THE BIOGRAPHY OF LIAN KHAN CING azom-i

Thang Siangh tawh a kitheihna.

Kei Nu leh Lian Khan Cing pianna Pii uunau ahi hi. Silehsa kinai hi. Ahih hangin kongzing gamla ahihmanin sanggam bangin kithuahhun om taktak lo hi. Nungakno pasal khempeuh etlawm a sak laitakin khat veivei lawmte tawh kahawh zel hi. Kingaihnathu kagenloh hang un ka kilamnaih mahmah uh hi. Midangte sangin gen khempeuh kipakta zaw uh hi.

Khatvei Thang Siangh in mangman hi. Amangin Cingno kiang hawh dingin aaklui-kaang khatin vapai hi. Agia sau hi. A khuang peeklianin puknelnelin hoih kisa mahmah hi. Cingnote pialkhang a tun ciangin, meikhuklam nga-in a khaazaap khiahkhiah-in khuang ee-aa hi. A uupa Hau Hau Za Cin in, " eh hih aaklui koipan hong om dihdih a hia? Pusa thoihna-in nei ni ei," ci hi. Tua leh Cingno in phallo hi. " Uu aw, a ci dingin khawi zaw ni," ci hi. Nitak zawlhel aa apai ciangin, amangmat teng Cingno kiangah vagen hi. Tuahun aa kipan "katenpih ding hinteh," ci-in anih tuakin lungsim tawngah vom den uh hi.

Thang Siangh Laisiangtho Saang pan a ciah ciangin, kingai uh a, March 4, 1973 ni-in Pyidawtha biakinn ah kiteeng uh hi. Khanglui ten kaam-kituak ci uh hi. Tuhunin Pasian thupha sang kicizaw hi. Amau ngah thupha hangin a tate USA tunpih kim hi. US pen tuhun Canaan gam ahi hi. Khuaizu leh bawngnawi luannagam ahi hi. Mundang gamte tawh tehpih ding hilo hi. Neektheih annamkim kingahlo omlo hi. Azawngpente motor lo-in naseem lo uh hi. Phone kinei kim hi. Aircon sungah ki-om kim hi. Sualphah carpet tungah ki-om kim hi. TV, Video, leh computer kinei kim hi. A zawngpente dinmun pen hizah ciang hisaap hi.

Lian Khan Cing pen Kawlgam a omsung pumpi zawngkhal mahmah hi. Khasum tawmno tawh munhaksa nawk kawi hi. Ta sagih nei uh hi. Khelh ding puansilh kicing neilo hi. Ahih hangin Pasianthu sungah citakin om hi. Damlohna hangin Zato ah 4vei ki-aat hi. Pumpi zawngkhal mahmah a, pong-80, 90 bek pha hi. Gawnglua aa silah-nungta aa om pen, Church Ministry Workshop hilh dinga hong pai siaten, nasungthau tamlua hi, ci-in nagen a, sathau khawng bawngnawi khawng limneek ngamlo hi.

US hong tun ciangin kalawmpa Edington Everitt in, " nalawmnu Vitamin D Milk bawngnawi leh sa aduh zahzah nesak in," hong hi. Lawmnun bel siavuan ten, nasungthau tamlua, hong cih hiven, ci-in nengam paklo hi. US hong tun laitakin pong-80 gik hi. Kha-3 sawtlo-in pong-126 hong pha pah hi.

Cingno tawh kateen aa kipan tuni dong mangngilh zawhloh dongin kinial-kitotna kanei kei uh hi. Ama nuntakna khotakin Jesu tungah kinga hi. A pasal hong lungkiasak ngeilo hi. Katunna munmunah amah pen Deaconess in kizang tawntung hi. Pawlsung siatna ding kamsia pau ngeilo hi. Lawm leh gual gensiatna kam zang ngeilo hi. Kamsangnu in, " Silent is Golden" kampau kidawmzote pen kham sangin manpha zaw hi, ci-in gen hi.

Amah tawh kangah khop uh Pasian thuphate pen lungdam ding tampi kaba uh hi. Pasian tungah kakohnop lungdamna lianpen, zihoih, zi-lungduai, lungsim siangtho hong piak mahmah kalungdam pen hi. Kei pen, lungtomin, hehbaih zong lungdambaih kahi hi. Keibang a kicinglo midangkhat hileh tu-a zahin thupha kasaang zo kei ding uh hi.

Yangon ka-omlai un, biakinn mai-ah nupi teng a puanhoih uh kilakin baakvaat bang uh hi. Cingno ama puan mualningniang tawh sawitai dengdeng a, biakinn sung tuh vingveng hi. Napuan hoih si, aman bangzah ci-in khat leh khat a kidot hangin, ama puan man kidong ngeilo hi. Tu-in Pasian hehpihna tawh US a omzawh a puansilh vaalte, innlam pianuamin thuumthuum hi.

--------------------------

THE BIOGRAPHY OF LIAN KHAN CING.

LIAN KHAN CING TAANGTHU A TOMIN.

A pianna Beh leh pu.

En Ngaih khahte:
1. Son Thuam.
2. Hen Zel.

Son Thuam khahte: Hen Zel khahte:
1. Ngaih Tual. 1. Thuam Zam.
2. Thang Do. 2. Thang Hau.
3. Zel Khup. 3. Tual Za Do.
4. Khan Za Nang.

Ngaih Tual khahte: Thuam Zam khahte:
1. Thuam Go Thang. 1. Zel Khan Dal.
2. Tel Do Lian. 2. Do Suan Nang.
3. Do Dal. 3. Kam Thang.

Thuam Go Thang khahte: Zel khan Dal khahte:
1. Hau Za Cin. 1. Zam Than Lian.
2. Ciin Do Thang. 2. Neng Za Kot.
3. Pum Go Man.
4. Lian Khan Cing.
5. Khup Za Vung.
6. Gin Ngaih Lun.
7. Tual Lian.
8. Theu Sian Mung.

Tel Do Liankhahte:
1. Tual Khan Mang.
2. Thang Khan Suan.
3. Dal Za Khup.
4. Dal Lian Thang.
5. Pau Sian Thang.
6. Tual Siam Lian.
7. Do Sawm Thang.

Do Dal khahte:
1. Tual Khaw Pau.
2. Thang Do Hau.
3. Sawm Khan Thang.

Lian Khan Cing pianna.

Name: Lian Khan Cing.
D O B November23, 1953.
P O B Kapteel, Tedim tsp, Chin State.
Father: Thuam Go Thang.
Mother: Ciin Za Khup.

Ciin Za Khup pianna.
Father: Tuang Hau.
Mother: Niing Pum.
Behmin: Sukte.

Sanggamte:
1. Ciin Za Khup.
2. Lian Za Khup. khahte...............1. Hau Khan Mang.
3. Lian Za Khai. 2. Do za Tung.
4. Cing Do Lun. 3. Khai Khan Dal.
5. Hau Do Cing. 4. Gin Go Thang.
5. Thawng Khan Khual.
6. Khup Khan Mang.
7. Kai Za Dal.

