileh lohsak hi. Zi-leh-ta leisak hi. Innsia-losia vaanin puahpih hi. Thusia-thupha hawmding geelding khempeuh pen Thalloh or Bangkuapi lo-in kikhensat lo hi.

Zinkhak kici Sanggam nihna.
Zinkhak pen Thallohpipa zom ahi hi. Sanggam nihna zong ci uh hi. Sanggam naipente lakah a muan pen khat kiman(kiseh) hi. Thallohpipa vangik lua ahih ciangin a puakpih dingin Sanggam nihna Zinkhak kiguang ahi hi. Hilh ding, gen ding leh thuzaksak ding khempeuh aman vaan hi. Khual leh tual pan hong pai ahi zin-leh leengte zintun sehsak hi.

Tanupi, Haitawi, Tuitak.
Innsung Tanupi or Tuitak or Haitawi pen Tanu mokhakte sungpan ahaampen mah kiseh hi. Tua ahih ciangin Tanupi ci uh hi. Bangkuapi-thoi or Innsungpi-thoih or Pusa-toih ciangin Siampipa tuiphih ding zu taksak ahih ciangin Tuitaak kici hi. Tulpipa haikeu tawi sak ahihmanin Haitawi zong kici hi. Amah pen Nopna-dahna nasep ding khempeuh vaihawmpi hi-a, Managing Officer tawh kibang hi.

Tanu-nihna, Sawlla, Tanu-nauzaw.
Tanupi tawh kibangin seemkhawm uh hi. Mokhakte sungpan ahaamlam mah kizong hi. Dawipi or Innsungpi thoih ciangin sagolhna ding sialsawlmaam leh Nuhdo-song aa suan ding sawlsan hiang bawk laa ahih ciangin Sawlla kici hi.

Hih Tanupi nihte in innsung nasep khempeuh buplak ahih ciangin vangik mahmah hi. Sihna-ah dammawh agim aa kipan a-zun a-eek siak sak hi. Siluang a paikhiat mateng tenpih hi. Tanu-khak kici tanu-nautaangte nasep hawmsak a, khut kilenin seemkhawm uh hi. Tanu-nihna pen Work-supervisor tawh kibang hi.

Sanggambul-thumna, Beh-sabawl.
Behsung aa sanggam muancing khat kiseh hi. Nopna-dahna munah ganpum zat a kisapleh aman a ngah nadingin vaan pah hi. Thallohpa sawl bangin sa semin hawm hi. Thukhun zui-in sa asemtheih keileh asiam cial hi. Zomite Ngeina sungah Panmun zui-aa sa kihawmte pen atheepdeuh, a vodeuh ki-encik mahmah hi. A sasaan ahoih keileh kinolh thei hi. Satahn anolh ciangin ama panmun zong nolh hipah hi. Deihsak leh deihsaklo pen sasem hoih leh hoihlo tungpan sittel uh hi. Tua ahih ciangin sasemte siam mahmah kisam aa, kidop mahmah zong kisam hi.

Behthusa.
Innlak sanggamdawn khat kizong hi. Buaihunsung lai-aatpi-in kizang hi. Sanggam Bul-leh-teek kisehna ciamteh hi. Nopna-dahna hun-a ki-uapna sum leh khuttawi khempeuh ciamteh hi. Leengla phazah, sum ngahzah, an kingahzah, zubeel phazah, cikhum bawngnawi kipia khempeuh ciamteh hi. Zubeel pai khempeuh sangkhia-in a gual khit ciangin zuleih hi. Niangtui zatna munah niangtui awm hi. Innlam ciangin innkim innpam aa ninpa nahtak kinusiate phiatin puahsiang hi.

Numeilam pan.

Sunghpi.
Numeilam panin Bul-khatna ahi hi. Ih Zi hong paikhiatna bangkua bulpen kizong hi. Numeilam panaa thukuppih a lianpen ahi hi. Ih Zi sanggam lakpan a haampen kiseh hi.

Sungh-sabawl.
Beh-sabawl tawh a kibangin seemkhawm uh hi.

