CONFERENCE MOVEMENT KHAKTANNA

CONFERENCE MOVEMENT KHAKTANNA.

Lammaan tawh kingen
Kum-1989 kumpawl aa kipan Conference Status tawh ding kingen hi. Conference status ngen cihpen thusia hipeuhmah lo hi. Union in Conference movement ci uh hi. Division panin O.T. Edward hong pai hi. Delegate teng in signature piakim ciatin Division ah kipuak hi. Tua laitakin kei pen UET tavuan tawh Mandalay ah om kahi hi. President kasepma hun hi. Kiteelna lungkimlo a conference moved cih mawhsakna pen maanlo hi. Tua pen telo hiam, bang hang hiam khat hilel ding hi.

Ngetna lai filing a kibawl khit aa kipan, Division lampanin Field secratary Bocalar in hong vaan tawntung a, kei president sepsungin , " Conference Status tawh nadin uh ciangin, Tithes sharing pen Union bangzah puak ding, Union in GC ah bangzah napuak sawn ding," ci-in hong hilh hi. GC pan a kingah thei benefit khawng zong hong hilh hi. Maymyo tektekah Division Departmental Seratary te in seminar workshop hong bawlsak tawntung hi. Division tawh kikholhna hong tam simsim ahih ciangin, khanglam sia neu pawlkhat in, " UMM in hong khengvalh khin uh ei," ci uh hi. A kingah khin bang pianin Division tawh direct kizopna omkhin pian hi. Ahih hangin Conference hong declare ding pen Union ahi hi.

Mandalay meeting ah bel Union panin Elder Kyaw Balay, leh Sydney Gyi hong pai uh hi. Division mai-ah thusia hetlo uh hi. Pau zong khum thei mahmah uh hi. Kum khat sung dinzawh ding leh dinzawh loh ding sittelna-in Tithing Goal hong koihsak hi. Tua laitak aa kingah Tithe sumpi pen Ks 800,000/- kim kingah hi. Amau a zahnih Ks 1,400,000/- hong koihsak uh hi. Ngah kei nanteh, ci-a lungmuan khop ciang hiding hi.

Tua laitak pen Sia Pau Za Khan business ahoihpen laitak ahi hi. Member sumbawlte leh khuatual pan aa kipia sumpi pen midyear -in Ks 800,000/- cingto pah mawk hi. Kumbei ciangin Ks 2,000,000/- kingah hi. Pasian deihsakna om hi, ci-in kangaihsun hi. Pasian pen mithahat khat tungah kingalo hi, ci-in ka um hi. Tithe tawmlua ci-a khaktan pen pianglo mawk hi. "Na sum ngahna uh pen Regular Source Income hilo hi," hong cileuleu hi. Tua bang ahihleh ci-in president tavuan hong kisuat ciangin, Global Mission Strategy tungtawnin Regular Income neih theihna ding lampi kizong kawmkawm hi.

Project khempeuh zunglot sawm
Conference movement pen 1989 kum hi. Kei president kahhunin Global Mission bulphuhin kalsuan kipat laitak ahi hi. Tua strategy hihdan ding pen Union Sec.U Thein Shwe supervise sepna tawh kibawl hi. Amah dot kawmkawmin ko section president tengin , ut bang ciatin kageel uh hi. Conferenc support zo ding plan pawlkhat neih kul hi. Sanpya Clinic, Mobile Cinic kigeel hi. Zintun buuk Inns, Hotels cihte Kalewa khat, Monywa khat, Mandalay khat kacih leh Division in tun hih nai ken. Tha nagah khit ciangin damdamin zom in. Tu-in San pya clinic leh AWR leh na sangte hanciam phot in, hong ci hi. Sanpya Clinic bek inzong Conferece buppi hong support zo ding ahi hi.

Pr Kyaw Balay leh Pr Thein Shwe ta hun hong bei hi.Pr Ba Hla Thein leh Pr Ba Khin hong hileuleu hi. Pr Kyaw Balay te omlai hileh C tawh hong dingsak lian kei zongin, tu aa dinmun tungin ka um kei hi. Bang hong paulam to leuleu hiam, cihleh, " No pen makai cinglo, mature nailo" hongci leuleu uh hi. Tua tawh kisai-in Pasian mai-ah kicing ing kaci kei hi.Amaute tawh khalam dinmun kilamdang peuhmah kei ning kaci ngam hi. Amau Union lead thei ahileh en zong lead zawhloh nang om kei, kaci hi.