Married Pr Thang Siangh.............March 4, 1973.

------------------------------------

PASAL TAKTAK, PASAL PIL.

PASAL TAKTAK, PASAL PIL.

US pen leitungah taanglai Rome kumpi mah bang hi a, aneihloh khatbeek omlo hi. Leitung mihingte kidemna ahi, pilnalam kidemna, thahaatna-lam kidemna tuamtuam a khel nono, a lamdang no no, nei uh hi. California , Las Vegas acihna khua ah nakhempeuh phial kim hi. Leitung mihing etding lahtheih khempeuh lak uh hi.

Kimawlna tualpi lian mahmah om hi.Building lianpipi sungah a dei tuamtuam om a, amuhnop namkim kilahna omkawikawi hi. Kimawlna namkim a khawk akahwkin kinei hi. Pawi en dingin mitultul tampite paiziahziah tawntung hi. Pasal thahaat kidemna zong nei uh hi. Boxing kitupna munah, pong 240 ciang agik pasal baangaap kihualvalval kitupna zong om hi. Khatpan a lawmpa tumpai hi. A khut laamto-in, " ken zo ing" a cidanin mipilam nga veva hi. Pahtawina a kawngah kiteengsak hi.

Tua khit ciangin pong 600 apha pasal pi-6 pan pisagih kiim ngebtang Apes zawngkuh lampai bangin kaak laanglaangin hong pusuak leuleu hi. Tuate pen trailor motor golmahmah kaisak uh hi. Pi-12 a saaang khaukhungin Piipaa bungpite tamlawnzo kidem uh hi. Suangtum beemkim diameter pi2.5' apha sagih domin tausaang tungah ngasak hi. Tua khempeuh a banbanin hihzo lel uh hi.

Singlam tawh kisai Company te in singtan kidemna, singphuk kidemna, singluang hualhaat kidemna, tuitungaa singluang kikhungte tungah ataisiam kidemna tuamtuam nei uh hi. Hibang kidemnate pen valkhong lo hi. Nuntak kivakna naseplam phattuamna tampi piangsak hi. Cidamna lehthatang haatna khangsak semsem hi.

Tua khit ciangin vandaak zezua a, a tunglam bekbek en mipite kamu uh hi. Tua mite in inndawl varada maiaa numeite en uh ahi hi. Apumtangin seel kikeuhlo-in om uh hi. Ahoihna teng kimu ahihmanin tua munuamin mihing miksihon bangin kiphul naunau uh hi. Mihing paktatte leh a kicianlote in tua bang munah sum neihzahzah zang thei uh hi.

Tua khit ciangin Platform munkhatah pasal zangsau kidemna ci uh hi. A ente pen numei kum-40 nuaisiah tampen hi. Pasal thahoih mahmah giat hong pusuak hi. Kigual dimdiamin amau ngeina bangin hong laam uh hi. A lukhu aa kipan a tungaa puansilh khempeuh abanbanin a laamkhawmin khatkhit khat suahkhia-in paikhia uh hi. A pumgak sungnung leh sungten bektawh hong om ciangin, pawi-en numeite lawplua kisa-in khutbeengin awngin kihot dapdap uh hi. Tuamunah pasal pawi-en tamlua lo hi.

A pumgak leh a sungten hong suahkhia petmah hi. Gol lah gol si, sau lah sau si, a pheipaang saatin kipeidaudau hi. Tua laitak numei pawlkhat gonggaw-in zawngkhia uh hi. Laamtawpin tawlpikhat a pumtangin ding uh hi. Tua laitakin numeite in sumlot ziahziah uh hi. A tawpna ah numei khat dingin platform tungah kahto a, adeih penpen a kawngah kawi-in screen nunglamah ciahpih hi. Pasal taktak kidemna ahi hi.

Tua kidemna sungah a neupen letmat-8 sau hi. A saupen letmat 10 pha hi. Hih mite sungah ei Asia minamte kihelzo ngeilo kha ding hi. Ahih hangin tua mipa pen leitungah amin kiza ngei khalo hi. Nobel Prize piakdingin ki nominate ngei lo hi. Leitung pasal minthang taktakte kua bangte hiding uh hiam?

Leitung minthanna tuamtuam tampi om hi. Gaalhang aa minthang om hi. Thatang haat a minthang om hi. Science tawh kisai mipil minthang om hi. Political siam ahi gam leh minam aading a kikhamngam Patriotic om hi. Pumpi tung siamna tuamtuam ahi cidamnalamah minthang om hi. Eite in bang minthanna ih teel ding hiam? Pasal taktak bangci suah thei ding ihi hiam?

Pasian piak pasal power.
Pasian in mihing a bawl ciangin Pasal bawl masa hi. Ama-lim suunin bawl hi. Pasal neih van khempeuh Pasian in nei hiam, cih thudotna pen thuklua ahih ciangin ih kikum kei ding hi. Numei pen pasal nakguh panin bawl hi. A vante pasal tawh kibanglo hi. Pasal bangin Pasianlim suun khinlo hileh kilawm hi. Pasian in pasal sangin a niamzaw ah koih hi. Pasal zahin power pialo hi.

Pasal pen a bawlsa nakhempeuh uk dingin sawl hi. Biakna siampiza pia hi. Sisan tawh mawhsutna naseem sak hi. Numei lutang ci-in minguan hi. Israelte in mi a sim ciangin pasal bek sim uh hi. Numei leh naupang kinusia tawntung hi. Nungzuipite hunin zong mipi kaikhopnamunah miphazah a gen ciangin pasal bekta kigen den hi. Topa in pasalte hong piak power pen saang mahmah hi. Tua power kizatsiam leh pasal taktak kisuakzo bek ahi hi.

" Tapasal haute pen thal-um dimin thaltang pua mipa tawh kibang a, a gaalte kongvangah dakngam ding uh hi." ci-in pasal thupizia laisiangtho sungah kamsangte dongin gen uh hi.

Zomi, ih Pu ih Pate zong pasal thupiseh minam ihi hi. " Kanu tapa hi ing," kici ngeilo hi. Haksa thukhat peuh a om ciangin, " Kapa tapa hi ing," ci-in pasal hihna tawh tha kila hi. Nuntakna nei khempeuh apa kithupiseh zaw hamtang hi.

Zomite pahtak pasalte.
Taanglai-in saman theite,thautawi theite pasal taktakin kimu hi. Gaal-ai zo, tong zo, sialkopgo zote pasal taktakin kimu hi. Siikaang dolcial lamte pasal taktakin kimu hi. Phungsung leh bangkua vaanzote pasal taktak kici hi.

Ei Zomi ngeina tawh a khangkhia pasal taktakte in, ama pianna beh leh phung thupisak hi. Sanggam huaisiam uh hi. Thu leh la tuamtuam a om ciangin ama silehsa tawh kinaina zui-in dinmun la a, sanggamte aadingin kidalna lum bang ahi hi. Kulhpi bang ahi hi.