Nuphal.
Nuphal khempeuh pen sanggam gualna sungah kihel lo hi. Phamawh om ciangin Nuphal dinmun khat kiguang hi. Zawl tawh a tatna uh kibang hi. Ton-zupinun ciangin Zawl leh Nuphal in Antawi piakhawm uh hi. Sih ciangin mipi heu sungin amaute nih in innteek tutpih hi. Sigui khit ciangin mipi sigalte pen inn aa ciah tawh han pai tawh, kikhenthaang ahihmanin, innteekah kuamah omlo hi. Sinung ci-in Paunakin kinei hi. Tua hunsung teng Zawl leh Nuphal in innteekte zupeng kiciampih aa, hehnepna-in dahla sutpih uh hi. Si nungah latung leh lagualnuam khawng sak luanluan kideihlo hi. La-awi tawh aw damkaihin sa uh hi.

Zawl pen neulawm ahi khangual ngaih khat kiman hi. Ton zupinun ciangin sial gawhna ding khau kiheek sak hi. Songsuite tawh song nuai-ah Ailawng-to in zanhak uh hi. Zawlngawng kici-in sial ngawngsa kipia hi.

Hih sanggam Bul-leh-teek panmun pen a khang khangin kikhel suksuk hi. Hih Thukhun pen Pupa Ngeina Lawkite hunin muibun mahmah hi. Khangmasa Zomite thukhun pen kician sinsen a, Tapidaw kici Christian hun nangawnah kipaisiang theilo hi.

Ki-uapna Thukhun Puahphat huai.

Ki-uapna thukhun pen Zomi Lawki-hun tawh kituakin kilawm ngiaingiai mahmah hi. Ahi zongin tuapen leitung dang tawh kizoploh hunlai ahi hi. Bangzahin hoih taseleh ahun paizia tawh a kituak keileh laihding puahding hito zel hi. Ngeina hi ci-in puah ngei kei mawk leng, savun umlui sunga leenggahtui-thak thun mah bang ding hi. Khuazing leh khuavak koihkhop bang ding hi.

Christian Biakna leh Lawki Pupate thukhun pen kituak taktak lo, lah kipai siang theilo khatin om nemnum hi. Puahthakna thukhun kician omlo ahihmanin minamdangte ngeina in hong huzaap zaw a, tua bangin kipaipai lel hi. Ngeina amanthan ciangin minam zong alangtaang a mang khin ahi hi. Kampau mangleh minambup mang ahi hi.

Tua ahih ciangin Christian-hun zui-in Ki-uapna puahphathuai kasa hi. Pupa Ngeina pen Lawki-hun tawh kitangaih mahmah hi. Si-leh-sa kizoppih sanggam honkhat ki-uapna ahihmah bangin, muhna toisak thamlo-in minam itna zong toihuam lua hi. Kiim leh paam tawh kimuhna ding lampi tawmlua hi. Beh-leh-phung min bekmah tawh minsialin lei kituantuan a, minambup aading khualna om nawnlo hi. Minam nangawm ihmi-ihnam ahilam kiphawk lo hi.

Hih khang pen min mai-ah Behmin suanhun hinawnlo hi. Gambup minambup khual hun ahi hi. Min mai-ah Behmin suan pen khialhna omlo napi, lungsim huamkhak tawmlua ahih ciangin, minambup makai dingin lungsim picing keileh kilawmsak hi.

Hunlui ki-uapna.

Sanggamlam Numeilam
1. Thalloh 1. Sunghpi
2. Zinkhak 2. Puu
3. Tanupi-Tuitaak. 3. Sunghsabawl
4. Sawlla, Tanu-nihna 4. Vengthusa.
5. Beh thusa. 5. Nuphal.
___________________________________

Hih a tungaa bangin i ki-uap-a, agalva aate tawh kisukkhakna om nawnlo hi. Zomite thukhun pen Lawki-hun aadingin pauban omlo dongin hoih napi, gamlian, namlian, miphunglian suahna ding nakpi takin hong dongkholh leuleu hi. Anam-anamin, abawng-abawngin akhil-akhilin hong koih hi. Minampi lungsim, gamlian lungsim hong paihkhiatsak ahihmanin Beh khat leh khat kidem ki-elna tam a, gambuppi kithutuahna leh kikhual kikepna thakiam hi. Ih do ding Gal kido lo-in ei leh ei kido-in nitum den hi. Lampi-thak zonhun hi.

Khangthak Zomite.