Committee sungah, " Conference status tawh hong koih le-ucin UMM ah mi a om kei zongin Union sungah khat peuhpeuh teel leng hithei lo hiam?Ahih keileh zong gamdang aate tawlkhat kawm leng hilel lo hiam?" kaci ngei hi. Tua lah Conference System kiteelna pen Union in hong supervise theilo ding a, hong observe thei bek ding, cih thei uh ahihmanin paulo uh hi.

Conference deih khempeuh mipum zunglot kipan.
Project plan pen Division in hoih cikhin mawk ahihmanin thakhat aa beisak ding kilawm lo hi. Division te gullukin thumuam man nailo uh hi. Ei mi sungah kua teng khutzat ding, ci-in zong pah uh hi.Chance tuamtuam piak dingin promise pia uh hi. Conference movement pen zunglotin beisak ding hita hi. Union power zang ding ahi hi.

Upper Myanmar workers sungah Conference deih khat zong omnawn lo hi. Conference deih pen keibek hong suaksak uh hi. Kei leh, kei hong support teng longkhia ding hita mawk hi. Zomi workers khempeuh union tawh kop-a a zunglot nuam lamah pang khin uh hi. Kadeeklam tuktum khempeuh gal hikhinzo hi. Vantunglam ento a khuadak omlo hi. Union uliante maitang bek ki-en hi. "Section president kikaikhia ngawngaw ding kua a kiguangtam" ci-in kilamenin uliante maivil in nui siaisuai uh hi. Kei aadingin tua nuihmai pen lipkhap huai mahmah hi. Mrs White in, satan a nuih ciangin a lipkhap huaida agente kamit kha tawh kamu hi.

Pawlkhat in mual hong liamsan ta hi. Pawlkhat omlai hi. Tua hun a, ka bilbul aa hong nawksuk hong nawkto, Ba Khin kikoppihte pen tudongmahin ih thuaklah pen geelmah zong hilai hi. Union makai Deekte aading tawlngalo-in advocate sepsak hi. Union uliante maitang enin a pau uh ciangin, " conference zunglot ding," ci uh a, eimi lak hong pai ciangin," lampi maan tawh la ding," ci uh hi. Lammaan tawh kingen hong khaktantan hitasop in. Lammaan cih pen kipatcil tangthu theilo , tuhun khangthakte khemna thuzuau ahi hi. Tua laitakin ei Zomite lakah khutzat ding om keileh, hong piaknop loh hangin, a puadong ah hong khinkhia lo ding hi.

Naseppih lawmte bek hilo hi. Pau kibanglo sanggam member khat leh khat hong sutuah hi. Nam kibangte lakah position leh angsung khuallua teng hong teel khia hi. Angsung khualte aading khamangthang cih khawng, sanggam u leh nau, minam pih cih khawng thulakah seh tham hilo hi.

UMM U Kan Ngunt khawlnuam hi. Ama munah converted ahilo Naw Tri Too pasal Soe Win tuiphum dingin sawl uh hi.UMM Chin te khutsungah tui kiphum nuam kei ung, ci-in khauh setsetin pau uh hi. Tui kiphum dingin Toungoo nai uh hi. Lampi ah motor acident in sikhin uh hi. Union te khalam thanemna hangin bangmah theilo member te nangawn in manthan lawh uh hi. Bang hang hiam cihleh Chin muhdahna tawh Toungoo nai uh ahi hi.Mandalay ah Chin pastor khat in phum leh tuaklo ding hi.Tua muhdahna lungsim aguan pen Union officer te ahi hi.

Union khutzatte lungsim puakzia.
Conference langpang siate pawlkhat in ngaihsutna tuamtuam nanei uh hi. Silehsa tungah na kinga lua uh hi.
1. Pawlkhat ten amau support ding member tawm sa .
2. Pawlkhat in, member om napi member te favour ngah ngaplo
3. Pawlkhat talented kisa lo. maivil tawh kingap zaw.

