KAMIDIK IN SAGIHVEI A TUK HANGIN THOKIK.

KAMIDIK IN SAGIHVEI A TUK HANGIN THOKIK

MIKHEMPEUH TUK HI.

Khalam tukna pen mikhempeuh sukkhak ahi hi. Mikhempeuh muh aa tuk om hi. Mi muhloh aa tuk zong a tamzaw hikha ding hi. Pukna pen nakpi-in puktawh kibang napi puahkikna ol pawlkhat om hi. Mawhna pen ngeina bang-a nei Christian kitam mahmah hi. A thokiklo pukna khempeuh pen sihna Hell sung tunna ngentang ahi hi. SDA signboard limbel napi Vantung Pawlpi sazian ah omlo tamzaw ding, ci-in muhkholhna sungah kigen hi.

Ko kiangah 3ABN25 Seventh-day Adentist Broadcasting Service tatsat lo-in kitangko hi. Biakinn sung sangin kitelzaw ahihmanin kha-an kivakna-in kanei den hi. Jesus pen biakna makai khempeuh muitum ahi hi. Ama thuhilh a ngaite nangawn in muhdahna thuak lawh hi. Ama teelsa Pawlpi or Minamte lakah tazo lo hi. A gamtatna khempeuh kizui zen hi. Singlamteh atun dongin khawllo uh hi. Mawhzong siamte pen Satan khutzat hi a, hangtak a mawhna pulakin teti pang ngam tha lakik ngamte pen Pasian tate ahi uh hi.

Kawk banglo pen vantung pan aa hong pai Pasian tapa ahi hi. Tua ahih ciangin tua mipa kamuh kanuam a, kei thanemna kicinlohna, pholakin teti pang dingin kamaizum kei hi.Tua mipa khahsuah lo-in kadelh tawntung hi.

Laisiangtho pen Pasian leh Satan kidona thubu cileng kikhiallo ding hi. Satan lungsim zuauthu leh angsung khualna tawh minam khempeuh huzapin a suksiatna thu hong lak hi. A langlam panin Pasian sianthona, thumaanna, itna leh hehpihna kidim a, dikna tawh hong gualzawh pihna hong lak hi.

Lamkhat panin mihingte hoihna pen leikaang kizut hankhuk bangin genteh hi. Mihingte siatna pen lipkhaphuai Calvary singlamteh sihna tawh Jesu pumpi tungah hong lak hi. Jesu omlo hizenzen leh mikhempeuh in Calvary singlamteh sihna a thuak ding ihi hi. Ei tangin tua sihna kizo zo hi. Tua thu simloh leitung nate eek bangin kangaihsun hi, cise hi.

Paul in ama thanemna panin Jesu hang-a gualzawhnate muibun takin teti pang hi. Misiangthote kilamkikna hanthotna hoihpen suak hi. Khalam thuthuk theilote in mawhna a lian leh a neu khen thei uh hi. Pasian mai-ah mawhna neulua omlo hi. Sawpsiang zawhloh ding mawhna lianlua zong omlo hi. A kisel khinkhian mawhna khempeuh pen Hell sung tunna hikhin siksek hi. C sungah bangzah M sungah bangzah ci-in ganan tawh simthei hizenzen lo hi.

Pasian maitang mu tawh kibang.
Cimawh zawngkhal takin kakawivak hi. Kei kawivak sungin kasanggam nihte pen Pasian naseem dingin kicial khin hi. Ka khalam dinmun hong muh uh ciangin lungnuamlo-in lai hong khak uh hi. " Lawm aw, lungneu kei in. ' Kamidik in sagihvei atuk hanginsagihvei thokik hi' kici hi" hong ci den uh hi. Lungsim ut mahmah napi leitung silehsa in hong mengcip ta ahihmanin katho zo mahmah kei hi. Tua hanthotna awgingte zaza kawmmahin Lawki gualnopna sungah nuamtakin ka om hi. Zolaam kici khempeuh kalaam thei hi. Khuangtum cileng lawki pupa ngeina khuangtum namkim katumloh omlo hi.

Zupi nunna munah khuangtumin, laamin, puknaingai-in lasa aa ka om latakin huansak lampi panin Pr Elisha Paul leh Pr Rualchinna hong dingin kigalet kawmin kanui uh hi. Pasian maitang bangin kamu hi. Kagei aa pa kakhuang pia in kadelh hi. " Pasian in a naseem dingin hong deih hi, zing ciang hong kikhawm in," ci'n hong zol hi. Ka kikhawm pah hi. Nipi kik ciangin tui kikphum pah in hong cingiau leuleu hi. Ka kiphum pah hi. Laisiangtho sangkah in, hong ci leuleu hi. Ka kithawi pah hi.

KIHEHNEPNA HOIH TAWH.

Laisiangtho sang' katuak ngawngaw hi. Kasep nang mun pen Yangon Ahlone ahi hi. Lawmte Yangon omnuam kituh uh hi. Keipen lau cihtakin kalau hi. Amaute in Yangon thupina leh omna nuam en uh hi. Ken ka nasep masuan ding ka en hi. Minam neu pilna neu Kawlkam nalzalzal lo khat pen bang suak ding cihtawh himawk! Pastor haute pen cina zatolum cihkhat omleh neektheih cikhum bawngnawi tawilitliatin hawh uh hi. Thungetna sangin cinate lungsim malhsak zaw uh hi. Ken bangtawh mai mu ding ci-in kadah hi.