Numei tungah thuneihna
Zomite lakah zilelte kineumuh mahmah hi. Mawnlel ci se se uh hi. Ama pianna Nu leh Pa hihgawgaw a, a Sunghte neel hianghianmg aa hopih om hi. A pianpih sanggamte ngotliapliap aa ho a, a zi ciangin sia leh pha khenlo dongin tuisiksaat a bang pawlkhat om hi. Nu leh Pa thusimlo a, zite ekteh dek a kihta om hi.

Tua bang mite pen Mawnlel taktak ahi hi. Zi a beel pasalte zong kineumuh mahmah a, Mawnbeel mah natang sak uh hi. Zomite in numei suan leh khak zui-in khang sim lo uh ahih ciangin Mawnlel te pen hunkhat ciangin sanggamsel bangin hawmkai thei hi. Numei pen a kilawmzah sangaa pibawlna in pasalte vaangkiamna ahi hi.

Numei cih bangbang cihmai lel lawmlawm pen mawnlel simtak mahmah khong ding hi.

A pualam tawh kizopna-ah
Thumaanna kisam hi. " Honesty is the best policy," kici mikaangte paunak pen mang ngeilo ding hi. Khat saangaa tamzaw mihing omna khempeuh ah thumaanna leh cihtakna kisam hi.
# Ciampeello mihing pen pasal muanhuai hihna namkhat ahi hi.
# Nupa kikaal paubanglo ding hi. Tua in pasal taktakte piazia ahi hi.
# Guallelhhun lungkiathun leh daupaihun a lungsim kilamdang tuanlote pen
pasal picing pasal lungtangpha ahi hi.
# Bangbang biakna ahizongin a pomlaitak biakna tungah cihtak pasal pen
pasal lungtangpha ahi hi.
# Gam leh minam puapaih ngeilote pasal taktak ahi hi.

Thumaanna pen thatang haatna leh leitung minthanna khempeuh sangin manpha zaw hi.Kasangnaupang lai-in sangsia-4 kanei uh hi. Sia pawlkhatte pen amau uthunin hong pai dildial uh hi. A hunmaanin tung ngeilo hi.

Sia khat pen, amahun a tunlian leh, kongkhak sunglam a khe tawh hong siikto lian hi. Amah pen samphiahsa-in hongpai ngeilo hi. A puan kilhkhial ngeilo hi. A puanngawng bawllohin om ngeilo hi.

A inn a lote siangtho hi. Huan sungah mehteh mehgah ahunhunin kingah hi. A tuikuang niin ngeilo hi. Thumaanna hangin mikhempeuh in zahtak hi. Degree sangpen sangin ama thumaanna in tawisang zaw hi.

Zii itna bangcizat ding.
Tuteng " Zii nei leeng" cih thulu hong laang mahmah hi. Numei a tamzaw pen a puakkhamlo bomtang ahi hi. Tua bomtang zangno a cing dingpen a pasal ahi hi. Zii it ding, ngai ding cihpen genphapha zong kisam kasa kei hi. Tua itna bangci zat ding cih thupizaw kasa hi.

Itna zangkhial kitamzaw a, bangkuasung phungsung kitamkham tam hi. Sanggam uu leh nau Nu leh Pa nungheilo pasal tam hi. Cihmawh hun ciang bekin sanggam omlam, nu leh pa omlam kiphawk thei hi. Cihmawh hun ciangin numeilam bek kicing lo hi. Sanggam dintuakna munah numeilamte hong kiguangngam tuanlo hi. Luangpham hun leh leiba thangba tungtaangah sunghlamte hong phunkhia ngam lo ding hi. Ei luang hong pham dingte mah ih khing ih sa, a nepente hizaw leh nakhempeuh hoihpai pah deudeu hi.

Tuuhon lakaa ngianupa bangin pianpih sanggamte suanghik lawn bangin kikhenkek thei hi. Tate theihloh kaalin Nu leh Pate lukham tekhdikdekin kap thei uh hi. Zuntui ektui siak a, khitui naptuitawh a keem nu leh pa donlo-in khatvei beek zunleh ek siakkhalo a sunghte akhum a al neektaangin a piak ngam mawk uh ciangin bangzah diipngeek na ding hiam?

Numeilam sanggam kicingpiante amau nuphal leh a sunghno tengtawh gualnuamin khua phawklo thei hi. A sawtlo-in a teeklamte hong beibei hi. Khanglaite zi leh pasal hong nei-in amau masuan ciat uah hong mangthang uh hi. Teek semsem a, hong kem hong vaan ding hong tawm semsem hi.Pasallamte tawh kizomna tawm a, kimeltheihna ki-itna ki-aangvana omlo hi. Ama sanggamte neuseh ahihmanin a tate in zong a pa sanggamlam thusimlo hi. A pa mahmah tuamval lel hi. Anu a pate tung abawlmah bangin a tate in ama tungah bawl hi. Ih zi ih tate pen sanggam itna khauhtak hilh huai hi.

Itna thakiam sak lo a, zi gilo kam hubipzote pen pasal pil, pasal picing ahi hi. Nu leh pa sanggamte itna kiamlo a, zi-iitna khotak neite pen pasal picing ahi hi. Zii leh innkuansung kigualnuam sak zote pen pasal pil ahi hi. Sia leh pha khenlo a, " Zi cih bangbang " man sawm mawkte pen thal-um sungaa thaltang omlo, galsim dingaa kuankhia pasalhai tawh kibang hi.


Kamkaihkhau khahsuah ken.
Numei gilo khat uk sangin gambup ukbaih thei zaw hi. Numei khat leh khat kibanglo hi. Nuntakna masuan lungpatau theilo utut aa omnuam om hi. Zuaugen haat om hi. Amah kiphatphat bangmahlo om hi. Guta om hi. Pasal lo-a bangmah phulzolo, seemtheilo. pasal sailala om ding hi. Mi gensia aa nitum om ding hi. Uisan, thadah puansilh niiktenhoih bek tawh lungkim om ding hi. Pasal laingam om ding hi. Anhuan theilo kuangsawp theilo om ding hi. Pasal khatguak tawh lungkimlo zualzang om ding hi. Sumkhol theilo a maneek tawntung om din g hi. Thu-im theilo a theih khempeuh a lawnkhiamang pahpah om ding hi. A pasal bek ngai a teekte huatsah om ding hi.

Hibang siahuai khempeuh lencipzo a, tuate munah itna a guangzo, numei migi a suaksakzo pasalte pen leitungah pasal thahaat pen leh pasal pil, pasal cingtak pen ahi hi.

Pasalte in numei ngaihsutna khempeuh theihpih ding hi. Itna bulphuhin encik ding hi. Pukna lampi khempeuh khaktan ding hi. Masuan kalsuan zi a ding ngimna khempeuh nupakopin kitheisak ding uh hi. Thusim omlo ding hi.

Pasal sangaa thukhualzaw ahoih khungthei zaw numei zong om hi. Numei ngaihsutna hoih khempeuh lei-ah kiasak mawklo ding hi. Innkuan lamtohna ding ngimna khempeuh kikumkhawm ding hi. Kikhenkhapna a piangsak ngaihsutna khempeuh nilkhia ding hi. Itna bulphuhin nakhempeuh sem ding uh hi.