Beh leh Phung ki-uapna pan khua-leh-tui ki-uapna ah, khua-leh-tui ki-uapna pan gam-leh minam minam ki-uapna-ah, i kalsuan kul ding hi. Nopna leh Dahna munah sanggam uu-leh-nau pen pau kullo-in kidelh lel hi. Ki-uapna pen khuapiliante block in khen a, khuaneute pen khuabupin vaihawm huai hi.

Sihhun aading.

Zomite ih nat ciangin Tanute in suntawh-zantawh giahdenin ki-ompih hi. Tuhun leuleu mipilgamte-ah dammawh nai-ah mi-cidamte kinehsak lo hi. A kilawhthei natna ahihleh Zato ahzong kihawhsak lo hi. Cina anpiak-hun, zatui suthun leh kisilhunin kidalna zangin cina keem uh hi. Cina kualpihpih lo hi. Asih ciangin a votdei sungah seng pah hi. Cina adam ding a thupi zahin cidamte natna a ngahloh ding zong thupi hi.

Ei kiangah tua bang taktak ding haksa lai hi. Ahi zongin misiluang sawtvei tutpih pen lauhuai mahmah hi. Kawlte asih ciangin singkuangah guangin apua-ah koihkhia pah hi. Ei Zomite in tua bangin kihih nuam phalo hi. Ahih hangin siluang paihding pen Innteek donglo-in Hausa te leh Pawlpi-uk siate kikup ding ahi hi. Nattom a lauhuai pulnatna hangaa si ahihleh manlaang takin paih ding ahi hi. Natsau sihngeina ahihleh zankhat or sunkhat koih hang phamawh lo hi.

Misi tungtaangah hunzat pen Pawlpi in zang henla, sigui nasep tuamtuamte pen Khangnote aa hisak leeng, Pawl deidan omlo, Beh leh Phung deidan omlo, khua leh tui ki-uapna suak pah lel hi. Meigong tagahte zong dongtang tuanlo hi. Kuakua a si zongin Veng-Khangnote in singkhuah khatciat, ci-al,antang piakzawh bangbang dong ding uh hi. Ki-uapna pen a zawng a hau kilamdang se lo hi.

Khuasungah lukhat damlo lokho zolo a om ciangin Khangnote nikhat vakuan leh a lo zawhsak pah a, thakhatciat kigawm khawm hi-a, kuamah thazaang tuanlo hi. Innteek aadingin kumkhat sepding pen nikhatsungin kizo a, nasia mahmah hi. Mikaangte in, "Unity is Strength " acih hibang munte ahi hi. Mimalte kipumkhat leh khuasung kipumkhat hi. Khua khempeuh kipumkhat leh gamleh-minam kipumkhat ahi hi. Minambup kipumkhatna pen khuasung pan kipan hi.

Tua ahih ciangin sanggam ki-uapna pan Veeng ki-uapna, Veeng ki-uapna panin khua leh Tui ki-uapna, khua leh tui ki-uapna panin gam leh minam ki-uapna dongin Ih khantohna dingin ngaihsunin geelkhawm ni.

Thang Siangh. zogampalpi@yahoo.com

BIAKNA LEH NGEINA. ( i )

ZOMITE SANGGAM KIM LEH PAM KIZOPNA.

Mihingte mimal khatleh-khat kizopna kammal.

A kihonkholh ganhingte lakah ahonlian pen mihing ahi hi. Ganhingte zong amau ngeina ciat utawh kizopna kammal nei uh hi. Kizopna a ol theihna dingin mi khempeuh min khatciat kivawh hi. Pahtawina, zahtakpiakna leh itna lahna tawh kihopihna min zong a tuamin kiguan hi. Tua pen Minno kici hi. Mimal in ih tuamneih min leh kinaina zui-a kihopihna min om hi. Tua min leh kammal tawh khatpeuh hong paukhiatleh amah kihopih ahihlam kitelpah ahihmanin thudonlo cih om thei lo hi.

Mihingte pen pilna leh thukhualna tawh kidim-a, Pasian lim suun ihi hi. Minmal aa kihopih sangin tua min sang-a khumzaw khat kizangleh, lungkimna, kinaina leh ki-itna khangsak zawse mawk hi. Tua ahih ciangin mintak tawh kilo lala lo zaw-a, pianna sisan kinaina zui-in minno kiguan hi. Tua minte in ei bangzahin kinai cih, hong lak pah hi.

