PU. TUN THUAL KHANSUNG TAANGTHU.
A pa Ngam Cin thu.
Pu. Pau Khawm in tapa 6 nei hi. Ngam Cin pen ahihna ahi hi. A uupen Thawng Tun hi-a, Pu. Thuam Thawng tamsak hi. Ngam Cin in ama-pianna pu ahi Tuang Ngam tam hi. Pu. Tuang Ngam nuntaksung pen Minlawhna Sukzotu kizang a, a tate khangin Vanlaitu tawh Minlawhna zang uh hi. Sukte Innpi pan a kikhenkhiat khit uh hangin sanggambul-in kiman veve a, zubeel-ankuang kizopna tatsat lo uh hi. Ki-itna kiamsak lo uh hi.
Ngam Cin in tapa-4 aneih sungah Pu. Tun Thual pen anihna ahi hi. Pasal ngalhaat mipil mitei mahmah khat hi-a, Sukte bangkua leh Phiamphu bangkua sungah khutzat thudotpi-in nei uh hi. Ama khansung a pa Ngam Cin innsungah gamsamui innsamui nam tawntung hi. Inntual meikhu tawlnga lo hi. Khuang leh zam ging kitatsat ngeilo hi. Khiatna tawh kidim la namkim kisakna innpi kici hi.
Pu. Tun Thual pen Ngam Cin leh Ngai Khawm tapa nihna ahi hi. A suahni kiciamteh lo hi. Aman tapa-4 leh tanu-8 nei hi. A zimasa pen Malneute Vung Khawl hi-a, a zinihna zong Malneute mah Song Tel tanu neupen nihna Niang Ngaih Khup ahi hi. Amasa tawh tapa khat leh tanumei nih nei hi. anihna tawh tapa-3 leh tanu-6 nei hi.
A Masate.
1. Chin Dal. ...Ngam Cin tam.
2. Khawm Khua Zam....Ngai Khawm tam.
2. Awi Khua Hau...Thang Awi tam.
Anihna tawh.
1. Lang Man... Awi Lang tam [ A nupii]
2. Ciin Za Gin...Neem Ciin...[ appi]
3. Vung Za Tung... Khawm Vung tam.
4. Thang Siangh... Song Cin Thang tam.[ apano]
5. Cing Khaw Lian... Tel Don Cing tam, [ ani ]
6. Lang Sawm Lian...Thawng Lang tam.
7. Thang Don Hau... Awi Za Thang tam.
8. Lian Za Don... Khual Do lian tam
9. Vung Ngaih Lun...Don vung tam.
Tun Thual minthanna leh tungtuanna.
Leitung galpi nihna WWII hunsung pen Pu. Tun Thual ngalhaat laitak ahi hi. Mikaangte in Japan gaal nanna dingin Sukte Independat Armies ci-in galkap dong uh hi. Amah zong galkap tum hi. Mikaangte kibuphualna ahi Takzaangah thu kikupna nei uh hi. Mailam kalsuan zia ding kikupna ah, Pu. Tun Thual taangthu hibangin ciamteh uh hi.
" At the meeting at Takzang Headquater to discuss future objectives, Tun Thual of Kapteel made this proposal: ' Now we have initiated the plan to raid the Japanese posts and drive the Japanese from all the Tedim area, will it be proper to name this movement after this territory ( Suktegam) and call it Sukte Independent Army was unanimously adopted. ( Meeting July14, 1994)
KEELY'S BURMA CAMPAIGN letters from Chin Hills by Desmond Kelly.
Mikaang kumpite in Japangal hunsung Intelligence in zang hi. Japan mangpa Tedim hong tun ciangin, hiamgam lua ahihmanin kilau mahmah hi. Manghawkpa kici hi. Keituine bangin a lauhuai theithei-in kigen hi. A zumah Tun Thual sam hi. A namsau dokin a maitangah a tunglamin taatsek a pheilamin taatsek in thahdingin thusit kawmkawm hi. " Na nasep bang hiam" ci-in dong hi. " Keipen mikaangte intelligence hi ing. Nang, thatnuam aa kong zonzon pen tun hongmu pan kahi hi. " cingam mawk hi. Manghawkpa inzong lamdangsa aa salgega in en a, " Kei, kei, hong kihta lo na hiam? " acih ciangin, " ka nasep hiven, nang naseem lengzong tuamah bang ding hing" ci-in dawng hi. Japanmangpa in " hipa pen pasal taktak gaalhang khat hi, ci-in khahkik bilbel hi. "Tu-in vaciah phot inla, kong sap kik ciangin hong that ding hing," ci-in vaikhak hi. A sidingin hong paikik ken , cihna ahi hi.
Mikaang kumpite in minphatna tampi pia hi.
* Homeguard Lt . Tun Thual [Bawknih] pia uh hi.
* Dangkapi khat.
* Medal minphatna thum.
* Mikaangthau khat.
* Ngunnaam khat. ngah hi.
Bawknih a ngah ciangin laphuak hi.
a. Koliang paksil in zem ing e, tumtaipaal katuangsak e.
b. Duangah zamzo kakai sak a zatan banzal aa bia ee.
Laisin ngeilo mikhat aadingin kisaktheihpih huai mahmah hi. Supply Store officer a seplaitakin Japangaal veng a, Mikaangte ciahkik uh hi. A van khempeuh puakhinzo lo hi. Dangkatang Ks4000/- nei hi. Tual hunin Ks 100 pen dangka tawikhat kici hi. Dangka tawikhat neite leituanin minsial ngam uh hi. Taanglaimi khat hihna tawh nei kisagawp a, a kiamkik theilo dingzahin kingaihsun ngei hi. Laa, sakol tampi leh saseng, sakol tutphah hoih mahmah tampi nusiat hi. Van nengneng pen genvet hilo hi. Economic pilna omlo ahihmanin keem theilo a, thelthang mang lel hi.
Kawlgam Independent khit ciangin Khamtungah Pha-sa-pa-la leh CNO party kidem uh hi. Ukpilui ahi, Sukte leh Sihzanglam kikopin Pha-sa-pa-la pawm uh hi. Nautaang a tamzaw pen CNO lamah thahaat uh hi. Pu. Tun Thual pen Sukte bangkua tawh khangkhawm ahih ciangin, Pha-sa-pa-la lamah thahaat mahmah hi. Tua laitakin Party Advisor ding kiteel a, Tedim gam panin, Tun Thual, Thang Suak, Hau Za Lian tua thum teelkhia uh hi. Pu Tun Thual in laphuak a,
a. Zangkhen kawlciang ih tawi tek a, ei an sangphung khen aw e..
b. Gual tawh tongdam ih lel tek a, ei aa vaizua pan dong e...... naci hiau sam hi.
Athat-amante lakah
Ama khansung pen athah-amat kidemhun kheng nailo hi. Tua laitakin khuasungah amah demzo omlo hi. Gaal-ai Sa-aite in Gaalzu-Sazu a luup ciangin zuu kileepsak hi. Zuleep cih ciangin a cilpen kinesak cihna hi. Tuahun pasal ngalhaatte kipahtawina leh kidemna hi-a, midangte nuai ah om ngeilo hi. Nidanglai-in, saminthang acih ciangin sahangnam kamkei tungsiah, vom, ngla, sazuk,saza, sai, zangsial, cinghpi leh vasanamte lakah vaphual, mupilian, siahnial namte thupisak uh hi. Tua sanam khempeuh a matloh omlo hi.
Hanla sa theilote pasal kicianin simlo uh hi. Khanglui pasal minthang pasal pilte kapnuamlo uh a, a kah tangin hanla[dah hanla] minlo-in kitomzaw semawk uh hi. Hanla sasiamte pen pasal simthamcing ciamtehna namkhat ahi hi.
Ama hanla pawlkhat, zangsial amat ciangin,
" Thawm ii sawmsial hi e, a tatna ee zangtui tualnuam ee, simlei gaalkhua a dakna thangvan lemmual saang hi ee," .... ci hi.
Sahang amat ciangin,
" Lentu sanglian ee, alet ee hong ki thangvai ciai e, a let ee hong ki thangvai ciai e, oi kanu kapa tho rawh tho rawh sang minthang tuang hong tung ee eee." ci hi.
Khangluilai-in samante in mualah meikhu masa uh hi. Gamkuan saman om ei, ci-in thei pah uh hi. Thau lawngkhat lawn masa hi. Mikhempeuh khuadak khia ta ding hi, acih ciangin, bang sa man, atheihna dingin, saminlawhna hanla samasa hi. Vom amat ciangin, " Vombuai ee," kici hi. Zuksa ee, zangsa ee, ngalpa ee cih bangin kilo se hi.
" Zangsa ngalpa e a let e, a haapha e, a let e, hong kithangvai ciai e, taangin e a lungduh e, a luthawn tawh katung e," kici hi. Tua khit ciangin minlawhna ci in, samanpa min leh a Behmin kilo leuleu hi.
" Tak te, tak te, Kapteel aami, Kapteel aa mi, Vanlaaitu vanlaaitu, Tun Thual takte Tun Thual tak te," kingiatngiat aa kitel khial lo hi.
Pu. Tun Thual pen gaalman saman bek siam hilo hi. Leitungthu ah zong theihna muhna zai mahmah hi. Nainganzi uk mahmah aa gam leh minam khualna nei hi. Laphuak siam hi. Ama laphuahte pen saknuam a, a la in bunmahmah sawnsawn hi. Thu in la hi-a, La in thu hi, acih mah bangin, ih Pu ih Pate in thusaupi gentangin la dawngkhat tawh suziau uh hi. La leh thu pen kikhen theilo hi. Lungsimpilna, hanna, samat siamna, laphuahsiamna namkim tawh kidim pasal minthang mahmah khat ahi hi.
1980 kumin Kale township Chanthagyi khua ah hong nusia hi. A tu Thang Siangh tapa thumna Tung Khan Lang tawh kiphum khawm uh hi.
Phungsung buaina.
Tapidaw kici Christian hong khang hi. ABM kici American Baptist Mission te hong tung masa uh hi. Pu. Pau Khawm tate lakah a neupen nihna Pu. Khoi Suan in napom masa hi. Tuahun sanggam kizopna pen zubeel-sakuang mah kici a, Tapidaw hangin sanggam kizopna tampi thakiam hi. Pupa ngeina sungah Christian kipakta lua lo mawk hi. Christian ten zong Lawki elbawl in haimuh pah uh hi. Lampi nih pawlnih in paipai aa sanggam innkuan zong kikhenkham hi. Lawki pen vangik lua kisa ahihmanin damdamin thakiam tektek hi.
Tua laitakin Pu Tun Thual pen Lawki sungah lungkip mahmahlai hi. Nainganzi party ah zong Sukte tawh ki-aihual zaw hi. Pu Khoi Suan pen Christian bek hilo-in CNO party lamah thahaat hi. Utna kibanglo pasalpil nih Behsungah om ahihciangin deihna kikhat ngeilo hi.
Pu. Tun Thual a vaangphat laitakin gamvakleh sa luangkhat tawh ciahlo-in omlo hi. Khatvei beek guaksuak ngei zen lo hi. Gamkuan ding a sawmsimin a zuinuam tammahmah hi. Nikhat a pano Vial Khua Tuan in zui hi. Tuani sese-in sahang kamkei khat tuak uh hi. Tun Thual in kaap a sipahlo hi. Tawlpikhat kilai niloh uh hi. Mipite mai-ah kikhamin sahang tawng hi. Kigual dimdiam a, a nunungpen ah a pano omsak hi. Sahang in a mai aate bawh lo-in a liangkotung siikin lengto a, a nungpek aa om a pano Vial Khua Tuan mah bawh vanvan mawk hi. Tun Thual leengin sahaang ngawngzangah luai a, a kamsungah a thaulawng thusukin kalgawp a, tua ciangin thatzo bek uh hi.
Pu. Vial Khua Tuan liamsa-in inntun uh hi. Sahangmat hang aa hanlasa aw, a liamte kahtawh aw, ciak kheukho uh hi. Tedim Zato puak uh hi. Kamsia tuak hang cilo-in a pano Pu. Khoi Suan ki hahiamsakin , " Tun Thual sakaap peh hi, " ci-in heh ngiau hi. Tun Thual in, " Ih Pa kibawlna sumbei teng ken hong si ning," ci-in kamciam pia hi. Zato a tuah ciangin a kibawlna tengbek thamlo-in innlak sanggamte vehna khempeuh tawh Pu Tun Thual tungah siik uh hi. Tun Thual in, " Ih Pa it aa navehna uh keitawh bang kisai hiam? zatui kibawlna teng simloh keitawh kisai kei, " ci-in nial hi.
Tua ciangin a pano Khoi Suan in pawlkai-in nasia takin phungsung buaina hong piang hi. Ngam Cin suan khempeuh tawh zubeel-ankuang kizom loding ci uh hi. Beh sungpanin nilkhiat sawm uh hi. Tun Thual in, " Beh icihpen, sisan tawh piang hi. Kimak theih zong hilo hi. Ken kasanggam ma ngei kei ning. Ka Behmin lah pai ngei kei ning. Sanggam ma cihpen muhtheih muhmawh in hoihsa lo ding hi. Na en un, suhawm-sahawmna ah hong nawlkhin simin kihilna khat peuhpeuh hong piang ding hi" ci-in thuhilh hi. Behma sanggam ma cihpen kamsiathuai mahmah thu ahi hi. Pu Tun Thual zong lungsim hehnepna lakhat phuak hi.
a. Kei zong laizom kasel liang diam, gam phuigua zong phung nei e
b. Gamphuigua zong phung nei tah a, gamtulta zong hiangzau ee....ci hi.
Khangluilai Lawki hunin sanggam makna pen zubeel ankuang kizoplohna bektawh kician hi. Sahawmna leh zuhawmna omlo-in ama ahi a, sanggam aa a man ahizongin kipsakna kitelzo lo hi. Sakuanghawmna khat a omna dingin Ngam Cin laizom Ngaih Suan Tongsak uh hi. Amaugeel pen laizom ahihbanah inn kizom hilhelin teeng uh hi. Ngam Cin kongnuai ah Ngaih Suan teeng a, innkadawn panin kihopih thei uh hi. Tonzo dingin Ngam Cin suante beng kikeuhlo uh hi.
