Uuzaw Innluahpa leh a Zi.
Zomi Ngeina sungah i-om laiteng Teek leh Khang kithuahdan ngeina leh suahpih sanggam-sung kihuaidan ngeina kipaizo lo ding hi. Tua ngeina a zangsiamte' bangkua hoih-a, a nawkkha khempeuh tualbial nuam uh hi. Teekte omsungteng amau khanpih sanggamte leengla kitawlnga lo-in kiphathuak den hi. Tua hunsung Bangkua pen thupi-suah mahmah hi.
Uupipa in Zi hong nei hi. Ruth bang-a, numei-hoih ahihleh Teekte tawh hong ki-aihual pah hi. Ruth in, " Namite kei mi hihenla, na Pasian zong keima Pasian hihen, " cipah siausiau hi. [Ruth 1:14-16.] A pasal ii Nu leh Pa pen nu-mah pa-mah cipah a, pasal sanggam khempeuh ama sanggam suakpah hi. Ama-lam sanggamte hong kibehlap ahihmanin sanggam-hau suak hi. Teek leh Khang ii hiang khempeuh kigawmin nopci-suah peuhmah hi.
Mithak ahihna leh a gualhuaina hangin sanggam khempeuh in lamnaih uh a, a mu khempeuh in hopih-nuam uh hi. Heeksuk-heektoh maingal tawntung hi. Pi aw, nu aw, ci-in innkuanpih ngeisa mahbangin bawl uh hi. Teekte inzong it beklo-in muang mahmah pah uh hi. Kilawm kituakin seem thei gamtaang thei ahihmanin kuaman phunsan lo uh hi. Khutkhelhna nangawn a tup hilo cih theitek ahih ciangin hu'-in amalamah panghon uh hi. Itna in mawhna khempeuh seelzo hi. 1Corinthians 13:4-7.
Numei a pauziahziah khempeuh siakhin lo hi. Itna leh thuhoih bulphuh a, pauziahziah om hi. Amah ki-awnghon tuanlo-in nasep-silbawl hawm ziahziah hi. Paulap zong lo hi. Hun ngah keng, cingei lo hi. Sepding bawlding khempeuh amah kiphuum den hi. A teekte in, " Na uu guak seemsak kei un, huh un, " ci tawntung a, bangkua nasep-silbawl mapai mahmah hi. A sanggamte in a nung zui uh a, bawm liailiai uh hi. Ama thanuamna in makaihoih suaksak hi.
Lungsimkawi neilo a, pauziahziahte pen gualhuai in, Teekte pahtakna ngah thei zaw hi. Pasal zahtakna leh itna, Teekte hehpihna leh neekngaihna, innkuan nuntak khantohna ding ngimna tawh gamtaang ahih ciangin zahtakna kipia hi. Teekte in, "Na uu cih bangbang gamta un," ci-in a tate hanthawn uh hi. Khat leh khat kithupi-bawl ciat uh a, ki-itna khang semsem hi.
Uupipa pen hun-awng neihni zingsang simin puanza tamsilh khingkhengin, a naute inn banhawh hi. Haksaatna tuamtuamte khempeuh theihpih hi. Damlo a omleh, a hunlapin phawkpah hi. Innka-liip ging liapliap a zak uh ciangin, " Nu ei, i uu hong vaak hilo maw" ci-in tokhom lenlakin munhoih penah nakoihkhol hi. Itna leh zahtakna kigawm ahi hi.
A Zi penzong a Pasal mahbangin sanggamte khualin angvandan siam mahmah hi. Uupipa-zi thukhualna hangin sanggamte lomkhat suak uh hi. Singkung tampi neektakin pokhawm leh, huih in mutpai zolo hi. Sanggam kilomkhatte kiimlehpaam in nopneh ngamlo uh hi. Khauzangneu tampi kihualkhawm leh tembaw gol mahmah kaizo hi. Uupipa-zi hoih ahih ciangin sanggamte in a tenna khua taisan ngamlo dongin khenglah uh hi.
a. Damtui kulthuk limngaan zuan a, singcin paal phialvan bawm e.
b. Lunmang hawmsiam zataan bawm a, ciin hawmsian tuai in bawm e.
Ahun a cin ciangin innlak sanggamteng kithuza-in uupipa Tukzu khol uh hi. Nopna-dahna thu khatpeuh a om ciangin buakhuanin uap ciat uh hi. Uupipa leh a Zi thukhualna hangin innlak sanggam teng kilomkhawm uh hi. Thusia-thupha khempeuh Uupipa kiang kitun hi. Thusia-thupha khempeuh a kibangin puakhawm uh hi. Sanggam kilungtuakte kiangah puakzawhloh ding vangiklua omlo hi.