SDA sung katun aa kipan, Sia Phung Kai pen, Pa bang, sanggam bangin thukoh pen leh dotpen hong suak hi. Yangon paiding Tedimah kabaang hi. Kikhop khit ciangin hong ciahpih hi. Vaimiimciim hawpmasa-in kaman ciangun thu hong ngetsak hi. Ama naseplai tangthu hong sutpih hi. A photo suante hong etpih hi. " Kei kipatna hibang hi ei. Nikhatni ciangin katate in taangthu a mangngilh khak ding kalauna tawh hibangin a suang kahi hi" cingiat mawk hi.

Midangte in ahauh-aliatnate uh suang hi. Aman bel kiniamkhiatna limte suang hi. A zi damlo hi. Nau nih leh thum tawh om hi. Vaimiim amah mah in su hi. Bawmlaang tawh sing pua hi. Sunin kuankhia-in Pasian naseem hi. Tudongin haksatna zawnna cihmawhna kathuak ciangin , tua hanthotna hangin khamuangtakin ka om hi. Christian te gualzawhna pen hibang ahi hi.

Khalam thu-ah layman leh pastor kibang
Silehsa tawh omlaiteng mikhempeuh thanemna kibang ciat lel hi. A tukte phong dingin Pasian in a tuktheite mah Pasian in zang zel hi. Kei thonuam aa kithawi laitakin kalawmpa pen nasep nakhawl leuleu hi. Leiletin buantang lakah lawi nung zui-in na om hi. Sanggamte nih in ahuh nuamin lampi zongzong uh hi. Haksatna hun taktak ciangin sanggam silehsa kinaite mah lunggim masa teitei hi. Minamdangte lakah minampihte mah lunggim masa hi. Koikoi-ah gam leh minam mahtawh mapangin Pasian Lungdamnathu tangko lehang, muibun pen hi.

Tedim Circle leader in Pastor Kip Za Nang a omlaitakin sanggam nihte mahtawh kikumin nasep guankik hi. Pr Kip mah in ordination hong forward ahihmanin kanih un ordained pastor kangah veva uh hi. Section committee member in hong koih hi. Circle leader, deparmental cih bangin kakhang toto uh hi. Pasian nasepna ah thasiallo-in kiseem a, Pasian ompihna leh hehpihna kangah tawntung uh hi. Hehpihna tam ngahte in hehpihna thu tangko leh muibun zaw hi. A tuk ngeilo, hehpihna phot ngeiloh mite pen teipan siamlo uh hi. Satan deih mithahaatte pen Pasian aadingin zong mithahaatte ahi hi.

Section meeting hongsam uh hi. Union panin ulian nihtawh committee meeting katu uh hi. Sia Kip chairperson ahi hi. Kei aadingin sia dangte sangin amah zahtak piakhuai tampi om hi.Evangelist nasep leh thunget hanciamna kasim etteh tawntung ahi hi. Ordination zong ama hong forward hang aa ngah kahi uh hi. Meeting mankhit simin sumkempa innah zingan nitakan kine tawntung hi.An pen a lim theibel dingin kibawl a, lungdam takin ciak hethatin kane uh hi.

Awih! ci-in numei khat patau hong kiko hi. Pastor khat namsau tawi-in hehlua kisa muk liingdaldalin hong pusuak hi. Ko a sanggam teng in a temtawi sutin kalai lunglung uh hi. Sanggam tengmah kikham ngam hi. Kuamah dang a kho ngam omlo hi. Innteknu bang a kawngah luai-in a khut langkhat tawh a tem sut vanvan hi. Thupi kasa mahmah hi. Siapite maitangah sisan tenglo uh hi. Committee pen eideih banglo thei a, gualleh hunin na kisa mahmah thei mah hi. Siapite Yangon a tunsuk uh ciangin, SDA tangthu ci-in tuathu bekbek genin nei uh hi. " Da-mah-sia" acih ciangin amah acihna hi sese hi.

Kum kiheihei a, tua bang nangawn Pasian hehpihna lianzaw ahihmanin, section officer ngentang,Union departmental dongah hong domto zel hi. Tanem thokikte aadingin teti panna khaupai semsem hi. A thokik thanemte hangin midangte in Pasian hoihna telmuh thei semsem hi. " Hih lungdamnathu hangin kamaizum kei hi"

Conference moved kipathun.
Sumbawlte hong tuahpha hon uh laitak ahi hi.Degree kiteh bang hieh 100* khawng hiding hi. Kei zong Evangelist kathahaat hunsung ahi hi. Tua hunin member hong mu ngeilo tawm mahmah kha ding hi. Lay member te khanglo lawpmahmah hunsung zong hipah hi. RB makaite nak thahat mahmah uh hi. Conferenc utna pen mikhat bek hangtawh hitheilo hi. Khat leh khat kimuan laitak,kihuzapin ki-itna leh kimuanna tawh a nop mahmah laitak ahi hi. Ki thutuak takin Conference move dingin kipankhawm ahi hi.


Pr Thang Siangh. zogampalpi@yahoo.com