Zupinun Pansikni-in Ngam Cin pen zubeelta angkuah a, nilum elkuahsa-in huansaklam nga-in tu hi. Tonzo a nawksuk anawkto khatbeek in hopih lo uh hi. Tua ni mahin Pu Tun Thual sabengin kuankhia hi. Vompi lian mahmah khat leh sazuktal khat man hi. A pa, Ngam Cin lungleeng khuangai aa a omlaitakin khuamualah thau lawngkhat hong ging a, " Vombuai ee, alet ee alet ee , a haa pha e, lentu sangmang tunnu hi e, zuapa aw hong muak aw, tunnu aw hong muak, tun aw ningbeel nagual ve aw, zua aw hanzai nasa aw," ci-in thau kilawn hi. Hih saman a kuapen ahia, acih laitakin," Tak te tak te Kapteel aa mi, Kapteel aa mi, Vanlaai tu, Vanlaitu Tun Thual tak te" a kicih mawk takciangin, Ngam Cin bangkua aa piang tanukhakte leh innlak sanggamteng amau bawng tengtawh kihawkin innah zunungin luumpah dimdim hi. Khuang leh zam tatpah ziah ziah uh hi. Tun Thual in la hong gen a,
a. Zua heh khuankhi kanulna di zonundawng vahong ing e.
b. Zolawkta bang a taupih din sang aw naphung mang lang e.
a. Singtan khavang el laitak a, sangmang hong zing zin aw e
b. Sinlai taang bang nat laitak a, tuah aa ciam tazen aw e
Tuahun aa amathuak lungsim gimnate kangaihsut ciangin kangaihsun zo kei hi. Ahih hangin Asiam in lungkiathun a tun ciangin kihilna khatteitei tawh thakhauhsak zel hi.
Tun Thual muhdan leh Ngaihsutdan
* Beh leh Phung cihpen mikhat tuamneih theih hilo hi. Ei ngaihlo peuh nangtawh kibeh kei ni
mawkcih theih hilo hi.
* Ih ngaihlohte ankhing tuibuuk kitan thei a, Beh leh nammin pen suhkhiat mawk theih hilo hi.
* Beh leh sanggam pen si leh sa tawh piangkhawm hi a, Pathian bawl ahi hi.
* Sanggam makding hanciamte in Pasian nasep a phial ahihmanin a tawntungin daupai lo ding hi.
* Puansilh niikten kilaih thei hi. Zi kima thei hi. Sanggam kima theilo hi.
Pilna neite khuaksiangthote muhna pen thukmahmah hi.
Thakiathun leh kiamsang manawh.
Pu Tun Thual in ta-3 aneih laitakin a zi khuai hi. Zikik neih kul hi. Ei Zomite ngeina ah zikik neite pen nautumpen dinmunah kikoih a, neu mahmah hi. Tu-in nauzaw dinmunah tungkik hi. Aneihsa khempeuh tungah thu neinawn lo hi. A ta upapen Chin Dal thulo-in ama vaihawmtheih bangmah omlo hi. Chin Dal pen muhna theihna tawmlai ahih ciangin, neihsa kepdan ding mubanvet lo mawk hi. A palamsa sumnu-sumpa khempeuh thelthang gai hi. Nakhempeuh laklawh takin om a, neihsa lamsa khempeuh palau gai hi.
Chin Dal pen suanginn hoihmahmah sungah om hi. A pa Tun Thual pen zo-innpi lui mahmah sungah taneu 9 tawh om hi. Nuntak masuan khempeuh a tawpanin patkik kul hi. Amah thakia khinzo hi. A letding sumtang neilo hi. zontawm tawh taneu tuazah vaak dingpen thu-ol hilo hi. A thakiasa mahin palik lutkik hi. Tua hunlai-in palik lut zong ol tuanlo khong hi. Kumpi naseem khat ngahding ollimlim lo hi. Pu Thawng Cin Thang huhsa mahtawh palik tum thei ahi hi. A tate kawlbuh leh ngapiktui tawh hong vaakzo veve hi. Hauhna liatna thupina omzo nawnlo a hizongin bi-innsia mahmah nuai-ah buhsih leh ngapiktui tawh a tate vaakzo hi.
Palik a omsungin, saza, sakhi manman a, a vunte tutphahin bawlin, kuamah neihkimloh tutphah kicingtakin kanei uh hi. Ciingpheek hoihmahmah kaneizo uh hi. Um leh kuangkeu kicingtakin kanei uh hi. Palik hong tawp ciangin teekluata a, genthei takin lokho hi. Anneek tuidawn silh leh ten taangsapnate nakpi-in thuak hi. Nidang aa kipahtawina munah gensiatna leh simmawhna, itna leh ki-aangvanna munah muhdahna leh mawhsakna, kisaktheihna munah maizumna leh zahlaatna in hong luah hi.
A zikik Niang Ngaih Khup tungpan.
Tun Thual zikik pen Malneute Song Tel tanu Niang Ngaih Khup ahi hi. Tanu-tapa 9 nei uh hi. Tamasate tawh innkhenin a om ciangin, logam khatzong minvawh lo uh hi. Taubeelsan lui mahmah khat, danbeel tulmahmah guai linglung khat, zokuangpi khat nei hi. Ahih hangin zothau lawngkhat, mikaangthau lawngkhat bel ama khut tawh kipelh ngeilo hi. Tua thaute tawh gamkuanzo nawnlo hi.
Lawkite in an leh zu a kikimin zang uh hi. Nopna leh dahna ah zu kizang hi. Zing-an nitak-an tawh zu kimeh tawntung hi. Tuhun cikhum bawngnawi zat bangmah ahi hi. Gualnopna ah zu, hehna dahna ah zu, gilkial dangtakte anmanlaangin zu, zu bekmah tawh kinamtak uh hi. Zukhum neite kipakta a mite lakah maingal mahmah hi. Niang Ngaih Khup zu pen khum tawntung hi. Zununna munah Niang Ngaih Khup zu, ci-in minthang vangvang hi. Niang Ngaih Khup inn siikmasa lo-in zozongte ciah ngeilo hi.
Nikhat zukhum geimahmah beelpi khattawh guangin, vok tukli khattawh Pu Tuang Hau zukhol hi. Nuammahmah ahih ciangin, Tuitawh tawh gamgi Thanggen kici lociing khat, Luipi singham hoih mahmah khat leh taubeelsan ta khat namat hi. Tua logamte mah tawh khuasa-in ka nungta uh hi. Kapteel khua pan a paikhiatni mateng nuntakpih uh hi.
Asiam in ompih
Tuhun khangthak ten Pasian thupha icihpen khangluiten Asiam in ompih ci uh hi. Niang Ngaih Khup bangkua ah anlim diak, annem diak ci uh hi. Innlak sanggam ten ih pam innah annem mahmah ven, huan kibang veve amau aa limdiak ve aw, ci ciat uh hi.
Nikhatni ciangin anpua kacial uh hi. Ka thacial uh mi-6 hi a, naupang teng tawh sawm hong pha uh hi. Ko innkuan mi-11 tawh a kigawm anne ding 21 kapha uh hi. Vok tuk-3 khat ka go uh hi. Innteek sa dingin a lu leh a lungbom kikoih hi. Leenglate in, " Mihing hizah neek ding, an hiteng peuh, kuan ne a, kuan ngawl ding hiam, " ci uh hi. Khamtakin a neek khit uh ciangin kikhamval lai hi. Khamtak mah a, kaneek hi veh aw, ci-in lamdangsa mahmah uh hi.
Kangaihsutsut ciangin, hih ankuang hawm pen, Jesu mah hin ka um hi. An thuklaitak khawngin muthei leng, anthukte khut thupha pia a phunphun mikhat kimu kha ding hi. Meigong tagah mizawng daipam a cingpa in, amah ih theihma pekin hong ompih khin, cih ka um hi.
Innnuai vok dawng thei mahmah a, hoih kisa-in a ci hong lazel uh hi. Amau innnuai atun ciangin hoih tuanlo hi. Anno khang mahmah a, tuate mah zuakin an kataw uh hi. Tua mah tawh sang kakah uh hi.
Haksaatna leh lungkiathun ciangin mipawlkhat gui-awk in si uh hi. Pawlkhatte phe kaap,zune in amahmah kisulal hi. Tun Thual pen tua bangnam hilo hi. Thukhen siampa in a thu hong heihun om ding hi, ci-in ngak hithiat hi. Haksapi mahin a tate nupi-pasal hong suaksak kim hi.
Pu Tun Thual pen 1980 kumin si hi. Pr Thang Siangh in Chanthagyi khua ah gui hi. Niang Ngaih Khup pen a tapa Vung Za Tung kiang Tedim ah si hi.
Phungsung buaina pen kuamaan kua khial ih kikum kei ding hi. Pasal pil nihte hang ahi hi. Pasian in Phung kikhenna leh sanggam kimak ding phallo ahih ciangin, ko a tu a tate teng pen zi leh ta-in ka kila uh hi. Ngaih Suan tupa Suan Go Pau leh Ngam Cin tunu Lang Za Dim kiteeng hi. Khoi Suan tupa Suan Sawm Thang leh Ngam Cin tupa Suan Mang tanu teng hi. Tun Thual tupa Thual Sian Muang leh Khoi Suan tunu Dim Pan Hau kiteng hi. Nidanglai thute mangngilhin a tu a tate ka kingai mahmah uh hi. Hi bang thute zong Pasian vaihawmna nalamdangpi ahi hi.
Nu leh Pa a neilaite, sum leh paai zongzote in ih Nu ih Pa keemkhial kei ni. Nu leh Pa pen kumpinu leh kumpipa ahi hi. Eite muhtheih pasiano khatzong ahi hi. Nu leh Pa tawh lungsim kigamla lawmlawmte daupai lua omlo hi. Amau hoihna ih phawk ciangin kizekai lua thei hi. Nu leh Pa vaak cihpen thusiamna hinailo hi. Leiba aloh kihi bek lai hi. Minamdang pawlkhat ten a Nu a Pa te bia uh hi. Abraham hunlai Jacob hunlai-in a Nu leh a Pa a bia phialphial mah bangin zahtak uh hi. Amau sih khit ciangin itna la tampi phuak a, mualsuang tungah khenin mikhempeuh muh dingin khuamualah ihphuh sangin, a nuntaklai tuivot haikhat nasuah manpha zaw hi.
Thursday, August 21, 2008
Tuesday, August 19, 2008
GAALHAANGPA PU TUANG NGAM TAANGTHU.
PU. TUANG NGAM TAANGTHU.
Khangtaangthu a kisut ciangin, ahoih dinga kizuuntawm tam mahmah hi. Pawlkhat pen pupa khangmasate nopsakna, gualzawhnate hangin kiphasakin tuangkhawng thei uh hi. Pawlkhatte in maizumlawh aa gen ngamlo uh hi. Taangthu icihpen taangthu bangmah aa saanding ahi hi. Phuahtawm aa zuun zong hoih tuanlo hi. Ahoihleh ahoihlo tungtawnin khangthakte in pilna la-a kipuahsiam ding kisam mahmah hi.
US gam pen Taangthu ih sim ciangin Gam-innteek Red-Indiante tawh kido uh hi. Africa gam pan-a kila silate tawh nasiatakin buai uh hi. England Kumpinu khutsungpan suahtakna dingin nuntakna tampi tawh lei uh hi. Minam buaina tawlngalo-in nei uh hi. Khat leh khat kizawhthawhna leh kithahna tawh kidim hi. Khangthakte in tua haksaatna khempeuh imciplo seelsim selo-in pholak uh hi. Taangthu tawh sutkikkik uh hi. Tua haksaatna tungtawnin Constituitions hoihmahmah piangkhiasak uh a, USA gampen leitungah a suaktapen gam ahih banah leitung dangte sangin nasiatakin khangto zaw hi.
Tuhunin zong ih Pu ih Pate thuak haksaatnate hangin kidona leh ki-elnalam manawt zawlo-in hanciamna leh gualzawhnalam leh kipumkhatnalam nawt ihih ding thupi hi. Ih pukhat ih pakhat ii huntomno gualzawh picinna pen khantawn aa minamte lakah mualpho a leituathun hinawnlo hi. Hih khangah bangci kalsuan leeng hoih ding hiam, ci-in mitkhaak sitset a ngaihsuthun ahi hi.
Leitung minam khempeuh in a suan a muan uh gaalhaang-minthang khat peuhmah nei hamtang uh hi. Taanglai Kawlkumpi gaalhaang minthangte pen, Banduhla, Kyansitta cihkhawng ahi hi. Ei Khamtungah Sukte maanlai-in Tuang Ngam minthang mahmah hi. Pu. Tuang Ngam taangthu ih kikum ding hi.
Pu. Tuang Ngam pianna
Pu Tuang Ngam pen tulaitak Tonzaang township sungaa om Tualmu khua-ah teeng hi. Taanglai-in ih Pu ih Pate pen gaalmat-samat tawh kidem uh ahihmanin, galben saben pen sport nasia mahmah khatin nei uh hi. Tualmu pasal thahaat khempeuh gaal bengin kuankhia uh hi. Numei naupangte bek nusia uh hi. Pu Tuang Ngam pen naupangno hilai hi. Pasal khempeuh gaalbeng dingin a kuan sungin, Khuangnung khuate n hong sim a, a thah bangteng manin ciahpih uh hi. A pu gaalbeng hong tunkik ciangin, khuasung nadai dikdiak a, mihing khatbeek na om nawnlo hi. Tua ciangin la khat phuak hi.
a. Phunggual al bang man nua aa siallum kalawh zua saumang guak sang sumin zemnuam ing e.
b. Zua saumang guak sangsumin zem nuam ing aw, khuamual guaksa la sumin zom nuam ing e.
Pu Tuang Ngam amanpa pen Khuangnung khua Haatzawte Kim Thang a hi hi. A taikik ding lau a, suntawh zantawh kolbulh hi. A lungmuan dongin khihcip hi. Ama tungpan Mualbeem khua Sukte Pu Khan Thuam in lei hi. Pu Tuang Ngam in thutheihhun a tun ciangin a thuakna teng ngaihsunin laphuak hi.
a. Ih tungsunni vanlai ah kai ciciai e, singhen dawhtuam kol tungah kei kai ing e.
b. Singhen dawhtuam kol tungah zua pahtaang ah tungsun nin kiillam zong ven ken zong mawng e.
Pu Tuang Ngam pen silate lakpanin ciim mahmah a, thudotin nei uh hi. Sila dangte sangin itzaw uh hi. Tua hun aa Pu Khan Thuam sila khawite,
1. Pu Tuang Ngam. .....................Phiamphu.
2. Pu Chongpuithang...................Galte.
3. Pu Zunhong .............................Thatmun.
4. Pu Bena, [Bedok].....................Vunghlu.
5. Pu Haang put........................... Vangteh khua
6. Numei honkhat zong om hi.
Pu Tuang Ngam Saizaangkhua a tunna.
Pu Khan Thuam tapa Pu Gawh Pau in Saizaang khua ah inntuan sawm hi. "ih silate sungpan nadeihpen tonpih in," acih ciangin Pu Tuang Ngam tonpih hi. Saizaangah hong tangval ta a, Taangko seemsak hi. Amah a kheelbai ahihmanin Gawh Pau sanggamte leh sila pihte in simmawh uh hi. "Tuang Ngam in gaal a mat leh, haanzu leih nadingin guntui tawi ning," ci-in nuhnau uh hi. Pu Tuang Ngam in ciamteh gige hi.
