THANG SIANGH KHANSUNG TAANGTHU. [ vi ].

KALUNG HONG LAWNG MANGPAWLKHAT.

1. Reform-movement hong dona.
SDA kalutcilin Sabbath thumaan leh Jesu hong paikik ding, cih lametna tawh lunglut takin kalut hi. Laisiangtho saangah upna Fundamental Beliefs nam-28 kasin beh hi. Lungkim takin Laisiangtho-saang tuakin naseem dingin kipia kahi hi. Lamet hetloh thuhaksa tuamtuam kaphul kha hi. Pawlpi aading khualna omlo, deidanna lungsim hanga mawhzonna, lehheekna namkim kaphul kha hi.

Pyidawtha pawlpi khangto hi. Khangnote lawp uh hi. Singuunau pawlpi khutsung ahih ciangin, Church Organization kabawl khit uh hangin hong huzaap nuam uh hi. Reformmovement aa lunglut mahmah uh hi. Ahih hangin a tate uh SDA sungah naseemin kivak ahih ciangin nusia ngamtaklo uh hi. Pawlsung nangawn buaisak tawntung hi. " Sanete vantunggam tunglo ding hi. Zatui zaha zanglo ding hi. Mehteh mehgah a sialin nee ding hi. " cihtawh khauhtakin ding uh a, tua tawh a mai-aa-suak banvaat uh hi. Minam lungsim khauh mahmah hi. Amau minam leh naihuaite humvinven hi. Midang khat ahihleh a zahtampi-in behlapin gensia-in uliante tungah heek tawntung uh hi.

Amaute maisuah leh thugen kampau dante ahi zongin, gamtat-luheek Christian tawh kibanglo lua lawmlawm hi. Keipen Sia kahih zenzen hangin Christian sungah moilai, SDA pawlpi sungthu katheina tawmlai ahih ciangin, Pawlpi zongkhial hiding hing, ci-in lungkia mahmah hi. " Topa, kabelh Pawlpi pen nang aa hilo kha ahihleh, na Tuute omna munah hong puak in," ci-in khitui naptui luangin ki-aapna kanei hi.

Kamang sungah Pasian in hong hopih bangin, kaza hi. " Lau kei in, kong ompih ding hi. Nang, hong sukhate ciangzumsui bang ding hi<" ci-in aw khat kaza hi. Kathawh ciangin, tuamang khiatna theilopi-in kalung nuam mahmah hi. Haksaatna kanawk hangin thasial kikeuh lo-in Ama-na kaseem hi.

A sawtlo-in Sanete vantung tunglo ding, nopna dahna ah sa zang theilo ding, a ci Elder-pa tanu hong si hi. A bawngtal golmahmah go hi. Sihzang upa saneekna hang a, pawlsung buaisak mahmah khatbeek a phun a pau omlo hi. SDA Pawlpi pen political kimawlna tualpi suaksak mawk uh hi. Tua khaici pen leitung bei dong omding hi. Hibang upna pen Christian hilo hi. Mikaangten Cult, ci uh hi.

Gualzawhmang.
Mangmat khempeuh tungkim lo hi. Ahi zongin mailam thupiang ding hong kihilna mang zong om hi, ci-in ka um hi. Reform ten mang peuhmah saanglo ding, cingiau uh hi. Tua zong lampialna nokhat hi kasa hi. SDA upna pen Daniel mang leh John mangte tungah kinga hi. Pasian hong kihilna mangthupi om ding a, sisanpai zui a ihmat mang om ding hi, cin ka um hi.

Zankhat kamangin innsungah ka om hi. Tua laitakin kasanggamnu hong awng lela a, " Thangneu, thangneu, gaalten hong sim hilo maw, tho ve, tho ve," ci-in hong kiko hi. Tho-in kadak khia a, innkiimkotah gaal a dimin na om hi.

Amaute tawi gaalhiamte pen munphiah, meikuang, tupeek, siksem, molhzum leh thaltang ahi hi. Do dingin dingkhia a kapusuah ciangin amaute tawi gaalvan khempeuh kakhutsung hong tung hi. Keizong hehlua kahih ciangin, ku lela a, kakhut sungaa om amau hiamteng tawh naakpi-in lei kavaat hi. "Khatvei kazawhna, nihvei kazawhna, thumvei kazawhna, liivei kazawhna, ngavei kazawhna, gukvei kazawhna, sagihvei kazawhna hi ei," ci-in sagihvei lei kasaat khit ciangin , lei denna-in kapai hi.

Pasian in hong ompih lamtak katel hi. Kagalte hong bawlna ngiankawi khempeuh kei hoihna ding ahihlam katel hi. Tua kagalte ka-et ciangin, naseppih siate ngentang patau aa taangsiasua kamu hi. A zapding theilo in a kiim a paam zawtin taangsiasua kamu hi.

Upna laigil khahsuah kei ni. Jesu tawh kikholhna taisan kei ni. Lawmhoihpen ahi Jesu hong letna khut khahsuah kei ni.

Dawi Ngal khuahaang hong delhna.
Kamangin singkunglian niimdihdiah lakah kavaak hi. Ngal Khua Haang in hong delh hi. Lau acihin kalau hi. Katai ciangin keima thahaatna sangin a zah sagihvei-in haatzaw kahih ciangin hong phazo lo hi, ci-in hong hilh khat om hi.

Hong phakloh ciangin sinso semsem a, kasikna ding munkhempeuh ah gulgunei navial kawikawi hi. Gul omlohna siikin kaangliangliangin katai hi. Hong pha-in hong sawkkha dekdek ahih ciangin singdawnah kahto-in singhiang kawmin katai leuleu hi. Amah zong singhiang kawmin hong delh veve hi.

