ETTEH HUAITE ENTEH...2

ETTEH HUAITE ENTEH...2.

Nikhat dainawl innkhat hong kaangh hi. Khuahun a sat mahmah laitak hi. Nitak naigiat hunpawl hi-a, vok-an huanna meipuak leengthem pen pat kaapsa a kikoih tung tu hi. Tua panin mei hong kuang hi. Taangkona tausaang tungpanin daak saatin kiko hi. Meiikaatna inn koilai-ah om ci-in kuzaza-in hilh hi. Innkiim dimin khangno pheikhai thei khempeuh hong kim ziau hi. Numeite in tuiphel khatciat tawh hong delh uh hi. Pasalte in tuiphel saangkhia-in buak tawh saat tawh thuah hi. Meikuang baba pen tawmvei sungin saatlum hi. Kawlte khat in, " ko Kawl khua hipeuhmah leh khuazangin tum ding hi" ci-in gen hi.

Khatvei meigong khat cisanatin si hi. Kei zong khuultote huh dingin kapai hi. Kei, niangbeel phungah hong tusak hi. A khawl masasa haitehin numeino khat in hawm hi. Khangnote pen a seemnuam kituhin kilai dekdek uh hi. Naikhat sungin hongzo ziau uh hi. Kawlgam ah Christian hankhuuk tawhna munah zong kapai ngei hi. Khat in toto a, adangte ciamnuih genin nui nahnah uh a, khelh ding ngaihsun lo uh hi. Upa khat in a khel ding bankaih ngiat hi.

Khatvei, sanggam sumbawl khat kithat a, Aizawl khuataw ah kiphum hi. A sawtlo-in a luang la dingin kapai uh hi. 1963 kum ahi hi. Mihing guk kapha uh hi. Tua hunin Tonsim leh Aizawl kikal khakhat jeep khatvei bek paizo hi. Kumpi in lamlian a tawhsan laitak ahi hi. Khe tawh nisagih kapai zen uh hi.

Misi kaphot ciangun a luangbupin muatlo-in na omlai ahihmanin, niangteh kuanghawm lian mahmah sungah kaguan khit u ciangin guatawn tawh puak ding ahi hi. Tua laitakin Aizawl khua ah Chief Minister Pu Saplawnga in a sep laitak ahi a, ama huhna tawh Taiban kangah uh hi. Khuakhat khit khuakhat kisaang lianlian uh hi. Ciaugun gal eilamah nga-in hong nusia uh hi.

Tamvei a puakha kidemin sauvei a puazo kituh uh hi. Pawlkhat mapai-in kisut uh hi. Hibang kidemna pen ahoih kidemna hi a, minam domto ding kidemna ahi hi. Kavante uh hong saangkhia-in hong guakpai sak uh hi. Hih mite tlawmngai hi, ci-in buhtang, meh hong pia uh hi. Kapailam un, Ciau panin niguk kapai pen u, nungdelhin taitai kahihman un, nilii sungin katung uh hi.

Ciau panin Haimual khua dong kapua uh hi. Haimual khua katun uh ciangin Taiban kangen uh hi. Taibaan pia cih genvet kei o, misi pua ci-in zing hong tung sak lo hi. Haimual panin Tuitawh kadelh uh hi. Gamsi hong kipua ci-in inn simah sawlhing nabaang uh hi.

Christianity zatsiam ni.

Sanggam Mizote pen Christianity zatdan siam a, limci takin na khansuah uh hi. Etteh huaite enteh leng hoih hi. Tua kacih ciangin Mizo suak ding, Mizo kampau ding kacihna hilo hi. Etteh tuakte enteh ding hang a, sepkhop theihna khempeuhah seemkhawm ding hang a, unau bangin i om ding hi.Ngeina hoih tawh minampi i suahna dingin kipuahin ih khanpih ding hi.

Kapteel khua-ah Lawki beina pawi kibawl hi, ci-in email sungah kasim hi.Ih khantoh pih zotam, ci-in lawptakin kangaihsun hi.

Sanggam Mizote kipiakzawhna uh bulpi pen Christianity zatsiamna pan hikhin siksek hi. Mi hehpi theihna, thumaanna, pumpi thatang leh neihsa dongin piakngamna, gam leh minam huutna dingin nuntakna dong piakngamna zungpi pen Christian zungkhakna pan ahi hi.

Jesu thuhilhna khempeuh practical a zat dingin sin pah uh hi.Zong siam uh hi. "Nangma pumpi na it bangin na innveengte it in" " Nang tung a hong kibawl ding na deih bangin midangte tungah bawl in," Keimin tawh naupangno khat tui haikhat nasuah ciangin Kei tungah hong bawl nahi hi"cih kammalte nuntak pih hi.

Biakna, Pawlpi kibanglo cihtawh kideidanna omtuan lo hi. Pasian thuzui Christian ahihna uh thupi sak zaw hi.Tua ahih ciangin gam leh minam buppi-in thupha ngah a, tu-in ei phakzawh ding dinmunah omnawn lo hi. Kawlgam pan a pai anduh gilkialte nasep naguan uh a, hoihtakin omna napia uh hi. Guta tatsia ukzawh lohin omphial taleh, " kan unau te" ci-in panpih tantan uh hi. Uzaw lungsim, nampi lungsim icih pen tua hipah hi.

Mitkeuh ding a kithawi Zomite in, kiim leh pam khuadakin ahoih khempeuh i enteh ding hi. Pawlkhatte in Zomi hoihna bek gen ding, ahoihlohna genlo ding a ci om hi. Socialist kumpi mittaw sak policy ahi hi.

USA taangthu sutte in, abeisa hun a thanemna a gallelhna, azawhna sutsutin, kipuah uh hi. Enzong i thanemna kanin, a damna ding zatui zong imuh dongin zonding hanciam ding ahi hi.

Zomi it kineih tampi pen neektawm zonna hi a, tua bang mite hangin kikhenkhapna nasia tektek zaw hi. Kampau zui-in kikhen hi. Beh leh phung zui-in kikhen hi. Amun-amual zui-in kikhen hi. Tulaitakin Zomi a khenkham pen Christian kinensuahna pan ahi hi. Zomi Christian kilomkikna panin kipumkhatna hong om pan ding hi.

Ih Christianity zangsiam ni.

Thang Siangh.