ETTEH HUAITE ENTEH. 1.

Leitungah gamliante khantohna entehin gamneute kikhangto zel hi. Ei khangno tuailaite inzong midangte i phakzawh ding delh kul hi. Pu Kim Gin in ama ut khatpeuh sutsutin gen thei hi. Tua pen "Kim Gin lungsim" ci uh hi. Khantohna pen khangnote khutsungah om hi. Upa vaihawmte in khangno thatang leh pilna zangsiam le-u kipumkhatna zong oltuam pah hi.

Khampat khua Lusei veeng.
Kawl kumpi sia lua ahihmanin mikhempeuh in paulamin mawhsak hi. Ahi zongin khua khat ii khantohna ding pen, khuamite leh hausa upa leh khangnote sep ahi hi. Kumpi in hong nawngkaisak zawhloh khuamite septheih tampi om hi.

Khampat Circle Leader kaseplai-in, ngeina-hoih tampi nanei uh hi. Khampat pen veengli kisuah hi. No-1 Tedim hi. No-2 Lusei hi. No-3 Thado hi. No-4 Haka ahi hi. Tedim veeng pen khuasung kivak theilo hi. Lampi khempeuh lawi-bualna buannawi suak khin hi. Lampi pelhin huangsung khawng kilut khuankhuan hi. Haka leh Thado veeng pen Tedim veeng sangin hoihzaw deuh hi. Pauban tampi om hi.

No-2 Lusei veeng peuhmah pauban tawm mahmah hi. Lampi khempeuh sehnel kisungin kei silsial hi. Tui kivung peuhmah omsak lo hi. Huangdai ki-umin hoihtakin kivaat sitset hi. Niliap singkung leh pak hoih nono suan uh hi.Huangkiim' leh khuasung lampi ah gan zauvak kimu lo hi. Bawngleeng a hawl laitakin a bawng in ek a thakleh, a neipa leengtungpan tuakin paiipah lian hi. Ganhing ek omlo hi.

Khua ki-uk dan.
Hausa leh Veeng upa nei uh hi. Khangno kipawlna ah zong, president, Secratary, leh Veng-pazang nei uh hi. Hausa zum atuamin lam hi. Hausa-zum leh khua kipawlna sumbuuk kizom sak hi. (Ta-mah-vuai-za-mah) icih pen ahi hi. Hausa-zum innpi gei-ah Taangkona Tausaangpi khat nei hi. Patau khempeuh tua dawnah kiko hi. Daak saat hi. Taangko dingin, mitei, mithahaat, mi-kizen guai uh hi. Taangko beklo-in gaal zong vil hi. An a kham ding kipia a, lokhawh tangin seem hi.

Thulamdang khatpeuh a omleh Hausa zumah kipuak hi. Taangkote in daksaatin tausang tungpan kiko hi. Inn aa om hausa upa leh khangno omzahzah kikhawm uh hi. Tawmvei sungin tungpah hi. Khua leh tui aading a singam dingin kuankhia uh hi. Bubu lo uh hi. Kihemhem lo uh hi. A tung masa leh tam a seemzaw kidem uh hi. Kangmei patau hiam? Galvai hiam? Guta damiah migilo hiam? Khuaihaang hon bangin kuama phut ngam ding hilo hi. Ama dawk kituh uh hi.

Nopna dahna-ah ki-uapna.
Ei Tedim mite pen ki-uapna hoihnapi zaa huam zo lo hi. Minambup khua leh tui huamzo lo hi. Beh leh phung, tanu-tapa leh ei omna pawlpi ciangbek ki-uap a, toi mahmah hi. Minam itna khang theilo hi. Khua leh tui khualna khang theilo hi. Tua sangin a zaizaw kalkhat suanto laileng nopci-in kicing pah ding hi.

Luseite khantohna leh kipumkhatna pen Khangno kipawlna khauhtakin nei uh ahihman ahi hi. Khangnote in Hausa upa tawh a khangkhangin naseem khawm uh a, ngeina-in nei uh hi. Biakna Pawlpi ki-uapna tuamneih lo uh hi. Beh leh phung leh tanu-tapa bek tawh naseem lo uh hi. Tua pen nopna dahna ki-uapna gen kahi hi.

Misi khat a om ciangin, Pawlpi makai leh Hausa upate leh inntek kikumin a guini ding seh uh hi. Nattom natna hoihlo a kilawh thei pulnatna ahihleh manlaang takin hankhul to-in gui pah hi. Ki-uapna pen hunnuamtakin zang lel uh hi. Hun zatna pen Pawlpi in uk a, siguina, leh gamtatna khempeuh khangnote khutsung hikhin hi. Khangnote siko-in zang hi. Khuul to hi. Misi a phuum khit dong khangnote gamtaang uh hi.

Nungakte in innsimah singkhuah khat leh antang haikhat dong uh hi. A piazote in amau piaknopna zui-in ci-al, cikhum, antang avalin napia thuah uh hi. Si-innteekte pia uh hi. Khangnote in nitak ciangin niangtui-tuilum awmin tutpih uh hi. Lusei Veeng aa teng meigong tagahte hampha mahmah uh hi. Meigong tagah mizawngte tasam saklo uh hi.

Mizangkhal naseemzolo dammawh a om ciangin Khangnote in khatvei ciat lo vahuh hi. Inn phopzo lo meigong a omleh amau huhzawh zah ciat tawh, bitelkhat a tawi om, naanglomkhat a tawi om, guaphel khat a tawi om, tua bangin inn vaphop sak uh hi. Christian lungtang puak hoih mahmah hi.Tua khempeuh theih huai hi.

Khualiante pen veengnih veengthum kisuah thei hi. Khangno kihello omsak lo hi. Khuasung galmuanna khempeuh zong khangnote khutsungah koih hi. Guta man uh hi. Khua leh tui neihsa susia, lampi, lei, mualsuang, singno, buuk, huangdai susia theite kanin thuhilh hi. Liausumte pen hausa leh khangno fund ding hipah hi.

Khua khempeuh hibang kipawlna thahaat tek hilengminam buppi aading kipumkhatna olno takin kingah ding ahi hi.