Zi pen saatding leh velhding hilo hi. Nakahnsungaa naneih vanmanpha pen ahi hi. Zuun ding leh puah ding ahi hi. Pianpih zawngkhalnate simmawh zawhthawh ding hilo hi. Dom ding leh panpih ding ahi hi. Sangnaupang pillo a saatsaat siate a haimah ahi hi. Zi te pen sangnaupang bangmahin pantahin hilh ding ahi hi. Khuttum leh ciang zang ngei kei in. Thuhoih hilh ding pelh ngei kei in. Na it mahmah khaipote nakhoih mah banginkhoi in. A tungaa om lungnote paihding kihta kei in.

Numei uksiamte mipil mithahaat ahi hi. Mawnlelin dai ngeilo ding hi.

Thang Siangh. zogampalpi@yahoo.com

SDA MISSION CORRUPTIONS PUAHPHAT HUN. ( v )

A KHANGKHANG AA PAWLPI SUNANGH MAWHNA.

Vantung in Ama Pawlpi tatsat lo-in hong vil gige hi. Ahoihna leh lampialna khempeuh teltakin mu hi. Hunlapin thuhilh ding pelh ngeilo hi. Thumangte ngah ding leh migilote ngah ding zong theisak pah lel hi.

Nungzui hunlai-in Lungdamnathu in leitungbup kiloksak hi. Pawlpi tampi phut uh hi. Leitung aa-om dawibiakna leh milim biakna pan hong pai minamkimte Christian hong suak uh ahihmanin a khankhiatpih uh ngeina hoihlo tampimah hong keng uh hi. Pawlpi pen nungzuipi-hun tawh kibanglo hi. Upna tawh kisai kinialna tawmtawm hong kipan hi. Lampialna leh mawhna in thumaan-thutak hong suankhia hi.

Topa in vantung panin ensuk a, pawlpi-sagih tungtawnin thuhilh hi. Tua pawlpi sagihte in, Ephesus, Smyrna, Pergamos, Thyatira, Sardis, Philadelphia, Laodecea te ahi uh hi. Tua hunlai-in pawlpi lian mahmah tampi om khin hi. Antioch, Rome, Corinthian cihte minthang mahmah uh hi. Tuate zanglo hi. Pawlpimin leh amau palsat mawhnate tawh kituakin leitungbup aa-om Christian khempeuh thu hong hilh ahi hi. Tuahunin leitungbup huamin Pasian Pawlpimin tuamneih selo hi. Amau omna ciatah min khatciat nei-in Pasian tawh kizomkim tek lel hi. Vantung in khatbeek khahsuah selo hi.

Hih Pawlpimin pen abanban aa kiluahto hituanlo hi. Pawlpi minkhatciat aa om uh ahi hi. Christian lampialna ahi palsatnate leh Pawlpimin leh zia lehtong kituak ahihmanin tua sihsanin hong kihilh ahi hi. Hih Pawlpimin khiatna leh Christian khalam dinmun saikak a, leitung vannuai Christian omkhempeuh thuhilh hizaw hi. Tua Pawlpi thanemna khempeuh SDA sungah kimtakin om hi. Topa hong itna leh hong thuhilhna ih sin ding hi. Pasian in mite thu hong hilh ciangin teelding namnih bek om hi. Tua pen sihna leh hinna bek ahi hi.

Ephesus Pawlpi tungtawn aa thuhilhna.

Aksi sagih a tawi vantungmi pen Jesu ahi hi. Tua aksite pen Pawlpi uksiate ahihkeh lungdamnathu naseemte ahi hi. A thupuak thuhilhna pen Amasa aa naneih ki-itna kiam ci hi. Na kipuahkik mkeileh na meivak khinkhia ning cingiau hi. Khasiangtho in nusia ding acihna ahi hi. Pawlpi a om hangin Pasian ompihna leh Khasiangtho teenpihna omlo thei hi. Pawlpi pen Khalam ah a si ahi hi. Khasiangtho tenpihloh pawlpi pen gupna tawh kisai nawnlo hi.

Pasian hoihna pen ITNA in hoihsak hi. Leitung vantung pasian dang khempeuh tawh ama kilamdanna pen Ki-itna Pasian ahihna hang ahi hi. Pawlpisung ki-itna a kiam ciangin eite tawh Pasian hong omkhawmlo ahi hi.

" Itna in a lungduai thei hi.
" Itna in a ki- el kei hi. A kiphasak kei hi. A gilo kei hi.
" Itna in a kilawmlo-in a gamta kei hi. Ama phattuamna ding bek a zong kei hi. A heh thei kei hi. Mawhna awlmawh lo-in a om kei hi. Thumaanlo a gamta nuam kei hi. Thumaantawh a lungkim thei hi. Asia nakhempeuh a ki-iipzo hi. Nakhempeuh a um thei hi. Nakhempeuh a lamen thei hi. Nakhempeuh a thuak keikai thei hi.
" Itna pen paktat-in zualzang lo hi.
" Tu-in ahihleh upna lametna, itna thum om hi. Hih thumte lakah Itna a lianpen ahi hi." 1 Cor 13: 1-13.

" Keimah in vantungmite kam kapau thei zongin itna a om keileh, agingthei pengkul, agingthei daltuah bangbek ahi hi.
" Kamsangpa pilna nei-in thuthuk tampi kagenthei zongin, mualkinsak upna kanei zongin itna kaneih keileh amawknapi ahi hi.
" Kaneihsa khempeuh pia-in midangte anvaak bek lo-in kapumpi haltum dingin kapia zongin ki-itna kaneih keileh amawkna ahi hi. " 1 Corinthian 13: 1-3.

Itna omkeileh thukham palsatna tawh kidim hi. Pasian itna pen thukham khempeuh kicinna zatui ahi hi. Pasian thukham khempeuh itna pan hong phulkhia hi. Christian te namtuina leh midangte ahuupzawhna pen itna ahi hi. " Itna longal leii kibasak kei un,"cihpen thuzuite aading thukham lianpen hiding hi. Pasian kiangpan itna ih ngah a, tua itna mah leitungah ih piakhia hi.

Nicilaitan pawl Pawlpi sungah.

Pawlpi masate thuaklah Nicolaitan kici Nungzui aa kineih thuhilh zuaute na om uh hi. Tuate in pawlpi huzaap mahmah hi. Mitampite in Pawlpi pen nuntak kivakzonna-in nei uh hi. A pumpi a kingak hangin a kha leh lungsim kinga lo hi. Pasian Tapa hong sihnathu in amaute lungsim vutlo hi. Tua mite pen Pasian misiangthote aadingin gaal sehuai pen ahi uh hi.