A Pu Gawh Pau tawh galbeng dingin kuan uh hi. Aman gaalnih man hi. Vaaitutna zu a neek uh ciangin, laa gen a,
a. Ka pisei tawh ciam ing ee ka ninu tawh, laal nathah leh khangguntui tawi ning ci.
b. Khang guntui tawi khua suakmual nakhum zuk am, tang laithahlu khuamualah alvan bawm.
Hih la a zak ciangin, " ih ciamsa hi," ci-in seng la-in, guntui tawi dingin kipan uh hi. A pute in zu beelkhat tawh lem a, guntui tawisak nawnlo uh hi.
Saizaang khua gaalten sim
Saizaang khua sim dingin gaalte hong pai hi. Gaalvil ten phawk aa patau kiko uh hi. Gaalhung dingin Mualbeem ko uh hi. Pu Tuang Ngam Taangko ahihmah bangin, minsial kawmkawmin Asiam leh Asa ko aa, "Ka Khuangding tho in, ka Muanding tho in, nakhua gaal in hong sim hi," ci-in nakpi-in kiko hi. Khuangding leh Muanding acihpen, Saizaang khuataw aa, Sialtaang lui tunsuk madiakah a langtuak kenliangpi mualdawk khat om a, tua dawn ah Muanpi nih kimaingat hilhelin om hi. Lipkhaphuai lauhuai mahmah ci uh hi. Kum-3 simin sialkhat tawh bia uh hi.
Mualbeemte tawh kopin gaalte uumgawp a, gunkaanna Kawn saatsat hi. A thah baangteng gun in taai a, a khua uh a tungkik tamlo hi. Pu Tuang Ngam in a gaalmatte a khutme tanin a ipdimin pua hi. Pu Tuang Ngam in la phuak a,
a. Saitui vangkhua kainuam a do zatam aw, deih nakawina nabanzal paai a kuang e.
b. Gual tawh hanlung naciamna na selung aw, a mual kitawi siatlei teng kataisak e.
Mualbeem ten thahsawm.
Taanglai galdo dan pen lum leh tei tawh kithatanglai hi a, galzote pen pasal simthamcing mahmah hitakpi khong hi. Gaal azawh ciangin Pu Tuang Ngam in laphuak a, Mualbeemte thangpai in thahsawm uh hi. A la pen hibang ahi hi.
a. Ka Khuangding leh ka Muanding sum bang biang e, leido tangphuung bang kiciang taangbang
ee..........acihleh, Mualbeemte heh a, " noguak hikei uteh, ko tawh kop aa i zawh hi," ci-in that dingin kithawi hi. Pu Tuang Ngam in a dawn beek hong gensak lai un, acih ciangin gensak a,
b. Ih khang ciautui no tungah laam bang ngaang ei, Beemtui taanggual no bang aa sing omlo e,....acih ciangin lungkim takin kikhen uh hi. Tua khit ciangin Mualbeemte lungkim takin khualam zuanin ciah uh hi.
Pu Tuang Ngam hangin
Pu Tuang Ngam sabeng dingin kuankhia hi. A taamna khua khat ah, a thausialkii meitungah akoih mang hi. " Bang hangin kathausialki hong gu nahi uh hiam, ka Pu Khan Thuam tawh kong sim ding uh a, nakhuabupin kong thatkhin ding a, na inn uh kahaaltum ding uh hi," acih ciangin lau-in sial-11 tawh thuum hi. Sial-11 pen a Pu Gawh Pau kiang tunpih hi. Tua ciangin Gawh Pau tongzo hi.
Gamlian minamliante bang himawk leeng, Tuang Ngam pen Pu Gawh Pau gaalkapmang ahi hi. Gawh Pau in Pu Tuang Ngam pen zahtakin bangkua vaikhawm thuzeekpi-in zang hi. Kikamtam leh, " Kei om kei leng, cikpimei zong kuaitan zo kei niteh," cikha mawkleh zumhuai lua ding hi. Thu in la hi-a, la inzong thu hi, a kicihmah bangin,
a. Liimbelh lunmaang nunvom[sial] in zin bang khang e, von katawi tui bang siang sak zo ing e...
b. Guallen zil ing khattang phai valo ing ei, lun sumtual ton mungphuh naan nei ngawn hi e,..
Ama hangin Gawh Pau picingzo ahih ciangin sila innteng bangin koihlo a, sanggam bangkua bangin kiman uh hi. Munkhempeuhah vaihawnm khawm nekhawm dawnkhawm uh hi. Pilin ciim mahmah ahih ciangin vaihawmna khempeuh mapai mahmah hi.
A gaalla phuahte
a. Ka Khuangding leh ka Muanding sum bang biang e, leido tangphuung bang kiciang taang bang theng ee
b. Ih khang ciautuino tungah laam bang ngang e, Beemtui taanggual no bang a sing omlo ee
a. Saitui vangkhua kainuam a do zatam aw, ngaih nakawina nabanzal pai aa kuang e
b. Gual tawh hanlung naciamna naselung aw, a mual kitawi siatlei teng katai sak e..
a. Kaseino in simsal taang in e, kei zong nuamsing katanpih ding sui ing e.
b. Taang kagual in pheiphung va bang bai ci ei, dolai tengah kadin nin bai melmang e.
a. Kaseino in lunsiang mawng bang peem ing ei, gual in siallum alawhleh lo lei ing e..
b. Gual in siallum a lawh leh lolei ing aw, laimi va bang a matleh henlei ing e..
a. Nungtui vangkhua nunnuamno daidam tah a, zotnuam tuanglam ngilsa aw paankai tah e.
b. Zotnuam tuanglam ngilsa aw paankai tah a, kadawn luitui kadawn nawn loh ding aw e..
a. Ka Khua ngai ing kanu vangkhua ngai ing e, kalam ngai ing kakhawlmual lam ngai ing e.
b. Kalam ngai ing kakhawlmual lam ngai ing aw, kadawn ngai ing kadawn luitui ngai ing e..
a. Mi a ciin tawh a tuai tawh vailo kuan ven, lailam khuasuak mualah hawm suangvum bang e..
b. Khattang vailo kuan ing e khua tuanglam ah, pupa gamzaang gii sing hawi bang neem ing e..
Tedim khuate a phuah.
a. Dimtui gual aw khuai bang a kahaang nacih, Zangtui ih vangkhua a sing zo omlo e.
b. Sakciang aa mi Dimtui gual tonbgtam lo vua, luntawi vang a khaimulaam siam zil hing e
a. Mi kitawi ven a phung tawh kitawi tah a, kei zong kasiallumno tawh kitawi ing e..
b. Siallum kawlciang namcihgual kihei taleh , khat aa khang zong khuakiim in lo bang lel e.
Pu Tuang Ngam in zi nei
Pu Tuang Ngam in Ciin Giak tenpih hi. Ta neihak ahih ciangintasel or tatah ahih ding lau a patau mahmah a, lungneu mahmah hi.
a. Ngaih aw nadawi-ai hiam aw kei dawi-ai hiam, pheiphung tungah vonsen laam lo ding aw e
b. Pheiphung tungah vonsen laam lo ding aa maw, Khuangnung nungtuang aa leiloh leng ding aw
ee....
a. Tum bang guaina naitah aa lobang tulna,zalai lawi bang kathan nawn loh ding aw e
b. Kahen gensing zalawi bang kathan gen sing dolai tengah kadin nawn loh ding aw e..
a. Ngalliam kapaal tualkia ei laantheu ing aw, zangsa kamkei kanahdawn laikaang tah e
b. Zangsa kamkei kanahdawn laikaang tah aa tungmuvanlai kakuizil tual aa kia ee.
a. Omlai veei ing khunlaan ah hul ning niang ing, kakaankil ah tongdam aa bia omlo e
b. Kasak luang pawh zotaang bang a damlai-in, Tuangtui tuangdai ten deih e, phung in deih e..
Minlawhna kheelsak.
Ei Zomite in minam-leh-Beh zui-in minlawhna kineituam ciat hi. Tuulpi kici Beh-siampi kinei hi. Gaal-aaite, Sa-aaite, Sa-mualsuahte khempeuh in tua Minlawhna zangin amau Phungmin laamto uh hi. Hoihna leh gualzawhna khatpeuh aneihhun ciangin amau Phungmin taangin tua Minlawhna zangin minsial uh hi.
Pu Tuang Ngam pen Sukte Innpi bangkua tawh khangkhawm ahih ciangin ama hunsung Sukzotu ci-in minlo hi. Ama sihkhit ciangin Minlawhna laih dingin vaikha hi. "Sabeng unla namat peuhpeuh utawh hong phutuah un, ka Khaan nakhia un, ka vamul hong kaapkhia unla, Vanlaitu ci-in minlo un," ci-in gen hi. Pau Khawm tapa Thawng Tun in ngalpi khat man a, tua tawh Khaan khia-in Phutuah hi. Tua ni aa kipanin Phiamphu suan ahi, Pu Tuang Ngam khahte in, Vanlaitu in minlo uh hi.
Vanlai hong piankhiatna.
Phiamphu, Phiam Thang, Gial Kim, Kam Gen, Nawh Sente a phatlaitakin, Suantak leh Samte tawh kibehmat uh hi. Tua laitakin gaalten hong sim a, Phiamphute guallel aa thatmai uh hi. Cimanglo ding aa Pasian geelna om hiding hiam, naupangno khat luisung aa bu gaalten thah a sawmlaitakin Muvanlai nupa in vantung panin ngumlutin bawh a, Beh aa kimatpih sanggamten vadelh hi. Luisungah naupang khat om amuh ciangin, ciahpih in keem uh hi. " Namin bang hiam, na nu kua hiam, na pa kua hiam?" ci-in a dot hangin theilo hi. Muvanlai hotkhiatsa aa suakta ahih ciangin VANLAAI ci ni, ci uh hi.
Phiamphute han-lapi.
" Thangtui maang in ee, kazua henkol bulh, zaitha thawng e, a maang tui bang la ing e, pupa khuasuak mual ah zua min thei bang lo ing e,,"
Minlawhna hong laih ciangin, suahtakna thangko mahtawh kibang ahi hi. A pu Sukte in, " Bangthu hong thei sese nei vuam oo, Bangbang ahi zongin sanggam kizopna paii tuan kei ni. Zubeel ankuang vaihawm khawm ni. " ci ahih ciangin sanggam uu leh nau bangmahin kizom uh hi. Ki-itna peengsak tuanlo uh hi.
Sukte-hun hong bei ciangin, pawlkhat in langpanin elbawl uh hi. Tua thu tawh kisai Tun Thual ngaihsutna hibang ahi hi. " Sanggam tamlua ngeilo, minam tamlua cih om ngeilo hi. Innkuankhat aa omsa, ankuang umkhawmsa kilangdo sangin ki-it leeng mainawt zaw ding hi. Cikmah hunin Sila-Ngeina omkik lo ding hi." ci hi. England gam Democracy ki-ukna tawh ki-uk uh hi. Gam makai ding mipil misiam mipite in teel uh hi. England kumpi kiphiat tuanlo hi. Mipi deihna tawh ki-uk hi. Kumpigam beisak lo hi. USA zong England kumpi khutsung pan suahtakna la uh hi. Mi tultampi in sihlawh uh hi. A hih hangin ki-el tuanlo hi. Tudongin kipumkhatin naseem uh hi. Kuaman zolo hi.
Taangthului tawphah aa kideidan hun hinawnlo hi.Zomite kipumkhat theihna ding hanciam hun ahi hi.
Kamsaangte bangin mukhol.
Pu Tuang Ngam pen pil beklo ciim beklo-in,amauhun aa Sport thupi pen ahi, gaalbeng thahaatin gaal tampi man hi. A thung-ip dimin a gaalte khutme liangkuah ngei hi. Amau hunin pasal thahaat ngalliam mahmah hi-a, kuamah in tangtakin en ngamlo hi. Laisiangtho sungah, " Saul in tultul thenthen that, David in sim zawhloh that," acih tawh kibang ahi hi. A pu Gawh Pau khawi leh gulh khempeuh ama topsa ngentang ahi hi.
Tua bek thamlo-in mailam thupiang ding muhkholhna nei hi. Mang khiatsiam hi. Thugil thuhaksa khempeuh ama kiang kitun hi. A genkholhthu pawlkhat,
* Tawmbing hong maang ding hi.
* Gualnam in laihin Gualnam hong maang ding hi.
* Gualnam pen Sukte in laih ding hi.
* Sukte maan laitakin Tukbeeksawm hong khang ding a, tua laitakin kasuan kakhak inn-40 pha ding hi. Kham leh zaangah ganhingguh leh mihingguh kikhenlo-in kiciau ding hi. Tua pen Japan gaal hidingin ki-ummawh hi. Tua banah Khammi Zaangmi kideidan lo-in kiteengkhawm hi. Tua thu mukhol hi-in um uh hi.
Kapteel khua ah Hatzawte in mangkhat man hi. A lungsim lawnglua ahihmanin aakmasa khuanin tho a, Pu Tuang Ngam kiangah vahawh hi. Gaallai cih ciangin naphawk pah a, ' bang eh kata hong lol si cia," acihleh, a mangmat teng gen hi. " Kamangin ka innnuai ah tuilii kicing a, ka innkhuam khempeuh tum hi." ci-in gen hi. Tua ciangin Pu Tuang Ngam in, " Kata aw, lah dah pah kenla, zong khasia pah kei in. A sawtlo-in liaupi natuak ding hi. Lawi-8 naliau ding aa,nang neihsa in cin lo ding hi. Na uu nanau neihsa a um a beel a zam a dak dongin nakaihkhop khit u ciangin nacin zo pan ding uh hi." ci-in gen hi. Khakhat sawt nailo-in tungpah hi. Lawi-8 liau hi. Tua hunin lawigiat pen Ks 240 ahi hi. Aneihsa khempeuh kihawk siangsak hi.
Pu Tuang Ngam pen a suahna Tualmu panin gaalten man a, Khuangnung khua tung hi. Khuangnung panin Mualbeem tung leuleu hi. Mualbeem innpi panin Saizaang khua tung hi. Saizaang khua a tun ciangin Pi Ciin Giak tawh teng uh hi. Tapasal nga leh tanu nih nei uh hi.
Tapa Tanu
1. Vaih Kim 1. Nuam Nem.
2. Pau Khawm 2. Uap Zel.
3. En Khoi
4. Pau Khual
5. Awn Vial.
Hih teng suan leh khak inn-40 vaal a phak laitakin Japan gaal hong tung hi. Tulaitakin, Kapteel, tuitawh, Haimual, Sakhangyi, Chanthagyi, Sawbuayeshin, Pyidawtha, Kalemyo khua tengah om uh hi.
Asuan akhakte thu vaikhak.
* Taangkogui ihi hi. Taangko seem un.
* Siikseekgui ihi hi siikseek un.
* Siampigui ihihi, siampu dawisa seem un. Dawineu khempeu kithoih thei hi.
* Tuikhuk khuatgui ihi hi. Tuikhuk khuat un.