Hong pha a, zamding a hong kithawi laitakin singhiang dangkhat lengin kana zam man hi. Tua ban hong delh thei nawnlo hi. Lamdangsa-in katuanna singkungpi ka-et ciangin, mualpi nih kikaal dim aa po singkung lian mahmah khat nahi mawk hi. Tua singkunpi hiangdawn khat a mankha kahi hi. A singkung liatzia pen kitehpih vat ding omlo hi. A hawngpen taanghawng bangin thep lipliap a, kham bangin taang heuhau hi. Mualnih kikaal aa po singkung pen tua mualnihte sangin saangzaw lai hi. Lungmuang takin tua singkung tungah ka om hi. Tua singkung nasiatzia kagen siang thei kei hi.

Mualpi nihte pen kumpi nih kawm a ka omna ding hi-in ka um hi. Singkung lian mahmah pen kabelh USA kumpi hi-in ka um hi. Kei hong delh Ngal Khua Hang pen kei hong susia nuam Myanmar Union mission makaite hin ka um hi. Gul kivial tuamtuamte pen a khutzat amau molhtum teng hin ka um hi. USA kumpi pen ka it hi.

Pasian in Hong khamuangsak
Kawlgam SDA pawlpi pen corruption tawh kidim hi. Christian hoihna kimu nawnlo hi. Biakna tawh kibang lo hi. Kideidanna, duhhop huaihamna in Christian lungsim omna luah khin hi. Makaite in amau kimpih khempeuh nengcipin nawlkhin uh hi. Pasian gam khantohna ding hanciamna khempeuh kimkanna neilo suaksak uh hi.

USA Detoit, Sterling Height ah CGE ah kaseem hi. Gim mahmahin hul ningniangin pawlpisung omzia ngaihsun kawmkawmin lupna ah ka kilawnsuk hi. Khukdin, " Topa kahanciamna khempeuh Lungdamnathu mainawtna ding ngimna hilo hiam, khagup nading ngimna bek hilo hiam, kalungsim a tawng dongin hong mu hilo nahiam? Bang hangin hizahin hong huatsah uh hiam? mithat kahiam, mi neihsa sut kahiam, mi heek kahiam?.." ci-in khua-ul kai damdamin khitui naptui takdatdatin kangen hi. Bang hangin hong nusia nahiam? cihtawh kazom hi.

Zan kamangin pasal gol mahmah khat in hong dinpih hi. Kaliang langnih hong lenin hong ensuk hi. " Bang hangin lau nahiam? Napaina khempeuh ah lamlak khat teitei hong pia hilo kahiam? Giant-milian pipite tawh ankuang hong umkhawm sak hilo ka hiam? " hong cih khit lian leh ka khanglo hi. Giant-milian acihte kua ahitam, ci-in kalung ngai hi.

Grand Rapid ka omlai-in Pastor Bill Grdner in hong samkhia hi. A pawlpi sungaa mihau a zahtak pen uh innah kha-6 sung ka om a, zingan nitakan kane khawm uh hi. Lawmta bangin kikhawlin ka ki-it mahmah uh hi.

Florida Zatopi katung leuleu hi. President Bill Wilson leh Pr William Meril in hong keem hi. Mite lakah amau hangin kamaingal mahmah uh hi. Munhoih khemnpeuh katung uh hi. Ulian kikaihkhopna khempeuh ka kihel uh hi. Amau innkuanpih bangin ka om uh hi. Meril pen SDA GC zumpi ah Treasurer ahi hi. Wilson pen American gam Zato lianpen nihna president ahi hi. Leitung mahmah ah mineu hilo uh hi.

New Mexico katun ciangin Edington Everitt tawh ka kimu uh hi. Republican Party ulian ahi hi. Tua tungtawnin US Senater Pete Dominice tawh hong introduce a, ka innkuanvai khempeuh hong huh hi. President Bush hong pai ciangin kalut theihna ding ticket nih kangah tawntung hi.

Giant milianpite tawh ankuang kong uumsak hi, acihpen maan kasa hi. Pasian hong kepna lianin thukin zai kasa mahmah hi. Kamang aa hong hopihpa in US ah nasuan nakhak 1200 pha ding hongci thuahlai hi.

US citizen suahna ding mangman.
Kamang sungin shopping kapai leh munkhat ah kum-6 gual mikaang numeino meelhoih mahmah khattawh ka kituak uh hi. " Lawm, napa kua, " kacih leh, " ee maw kapa pen Thang Siangh hilo maw" hongci kik hi. Lamdangsa-in , " Napa kua ahi ee, " kaci kik hi. " EEtuh maw, kapa Thang Siangh hilo maw," hongci kik leuleu hi.

Kalungsim hong lawng ahih ciangin laibu sungah kaciamteh hi. Nasepna mun katun ciangin, lawmte kiangah kagen hi. Thang Lam in, mikaang zawlta nei ding hiniteh, hong cimawk hi. Sia Tial Hlei Kiu in, " US citizen ngah ni ciai, ciamteh o," hong ci hi. August15,2006 kumin citizen kangah takpi hi. Kamsang kahi kei hi. Pasian in hong makaihna, mangsung leh lungsim pilna zangin hong kihil hi, ci-in ka um hi. Hong nusia lo, kabiak Abraham Pasian, Isaac Pasian, Jacob Pasian tungah kalungdam hi.


Thang Siangh. zogampalpi@yahoo.com