SDA hong kipatcil lai-in Battle Creek ah Sanitarium Institution lian mahmah nei uh hi. Zatopi tawh pilnasang tawh, administration office tawh gawmkhawmin building nasia mahmah tawh om uh hi. Member naseem khempeuh tualai-ah kibuphual uh hi. Kikhen nuamlo hi. A sawtlo-in hong kaangtum hi. Kiphelhzo lo hi. Mrs White in Pasian haal hi, cingiau hi. Nasep ding omlo ahih ciangin kikhenkek uh hi. Lungdamnathu nasia takin kizel zaw a, Pawlpi khangzaw hi. A kineih khempeuh pawldangah mangthang hi.

Nicolas pen Pawlpi keem dingaa sathaunilh mi-7 te lakah khat ahi hi. Amah pen Gentile mi ahi hi. Antioch Pawlpi pan hong pai hi. Antioch pen Gentile minamte omna Pawlpi lian mahmah khat ahi hi. Gentile Lawki ngeina ahi gawlmek kithatsa, dawibiaknasate leh numei pasal paktatnate in Pawlpi sunglam hong tuh hi. Pasian in nasiatakin langpanin thuhilh hi.

Tuhun ih Pawlpi sungah numei pasal tawh kisai kithaangzat mahmah hi. Gamdang pai dingte in a zi ding uh, van vaikhak bangin kivaikhak ziahziah uh hi. Ordained Pastor ten zong deihsakna tawh a simthamin thungetsakin certificate pia uh hi. Pasian mai leh mipi mai-ah kaciamna cihte ahi, Pawlpi neih ngeina kitenna siangtho pen limci takin kuaman neinawn selo uh hi.

Pasiannaseemte numeivai aa paubang kitam mahmah hi. A kha cinglo a nausuak tamzaw mai hi. Upa muanhuai tampi pen zi nih zi thum tawh om uh a, a daipih numei phazah meneu pan panto leng khutpi dong tung dekdek ngentang hong himai hi. Christianity sianthona kimu kha nawnlo hi. SDA bek kigen hilo hi. Pasian deihloh Nicolas upna acih ciangin Lawki ngeina tawh kisawhpawi gamtatnate ahi hi. Leitung tawh kilamdang lo hi.

SDA Pawlpi in Laws and Grace ih tel mahmah keileh kha tampi kitanlawh kha ding hi. Pawlpi thukham in numei pasal milian mineu deidan lo hi. GC president pa zong Churchboard khutnuai ah om hi. Pawlpi sianthona pen Churchboard in kemcing ding hi. Pasatna leh mawhna pen Pawlpi ngeina a suahlohna dingin dalin keem ding hi. A thanem khate khoi ding a sianthona sungah tumpih tawntung ding hi. Mikhat deihsakna tawh Christian Standard khiam tuanlo ding hi.

Pawlpi a khanmah bangin palsatna zong tam ding hi. Upna bulpi sihsanin thapiak ding ahi hi. Elder or makai khatpeuh ahihleh thusian mateng van kisuanlo a, etcikin kikoih hi. Laymember ahihleh etcik ci-in thungen a thapiakna hun leh kilamkikna hun kipia hi. Kisiikkikna lim hong kilat a, hoihlam hong manawh ciangin ngeina munah kikoihkik hi. Tua pen hehpihna leh thukham zatzia ding ahi hi. Nicolas upna omlo ding cilo hi. Nial in, ngeina suaksak kei in, aci nuam ahi hi.

Smyrna Pawlpi tungtawn aa thuhilhna

Ephesus Pawlpi sungah " Nungzui taktak hilo, nungzui bangaa kibawl" ci hi. Smyrna Pawlpi thuhilhna ah, " Jews taktak ahilo Jews bangaa kibawl. vs 9" ci leuleu hi. Pasian minam hing ci a kiphatsakna leh Pasian Pawlpimaan sungah om ing, ama naseem siampinam hing cih kiphatsakna kibang hi. A pualam Jews leh a sunglam Jews om hi. Sunglam pianthakna omlo Pasian naseem khauh mahmah pawlkhat om hi. Tua mite pen ki innteek sak mahmah zawsop hi. Pasian Pawlpi pen ama deih bangin a zeekthei bangin kineih mawk uh hi.

" A pualam Judahmi banglo-in a sunglam Judah ih bat ding Topa in deih hi. A pualam vunaatna bektawh vunaat taktak hilo hi. A sunglam Judah mite bek Judah mi taktak ahi hi. Vunaatna zong ..Khasiangtho thu hang a lungsimthak nuntakna tawh kisai hi. " Rom 2: 28-29. 9: 6-7. Gal 3: 26-28.

A pualam Judahmi banglo-in a sunglam Judahmi ih bat ding Topa in deih hi. Ei Sabbath maan, ei sa nelo misiangtho, thuman-thutak taangko cihbek tawh Christian hoih kisuaklo hi. Sabbath tang mithat tampi om hi. Zukham kawmsa a thuman kupsiam mahmah om hi. Jesu ih sungah hong ten ding kisam hi. Tua pen Paul in sunglam vun aatna ci hi. Tuhunin piangthak kici hi.

Pergamos Pawlpi tungtawn aa thuhilhna.

Nidangin Satan in ih Pawlpi a zangtheilo dingin kangaihsun ngei hi. Muanglua kahihmanin hong naupangvai kik zawzen hi. Jesu in Pergamos Pawlpi tungah, " Natutna pen Satan tokhom hi," acih pen dipkuat huai mahmah hi. Satan pen ciim mahmah a, a sungah lutin, SDA suak photin, makaipa tokhom luah leh tua pen Pasian Pawlpi suksiatna muibun penpen ahi hi. 2 Thes 2: 3.

Makaite cih peuhpeuh, "suk acihleh suk, to acihleh to", cileng bawlsiatna om ngeilo ding hi. Bawlsiatna pen Christian upna khiam nuamlo, thumaan tawh a ding tinten misiangtho te hangaa piang ahi hi. Pasian in Christian Pawlpi ki-ukna dingin kumpi aana zat ding deihlo hi. " Makai utte in sila suak ding," cizaw hi. Constantine kumpipa Christian hong suah ciangin Christian makaite in power hong tamngah lua uh hi. Pawlpi makaipa pen Jesu in " man of sin 2thes2:3. ci-in minvawh pah hi.

Na tutna pen Satan tokhom hi, cingiau mawk hi. Pawlpi makaite aana hong liatpian ciangin tokhom tungah Satan tu cih phawk in. Misiangthote nakpi-in kikep kul hi. Anti-pas acih ciangin Pope thunial a tangtak a ding misiangthote gennuam ahi hi.

Balaam in Nicolas lampialna teng a pialpih banah sumgolh sumsiangtholo, maivilna khuttungtawi, letsong deih hi. Golhsum bekbek zangin naseem nuam hi. Milim biakna leh tua biaknasa neekpen Pasian in palsatna kikimin ngaihsun hi. Gawlmeksa neek zong milimbia mah bangin hong ngaihsun hi. Numbers ch24, 25: 2-3. 2 Peter 2: 15. Jude 11.