* Neih leh lamgui ihi hi. Sum zong un, lokho un leithau nane ding uh hi. Gankhawi un, cipha ding hi.
Hihloh ding
* Dawilian ahi, phaiphengphah, lingguikaih, bumleh hih kei un.
* Khuangkaan kei un. Khuangkaan nam ihi kei hi. Gilpuak thei hi.
Sihna tawh kisai
* Puulpi zavaatin lau kei un. Pulnatna tawh kisilo ding hi. Tua natna in hong sukha lo ding hi.
* Gal leh sa na kidawm un. Ei zong gaalmanin gaal kithat hi. Samangui hi hang.
* Sihtheihna tuamtuam na kidawm un.
Pu Tuang Ngam a sih ciangin a tapa lina Pau Khual in gui hi. A sih ciangin Pu Pau Khawm in la tawh kha hi.
a. Phunghawm bansam zua khattang sa bang nahei, von in limsawl bang kon liah lolai hi ee.
b. Tulai sinthu nangai un uu leh nau aw, phunglai sinthu zensiam teng taang bang pha e.
Latung aa sak ding.
a. Zua aw napham lungsiit lo aw khaimu kha tawh hei veh aw.
b. Khaimu kha tawh nahei vadial zua aw e etlawm sang e.
Mihing pen bangzahta-in thahaatin minthang mahleengzong, ih teek ciangin niinpa bang kihi lel a, ih sunaa piang suan leh khak picing keileh, hehpih huai mahmah hi. Pu Tuang Ngam beina hibang ahi hi.
Gaalkap mangpa.
Pu Tuang Ngam pen Mualbeem innpi leh Saizaang innpi uksungah Taangko seem hi. Innpi taangkote pen galkapmaang ahi hi. Hih bangkua galmuanna pen ama khutsungah om hi. Amah vanlian mahmah kisuan hi. Galsim aa kuankhiate aman uk hi. Ukpihun kici Sukte khansung ahihmanin amau haatna khempeuh innteek pute haatna suak a, amau samat-galmat khempeuh inntek pute aa suak sak hi. Taanglai innpi bangkua uksungah pasal thahaat mintyhang tampi om hi. Tua mithahaat minthangte amau mintawh kipahtawi ngamlo hi.
Song Theu leh Pum Za Mang kitawng hi. Pum Za Mang in, " Song Theu nehtual deldal " acihleh, " Ee maw pu, kanehtual bel, mi mat peuh keimat nacih a, mi thah peuh mithah ci a, hanla sa a thau nalotlot,kaneh kadawhdawhna aa hici hilo maw," cikik hi. Tuhun bel Sukte zong Sukt mintawh bangmah piangtuanlo ding hi. Adangten zong elding hilo hi. Gam leh minam aadingin kua pil hiam, ? Kua kipiazo hiam? Kua in gam aa dingin bang seem hiam cih longal masuan dang ih nei kei hi.
Thang Siangh. zogampalpi@yahoo.com
Khangtaangthu a kisut ciangin, ahoih dinga kizuuntawm tam mahmah hi. Pawlkhat pen pupa khangmasate nopsakna, gualzawhnate hangin kiphasakin tuangkhawng thei uh hi. Pawlkhatte in maizumlawh aa gen ngamlo uh hi. Taangthu icihpen taangthu bangmah aa saanding ahi hi. Phuahtawm aa zuun zong hoih tuanlo hi. Ahoihleh ahoihlo tungtawnin khangthakte in pilna la-a kipuahsiam ding kisam mahmah hi.
US gam pen Taangthu ih sim ciangin Gam-innteek Red-Indiante tawh kido uh hi. Africa gam pan-a kila silate tawh nasiatakin buai uh hi. England Kumpinu khutsungpan suahtakna dingin nuntakna tampi tawh lei uh hi. Minam buaina tawlngalo-in nei uh hi. Khat leh khat kizawhthawhna leh kithahna tawh kidim hi. Khangthakte in tua haksaatna khempeuh imciplo seelsim selo-in pholak uh hi. Taangthu tawh sutkikkik uh hi. Tua haksaatna tungtawnin Constituitions hoihmahmah piangkhiasak uh a, USA gampen leitungah a suaktapen gam ahih banah leitung dangte sangin nasiatakin khangto zaw hi.
Tuhunin zong ih Pu ih Pate thuak haksaatnate hangin kidona leh ki-elnalam manawt zawlo-in hanciamna leh gualzawhnalam leh kipumkhatnalam nawt ihih ding thupi hi. Ih pukhat ih pakhat ii huntomno gualzawh picinna pen khantawn aa minamte lakah mualpho a leituathun hinawnlo hi. Hih khangah bangci kalsuan leeng hoih ding hiam, ci-in mitkhaak sitset a ngaihsuthun ahi hi.
Leitung minam khempeuh in a suan a muan uh gaalhaang-minthang khat peuhmah nei hamtang uh hi. Taanglai Kawlkumpi gaalhaang minthangte pen, Banduhla, Kyansitta cihkhawng ahi hi. Ei Khamtungah Sukte maanlai-in Tuang Ngam minthang mahmah hi. Pu. Tuang Ngam taangthu ih kikum ding hi.
Pu. Tuang Ngam pianna
Pu Tuang Ngam pen tulaitak Tonzaang township sungaa om Tualmu khua-ah teeng hi. Taanglai-in ih Pu ih Pate pen gaalmat-samat tawh kidem uh ahihmanin, galben saben pen sport nasia mahmah khatin nei uh hi. Tualmu pasal thahaat khempeuh gaal bengin kuankhia uh hi. Numei naupangte bek nusia uh hi. Pu Tuang Ngam pen naupangno hilai hi. Pasal khempeuh gaalbeng dingin a kuan sungin, Khuangnung khuate n hong sim a, a thah bangteng manin ciahpih uh hi. A pu gaalbeng hong tunkik ciangin, khuasung nadai dikdiak a, mihing khatbeek na om nawnlo hi. Tua ciangin la khat phuak hi.
a. Phunggual al bang man nua aa siallum kalawh zua saumang guak sang sumin zemnuam ing e.
b. Zua saumang guak sangsumin zem nuam ing aw, khuamual guaksa la sumin zom nuam ing e.
Pu Tuang Ngam amanpa pen Khuangnung khua Haatzawte Kim Thang a hi hi. A taikik ding lau a, suntawh zantawh kolbulh hi. A lungmuan dongin khihcip hi. Ama tungpan Mualbeem khua Sukte Pu Khan Thuam in lei hi. Pu Tuang Ngam in thutheihhun a tun ciangin a thuakna teng ngaihsunin laphuak hi.
a. Ih tungsunni vanlai ah kai ciciai e, singhen dawhtuam kol tungah kei kai ing e.
b. Singhen dawhtuam kol tungah zua pahtaang ah tungsun nin kiillam zong ven ken zong mawng e.
Pu Tuang Ngam pen silate lakpanin ciim mahmah a, thudotin nei uh hi. Sila dangte sangin itzaw uh hi. Tua hun aa Pu Khan Thuam sila khawite,
1. Pu Tuang Ngam. .....................Phiamphu.
2. Pu Chongpuithang...................Galte.
3. Pu Zunhong .............................Thatmun.
4. Pu Bena, [Bedok].....................Vunghlu.
5. Pu Haang put........................... Vangteh khua
6. Numei honkhat zong om hi.
Pu Tuang Ngam Saizaangkhua a tunna.
Pu Khan Thuam tapa Pu Gawh Pau in Saizaang khua ah inntuan sawm hi. "ih silate sungpan nadeihpen tonpih in," acih ciangin Pu Tuang Ngam tonpih hi. Saizaangah hong tangval ta a, Taangko seemsak hi. Amah a kheelbai ahihmanin Gawh Pau sanggamte leh sila pihte in simmawh uh hi. "Tuang Ngam in gaal a mat leh, haanzu leih nadingin guntui tawi ning," ci-in nuhnau uh hi. Pu Tuang Ngam in ciamteh gige hi.
A Pu Gawh Pau tawh galbeng dingin kuan uh hi. Aman gaalnih man hi. Vaaitutna zu a neek uh ciangin, laa gen a,
a. Ka pisei tawh ciam ing ee ka ninu tawh, laal nathah leh khangguntui tawi ning ci.
b. Khang guntui tawi khua suakmual nakhum zuk am, tang laithahlu khuamualah alvan bawm.
Hih la a zak ciangin, " ih ciamsa hi," ci-in seng la-in, guntui tawi dingin kipan uh hi. A pute in zu beelkhat tawh lem a, guntui tawisak nawnlo uh hi.
Saizaang khua gaalten sim
Saizaang khua sim dingin gaalte hong pai hi. Gaalvil ten phawk aa patau kiko uh hi. Gaalhung dingin Mualbeem ko uh hi. Pu Tuang Ngam Taangko ahihmah bangin, minsial kawmkawmin Asiam leh Asa ko aa, "Ka Khuangding tho in, ka Muanding tho in, nakhua gaal in hong sim hi," ci-in nakpi-in kiko hi. Khuangding leh Muanding acihpen, Saizaang khuataw aa, Sialtaang lui tunsuk madiakah a langtuak kenliangpi mualdawk khat om a, tua dawn ah Muanpi nih kimaingat hilhelin om hi. Lipkhaphuai lauhuai mahmah ci uh hi. Kum-3 simin sialkhat tawh bia uh hi.
Mualbeemte tawh kopin gaalte uumgawp a, gunkaanna Kawn saatsat hi. A thah baangteng gun in taai a, a khua uh a tungkik tamlo hi. Pu Tuang Ngam in a gaalmatte a khutme tanin a ipdimin pua hi. Pu Tuang Ngam in la phuak a,
a. Saitui vangkhua kainuam a do zatam aw, deih nakawina nabanzal paai a kuang e.
b. Gual tawh hanlung naciamna na selung aw, a mual kitawi siatlei teng kataisak e.
Mualbeem ten thahsawm.
Taanglai galdo dan pen lum leh tei tawh kithatanglai hi a, galzote pen pasal simthamcing mahmah hitakpi khong hi. Gaal azawh ciangin Pu Tuang Ngam in laphuak a, Mualbeemte thangpai in thahsawm uh hi. A la pen hibang ahi hi.
a. Ka Khuangding leh ka Muanding sum bang biang e, leido tangphuung bang kiciang taangbang
ee..........acihleh, Mualbeemte heh a, " noguak hikei uteh, ko tawh kop aa i zawh hi," ci-in that dingin kithawi hi. Pu Tuang Ngam in a dawn beek hong gensak lai un, acih ciangin gensak a,
b. Ih khang ciautui no tungah laam bang ngaang ei, Beemtui taanggual no bang aa sing omlo e,....acih ciangin lungkim takin kikhen uh hi. Tua khit ciangin Mualbeemte lungkim takin khualam zuanin ciah uh hi.
Pu Tuang Ngam hangin
Pu Tuang Ngam sabeng dingin kuankhia hi. A taamna khua khat ah, a thausialkii meitungah akoih mang hi. " Bang hangin kathausialki hong gu nahi uh hiam, ka Pu Khan Thuam tawh kong sim ding uh a, nakhuabupin kong thatkhin ding a, na inn uh kahaaltum ding uh hi," acih ciangin lau-in sial-11 tawh thuum hi. Sial-11 pen a Pu Gawh Pau kiang tunpih hi. Tua ciangin Gawh Pau tongzo hi.
Gamlian minamliante bang himawk leeng, Tuang Ngam pen Pu Gawh Pau gaalkapmang ahi hi. Gawh Pau in Pu Tuang Ngam pen zahtakin bangkua vaikhawm thuzeekpi-in zang hi. Kikamtam leh, " Kei om kei leng, cikpimei zong kuaitan zo kei niteh," cikha mawkleh zumhuai lua ding hi. Thu in la hi-a, la inzong thu hi, a kicihmah bangin,
a. Liimbelh lunmaang nunvom[sial] in zin bang khang e, von katawi tui bang siang sak zo ing e...
b. Guallen zil ing khattang phai valo ing ei, lun sumtual ton mungphuh naan nei ngawn hi e,..
Ama hangin Gawh Pau picingzo ahih ciangin sila innteng bangin koihlo a, sanggam bangkua bangin kiman uh hi. Munkhempeuhah vaihawnm khawm nekhawm dawnkhawm uh hi. Pilin ciim mahmah ahih ciangin vaihawmna khempeuh mapai mahmah hi.
A gaalla phuahte
a. Ka Khuangding leh ka Muanding sum bang biang e, leido tangphuung bang kiciang taang bang theng ee
b. Ih khang ciautuino tungah laam bang ngang e, Beemtui taanggual no bang a sing omlo ee
a. Saitui vangkhua kainuam a do zatam aw, ngaih nakawina nabanzal pai aa kuang e
b. Gual tawh hanlung naciamna naselung aw, a mual kitawi siatlei teng katai sak e..
a. Kaseino in simsal taang in e, kei zong nuamsing katanpih ding sui ing e.
b. Taang kagual in pheiphung va bang bai ci ei, dolai tengah kadin nin bai melmang e.
a. Kaseino in lunsiang mawng bang peem ing ei, gual in siallum alawhleh lo lei ing e..
b. Gual in siallum a lawh leh lolei ing aw, laimi va bang a matleh henlei ing e..
a. Nungtui vangkhua nunnuamno daidam tah a, zotnuam tuanglam ngilsa aw paankai tah e.
b. Zotnuam tuanglam ngilsa aw paankai tah a, kadawn luitui kadawn nawn loh ding aw e..
a. Ka Khua ngai ing kanu vangkhua ngai ing e, kalam ngai ing kakhawlmual lam ngai ing e.
b. Kalam ngai ing kakhawlmual lam ngai ing aw, kadawn ngai ing kadawn luitui ngai ing e..
a. Mi a ciin tawh a tuai tawh vailo kuan ven, lailam khuasuak mualah hawm suangvum bang e..
b. Khattang vailo kuan ing e khua tuanglam ah, pupa gamzaang gii sing hawi bang neem ing e..
Tedim khuate a phuah.
a. Dimtui gual aw khuai bang a kahaang nacih, Zangtui ih vangkhua a sing zo omlo e.
b. Sakciang aa mi Dimtui gual tonbgtam lo vua, luntawi vang a khaimulaam siam zil hing e
a. Mi kitawi ven a phung tawh kitawi tah a, kei zong kasiallumno tawh kitawi ing e..
b. Siallum kawlciang namcihgual kihei taleh , khat aa khang zong khuakiim in lo bang lel e.