Min pen mipum taang-a ding hi-a, khut tawh kilawn kulse lo-in, tua min kilawh simin a neipa nalawngkha pah lel hi. Kinaina zui-a kivawhmin a zangsiamte pen mipil thukhual kici hi. Ki-itna khangsak bek thamlo-in kilamnaihna hoih piangsak hi. A zangsiam khempeuh tungah itna leh pahtawina kipia hi.

Tua minte pen.

Puu, Pii
Puu pen lakam tawh Puvon, theisen puvon, cih bangin kilo hi. Pii pen Pisei kici hi. Ih Pa pianna Pa leh amagual khempeuh Puu kici hi. Tua mah bangin ih Pa pianna Nu leh amagual khempeuh Pii kici hi.

Tua banah ih Nute pianna sanggam pasal khempeuh zong Puu mah kici hi. Tua pen Numeilam or Sunglam pahtawina leh pahtawina ahi hi. Puu icihte Zi khempeuh zong Pii kici hi.

Zomite in leitung ulian zahtakhuai khempeuh Puu leh Pii ci uh hi. Ukpi lai-in Sukte khempeuh puu leh pii-in kiho hi. Department ulian khempeuh zong ama khutnuai khempeuh in Puu ci uh hi.

Pa, Nu.
Ih pianna Pa leh ama sanggam pasal khempeuh leh khang kibang pasal khempeuh Pa kici hi. Ih pianna Nu leh ama sanggam numei khempeuh leh Pa a kici khempeuh ii Zite Nu kicikhin siksek hi. Lakamin ih lawh ciangin, Zuapa, Khang zuapa, Zuamang cih bangin kizang hi. Nu pen Tuun, Nutuun, Tuun cih bangin kizang hi.

Munkhat khatah zatdan neukhakha kilamdang thei hi. Saizaang tate in Nupi, Papii acihleh innkuanpih neisa numei pasal gennuam hithei hi. Pa unau lakah khanghampen leh Nu unau lakah khanghaam pente Papi, Nupi mah kici veve hi. Pa unau sung-a uupen zi zong Nupi mah kici hi.

Gang, Ni.
Gang pen lakam tawh Gangzuapa kici hi. Ni pen Ninu, Senninu kici hi. Beh sung-a piang ih Pagual khang kibang sanggam numei khempeuh Ni kici hi. Ni icih khempeuh pasalte Gang kici khin siksek hi.

Uu, Nau.
Lakam tawh Uu pasalte pen Ciinmang kici aa, Uunumei ahihleh Ciinlianu kici hi. Ei sang-a khangham zaw khempeuh numei pasal deilo-in Uu kici hi. Ei sang-a kumtawmzaw sanggam laizomte bek Nau kicithei hi.

Tu, Ta.
Ei bangkuasung pan-a paikhia numei suan khempeuh Tu kici hi. Ei sung-a piang tate suan-leh-khak khempeuh Tu kici hi. Lakam tawh Sawn, kici hi.

Eisung-a piang khempeuh Ta kici aa, lakam tawh Von, Vondeih, Vonmom,cih bangin kilo hi.

Nuphal.
Ziite sanggam numei khempeuh leh amau pasal khempeuh Nuphal kici hi. Sanggam Bullehteek gualna-ah zong Nuphal panmun khat kiguang hi. Nopna dahna munah Nuphal pen panmun poimawh khat ahi hi.

Mak, Sungh.
Mokhak numeite pasal khempeuh pen Mak kici hi. Ih Zi pianna leh hong paikhiatna Bangkua pen Sungh kici hi. Pasal pen Sunghpa kici aa a zite pen Sunghnu mah kicipah hi. Sunghpi pen Numeilamah Sanggambul pen ahi hi.

Hih minte pen bangzahin khang kilamdang taleh kikhello, kilaih theilo hi. Zomi hi-a Zokam ih pau laitengin kikhello ding-a kipuah theilo ding hi. Hoihtak aa zangsiamte mihoih mipha-in kimu ding hi.Midikte zat ahi Ngeina-hoih ahi hi. Zomi suan khempeuh in a theihna dingin muam ni.

Thang Siangh. zogampalpi@yahoo.com