Balaam kamsangpa in Barak kumpipa piak sumgolh ( Bribes) iplah hi. Tuhunin niangtuitaih, antaih a kicite pen Pawlpi sungah zat ding kilawm lo hi. Sangnaupang pilte gradehoih kipia lo hi. Siate a thoihsiamte grade hoih hi. Minam enin grade kipia thei hi. Pasian Pawlpi hoihna khempeuh Balaam kamsangpa leh Nicolaitan ngeina in valhtum khinzo hi. Pasian naseemte in anlim vaakte bek thupha pia uh hi. Lamet nei a kipia ante siangtho lo hi. Thuman tawh Pasian naseemte kipuapaih hi. Letsong piazote pen panmun hoihnono pia uh a, thupha saangte ci uh hi. " Thumaanna taisanin Balaam lampi zui uh hi. Tua Balaam kamsangpa in thumanlohna tawh kingah golhsum iplah a, ama palsatna hangin thuhilhna ngah hi. " 2 Peter 2: 15-16.

Thyatira Pawlpi tungtawn aa thuhilhna.

Thyatira Pawlpi thaneemsak pen Ahab kumpipa zi Jezebel thuaklah uh hi. Balaam kamsaang tulkhat anvak hi. Pasian kamsaangmaante tampi that hi. Christian minpua Pope khutsungaa kitha misiangtho tawmlo hi. Lawki kumpi ginalote zatmah bangin thahna namkim tawh misiangtho bawlsia hi. Mei tawh ahingtangin haal hi. Singtungah khailum hi. Suangtawh denglum hi.

Pasian thuman misiangthote thuakna pen Lawki kumpi sangin hunsau lazaw hi. Consatantine kumpipa pen nisuahna lamgam Constantinople acihna munah zumpi tuahin teeng hi. Rome khuapi aa kumpizum pen Bishop pa nusiat hi. Bishoppa in biakna aana leh kumpi aana kopkhawm a, damdamin power lian tektek hi. Lawki Rome kumpi sangin siahuai zaw hi. Nuntakna laibu panin member te min lakhia ngam mawk uh. Pawlpi sungpan amin phiatsak ek uh hi. M ten C te hawlkhia a, gupna taan dingte acih hong phawksak mahmah hi.

Biakna makaite pen Pasian munah koih hi. Christian kipawlna pen Monarchy ki-ukna suaksak uh hi. Makaite tungah mawhsut uh hi. Sum tawh kitanin tuisiangtho kitheh uh hi. Singlamteh awk uh hi. Dawite lau-in tai uh hi, ci uh hi. Jesu lim leh nungzuite lim koihin bia uh hi. Biakinn decoration pen Pasian zahtakna thupipen dan suaksak uh hi. Milim biak ngeina tawh hong kalsuan uh hi.

Vantungah siampi khatbek cinapi, midangte mawh sut uh hi. Hell sung peuh puak mawkmawk uh hi. " A kibia pasian a kici khempeuh sangin hong kipahtawi zaw ding a, Pasian bangin biakinnpi sungah tu-in, Pasian kahi, hong ci ding hi." 2Thes 2: 3-4.

Sardis Pawlpi tungtawn aa thuhilhna.

Hih hunsung pen leimaitang tuamin Christian dim khin hi. Biakinn lianpipi van sunin lam uh hi. Singlamteh pen biakinn khumvum leh mualsang dawnah sangkhai uh hi. Christian kithupi muh mahmah hi. Ahih hangin amau lungsim sungah Jesu kisangkhai lo hi. Amau thupina leh liatnate bek kisaktheihpih uh hi. Christian Living satandard pen dawibiate tawh kilamdang lo hi. "A nungta bangin na om hangin a si nahi hi." Biakinn hoihleh mipitam hangin Pawlpi ahing hituanlo hi.

Reformation kici puahphatna hong piangkhia hi. Germany gamah Martin Luther in Pawlpi manlohna upna nam-91 pulak hi. John Huss, John Wycliff galhang hong piangkhia lamlam hi. Puahphatna omsimin zumpi ngak innteekte in sangzolo tawntung zaw uh hi. Puahphatna makaite Pawlpi langpang suaksak hi. Ngeina palsat bangin minguan zawsop uh hi. Ahih hangin tua puahphatna pen Pasian in namtui sa hi. Galhang ci-in vantung panin ciamteh hi. Kamite, ci-in pahtawina ngahsak tawntung hi. Puahphatna khempeuh pen bawlsiatna pan hong kipan hiam, nuainenna pan hong kipan hiam, thuaksiatna khatpeuh tungtawnin hong kipan hiam, hithei tawntung hi.

Biakinn leh mipi tawh nopci tak a omkhempeuh pen khalam picing hituanlo hi. Sapuul omna-ah sasialne vasa hon-om hi. Palsatna a tam ciangin leitungmite in lungkimna ngah zaw uh hi. Effort munkhat ah laisiangtho kikupna kanei hi. Thukham thu ahi hi. " No SDA ten zong nagen bangun zui kei uteh," hong ci ngam mawk uh hi. Pawlpimaan cihbek tawh khuavak taangzo lo hi. Khasiangtho gah kisam hi.

Philadelphia Pawlpi tungtawn aa thuhilhna.

Philadelphia pen sanggam ki-itna acihna ahi hi. Lungdamnathu puaksawn ding kipan uh hi. Leitung minam khempeuh hih khuavak hawmsawn nuam hi. Pasian in tua nasepna dingin lampi honsa-in koih hi. Kuamah in mikhat gupna khaktanzo lo ding hi. " Kuamah khak zawhloh kongpi namai-ah honsa-in om hi." ci hi. Pasian a zongte aadingin neukha beek lauhuai lo hi. India gamah William Kelly pai hi. Kawlgam ah Judgeson hong pai hi. China gam, Africa gam leh leimong dongin misssionary kipaisak hi. Sanggam ki-itna lungsim bektawh lungdamnathu kipuaksawn zo hi.

David tawhtang, acih pen pawlkhat in pope ahihkeh biakna makaite power sakha uh hi. Tawhtang neipa pen Jesu hi a, Lungdamnathu pen tawhtang ahi hi. Lungdamnathu tawh kipawl thumaan-thutak taangko Pawlpi in tawhtang a nei ahi hi. Mipum, mimal aana gen hilo hi. Mimal gupna ngahna pen kuaman sukha theilo hi, a khaktan thei omlo hi. Upna tawh a kisang ahi hi.

Laodecea Pawlpi tungtawn a thuhilhna.

Eite thu hong kikhen ding hi. Pasian thukham palsatna tungtawnin thukhenna kibawl ding hi. Jesu a sang mawhmaisakna ngahte aadingin suahtakna thukham hiding hi. Thukham palsatna Jesu sisan bek in sawpsiang thei hi. Jesu sisan tawh kisawplote aadingin sihna thukham hiding hi. Jesu in, Pasian thukham pen ki-itna thukham or suahtakna thukham ci sese hi. Jesu sungah a nungta khempeuh in suahtakna a ngah ding uh hi. Christian tultampite in mopuan neilo-in om uh hi. Sa lah sa lo, vot lah vot lo, a lum bek pen leitungmite tawh kilamdanglo Christiante gen ahi hi.