Uupi-van puazo-mi a tamzaw pen a Zi hoihna hang ahi hi. Khatveivei numeite gam-sakol bang ahi phial zongin, kamkaih lensiam pasalte khutsungah,suan leh muanpen suak thei hi. Sanggamte in Uupipa tawihuan ahihmanin midangte tung nangawnah vaang nei hi. Tua vaang in a sanggamte huutzawhna tha piakik hi.
a. Ih khang ciautui luanging icih akaih tam a, luangingno aw e.
b. Ih tung solsa vaangtaang icih alsi'n bawm a, vangtaangno aw e.
Thu kikum innkuante pen a ki-it innkuante ahi hi. Bangkuahoih icihte pen vaikhempeuh kikumte ahi uh hi.
Numei sinsia.
Bangkua-nuam leh nuamlo a tamzaw pen Mo neih ciangin kipan hi. Numei gilo khat, pasal Bangkua hong lut phetin, " No " leh "Ko " tawh hong tung hi. Na Nu na Pate,na sanggamte na Behte cihtawh thupan tawntung hi. Numei gilo phungkhen acihte hi a, thuhilh haksa hi. Hibang lungsim-puak pen pattah haksa hi. Uuzaw aading genloh zi ding limlimin hoihlo hi. Mo dingin hoihlo hi. A nei pepeuh mavang ngeilo ding hi.
Mihing pen ganhing mahbang hi-a, pattah thuhilh tawntung kisam ahi hi. Leengla hong pai zongin awnlo a, tu keihkaih mawk om hi. A pasal in, " natutna awn oh," cileh, nihvei thumvei khit ciangin thei paisuak lel a, hong pai khat peuhpeuh amuh ciangin,muktu zeenin awn thei hi. Tua bang numeite pen Nu leh Pa in hawmthawh lua, itlua ahihmaninin thuhilhlo, bangmah sinsak lo uh a, khialhna lianpipi a bawl uh ahi hi.
Tua bang mite pen " hakai pahtak lungheeng" cihtenam ahi hi. Pasal in tawsawn tawntung ding kul hi. An nahuan o, an thuuk o, kuangsawp o, innpuah o, ih puan sawp o, tho inla kityhawi o paihun ta ei, ci-in a zongsat dong gen kul hi.
A thongil ngeilo numeite pen masuan kinte hi-a, zi dingin hoih hi. Innkuan sung khuaziing ngeilo ding hi. Alarm Clock tawh a kitawng thei numei deih kei in. Paihun a cin ciang-a a kithawi pante a pasal in nakpi-in tawsawn keileh anih-un kithadahsuah thei hi. Innkuanbup zawngkhal sak zo hi. Pasal in tawlnga lo-in tawsawn tawntung ding kisam hi.
Zi or Mo zawngte in ataima[alol] numei , a ciltatvan a keemsiam, innkuanpihte angvansiam, neekngaih thei, Economy lungsim nei numei, a mun zui-in a om bangbang tawh kinaamtakzo numei, pasalte zahtak a vangpia thei numei zong un. Nakhempeuh kiguangkuaksa-in om a, hunlap tawntung numei zong un. Lungsim kuhkal masuan a tutdong a hanciamte zong un. Tua bang numeite in innkuan hong tawikangzo numei ahi hi. Tuhun ciangin uisan mehlimduh anhuan belmahmah thanuam zong un.
Zi leh innkuanpih aa ih omkhit ciangin meelhoih in bangmah man lo hi. Gamtathoih en masa un. Nikhatsung a innah om lecin a zia atong kisansaat thei lel hi. A Nu a Pate leh a sanggamte a hona, a gamtatzia ahekzia namu ding hi. Tua gamtatna khempeuh nang kiangah hong ken ding hipah hi.
Sanggamte leh Uuzaw nupate kikaal.
Ei Zo Ngeina sungah Uuzaw(innluah) dinmun pen thupi mahmah hi. Innpi pen sanggam lungzuang khuangaite lungzuan khohnamun ahi hi. Anduh gilkialte kingaknamun ahi hi. Uupipa pen sanggamte kidalna-lum tawh kibang hi. Amaute belh kulhpi tawh kibang hi. Uupipa-zi pen kongcingnu hi a, sanggamte sungtum pusuak sakin nuamsa mahmah uh hi.
Uupipa-zi ahoih keileh, kongbiang a dak leengla khempeuh a pet, uihang tawh kibang hi. Kongbiang aa dakngam om nawnlo hi. Innkamong kiliip gingte leh suangphahpeek siikna khekhaap ging puak leklekte kiza nawn mello hi. Sanggam leengla kivanglua ahih ciangin, innka kiliip ging a zak simin, naupangte in sikha sa uh a, puan kikhuhin bu uh hi. Khangluite in, uipi leengla zong nuamtuam, acih dinmun tungta hi.
Teek leh Khangte nupa kikaal.