Pu Tuang Ngam in zi nei
Pu Tuang Ngam in Ciin Giak tenpih hi. Ta neihak ahih ciangintasel or tatah ahih ding lau a patau mahmah a, lungneu mahmah hi.
a. Ngaih aw nadawi-ai hiam aw kei dawi-ai hiam, pheiphung tungah vonsen laam lo ding aw e
b. Pheiphung tungah vonsen laam lo ding aa maw, Khuangnung nungtuang aa leiloh leng ding aw
ee....
a. Tum bang guaina naitah aa lobang tulna,zalai lawi bang kathan nawn loh ding aw e
b. Kahen gensing zalawi bang kathan gen sing dolai tengah kadin nawn loh ding aw e..
a. Ngalliam kapaal tualkia ei laantheu ing aw, zangsa kamkei kanahdawn laikaang tah e
b. Zangsa kamkei kanahdawn laikaang tah aa tungmuvanlai kakuizil tual aa kia ee.
a. Omlai veei ing khunlaan ah hul ning niang ing, kakaankil ah tongdam aa bia omlo e
b. Kasak luang pawh zotaang bang a damlai-in, Tuangtui tuangdai ten deih e, phung in deih e..
Minlawhna kheelsak.
Ei Zomite in minam-leh-Beh zui-in minlawhna kineituam ciat hi. Tuulpi kici Beh-siampi kinei hi. Gaal-aaite, Sa-aaite, Sa-mualsuahte khempeuh in tua Minlawhna zangin amau Phungmin laamto uh hi. Hoihna leh gualzawhna khatpeuh aneihhun ciangin amau Phungmin taangin tua Minlawhna zangin minsial uh hi.
Pu Tuang Ngam pen Sukte Innpi bangkua tawh khangkhawm ahih ciangin ama hunsung Sukzotu ci-in minlo hi. Ama sihkhit ciangin Minlawhna laih dingin vaikha hi. "Sabeng unla namat peuhpeuh utawh hong phutuah un, ka Khaan nakhia un, ka vamul hong kaapkhia unla, Vanlaitu ci-in minlo un," ci-in gen hi. Pau Khawm tapa Thawng Tun in ngalpi khat man a, tua tawh Khaan khia-in Phutuah hi. Tua ni aa kipanin Phiamphu suan ahi, Pu Tuang Ngam khahte in, Vanlaitu in minlo uh hi.
Vanlai hong piankhiatna.
Phiamphu, Phiam Thang, Gial Kim, Kam Gen, Nawh Sente a phatlaitakin, Suantak leh Samte tawh kibehmat uh hi. Tua laitakin gaalten hong sim a, Phiamphute guallel aa thatmai uh hi. Cimanglo ding aa Pasian geelna om hiding hiam, naupangno khat luisung aa bu gaalten thah a sawmlaitakin Muvanlai nupa in vantung panin ngumlutin bawh a, Beh aa kimatpih sanggamten vadelh hi. Luisungah naupang khat om amuh ciangin, ciahpih in keem uh hi. " Namin bang hiam, na nu kua hiam, na pa kua hiam?" ci-in a dot hangin theilo hi. Muvanlai hotkhiatsa aa suakta ahih ciangin VANLAAI ci ni, ci uh hi.
Phiamphute han-lapi.
" Thangtui maang in ee, kazua henkol bulh, zaitha thawng e, a maang tui bang la ing e, pupa khuasuak mual ah zua min thei bang lo ing e,,"
Minlawhna hong laih ciangin, suahtakna thangko mahtawh kibang ahi hi. A pu Sukte in, " Bangthu hong thei sese nei vuam oo, Bangbang ahi zongin sanggam kizopna paii tuan kei ni. Zubeel ankuang vaihawm khawm ni. " ci ahih ciangin sanggam uu leh nau bangmahin kizom uh hi. Ki-itna peengsak tuanlo uh hi.
Sukte-hun hong bei ciangin, pawlkhat in langpanin elbawl uh hi. Tua thu tawh kisai Tun Thual ngaihsutna hibang ahi hi. " Sanggam tamlua ngeilo, minam tamlua cih om ngeilo hi. Innkuankhat aa omsa, ankuang umkhawmsa kilangdo sangin ki-it leeng mainawt zaw ding hi. Cikmah hunin Sila-Ngeina omkik lo ding hi." ci hi. England gam Democracy ki-ukna tawh ki-uk uh hi. Gam makai ding mipil misiam mipite in teel uh hi. England kumpi kiphiat tuanlo hi. Mipi deihna tawh ki-uk hi. Kumpigam beisak lo hi. USA zong England kumpi khutsung pan suahtakna la uh hi. Mi tultampi in sihlawh uh hi. A hih hangin ki-el tuanlo hi. Tudongin kipumkhatin naseem uh hi. Kuaman zolo hi.
Taangthului tawphah aa kideidan hun hinawnlo hi.Zomite kipumkhat theihna ding hanciam hun ahi hi.
Kamsaangte bangin mukhol.
Pu Tuang Ngam pen pil beklo ciim beklo-in,amauhun aa Sport thupi pen ahi, gaalbeng thahaatin gaal tampi man hi. A thung-ip dimin a gaalte khutme liangkuah ngei hi. Amau hunin pasal thahaat ngalliam mahmah hi-a, kuamah in tangtakin en ngamlo hi. Laisiangtho sungah, " Saul in tultul thenthen that, David in sim zawhloh that," acih tawh kibang ahi hi. A pu Gawh Pau khawi leh gulh khempeuh ama topsa ngentang ahi hi.
Tua bek thamlo-in mailam thupiang ding muhkholhna nei hi. Mang khiatsiam hi. Thugil thuhaksa khempeuh ama kiang kitun hi. A genkholhthu pawlkhat,
* Tawmbing hong maang ding hi.
* Gualnam in laihin Gualnam hong maang ding hi.
* Gualnam pen Sukte in laih ding hi.
* Sukte maan laitakin Tukbeeksawm hong khang ding a, tua laitakin kasuan kakhak inn-40 pha ding hi. Kham leh zaangah ganhingguh leh mihingguh kikhenlo-in kiciau ding hi. Tua pen Japan gaal hidingin ki-ummawh hi. Tua banah Khammi Zaangmi kideidan lo-in kiteengkhawm hi. Tua thu mukhol hi-in um uh hi.
Kapteel khua ah Hatzawte in mangkhat man hi. A lungsim lawnglua ahihmanin aakmasa khuanin tho a, Pu Tuang Ngam kiangah vahawh hi. Gaallai cih ciangin naphawk pah a, ' bang eh kata hong lol si cia," acihleh, a mangmat teng gen hi. " Kamangin ka innnuai ah tuilii kicing a, ka innkhuam khempeuh tum hi." ci-in gen hi. Tua ciangin Pu Tuang Ngam in, " Kata aw, lah dah pah kenla, zong khasia pah kei in. A sawtlo-in liaupi natuak ding hi. Lawi-8 naliau ding aa,nang neihsa in cin lo ding hi. Na uu nanau neihsa a um a beel a zam a dak dongin nakaihkhop khit u ciangin nacin zo pan ding uh hi." ci-in gen hi. Khakhat sawt nailo-in tungpah hi. Lawi-8 liau hi. Tua hunin lawigiat pen Ks 240 ahi hi. Aneihsa khempeuh kihawk siangsak hi.
Pu Tuang Ngam pen a suahna Tualmu panin gaalten man a, Khuangnung khua tung hi. Khuangnung panin Mualbeem tung leuleu hi. Mualbeem innpi panin Saizaang khua tung hi. Saizaang khua a tun ciangin Pi Ciin Giak tawh teng uh hi. Tapasal nga leh tanu nih nei uh hi.
Tapa Tanu
1. Vaih Kim 1. Nuam Nem.
2. Pau Khawm 2. Uap Zel.
3. En Khoi
4. Pau Khual
5. Awn Vial.
Hih teng suan leh khak inn-40 vaal a phak laitakin Japan gaal hong tung hi. Tulaitakin, Kapteel, tuitawh, Haimual, Sakhangyi, Chanthagyi, Sawbuayeshin, Pyidawtha, Kalemyo khua tengah om uh hi.
Asuan akhakte thu vaikhak.
* Taangkogui ihi hi. Taangko seem un.
* Siikseekgui ihi hi siikseek un.
* Siampigui ihihi, siampu dawisa seem un. Dawineu khempeu kithoih thei hi.
* Tuikhuk khuatgui ihi hi. Tuikhuk khuat un.
* Neih leh lamgui ihi hi. Sum zong un, lokho un leithau nane ding uh hi. Gankhawi un, cipha ding hi.
Hihloh ding
* Dawilian ahi, phaiphengphah, lingguikaih, bumleh hih kei un.
* Khuangkaan kei un. Khuangkaan nam ihi kei hi. Gilpuak thei hi.
Sihna tawh kisai
* Puulpi zavaatin lau kei un. Pulnatna tawh kisilo ding hi. Tua natna in hong sukha lo ding hi.
* Gal leh sa na kidawm un. Ei zong gaalmanin gaal kithat hi. Samangui hi hang.
* Sihtheihna tuamtuam na kidawm un.
Pu Tuang Ngam a sih ciangin a tapa lina Pau Khual in gui hi. A sih ciangin Pu Pau Khawm in la tawh kha hi.
a. Phunghawm bansam zua khattang sa bang nahei, von in limsawl bang kon liah lolai hi ee.
b. Tulai sinthu nangai un uu leh nau aw, phunglai sinthu zensiam teng taang bang pha e.
Latung aa sak ding.
a. Zua aw napham lungsiit lo aw khaimu kha tawh hei veh aw.
b. Khaimu kha tawh nahei vadial zua aw e etlawm sang e.
Mihing pen bangzahta-in thahaatin minthang mahleengzong, ih teek ciangin niinpa bang kihi lel a, ih sunaa piang suan leh khak picing keileh, hehpih huai mahmah hi. Pu Tuang Ngam beina hibang ahi hi.
Gaalkap mangpa.
Pu Tuang Ngam pen Mualbeem innpi leh Saizaang innpi uksungah Taangko seem hi. Innpi taangkote pen galkapmaang ahi hi. Hih bangkua galmuanna pen ama khutsungah om hi. Amah vanlian mahmah kisuan hi. Galsim aa kuankhiate aman uk hi. Ukpihun kici Sukte khansung ahihmanin amau haatna khempeuh innteek pute haatna suak a, amau samat-galmat khempeuh inntek pute aa suak sak hi. Taanglai innpi bangkua uksungah pasal thahaat mintyhang tampi om hi. Tua mithahaat minthangte amau mintawh kipahtawi ngamlo hi.
Song Theu leh Pum Za Mang kitawng hi. Pum Za Mang in, " Song Theu nehtual deldal " acihleh, " Ee maw pu, kanehtual bel, mi mat peuh keimat nacih a, mi thah peuh mithah ci a, hanla sa a thau nalotlot,kaneh kadawhdawhna aa hici hilo maw," cikik hi. Tuhun bel Sukte zong Sukt mintawh bangmah piangtuanlo ding hi. Adangten zong elding hilo hi. Gam leh minam aadingin kua pil hiam, ? Kua kipiazo hiam? Kua in gam aa dingin bang seem hiam cih longal masuan dang ih nei kei hi.
Thang Siangh. zogampalpi@yahoo.com
Monday, August 18, 2008
LEITUNGAH SILANAM A OM HIAM?
LEITUNGAH SILANAM A OM HIAM.
Sila, Inteng, Naseem hih namthum pen,amaumun ciatah kizang hi. Naseem ciatmah ahi hi. Thaman ngah naseem ahih ciat hangin, kumpi naseemte kithupi muh a, mimal naseemte kineumuh zawdeuh se hi. Company or Society kipawlna sungaa naseemte leh kumpi naseemte kilamdanglo hinapi, kumpi naseemte kitung-et zaw teitei hi. Tua pen amau power neihna hang ahi hi. Sila acihte pen galmat aa kikhawite leh zawnglua ahih ciangin akep-akhoite ahi uh hi. Tua bangte in thaman ngahlo uh hi. A Pute khutsungpan suahtakna a ngah matengin ahihkeh, amah leh amah aa adinzawh matengin naseemin om a, anne hi. Tua pen khangluite in, "innteng taimawh sila taimawh " naci uh hi. Mipum tuahkhak haksaatna tungtawn-a thupiang hi-a, Silanam ahihman aa Sila suak hituanlo hi.
Leitungah Sila minthang pen.
Jacob in a Pu Laban kiangah Zii thalawhin kum-14 sung naseem hi. A picinhun ciangin thusia tampi tawh kikhen uh hi. Israel minamte pen Egypt gamah kum-430 sung saltaang uh hi. Amaugam dingaa Pasian piak Canaangam tungkhin ahih hangin Babylon minamte khutsungah kumtul aasim om leuleu hi. Leitung suahtakna leh Khalam suahtakna piadingin Pasian in, ama Tapa kamciam hi. Messiah paihun ding zong ani-akha ciangtansa-in siangtakin hilh khol hi. Ahih hangin nial uh hi. Jesu hongpai petmah aa that uh hi. Jesu a thah ciangin Pasian heh a, Jerusalem khuapi leh Biakinnpi Rome galkapte susiasak hi. Khuapi leh Biakinnpi nusia-in Israel minamte leitungbup ah kithaangtheh hi. Luke21: 24 sungaa Jesu hilhkholhna hong taangtung pah hi. " Tem tawh thahna a thuak ding uh a, matna thuakin leitung khempeuhah kipuak ding uh hi. Jerusalem khuapi gamsimthamin kinusia ding hi." " Biakinnpi kicim dingaa suangkhat tungah suangkhat zong kingalo ding hi," ci-in gen hi.
Amaute a gampanin kihemkhia a, Gentile minam Arab mite in luah uh hi. Jerusalem biakinnpi a siangthopen munah Muslim biakinn kilam hi. Kumtulval a kinusia munah Arab mite na innteek khin uh hi. Jesu hong paini dongin Israel te piakik lo ding uh hi. Leitungah muhdahna a thuakpen Israel minam ahi hi. Pasian in leitung khuavak puak dingin pilna, hauhna, midangte tawh kibanglo-in pia hi. Amau zangkhial uh hi.
USA leh Russia te leitungdangte sangin a haatzawkna uh pen, Israel mipil pawlkhat nei uh ahihman ahi hi. Israelte pen Science lamah nasiatakin pil uh a, business nasep siam mahmah uh hi. Ahih hangin Pasian in minambup aa gupna ngah dingin kamciam pialo uh hi. Gupnathu ah eimau mahbang hilel hi. Leitungah sila aa sawt ompen te ahi hi. Leitungah minam gentheipen leh bawlsiatna namkim thuakpente ahi uh hi.
Leitung sila minthang pen African mivomte ahi hi. Europe minamte in pai-in tuuhon-bawnghon bang lelin a zalomin la a, Market ah zuak uh hi. A leite in thatanghaat tengkhia hi, taaisak hi, agik domsak hi. Hoih a sak ciangin kideekin lei uh hi. Tua bangaa sila khawite in nasiatakin naseem sak uh hi. Bawnglokho uk bangin saat uh hi. Gina a sak kei uleh kaaplumin that lel uh hi. Leitung sumzuak vante mah bangin amau neih silate tungah seal tum hi, a bil atkek uh hi. A ngawngah sikkol oksak uh hi. Kuangzawn sungah tuipia-in dawnsak hi. Abil vangah sikkhau khumin zalomin khauvawhsa-in kai uh hi.
