LEITUNG PILNA TAWH KIVAKNA

LEITUNG PILNA TAWH KIVAKNA.

Laisinna Sang pan kingah pilna, pianpih pilna, experience kici nawkkhakna tungtawn-a kingah pilna tuamtuam om hi. Bangbang hileh tua pilna khempeuh zangsiam leng hoih-a, pianpih pilna tawphah aa sinna saang neite picingzaw hamtang hi. Degree kibang ciatciat khantohna zekai gamneute leh a khangto masa Europe minamte phylosophy pen van leh lei zahin kikhai hi. Gam leh minam leh Pawlpi aadingin pilna i kisam lua hi.

Pilna Sang pan kingah pilna kaneihloh nasa lua kahihmanin, Upper Myanmar president tavuan hong kisuat ciangin, khangnote khualna tawh, Church School 28 kihong a, " Upper Burma ah Sang aatheih patungpo bang" ci-in , hong langpangte in sekaihin lipkhap gen mahmah se uh hi. Tua pen pilna kadeihna tungtawn a, khangkikte kakhualna ahi hi.

US itun semsem ciangin
Kawlgam khawngah pilna kisam icihcih pen gentham nahi lo hi. US itun semsem ciangin pilna kisam tetek hi. Kawlgamah bel pilna degree omlopi mahin president khawng, departmentle secratary khawng a sem kitam lel hi. US itun ciangin gamdangmi ahih nakleh Phd, medical doctor, mastor talpai vauvaute kuaman credit pialo hi. A kibangin a taw pan kipan ciat hang a, ekbuuklam dak khekhe ngentang ahi hi. Kumpi sponsor hilo khempeuh ekbuuk sawk kha lo omlo ding uh hi. Zum a kici khempeuh ekbuuk omlohna omlo ding hi. Kawlgam pan aa paite kuakua hileh mikangte ekbuuklam na deihsak mahmah sawnsawn hi.

Dr Thihah tawh ka omkhawm ngei uh hi. Ekbuuk sildan, mop taihdan ama hong hilhsa vive ahi hi. Amah pen pilna saang eite tawh kibanglo-in kiniamkhiat mahmah hi. Medical lam mah zomnuam ahihmanin Nursinghome ah naseem hi. Piteek-puteek cilkai demdam ui dada te taw vasil hi. Mailam aading ngimna tawh phunlo taulo-in sem hi. Degree neite pen thuakzo peuhleh, ama line tawnkhate vacancy om simin interview kisamin tawmtawmin khangkhang thei uh a, koi koi ah degree mah kisam hi. Dr Thiha pen American Medical doctor kician mahmah suaK ta hi.

Degree neilote pen ciangtanna om zelzel hi. Lawmte MA certificate tawite mahtawh ekbuuk mah kasem khawm uh hi. Amau kum-10 hong cin ciangin ahoih khom khat hong tung uh a, nuamsa mahmah uh hi. Degree neilo ciangtan omte pen a tuam vilvel Pasian hehpihna longal lamet dang bangmah omlo hi.

Pilna lunggulh luatmanin
Khuapih pasal khat phone kahopih hi. Bang thulamdang om hiam? Nadam uh hiam? kacih ciangin, " Mopawi tutpihna an siimin napai ung. Eimi SDA a omsunsun kim tek hi. Anneek kipat ciangin nupi khat hong hang ziahziah. " No gampua pial a sangkah numeite, pumpi zuak ngentang hi uteh. kua in makai, kua in bangzah khawng" ci-in hong awngkek mawk. Kaneek kadawn laitak uh hi. Kasung kalai u-ah zong a tumlam phawk kei ung, ci hi.

Phone tawh kakiho sungmahin kalungsim hong vut mahmah khat hong om hi.Kua in zuak, kua in customer bangzah nei, bangzahzah khawng cihlam hilo-in," Ih tate in pilna adeihman un,pumpi nangawn piangam ahi ve maw," ci-in ka khasiat hong suak hi.

Aban zomin kalungsim hong phongkik khat omleuleu hi. Upper Myanmar aadingin Bording High School nih kihong a, Kawlpi leh Tedim ah kikoih hi. Tua sangpi nihte sangnaupang ding kaihkhop nangin Middle School gamkiu tata ah kikoih hi.Kachin State ah Wymaw, Lusei Hualngo lakah Tuingo, Zampi, Anlang cih bang ahi hi. Tua sangte pan hon khangte High School kahsak ding.Tuate hong picin ciangin Singunau pen Degreepiakna sang, MA dong ki promote thei dingin University a suak dong hunla-in damdam in kalsuan ding ci-in ngimna kanei hi. Ei Zomi natna hoihlo hi. Vision saupi khuanglo-in kihazaatna tawh tungdian pahpah namte ihi hi.

Division Field Secratary Bocolar, ka plante kalah ciangin, " hanciam un. Conference pan bek hilo mihau naseem nuam tam mahmah hi. Muanhuai takin om un, hong ci hi. Ahih hangin Union panin plan khempeuh a susia ding thacial honkhat hong khah mawk uh a, hong saatcip hi.

Bocala in a subject zui-in pilnalam sia a kisap luat aaleh, gamdang panin Tourist visa tawh nipi nih khakhat cih bang lecture pia hong kilaih thei lel hi. Education department pan hong geelsak thei hi, hongci sawnsawn hi.

Pumpi zuak dong-a itate mawhna hilo hi. Eimau mah a Nu a Pate mawhna ahi hi. Minam dangte in hong deihsaklo ahi zongin, en, bang hang in, tate kizuak ciangdong a tunna dingin khanglamte panpih mawk ihi hiam? Sanggamte aw mailam saupi en un. Na khepi uleh na luzang ciang bek en buang kei un. Ih tate dinmun tu-in namu uh hiam? Cikha pan aa Myangmya tunna ding sumbei pen ei kiangah kah leh kumkhat kahkhopna cing ding hi.

Phone kiho kaman ciangin nakngawhin, " Kei sangkah theihlai-in, su nei hileng, sangkahna dingin zuak tektek mah ning," kacihleh kagei aa tu nupinu in, " Zakmah thadah" hongcihsan hi. Ei leh ei i kisualsual manin i tu i tate ngawnngawn in, "suzuak" suaklawh cihpen a maan a amaan kei zongin nasa ingh. Nasa ingh.Mawhsak kei un. Zahpih kei un. Nu leh Pa te mawhna himawk lo hiam?

Family pen Satan leh Jesu kidona galtualpi hi, ci-in hong gen ngei ing. Mikhempeuh tua vangik pan suaktazo ding omlo hi.Hong kawkkawk a om hangin kathuk kei ding hi. Zong kalau pah kei ding hi.Khangnote leh Pawlpi kakhualnate aban zomin kongsutsut ding hi. Laklak lo-i, abul adawn khenlo-i, enkhawmin saikakin nasim un.

Pr Thang Siangh. zogampalpi@yahoo.com