Ei Zomite pen kum-60 khit ciangin nasep ngeina bang hizo lo hi. Guhtui kang hi. Guh kilawi liapliapin tutna panin dinkhiat ding haksa kisa hi. Ki-uaikai mahmah hi. An leh tui pen anip-aneem bek kine zo hi. Tua bang thakiathun hong tun ciangin lo kikuansak nawnlo hi. Inn-ngaak ci-in innah naucin leh inn-nasep kithuahsak hi. Tudongmahin tuapen ahi dingmahin kingaihsun khong hi.
Mipil-mihau gamte ah, Innsung puahte pen Housekeeper ci-in a nai-in kicial hi. An pen bawlsa-in kizuak a,a manlaangin suanglumin ne uh ahihmanin, anhuanna-in huntam bei lo hi. Naucing pen poimawh hi. Amaute kiangah naucinna-mun a tuamin kinei hi. Naucin thaman pen manpha mahmah hi. Nasep dang sangin sumtam kipia zaw hi. A kiseem khempeuh naitawh thaman kingah sak hi. Ahunmaan tawh na kiseem a, ahunmaan tawh thaman kipia hi. Thaman neilo nasep khatbeek omlo hi.
Nu-teek Pa-teek inn-ngaak naucingte pen thaman a tuamin ih piazo kei zongin, naseem dangte mah bangin Credit piak ding kilawm hi. Numei haite in innngaak ci-in thusimlo thei uh hi. Us gamah nasep khat peuhpeuh thaman a ngah keileh,zum kitun uh a, piakloh phamawh sak uh hi.
Numei lungsimhoihte naseem a ciah ciangin, inn-ngaakte kiangah, " Nu, nabuai lua uh hia, an beek tui beek nadawn man uh hiam o, ih nau a cingh na?" ci-in hehpihna kammal tawh kihopih hi. Sunsung a gimna teng pen tua kamzol teng in nuulsiang mang a, a tawllam zong phawk nawnlo hi.
Khatvei a Teeknu thatang neukhiukheu gawng thipthep teekkhin sawnsawn, nau a puak cianginamah tawh a kikim phial khat om hi. A Mo pen thagolin sai vetvat khat ahi hi.Naseem a ciah ciangin a nau sangkhia hi. A nawi tahin pia hi. "Nu ei nau puksi dek hilo maw, an napialo maw?," cih kawmkawm leh a pumtung teng velvelin, " a ci nin si, sil buanglo a, nu ei a taw ciang in kui, hehpih huai lua si," ci laalaa hi.
" Gilkial ei, an bang huan, tua, tua, tua, nabawl lo maw? thadah si u cia, tua bek hilo maw nasep u,"ci-in mittang kisal lela-in en phei hi. A Teeknu in, " Nau pua kawmsa leh dinsa a anne hing ei, an minsa kakoihzawh pen kei, kipak petmah ing," cikik hianghiang hi.
Tuhun ciangin Teek leh Khang kikaal kuamthuk mahmah hi. Ih ngeina kiphiat vetlo napi zong kizang taktak tuanlo hi. Teek tawh om Khangte in dongkholh sa uh a, vangikpi-in ngaihsun uh hi. A pianna taangthu leh nupi-pasal a suah theihna taangthu suutkik lo mawk uh hi. Hih thute suutkik uh hileh, Khangte in Teek tawh om pen thupha ahihlam phawkin, vanzang sa mahmah ding uh hi.
Ei Zomite khang kilumlet laitakin, Upadi kip kineilo hi. Kikupna omlo-in uuzaw puak vante thudon lo-in dapkoih lel uh hi. Nu leh Pate in a tate a sepzawhloh hun dongin vaak napi,amau vaakkik ding kua cih matmun om nawnlo hi. Nu leh Pa vaak ding kua cih, genkholh theih hilo ahihmanin, Kawl ten zong Nu leh Pa vaak ding leh a luah atang ding sehsa-in koihngam lo uh hi. Asih dongaa vaak penpen aneih khempeuh nusiat lel hi.
Tuhun khangthak paizia cidiam, numeilam ah hoizaw uh hi. Ama Nu leh Pa sangin Sunghnu, Sungpa thupi seh zaw ciat uh hi. Tua ahih ciangin ta-numeite neuseh theih dingin omlo hi. Khang kilumlet a, khuahun paizia kikheelkheel hi.
Tuhun Khangthakte inzong, teekhun aading ngimkholhsa tawh a ciangtanin ta neih huai ta hi. Tate tungah kingaktheih om nawnlo kha ding hi. Europe mite ngeina mah zuihloh phamawh hun hong tung lel ding hi.Ngeina laklawh ahihmanin Zomite lakah a vaakding tasam Nuteek Pateek 70% bang om tawntung hi.
Innkuan hoih icihpen Khangmasate zahtakna pan kipan a, Mo inzong ama vun suahkhia-in,a pasal vun leh a pasal sisan sungah kiphuum ding ahi hi.. Pupa Ngeina ih phiat matengin, tua ngeina kiptak-a lente buailua ngeilo hi.
Thang Siangh. zogampalpi@yahoo.com