1776 kumin American in Independant honglak ciangin Silakhawi Ngeina nakpi-in hong khiam uh hi. Pu hoih neite khutsungpanin Sila suahtakna ngah uh hi. Abraham Lincoln hong khan ciangin sila ngeina beisak hi. Mivomte population tammahmah ta a, a kaangte patau mahmah ta uh hi. State Secratary seem Colin Power pen, African American mite lakah a masapen ahi hi. Amah a tawp ciangin C. Rice numei mivom khatmah kah leuleu hi. US Senate leh Congress ah mivom 1/3 bang kihel zo hi. Tua bek thamlo-in American president dingin andidate lut thei uh hi. Tulaitak Democratic te candidate muanhuai pen mivom khangno Barrak Obama ahi hi. Mikaang minam lungsim khauhpaite patau petmah uh hi.
Africa minamte pen Sila dingin Pasian in bawllo hi. Amautha leh ngal tawh American gamthak luahzo loding ahih ciangin Pasian in Sila dinmun tawh leitang tungah vanga hizaw kha ding hi. US leitang alangpen mivomte aa cileng kikhiallua lo ding hi.
Ei Khamtungah.
Khamtungah zong sila om ngei hi. Gaal bengin kuanhun nei uh hi. Pawlkhat thatin pawlkhat hingmat uh hi. Ahingmatte pen sila suak pah hi. Leitungah silanam cih omtuanlo hi. Gaal a tuah ciangin a guallelte kimanin sila suak ahi hi. Puhoih neite pen kampha a, innkuanpih bangmahin omkhawm uh hi. Anlim-tuilim zong a kibangin ne uh hi. Zi leh ta innkuanpih guan uh hi. Inntuansak uh hi. Sila pawlkhat a Pute it lua ahih ciangin suahtakna a piakhun nangawnin paikhia nuamlo zong om hi.
Tedimgam leh Tonzanggam uksung missionnary kapailai-in khanghaam pawlkhat in hong gen ngei hi. Tua taangthute pen mikaang khanma hun ahi hi. Mikaang khanma-in khuasungah a gualzo peuh in uk hi. Gaalman thahaatte in a galmatte inntengin zang pah hi. Pu gilote in a silate ganhingkhawi bang lelin ngaihsun uh hi. Puhoihte kiangah silate pen sanggam leh innkuanpih ngeina bangin bawl uh hi.
Sila-pil neite leh sila-thahaat neite in minthan lawhin nakpi-in khantoh pih uh hi. Amau silate hangin khang kidemna ahzong gualtung tuangzo uh hi. Mun khatkhat ah silate hanken kuasahin kizang hi. A Pu a sih ciangin sila khat teitei tawh sikhawm hamtang hi. Innka dawnah konglam ngasa-in taangzom petsak a, thau tawh a nungpan kaaplum hi. A luangpen innsungah a Pu lukhungah tusak hi. A kha inzong sila-in zang hi, cih upna nei uh hi. Hihmunah silate pen bawng leh sial bangin hanken in kigo zen hi. Hih hun pen mikaangte hong tunma hun ahi hi.
Homalin ah missionary aa ka omlai-in, sanggam Thahdo pasal khat tawh ka holim uh hi. " Bang hangin eimite innnih innthumin teeng bek zawzen nei vua, sang kihong theilo, zato kihong theilo, project khat peuhpeuh kisem theilo, Biakna nangawn pawlpi kiphut theilo," kacih ciangin, " Awi-aa-pu, Eimite pennn nidangin kigualzo mama, kitatsia lua lawmlawm ahih vangin samsiatna kithuak hi, " hong ci hiau hi. Nidangin TYhahdo leh Naga kido hi. Tua hunin Thahdote inn tampipi-in kitengkhawm hi. Meisehthau [ zothau] kinei a, kigualzo mama hi. Galmatte pen ekciang tungin kisawl hi. Anneek ciangin lumsakin tutphahin kinei hi. Tun pen kilemna omlo inn-10 zong kitengkhawm theilo, Naga ho in ei khengpaih mangta , ci-in hong gen hi.
Leitungah silanam omlo hi, amau khansung guallelte sila suak ahi hi. Ei khangah naupi-namneu kibang khin lel hi. Tua namminte in kuamah phattuamna piazo lo hi. Taanglai-in gaalman saman theite mithupi ahih mah bangin, tuhunin pilna-saang, mipil-zalian, sumhau khawhsa khamte mithupi milian ahi uh hi. Tulaitak US presidectial candidate minthang pen
taanglai aa silanam mivomte ahi hi. Mivom khat US presiden a suah ding pen a kaangten nasa mahmah uh hi. Whitehouse pen a min khelta ding ihi hiam? ci-in thudotna khelnono dong uh hi. Ahih hangin candidate ciangpen a khaktanzo omlo hi. Amah president hong kah hileh, American bek hilo, leitung buppi pen sila suan khat in a uk hiding hi.
Hunkhat lai-in, namlian, nampii leh, namnautaang , namneu-silanam ci-in kideidanna lian hi.
Zomite a tamzaw pen khua khatah khatvei hausa seemleh, nampi namlian bangin kingaihsun uh a, a tu- ata khangtampi dongin kisaktheih pih uh hi. Tuhunin leitung sum leh paai neihna thupi hi. USA gamah Company mihaute pen kumpi kihtak zahtak pen te ahi uh hi. Mihau sumneite in support pia kei leh kuamah picingzo lo uh hi. US mihau a tamzaw pen a Khangtawn aa Egypt te leh Babylon te sila ahi, Jews-Israel minamte ah hi. President kahnuam khempeuh in Jews minamte tawh kitheihna a bawl masak kul hi. Barrack Obama inzong " kei president kasuah leh, Israel minamte security nasiatakin kangaihsun ding hi," ci-in Israel president pa tungah kamciam piazo hi.
Tuhun pen Behkhat namkhat bektawh dintheih hilo hi. Gam leh minambup aading ngaihsut hunta ahi hi. Minampi suahna dingin pilna, hauhna, kipumkhatna kisam hi. Taanglai taangthuluite ngaihsun aa kimuhdah dinghun hinawnlo hi. Tua taangthute tungpanin pilna lakhun hizaw hi. Ukpinam leh mipi nautaang cihpen taangthului hi a, a beisa ahi hi. Hong tungding gamthak leh minamthak makai dingin mipil-misiam, minam a dawltuamtuam pumkhat sakhat sungah hong gawmzo ding, makai zon hun ahi hi.
a. Ki um leeng ki-um leeng aa, laizom silteng huantu bang ki um leeng ee.
b. Laizom silteng huantu bang ki-um leng a, koi-ah pilltaang bang natheh ta hiam aw e.
Thang Siangh. zogampalpi@yahoo.com
Sila, Inteng, Naseem hih namthum pen,amaumun ciatah kizang hi. Naseem ciatmah ahi hi. Thaman ngah naseem ahih ciat hangin, kumpi naseemte kithupi muh a, mimal naseemte kineumuh zawdeuh se hi. Company or Society kipawlna sungaa naseemte leh kumpi naseemte kilamdanglo hinapi, kumpi naseemte kitung-et zaw teitei hi. Tua pen amau power neihna hang ahi hi. Sila acihte pen galmat aa kikhawite leh zawnglua ahih ciangin akep-akhoite ahi uh hi. Tua bangte in thaman ngahlo uh hi. A Pute khutsungpan suahtakna a ngah matengin ahihkeh, amah leh amah aa adinzawh matengin naseemin om a, anne hi. Tua pen khangluite in, "innteng taimawh sila taimawh " naci uh hi. Mipum tuahkhak haksaatna tungtawn-a thupiang hi-a, Silanam ahihman aa Sila suak hituanlo hi.
Leitungah Sila minthang pen.
Jacob in a Pu Laban kiangah Zii thalawhin kum-14 sung naseem hi. A picinhun ciangin thusia tampi tawh kikhen uh hi. Israel minamte pen Egypt gamah kum-430 sung saltaang uh hi. Amaugam dingaa Pasian piak Canaangam tungkhin ahih hangin Babylon minamte khutsungah kumtul aasim om leuleu hi. Leitung suahtakna leh Khalam suahtakna piadingin Pasian in, ama Tapa kamciam hi. Messiah paihun ding zong ani-akha ciangtansa-in siangtakin hilh khol hi. Ahih hangin nial uh hi. Jesu hongpai petmah aa that uh hi. Jesu a thah ciangin Pasian heh a, Jerusalem khuapi leh Biakinnpi Rome galkapte susiasak hi. Khuapi leh Biakinnpi nusia-in Israel minamte leitungbup ah kithaangtheh hi. Luke21: 24 sungaa Jesu hilhkholhna hong taangtung pah hi. " Tem tawh thahna a thuak ding uh a, matna thuakin leitung khempeuhah kipuak ding uh hi. Jerusalem khuapi gamsimthamin kinusia ding hi." " Biakinnpi kicim dingaa suangkhat tungah suangkhat zong kingalo ding hi," ci-in gen hi.
Amaute a gampanin kihemkhia a, Gentile minam Arab mite in luah uh hi. Jerusalem biakinnpi a siangthopen munah Muslim biakinn kilam hi. Kumtulval a kinusia munah Arab mite na innteek khin uh hi. Jesu hong paini dongin Israel te piakik lo ding uh hi. Leitungah muhdahna a thuakpen Israel minam ahi hi. Pasian in leitung khuavak puak dingin pilna, hauhna, midangte tawh kibanglo-in pia hi. Amau zangkhial uh hi.
USA leh Russia te leitungdangte sangin a haatzawkna uh pen, Israel mipil pawlkhat nei uh ahihman ahi hi. Israelte pen Science lamah nasiatakin pil uh a, business nasep siam mahmah uh hi. Ahih hangin Pasian in minambup aa gupna ngah dingin kamciam pialo uh hi. Gupnathu ah eimau mahbang hilel hi. Leitungah sila aa sawt ompen te ahi hi. Leitungah minam gentheipen leh bawlsiatna namkim thuakpente ahi uh hi.
Leitung sila minthang pen African mivomte ahi hi. Europe minamte in pai-in tuuhon-bawnghon bang lelin a zalomin la a, Market ah zuak uh hi. A leite in thatanghaat tengkhia hi, taaisak hi, agik domsak hi. Hoih a sak ciangin kideekin lei uh hi. Tua bangaa sila khawite in nasiatakin naseem sak uh hi. Bawnglokho uk bangin saat uh hi. Gina a sak kei uleh kaaplumin that lel uh hi. Leitung sumzuak vante mah bangin amau neih silate tungah seal tum hi, a bil atkek uh hi. A ngawngah sikkol oksak uh hi. Kuangzawn sungah tuipia-in dawnsak hi. Abil vangah sikkhau khumin zalomin khauvawhsa-in kai uh hi.
1776 kumin American in Independant honglak ciangin Silakhawi Ngeina nakpi-in hong khiam uh hi. Pu hoih neite khutsungpanin Sila suahtakna ngah uh hi. Abraham Lincoln hong khan ciangin sila ngeina beisak hi. Mivomte population tammahmah ta a, a kaangte patau mahmah ta uh hi. State Secratary seem Colin Power pen, African American mite lakah a masapen ahi hi. Amah a tawp ciangin C. Rice numei mivom khatmah kah leuleu hi. US Senate leh Congress ah mivom 1/3 bang kihel zo hi. Tua bek thamlo-in American president dingin andidate lut thei uh hi. Tulaitak Democratic te candidate muanhuai pen mivom khangno Barrak Obama ahi hi. Mikaang minam lungsim khauhpaite patau petmah uh hi.
Africa minamte pen Sila dingin Pasian in bawllo hi. Amautha leh ngal tawh American gamthak luahzo loding ahih ciangin Pasian in Sila dinmun tawh leitang tungah vanga hizaw kha ding hi. US leitang alangpen mivomte aa cileng kikhiallua lo ding hi.
Ei Khamtungah.
Khamtungah zong sila om ngei hi. Gaal bengin kuanhun nei uh hi. Pawlkhat thatin pawlkhat hingmat uh hi. Ahingmatte pen sila suak pah hi. Leitungah silanam cih omtuanlo hi. Gaal a tuah ciangin a guallelte kimanin sila suak ahi hi. Puhoih neite pen kampha a, innkuanpih bangmahin omkhawm uh hi. Anlim-tuilim zong a kibangin ne uh hi. Zi leh ta innkuanpih guan uh hi. Inntuansak uh hi. Sila pawlkhat a Pute it lua ahih ciangin suahtakna a piakhun nangawnin paikhia nuamlo zong om hi.
Tedimgam leh Tonzanggam uksung missionnary kapailai-in khanghaam pawlkhat in hong gen ngei hi. Tua taangthute pen mikaang khanma hun ahi hi. Mikaang khanma-in khuasungah a gualzo peuh in uk hi. Gaalman thahaatte in a galmatte inntengin zang pah hi. Pu gilote in a silate ganhingkhawi bang lelin ngaihsun uh hi. Puhoihte kiangah silate pen sanggam leh innkuanpih ngeina bangin bawl uh hi.
Sila-pil neite leh sila-thahaat neite in minthan lawhin nakpi-in khantoh pih uh hi. Amau silate hangin khang kidemna ahzong gualtung tuangzo uh hi. Mun khatkhat ah silate hanken kuasahin kizang hi. A Pu a sih ciangin sila khat teitei tawh sikhawm hamtang hi. Innka dawnah konglam ngasa-in taangzom petsak a, thau tawh a nungpan kaaplum hi. A luangpen innsungah a Pu lukhungah tusak hi. A kha inzong sila-in zang hi, cih upna nei uh hi. Hihmunah silate pen bawng leh sial bangin hanken in kigo zen hi. Hih hun pen mikaangte hong tunma hun ahi hi.
Homalin ah missionary aa ka omlai-in, sanggam Thahdo pasal khat tawh ka holim uh hi. " Bang hangin eimite innnih innthumin teeng bek zawzen nei vua, sang kihong theilo, zato kihong theilo, project khat peuhpeuh kisem theilo, Biakna nangawn pawlpi kiphut theilo," kacih ciangin, " Awi-aa-pu, Eimite pennn nidangin kigualzo mama, kitatsia lua lawmlawm ahih vangin samsiatna kithuak hi, " hong ci hiau hi. Nidangin TYhahdo leh Naga kido hi. Tua hunin Thahdote inn tampipi-in kitengkhawm hi. Meisehthau [ zothau] kinei a, kigualzo mama hi. Galmatte pen ekciang tungin kisawl hi. Anneek ciangin lumsakin tutphahin kinei hi. Tun pen kilemna omlo inn-10 zong kitengkhawm theilo, Naga ho in ei khengpaih mangta , ci-in hong gen hi.