A zongnuamte aading a khaktanzo ding omlo hi. Kong honsa in kikoih hi. Gupna a taan leh zong amau teel hilel hi. Pasian in nuntakna leh sihna teelsak a amau teel bangbang thaman ngah ding uh hi. Vantungmi-3 taangkona in, huntawpna ahi hi.Thukham hilh a palsatte leh nial aa palsatte mawhna kibang hi. Jesu muan manin thukham thudon lo-in ih om kha ding hi. Pawlkhat ten thukham hilkhna bek tawh suakta dingin ih lamen kha ding hi. A nihtuakin pukna ahi hi.

Pasian kamsungpan aa pusuak thu tawh a nungtalo Christian te pen Jews tak tak hilo hi. Nungzui taktak zong hilo hi. Laisiangtho tungaa kingalo lungsim sawlna bektawh a kalsuan Christian te pen Satan beel sungaa om sa ahi hi.

Topa muak dingin na kigingnai hiam? Jesu sisan tawh kisawp puan nasilhnai hiam? Vuuk bangin napuansilh a ngo diam? Vantungmite tawh tonkhawm dingin na kilawm hiam? Calvary mual napha ngei hiam? Gethmani huanah Topa tawh na kituah kha ngei hiam? Hun tomno sung bek omlai hi.

Thang Siangh, zogampalpi@yahoo.com

SDA MISSION CORRUPTIONS PUAHPHAT HUN. ( iv)

KULHPI KICIMSAK VANGLETNA.

Leitung gaalpi khatna World War I hunma-in Germany minamte kisaangmuh mahmah hi. Germany bawl van khempeuh kithupi seh hi. Amau zong a lungsim uh lian a, Germany bekmah mihing kicianin ngaihsun uh hi. Kumpi thahaat hi. Leitungah kihtak khatzong neilo uh hi. A siahuai pen minam lungsim lian lua hi. Jews khempeuh minam mang dingin hanciam mawk uh hi. Million-2 vaal phialmang hihtuak hi. Ei Chin minpua kigawm zong million aasim ki-om nailo hi.

Leitung buppi ama khutnuai-ah koih sawm sawnsawn hi. Europe gamlian French, England, Russia leh American kikopin a sim ciangin zopan uh hi. Germany gam khenli suahin hawm uh hi. Russia ngahna gamteng pen Communist gam suak hi. American, French, England ngahna gamteng gawmin suahtakna pia uh hi. Democracy tawh ki-uk uh hi. Berlin khuapi khennih suah uh a, kulhpi tawh dei hi.

Gamkhat minamkhat ahih hangin ki-ukna kibanglo ahihmanin nitumna leh nisuahna kido uh hi. Dictatorship tawh ki-ukna Communist lamte pen khangto lo uh hi. Zawngzaw aa genthei mahmah uh hi. Gilo-in mihing nuntakna neuseh mahmah uh hi. Mipite pen Democracy lamah agukin taisimsim uh hi. Kulhkan aa taite kaplum pahpah uh hi. Coldwar kici Democracy leh Communist ki-elna hangin Germany gam leh a khuapi Berlin phalnih suakin amau leh amau kithatthat uh hi.

Russia President Gobercharve in Democracy thapia a, Berlin kulhpi phukpai-in gawm uh hi. Amau minamkhat ahihmanin policy hong kibat ciangin olno takin kigawm aa nuamsa mahmah uh hi. Kidalna kulhpi icihpen Policy hoihlo or policy zatdan hoihlo ahi hi. Policy hoihleh puukna leh kisiatna tawm hi. M leh C hong kitawngsak sak zong policy hoihlo ahihkeh policy zatdan hoihlo ahi hi. Mission makaihoih neite inzong Conference paizia tawh kalsuan pih a, buaina tawm mahmah pah zel hi. Tu a, ih siapi ten zong policy zui hileh buaina hizah pianglo ding hi.

Tulaitak pawlpi sung a ih lunggulh pen Khasiangtho tawh kidim makaihoih leh Conference system ki-ukna tawh kalsuan ding ahi hi. USA mite pen leitung dangte sangin hoihzaw tuanlo uh hi. Ahih hangin Constituitions leh Laws and Order hoihlua ahih ciangin tua in, mihingte khangto sak hi. Policy hoih icih ciangin politcal lam hileh biaknalam hileh Humanright leh Civilright omnate ahi hi. Pasian Pawlpi kipawlna pen silehsa tawh hilai ihihmanin policy hoih kisam hi. M ki-ukna pen silehsa tawh omlai eite ki-ukna dingin zatkhialh ol mahmah hi. Lungsimkawi makai khat Chairman seem a, sabuaimai zui aa hong kuulhah gega ciangin lipkhaphuai petmah hi. A sungah bang lut hiam, ci-in diip kisai pah litlit hi.

Policy ahoihleh kipawlna cidamzaw hamtang hi. Berlin kulhpi kicimsak pen Democracy ki-ukna ahi hi. Pawlpisung kidaalna kawmpi pen policy zanglo (lipservic) mukdawn aa ki-ukna ahi hi. Tua pen Khasiangtho tha bektawh kihemkhiazo ding hi. Kigaakcip, ukcip cihpen Jesu aa hilo limlim hi. " Thumaan-thutak nathei ding uh a, tua thumaan in note suahtakna hong pia ding hi. ...Tapa in note suahtakna hong piak leh, note a suakta taktak nahi uh hi. " John 8: 32. 36. "Freedom of speech and freedom of expression" cihpen Kawlgam SDA te taangsap pen hi-in ka um hi. Pawlpi sungah Jesu hong piak suahtakna omleh buaina teng vengkhinin gamsimtham cih omnawnlo ding hi.

A Siangtho Kiteelna.

" Pawlpi-ukza adeihte in nahoih deih ahi hi. Pawlpi-ukte in paubanna neilo ding, zi khat bek nei hiding, pilvangmi, buaitheilomi, gamtathoihmi, zindo hahkatmi, thuhilhsiammi, zunelomi, mitawh kitawnglomi, sumsiangtholo deihlo mi, duhhop huaihamlomi, lungduaimi, mi-ellomi, ama innkuansung ukzomi hiding hi. " 1 Tim 3: 2-5.

Anti-Chist hi, ci-a khalamah ih neuseh mahmah RC ten Pope hong teel uh hi. Vatican zumpi sung ahi hi. Biakinn-tualah Cardinals, Bishops, Fathers, brothers, sisters leh mipi teng-3 vaal dim zihziahin om uh hi. Vatican paizolo teng inzong amau gam ciat panin TV tawh enin ngak uh hi. Khukdinsa leh thungensa-in kiteelman dong om uh hi. Pope teelhun sungteng innkhum tungah meikhu-suahna vangpanin meikhu tawlnga lo-in pusuak hi. Meikhu avom pusuah laiteng kiteelna zonailo hi, cih a lahna ahi hi. Meikhu-kaang hong pusuah ciangin, kiteelna kiman hi, Pope ih nei hi, cihna ahi hi. Mipi in thakhatin khut beengin muak uh hi.