Hihte pen khalam meidawina namkhat ahi hi. Jesu galkapte leh MUM khutzatte paizia hong kikeelki mahmah khong hi.Tuhun ciangin pawlpi mite in, amau kemsiam a khoisiam bek deih uh hi. Pulpit pen sumpi ngetna aa zangthei te kikihta hi. Pasian tate aadingin kha tawh kidim siate mah kideih a, Kawl maw, Zo maw cih omlo-in mihoihte kingai ciat hi. Khalam makai hoih peuh leh neihsa sumpi ciangtan omlo-in kipia nuam hi.

Egypt kumpi in, Israel tungah zawhloh ding nasep a piak hangin Pasian in zosak hi. Tuamah bangin zawhzawh loh ding goal hong koihsak nangawn kikhengsat mang hi. Tua ciangin aana tawh zunglot ding sawm tamai uh hi. Zunglot policy hong zat aa kipan tudong nuntakna kha tampi in gentheih lawh hi. Amau naseemte zong tudongmah a pute tungah citak bilbel hi. Lammaan zanglo-a khaktanna hangin thongsung dong kitung ahi hi.

Banghang tuam om u.
Conference moved zawh kum 14 pawlin sumpi kipuak nawnlo hi. Kum 1995 kumin Kawlgam khutlapsanin US kapai hi. Union tawh naseem khawmte khaupai semsem a, member te khasia tetek hi. Kiteelna omlo hi. Union seh bangbang makai hong guang uh hi.Khalam makai dinmun zong niam cihtakin niam hi. Zuun ding puah ding lam sang hilo-in,danpiak ding leh suksiat ding lamsang hong hihi. Misiangtho limsun lo-in vompi halungvei bang ngentang ahi hi. Member ten amau neih sunsun tawh aneih Sangte buaisak hi. Exam lut theilo ding khawngin hong bawl mawk uh hi. Tua in Sia Kai Dal nasepna masuan hong toksia hi.

Mission naseemte in Lungdamnathu pulpit tungah gennawn lo hi.Makaipite pen Pasian teel ahihna leh a langpangte kisusia ding cihthu bekbek genin nei uh hi. Pastor khatpa bang in, " ka pastor hong respect lo hi," ci-in zumah khia mawk ngel zen hi. Sumbei khempeuh union treasury panin ki support sawnsawn hi. Tudongin tua bangaa paisuak mission ih nei hi. Kawlgamah khalam kipawlna pawlpi leh mission om nawnlo hi. Karen minamte ukna monopolism tawh kalsuan mission bek om hi.

Hizah ciang lawmlawm, gentham cing takeileh, sumpi puaknawn kei ni, ci-in, member te thukim uh hi. Lungkham luatna hang aa hong piang ahi hi. Member tung panin buaina khatbeekbeek kipan masa lo hi. Sumpi a puakloh ciangin siapite galhang hong kuanto leuleu hi. Conference adeih kuateng, ci-in khut laamsak hi. Disfellowship pia uh hi. Ei aa pen zunglot ding policy himawk ahihmaninkeivom leh tuuno tawh thu kinial bang ihi hi.

Conference in GC body tawh kikhen ding kampau ngeilo hi. Tuam omding sawm ngeilo hi. Upna nusiat ding sawm ngeilo hi.Conference status ngen hibek hi. Tith sharing puak a sawm hangin sanglo hi. Koihkhiat acih a kikoihkhia ahi hi. Quaterly Lesson leisak lo hi. Biakinn tawh kalh hi. Kikhawm nuamte Singuunau sangnaupang cialin singkhuahtawh pang hi. Utlo pipi-in tuam omloh phamawh hi.

Nidanglai Pawlpi administration hoihlai-in , makai peuhmah ministerial panin kiteel a, service leh experience neite kingaisun masa hi. Tua te mah in khalam thupiseh masa uh hi.Accountants lam leh office staff tuam koih vilvel hi. Zumnaseemte leh sanglam pen amau Line ciat ah credit ngahsak bek a, admin a lut tawm mahmah hi. Tua hunin pawlpi ki-ukna nakpi takin hoih hi.


Pr Thang Siangh. zogampalpi@yahoo.com