Leitungah silanam omlo hi, amau khansung guallelte sila suak ahi hi. Ei khangah naupi-namneu kibang khin lel hi. Tua namminte in kuamah phattuamna piazo lo hi. Taanglai-in gaalman saman theite mithupi ahih mah bangin, tuhunin pilna-saang, mipil-zalian, sumhau khawhsa khamte mithupi milian ahi uh hi. Tulaitak US presidectial candidate minthang pen
taanglai aa silanam mivomte ahi hi. Mivom khat US presiden a suah ding pen a kaangten nasa mahmah uh hi. Whitehouse pen a min khelta ding ihi hiam? ci-in thudotna khelnono dong uh hi. Ahih hangin candidate ciangpen a khaktanzo omlo hi. Amah president hong kah hileh, American bek hilo, leitung buppi pen sila suan khat in a uk hiding hi.
Hunkhat lai-in, namlian, nampii leh, namnautaang , namneu-silanam ci-in kideidanna lian hi.
Zomite a tamzaw pen khua khatah khatvei hausa seemleh, nampi namlian bangin kingaihsun uh a, a tu- ata khangtampi dongin kisaktheih pih uh hi. Tuhunin leitung sum leh paai neihna thupi hi. USA gamah Company mihaute pen kumpi kihtak zahtak pen te ahi uh hi. Mihau sumneite in support pia kei leh kuamah picingzo lo uh hi. US mihau a tamzaw pen a Khangtawn aa Egypt te leh Babylon te sila ahi, Jews-Israel minamte ah hi. President kahnuam khempeuh in Jews minamte tawh kitheihna a bawl masak kul hi. Barrack Obama inzong " kei president kasuah leh, Israel minamte security nasiatakin kangaihsun ding hi," ci-in Israel president pa tungah kamciam piazo hi.
Tuhun pen Behkhat namkhat bektawh dintheih hilo hi. Gam leh minambup aading ngaihsut hunta ahi hi. Minampi suahna dingin pilna, hauhna, kipumkhatna kisam hi. Taanglai taangthuluite ngaihsun aa kimuhdah dinghun hinawnlo hi. Tua taangthute tungpanin pilna lakhun hizaw hi. Ukpinam leh mipi nautaang cihpen taangthului hi a, a beisa ahi hi. Hong tungding gamthak leh minamthak makai dingin mipil-misiam, minam a dawltuamtuam pumkhat sakhat sungah hong gawmzo ding, makai zon hun ahi hi.
a. Ki um leeng ki-um leeng aa, laizom silteng huantu bang ki um leeng ee.
b. Laizom silteng huantu bang ki-um leng a, koi-ah pilltaang bang natheh ta hiam aw e.
Thang Siangh. zogampalpi@yahoo.com
Sunday, August 17, 2008
KAPTEEL KHUASAATNA TAANGTHU.
KAPTEEL KHUASAATNA TAANGTHU.
Khuamin leh khuamun.
1867-kumin Pu Thuam Thawng in mi-30 tawh Kapteel khua saat hi. Tua munah Kapteel a kici mikhat teeng khin hi. Tua ahih ciangin " Kapteel khua cipah ni," ci-in thukim uh hi. Khuathak saat ding pen Pu Thual Tun in awilo ahihciangin, lakhat tawh Pu Thuam Thawng nakha hi.
a. Limbelh in mabang pan e vangkhua khon e, Saitui vangkhua lailen ding ka-awilo e.
b. Ningzu aisa siah bang niang naphung lai-ah solsa deihluat hawm ih taan kha ding hi e..
Pu Thuam Thawng lungkimzo tuanlo ahihmanin gungaal nitumnalam veel sak hi. "Mual in um aa gaaldai hoih hi. A gam zong sabenna dingin hoih hi" acih ciangin Pu Thuam Thawng thukimin gamsaat uh hi.
Kapteel pen Dawi maw, mihing maw???
Hihmun aa teengpa in, "Kapteel hing," ci-in, hualsing golpipi hualvanvan hi, ci-in kigen hi. Kapteel in lovaat thacial a, a nu kiangah, " Taangngaan beelsagih nahuan inla, zu beelsagih naluup in, " ci hi. A ciah ciangin amahguakin hong tungaa, " nalawmte ee" acih ciangin, " kacih bangin ankuang sagih leh meh kuangsagih lui in," acih ciangin tua bangin hih hi. Annete a kimuhloh hangin an kinegai hi. Kapteel in Pawlhpii a kici gamkuampi khat nikhat sungin zomai lel hi.
Kapteel sihna.
Tua laitakin Suangpheigam kiiltungzaang khat om hi. Bualtung kici hi. Tua laiah minam tuamkhat teeng hi. Kulh tawh ki-um ahih ciangin kuamah a simzo omlo hi. Kapteel a kicipa in, " ken simzo ning" ci-in a sim dingin kuan hi. Kulhpua panin a ngiim bek zong, laulua in puukzaizai hi, ci uh hi. Mitampi a thah khit ciangin, kulhsung aate luhkhia dingin, zusa-in kibawl a, kulhvangah lut hi. Kulhvangah a lut ciangin vaithaangah awkin si hi. Hilai-ah Kapteel a kicipa taangthu bei hi. Amah pen Dawilawmnei bek hilo-in dawi hidingin ki um hi. Bang hang hiam cihleh mihing kimlai zusa suak thei ahihmanin.
Taanglai-in taangthu tuamtuamte ah Dawinumei a tenpih zong om hi, ci-in kigen hi. Piangthei takpi ding hi. Taangngaan beelsagih leh zu beelsagih gai hi. Nikhat sungin Pawlhpii gamkuam khat vaatzo hi. HUalsing luangte adeihdeihin hualzo hi. Leitung aa mihaatpente kicial leh zong mi-10 inzong taangngaan beelkhat gaizo nailo kha ding hi.
Kapteelgam kingahna.
Kapteelgam pen Falam khua Pu Con Bik gam ahi hi. Pu Con Bik kiangah siah kipia peuhleh khua kisaat thei ci ahih ciangin, Taangpuate Pu En Ngaih in Suangzaang Hausapa, Gualnamte ahi, Pu Zil KIl kamphenin la a, gamngen dingin pai uh hi. Pu Con Bik in sial 120 nangen hi. Behiangkum simin sial zabo khatta siah piak dingin thukim uh hi.
Tua laitakin Pu Thuam Thawng in Khuangleeng Hausapa tanu sal-a amat Vanchingi a keplaitak ahi hi. Khuangleeng Hausapa in hihthu a theih ciangin Pu Con Bik kiang napai a, " hong matsak katanu Vanchingi nakal hamtang in," ci hi. Kapteelgam leina lakah Vanchingi kipiakhia hi. Vanchingi pen sial-100 taangin sang a, hih a nuai aa teng pen sial-20 tangin saang hi.
Sial-100 ... ... ... ... VanChingi.
Sial-20 ... ... ... ... Saiha kopkhat.
Zangsial suan sialkhat.
Thau lawngkhat.
Zam khat leh daakbukhat.
Sialkhat.
Kapteelgam dingaa kipia.
* Nisuahna lamah meiteigun dung.
* Saklamah Musil mualdung.
* Nutumna lamah Innbuuk leh Lennupa.
* Khanglamah Lualui paisuk gunsun dongin napia hi.
A ciah ciangin Sialtei khat leh Thallupdak kici daktal khat puasak hi. Launa naneih uleh patauko nadingin daktal tum un, ci-in vaikhak hi.
Vanchingi a ngahna.
Saizaang ah Pu Thuam Thawng a khanlaitakin a salkhawi Vaipheite taisuah a, Khuangleeng dongin vakan hi. " Thuam Thawng aw, nasaltaai kan aa nong pai namaizum lo hiam? Khuasilgam Leisante Hau Pum kathah nathei hiam, " cihleh minsialin kogawp hi. " Tuate nathah takpi mah hiam" acih ciangin, " that mah ingh." cikik hi.
Tua khit ciangin, Pu Thuam Thawng in, " Hing kha kabeisak diam? Dai veel un," ci-in sawl hi. Daiveelte hong ciah ciangin galsim dingin kuankik uh hi. Hausapa tanu Vanchingi man a, hong ciah uh hi.
Pu Con Bik tungah sutpom.
Kapteel lungnuam mahmah aa omlaitakin kilemlohna hong piang a, mikhat in gaal vala hi. Tua laitakin Kapteel khua-ah kulhpi thum om hi. Khuamun sungah Haat Langte Pu Gen Sut kulh, khualai-ah Sukte Pu Thuam Thawng kulh, a niamlah Gualnamte Pu Vum Khup kulh kici hi. Khualulam Sihsiipveeng phei teng ah Vaipheeite inn-60 teeng hi. Hualngo-gaal ci-in hong sim a, mi-59 si hi. Tampi hingmat uh hi. Gaal lapa in innpi saksiah bek simin sawl hi. Tua mah bangin innpi saksiah bek sim uh hi.
Tua gaallapa taangthu hibang ahi hi. Logam ciing-3 deih a, Pu Thuam Thawng in tanzo kei niteh, Gen Suut in tan hen, a cih ciangin Gen Suut in tan hi. Tua teng lungkim lo-in galla ahi hi. Hausa upa theihloh-in zankhatthu in nataimang uh hi. Hibangin gaallauna hong tam ciangin, Pu Thuam Thawng in Suutpom dingin, Songpuutte Pu Neek Lut leh Kamphen dingin Simzaangkhua Kip Thuam te Pu Con Bik kiangah paisak hi. A paite-nih tungah Pu Con Bik in thupha tampi napia hi.
Amaute hong ciahkik ciangin Kapteel khua hong simlai a, a hingmat a sanggamte uh Seipi khua ah om ahihmanin, Seipi hong baang uh hi. Seipi Hausapa Dal Chung Nung in natawng gawp a, " ih gaalte hong pai hi," ci-in man a, taangcilciangin khuh uh a, a tungah aakngawngsi taakhin a zun uh peekin khum uh hi. Seipi pan hong ciah u ciangin, amau inn tunglo-in Pu Thuam Thawng inn tungmasa hi. A thu khempeuh a gen ciangin Pu Thuam Thawng in aakluisan khattawh lingaat hi.
Seipi ah bumtuak ahih ciangin Pu Gim Thang lungkimlo-in sialzabo khattawh sialsung-aih sak a, hinglapna bawl uh hi. A hinglapni taangsuah nitaak ciangin , bikhalaap a suah phetin lakhat tawh hong pusuak hi.
a. Mun-inn ngaihman sawnte ngaihman dota kankong hong ing e.
b. Ningzu aisa buan bang niang e, lawhciang khuklu in nei ing e, hente sang lah thang zawng e.
Sutpom hong tunzawh kha-7 a cin ciangin Pu Neek Lut si hi. Sutpom dingaa a sawllai-in, " na sihleh sialpi khat tawh hong gui ning," ci-in kamciam pia hi. Sialpi sangin Taamcip leitang deihzaw ahih ciangin, tudongmah in a taten neilai uh hi.
Myo-uk suam.
Kapteel khua pen 1867 kumin kisaat hi. 1880 kumin Mang Cin tapa Am Thang in Nuamkhua saat hi. Tu-in Muizawl kici hi. Pu Thuam Thawng sanggamnu Zaang Ciin zong Muizawl ah teeng hi. 1888 kumin mikaangte hong khang a, Tulsuk panin Phatzaang hong nawkto-in Leisan ah Thaang ah kido uh hi. January 23, 1889 kumin Gen. Founce leh Major Raikes makai a, galkap honkhat tawh Thuamvum ah giahphual saat uh hi. Tua kum February kha ni-4 ni-in Khuasak la hi. Ni-13 ni ciangin Buanman, Thuklai, Saizaang la a, Meiteigun nisuahna lam khempeuh Mikaangte khutsung tung khin hi.
Meitei gungal nitumnalam nawt dingin kipan uh hi. Tuahun in Khamtunggam ah inn-100 a pha khua tawm mahmah lai hi. Kapteel khua inn-300 mpha khin hi. Kulpi zong thum om hi. Mikaang kumpite pen Kapteel innpipa Pu Thuam Thawng tawh kilemna bawlin sialmei-in kivaat uh hi. Thukimna kamciam bawl ahi hi. Kapteel ah Mikaangten zumphut dingaa Pu Thuam Thawng in a ngeina bangin siahkai dingin thukim uh hi.
Pu Thuam Thawng zi pen Sihzangmi Khua Vung ahi hi. Tanih aneih khit ciangin Thang Ning in heek hi. Khua Vung in atheih ciangin hehlua a, a tanihte tawh kentuakin kisihbawl uh hi. Hihthu tawh kisai Sihzangte in nasa mahmah uh hi.
Gungal Kapteel khua ah Myo-ukzum koih ding cihthu leh Pu Thuam Thawng in siahkai ding cihthu, mikaang kumpi tawh kithukimna a zak ciangin Sihzanglamte patau uh hi. Tua bang hi thong leh Kapteel kizo nawnlo ding hi, ci-in hih geelna buaisak ding ngaihsun uh hi. Tua laitakin kamphenpa pen Sihzangte Khai am ahi hi.
Mikaang kumpite leh Pu Thuam Thawng sutuah dingin kamphenpa vapai hi. " Kumpite in nang lianpen ding hong cihpen hong khemna ahi hi, um ken" ci hi. Nangzaa suankhia dinga Myo-uk hong koih ding hizaw hi. Nata Pau Dal in gaal mannailo hilo hiam, lampi ah nasuaam lecin galman hipah ding hiteh," ci hi. " Pu Thuam Thawng in, " Mikaang kumpi tawh kiciamna nei khinzo ing," ci-in nial hi. Thang Niing in kamphenpa thugen um mahmah a, " Pau Dal gaalmat nang hihthulo a dang om kei, " ci-in a pasal nakpi-in tawsawn hi. A zi'n phuphu ahihmanin a sawt ciangin lungkimlo pipi-in mang hi. Pu Thuam Thawng a kuan khiatni zingsangin, Thang Niing in aniik ciangdawnah pei a, " Na Pu uh gaalsim dingin kuankhia hi,a zui ngamlo ten kaniik teng un," ci-in kiko hi.
Pu Thuam Thawng a zawh khit ciangin kamphenpa Kawlpi zumah taisuk a, Myo-ukpa kiangah, " Thuam Thawng in saiha leh cinghpi kingo hong pia nuam hi, hong lahen," ci hi, acih ciangin, Myo-ukpa lungdam mahmah a, lungdam thuhna dingin dangka Ks 3000/- puato pah hi.
October8, 1892 ni-in Myo-uk dingin Rakhine te U Tun Win paisak hi. Kamphen dingin Aung Kyi leh nungzui-28 hong tonpih hi. Sihzaang Khup Pau leh a tapa Khai Kam in Myo-ukpa sakolkhau kaihsak a, hong mapi uh hi. Pu Thuam Thawng leh a tapa Pau Dal leh Kapteel pan pasal thahaat teng tawh Thuklai leh Pumva kikaal Suangvum or Naalmual ah napang uh hi. A kiciamnamun a tun ciangin Khai Kam in dangka-kuang khelin aman pua a, " Kanungsiah teng vawt ta vo," ci-in dangka kuang tawh taai hi. Pau Dal in Myo-ukpa kaptuukin a nagawngtan pah hi.
Mikaang kumpite hongpai a, Kapteel khua haal hi. Pu Thuam Thawng te pata manin thong ah khum uh hi. 1893 kumin Pu Thuam Thawng si hi. 1894 kumin a tapa Pau Dal sileuleu hi. Kawl kumpite maivilna dingin mikaaang kado ci-in taangthu tuamtuam tampi a kigelh hangin mikaang kumpi ngawng tanngam pen Khamtungah Pu Thuam Thawngte pata bek om hi. Khai Kamte pata in dangkabawm tuah uh a, mikaang dolo uh hi. Hampha bilbel suak hi. Pu Thuam Thawng in laphuak a,
a. Thahtheih kathah thahmawh kathah thahminthang bel kei hing e.
b. Tuanglam lai-ah a lian bel zong taang in siam bang meet ing e..
Khamtung khuasaat dan leh thupiang tuamtuam sut leng a zaknop tampi omlai ding hi. Kei ciamtehna bangin kicinglopi-in hiteng hong suaksak kahi hi.
Thangsiangh. zogampalpi@yahoo.com
Khuamin leh khuamun.
1867-kumin Pu Thuam Thawng in mi-30 tawh Kapteel khua saat hi. Tua munah Kapteel a kici mikhat teeng khin hi. Tua ahih ciangin " Kapteel khua cipah ni," ci-in thukim uh hi. Khuathak saat ding pen Pu Thual Tun in awilo ahihciangin, lakhat tawh Pu Thuam Thawng nakha hi.
a. Limbelh in mabang pan e vangkhua khon e, Saitui vangkhua lailen ding ka-awilo e.
b. Ningzu aisa siah bang niang naphung lai-ah solsa deihluat hawm ih taan kha ding hi e..
Pu Thuam Thawng lungkimzo tuanlo ahihmanin gungaal nitumnalam veel sak hi. "Mual in um aa gaaldai hoih hi. A gam zong sabenna dingin hoih hi" acih ciangin Pu Thuam Thawng thukimin gamsaat uh hi.
Kapteel pen Dawi maw, mihing maw???
Hihmun aa teengpa in, "Kapteel hing," ci-in, hualsing golpipi hualvanvan hi, ci-in kigen hi. Kapteel in lovaat thacial a, a nu kiangah, " Taangngaan beelsagih nahuan inla, zu beelsagih naluup in, " ci hi. A ciah ciangin amahguakin hong tungaa, " nalawmte ee" acih ciangin, " kacih bangin ankuang sagih leh meh kuangsagih lui in," acih ciangin tua bangin hih hi. Annete a kimuhloh hangin an kinegai hi. Kapteel in Pawlhpii a kici gamkuampi khat nikhat sungin zomai lel hi.
Kapteel sihna.
Tua laitakin Suangpheigam kiiltungzaang khat om hi. Bualtung kici hi. Tua laiah minam tuamkhat teeng hi. Kulh tawh ki-um ahih ciangin kuamah a simzo omlo hi. Kapteel a kicipa in, " ken simzo ning" ci-in a sim dingin kuan hi. Kulhpua panin a ngiim bek zong, laulua in puukzaizai hi, ci uh hi. Mitampi a thah khit ciangin, kulhsung aate luhkhia dingin, zusa-in kibawl a, kulhvangah lut hi. Kulhvangah a lut ciangin vaithaangah awkin si hi. Hilai-ah Kapteel a kicipa taangthu bei hi. Amah pen Dawilawmnei bek hilo-in dawi hidingin ki um hi. Bang hang hiam cihleh mihing kimlai zusa suak thei ahihmanin.
Taanglai-in taangthu tuamtuamte ah Dawinumei a tenpih zong om hi, ci-in kigen hi. Piangthei takpi ding hi. Taangngaan beelsagih leh zu beelsagih gai hi. Nikhat sungin Pawlhpii gamkuam khat vaatzo hi. HUalsing luangte adeihdeihin hualzo hi. Leitung aa mihaatpente kicial leh zong mi-10 inzong taangngaan beelkhat gaizo nailo kha ding hi.
Kapteelgam kingahna.
Kapteelgam pen Falam khua Pu Con Bik gam ahi hi. Pu Con Bik kiangah siah kipia peuhleh khua kisaat thei ci ahih ciangin, Taangpuate Pu En Ngaih in Suangzaang Hausapa, Gualnamte ahi, Pu Zil KIl kamphenin la a, gamngen dingin pai uh hi. Pu Con Bik in sial 120 nangen hi. Behiangkum simin sial zabo khatta siah piak dingin thukim uh hi.
Tua laitakin Pu Thuam Thawng in Khuangleeng Hausapa tanu sal-a amat Vanchingi a keplaitak ahi hi. Khuangleeng Hausapa in hihthu a theih ciangin Pu Con Bik kiang napai a, " hong matsak katanu Vanchingi nakal hamtang in," ci hi. Kapteelgam leina lakah Vanchingi kipiakhia hi. Vanchingi pen sial-100 taangin sang a, hih a nuai aa teng pen sial-20 tangin saang hi.
Sial-100 ... ... ... ... VanChingi.
Sial-20 ... ... ... ... Saiha kopkhat.
Zangsial suan sialkhat.
Thau lawngkhat.
Zam khat leh daakbukhat.
Sialkhat.
Kapteelgam dingaa kipia.
* Nisuahna lamah meiteigun dung.
* Saklamah Musil mualdung.
* Nutumna lamah Innbuuk leh Lennupa.
* Khanglamah Lualui paisuk gunsun dongin napia hi.
A ciah ciangin Sialtei khat leh Thallupdak kici daktal khat puasak hi. Launa naneih uleh patauko nadingin daktal tum un, ci-in vaikhak hi.
Vanchingi a ngahna.
Saizaang ah Pu Thuam Thawng a khanlaitakin a salkhawi Vaipheite taisuah a, Khuangleeng dongin vakan hi. " Thuam Thawng aw, nasaltaai kan aa nong pai namaizum lo hiam? Khuasilgam Leisante Hau Pum kathah nathei hiam, " cihleh minsialin kogawp hi. " Tuate nathah takpi mah hiam" acih ciangin, " that mah ingh." cikik hi.
Tua khit ciangin, Pu Thuam Thawng in, " Hing kha kabeisak diam? Dai veel un," ci-in sawl hi. Daiveelte hong ciah ciangin galsim dingin kuankik uh hi. Hausapa tanu Vanchingi man a, hong ciah uh hi.
Pu Con Bik tungah sutpom.
Kapteel lungnuam mahmah aa omlaitakin kilemlohna hong piang a, mikhat in gaal vala hi. Tua laitakin Kapteel khua-ah kulhpi thum om hi. Khuamun sungah Haat Langte Pu Gen Sut kulh, khualai-ah Sukte Pu Thuam Thawng kulh, a niamlah Gualnamte Pu Vum Khup kulh kici hi. Khualulam Sihsiipveeng phei teng ah Vaipheeite inn-60 teeng hi. Hualngo-gaal ci-in hong sim a, mi-59 si hi. Tampi hingmat uh hi. Gaal lapa in innpi saksiah bek simin sawl hi. Tua mah bangin innpi saksiah bek sim uh hi.
Tua gaallapa taangthu hibang ahi hi. Logam ciing-3 deih a, Pu Thuam Thawng in tanzo kei niteh, Gen Suut in tan hen, a cih ciangin Gen Suut in tan hi. Tua teng lungkim lo-in galla ahi hi. Hausa upa theihloh-in zankhatthu in nataimang uh hi. Hibangin gaallauna hong tam ciangin, Pu Thuam Thawng in Suutpom dingin, Songpuutte Pu Neek Lut leh Kamphen dingin Simzaangkhua Kip Thuam te Pu Con Bik kiangah paisak hi. A paite-nih tungah Pu Con Bik in thupha tampi napia hi.
Amaute hong ciahkik ciangin Kapteel khua hong simlai a, a hingmat a sanggamte uh Seipi khua ah om ahihmanin, Seipi hong baang uh hi. Seipi Hausapa Dal Chung Nung in natawng gawp a, " ih gaalte hong pai hi," ci-in man a, taangcilciangin khuh uh a, a tungah aakngawngsi taakhin a zun uh peekin khum uh hi. Seipi pan hong ciah u ciangin, amau inn tunglo-in Pu Thuam Thawng inn tungmasa hi. A thu khempeuh a gen ciangin Pu Thuam Thawng in aakluisan khattawh lingaat hi.
Seipi ah bumtuak ahih ciangin Pu Gim Thang lungkimlo-in sialzabo khattawh sialsung-aih sak a, hinglapna bawl uh hi. A hinglapni taangsuah nitaak ciangin , bikhalaap a suah phetin lakhat tawh hong pusuak hi.
a. Mun-inn ngaihman sawnte ngaihman dota kankong hong ing e.
b. Ningzu aisa buan bang niang e, lawhciang khuklu in nei ing e, hente sang lah thang zawng e.
Sutpom hong tunzawh kha-7 a cin ciangin Pu Neek Lut si hi. Sutpom dingaa a sawllai-in, " na sihleh sialpi khat tawh hong gui ning," ci-in kamciam pia hi. Sialpi sangin Taamcip leitang deihzaw ahih ciangin, tudongmah in a taten neilai uh hi.
Myo-uk suam.
Kapteel khua pen 1867 kumin kisaat hi. 1880 kumin Mang Cin tapa Am Thang in Nuamkhua saat hi. Tu-in Muizawl kici hi. Pu Thuam Thawng sanggamnu Zaang Ciin zong Muizawl ah teeng hi. 1888 kumin mikaangte hong khang a, Tulsuk panin Phatzaang hong nawkto-in Leisan ah Thaang ah kido uh hi. January 23, 1889 kumin Gen. Founce leh Major Raikes makai a, galkap honkhat tawh Thuamvum ah giahphual saat uh hi. Tua kum February kha ni-4 ni-in Khuasak la hi. Ni-13 ni ciangin Buanman, Thuklai, Saizaang la a, Meiteigun nisuahna lam khempeuh Mikaangte khutsung tung khin hi.
Meitei gungal nitumnalam nawt dingin kipan uh hi. Tuahun in Khamtunggam ah inn-100 a pha khua tawm mahmah lai hi. Kapteel khua inn-300 mpha khin hi. Kulpi zong thum om hi. Mikaang kumpite pen Kapteel innpipa Pu Thuam Thawng tawh kilemna bawlin sialmei-in kivaat uh hi. Thukimna kamciam bawl ahi hi. Kapteel ah Mikaangten zumphut dingaa Pu Thuam Thawng in a ngeina bangin siahkai dingin thukim uh hi.
Pu Thuam Thawng zi pen Sihzangmi Khua Vung ahi hi. Tanih aneih khit ciangin Thang Ning in heek hi. Khua Vung in atheih ciangin hehlua a, a tanihte tawh kentuakin kisihbawl uh hi. Hihthu tawh kisai Sihzangte in nasa mahmah uh hi.
Gungal Kapteel khua ah Myo-ukzum koih ding cihthu leh Pu Thuam Thawng in siahkai ding cihthu, mikaang kumpi tawh kithukimna a zak ciangin Sihzanglamte patau uh hi. Tua bang hi thong leh Kapteel kizo nawnlo ding hi, ci-in hih geelna buaisak ding ngaihsun uh hi. Tua laitakin kamphenpa pen Sihzangte Khai am ahi hi.
Mikaang kumpite leh Pu Thuam Thawng sutuah dingin kamphenpa vapai hi. " Kumpite in nang lianpen ding hong cihpen hong khemna ahi hi, um ken" ci hi. Nangzaa suankhia dinga Myo-uk hong koih ding hizaw hi. Nata Pau Dal in gaal mannailo hilo hiam, lampi ah nasuaam lecin galman hipah ding hiteh," ci hi. " Pu Thuam Thawng in, " Mikaang kumpi tawh kiciamna nei khinzo ing," ci-in nial hi. Thang Niing in kamphenpa thugen um mahmah a, " Pau Dal gaalmat nang hihthulo a dang om kei, " ci-in a pasal nakpi-in tawsawn hi. A zi'n phuphu ahihmanin a sawt ciangin lungkimlo pipi-in mang hi. Pu Thuam Thawng a kuan khiatni zingsangin, Thang Niing in aniik ciangdawnah pei a, " Na Pu uh gaalsim dingin kuankhia hi,a zui ngamlo ten kaniik teng un," ci-in kiko hi.
Pu Thuam Thawng a zawh khit ciangin kamphenpa Kawlpi zumah taisuk a, Myo-ukpa kiangah, " Thuam Thawng in saiha leh cinghpi kingo hong pia nuam hi, hong lahen," ci hi, acih ciangin, Myo-ukpa lungdam mahmah a, lungdam thuhna dingin dangka Ks 3000/- puato pah hi.
October8, 1892 ni-in Myo-uk dingin Rakhine te U Tun Win paisak hi. Kamphen dingin Aung Kyi leh nungzui-28 hong tonpih hi. Sihzaang Khup Pau leh a tapa Khai Kam in Myo-ukpa sakolkhau kaihsak a, hong mapi uh hi. Pu Thuam Thawng leh a tapa Pau Dal leh Kapteel pan pasal thahaat teng tawh Thuklai leh Pumva kikaal Suangvum or Naalmual ah napang uh hi. A kiciamnamun a tun ciangin Khai Kam in dangka-kuang khelin aman pua a, " Kanungsiah teng vawt ta vo," ci-in dangka kuang tawh taai hi. Pau Dal in Myo-ukpa kaptuukin a nagawngtan pah hi.
Mikaang kumpite hongpai a, Kapteel khua haal hi. Pu Thuam Thawng te pata manin thong ah khum uh hi. 1893 kumin Pu Thuam Thawng si hi. 1894 kumin a tapa Pau Dal sileuleu hi. Kawl kumpite maivilna dingin mikaaang kado ci-in taangthu tuamtuam tampi a kigelh hangin mikaang kumpi ngawng tanngam pen Khamtungah Pu Thuam Thawngte pata bek om hi. Khai Kamte pata in dangkabawm tuah uh a, mikaang dolo uh hi. Hampha bilbel suak hi. Pu Thuam Thawng in laphuak a,
a. Thahtheih kathah thahmawh kathah thahminthang bel kei hing e.
b. Tuanglam lai-ah a lian bel zong taang in siam bang meet ing e..
Khamtung khuasaat dan leh thupiang tuamtuam sut leng a zaknop tampi omlai ding hi. Kei ciamtehna bangin kicinglopi-in hiteng hong suaksak kahi hi.
Thangsiangh. zogampalpi@yahoo.com
Subscribe to:
Posts (Atom)