Mipi mai-ah kilahkhiatna kham tawh kibawl kongvangpi khat om hi. Mikhempeuh in tua kongpi mitsuanin a kiteelthak kumpi Pope hong pusuah ngak uh hi. Tua kiteelna a paikhialh ding kidawm mahmah uh hi. Hunsaupi la uh a, mipi inzong thungetna tawh panpih uh hi. Hong pusuak Pope pen Pasian ai-awh aa kizang ahi hi. Zahtak kaai mahmah hi. Pope hong pusuak aa thupha a piakpen ngah nuamin mite in khitui-naptui tawh namuak uh hi. A khut uh zanin thupha dawh uh hi. A kam utawh huup uh hi.

RC Pawlpi Monarchy ki-ukna pen SDA ngeina hilo hi. Ei SDA te in, makaite pen ( INFALLIBLE) APUKTHEILO in kingaihsun lo hi. Kiniamkhiatna leh thumaanna tawh Pasian naseem makaite pen zahtakcing mithupi hi, ci-in ih um hi. Simmawh bawlsiat ding hilo hi. Tua bang mite pen zong kisimmawh bawl ngeilo pah hi.

Siangthotak leh limcitak tawh Pasian zahtakna lianpi tawh kiteel pen SDA te ngeina ding hizaw hi. Tua dinmun pen lunggulh huai mahmah hi. Kiteelna siangtho henla zahtak kaai mahmah leh kua awng awng nawn ding hiam? Siate a galmuh simin thupha nasim ngetnget ding uh hi.

Union Conference leh Local Conference Kiteel zia.

Union Conference a kiteel ciangin Field panin delegate kikaikhawm hi. Local Mission leh Local Conference ten delegate hong tonpih ciat uh hi. Tua delegate te pen a tungpan kiteelsuk hilo hi. Pawlpimi members ten a tawpanin hong teelto uh hi. Union a tun ciangin tua delegate sungpanin Nomination Committee lut ding kiteel leuleu hi. Tua Nomination Committee in amau Chairperson ding teeltawm uh hi. Tua hunsung Division Power leh Union Power om theilo hi. Division te pen observer bek ahi hi.

Nomination Committee kipan hi. Hoihtakin thungen a, zong gingngawh lua lo hi. Kihuau chialchial bek uh hi. Laidal leh laikung kiatsuah ging khawng bek kiza hi. Amau deihciat guang uh hi. Me ( vote ) a lakma-in candidate te hoihna leh thanemna kipulak thei hi. Gennop khempeuh a zawh ciangin vote pia dingin kipan hi. A lungkimlo a omleh kitawng kinialna omlo-in amau lungkimna bangin gensak hi. Thumvei bang vote kila hi. Tua bangaa kiteel pen lungkimhuai mahmah hi. Thukhual takaa kiteelna pen zahtakkaai bek thamlo-in kithutuahna thahaatsak a, Khasiangtho ompihna zong kingah hi.

Local Conference zong tuamah bang hilel hi. Union in Chairperson seem theilo hi. Amau delegate teng in Nomination teel a, nomination committee in a chairperson ding uh teel hi. Division leh Union personal te pen observers ahi uh hi. Ataw panin kiteel toto ahihmanin apiang bangbang kilungkim pah hi. Makai dingaa kiteelte zong mipi in zahtakin thupiseh kul pah hi. Amau teeltawm delegate tengtawh amaumah kiguang a ulian suakte tawh kilamdang mahmah hi.

Conference kiteelzia pen ulian maivil luat kisam lo hi. Mipi it ihih ding thupi hi. Sumgolh zong kinakzat theilo hi. Tua ahih ciangin upa-makai a utte in, Pawlpi mite itding hanciam kul hi. Tua hanciam aa mipi itte zong pahtak huai pah lel leuleu hi. Pawlpi mite gawtbawl lo-in zut hianghiang kul ahih ciangin kilemna omzaw hi. Pawlpi tangsapna khuakha-in vaan uh hi. Tua bangaa kalsuan ding ahi hi. Singkhuah suangtum tawh member a simngamte Union panaa ih guan ziauziau mawk tawh khalam dinmun kinak khaih mahmah hi.

Makaihoih tentan .

President leh Secratery pen Ministerial Lisense ngahte kimasak hi. Tuate sungpan soulwinning hoih kizong hi. Tua banah service tam leh ahoih ki-en leuleu hi. Service tam kisapna pen Pawlpi paizia tamtheih kisam hi. Tua khit ciangin Charector Background kisut toto hi. Leitungthu ukmi hiam , leitungthu tawh a buaithei mi hiam? temperence hoih hiam, cih bangin kitawng kinial lo-in damtakin kikan hi. Thu khatpeuh a sut ciangin, SDA sung tunkhit gamtatna thupiangte kisut bek hi.

Tua khit ciangin vote kila hi. A lungkimlo a omleh pulakhun kipia a, lungkim dongin vote nihvei thumvei kila hi. Atawpna ciangin result hoihpen mah hong suak hi. Gupkhiatna thuzeek dingte pen soulwinning nei kisam hi. Pawlpi khoisiam kisam hi. Sumsiangtholo deihlomi kisam hi. A innkuan ukzo kisam hi. Kideek kidaamzo kisam hi. Jesu limsuun aa thukhualna leh itna siangtho nei kisam hi. " Note lakah mizawng kitawlngalo ding hi. Neekding neilo nasanggam zawngte tungah nakhut zapi-in nazal ding hi. " Deut 15:11. Delegate lutdingaa lamette bek huh pen Jesu hoihna kimu lo hi. Amaute upna sittel dingin " mizawngte tawlnga lo-in ka omsak ding" ci hi.

SDA Pawlpi in sumzonna projects tampi kinei hi. Health Expose Cafeteria, Hospital & Clinic, Dispensory, Vegetarian Foodservice, Hotel, motel, Inns leh Lodging Center cih bangin sum kizong hi. Tua bang business Department makai ding , director leh manager pen Professional mipil misiam, experice practical naseem siam Senoir professor tampi kisam hi. Socialist ngeina tawh deihpeuh banguan pen supna longal result dang kingahlo hi. Institution khempeuh ah professional workers kisam hi. Pasian kihta zahtak kisam hi. Thuman citak kisam hi. Tem zatna munah khetbuk zatkhakloh ding thupi mahmah hi.

Nungzui hunin.

Nungzuite lakah Jesu lehheekpa Juda Ischarot pen a Topa sum-30 tawh a zuakkhak kisikin gui-awkin si hi. Ama taangdingin Josepth Barsabas leh Matthias lai-aai sanin teel uh hi. Pasian kiangah thu nakpi-in a nget khit uh ciangin, me sawk a, Mathias tung tu hi. Tua pen leitung mihingte ngaihsutna kihello kiteeldan ahi hi. Pasian Khasiangtho lamlahna bektawh ahi hi. Kuamah a phun a pau omlo uh hi. Acts1: 12-26.

SDA kalutcil lamin Kapteel khua ah Sia KIp Za Nang Church pastor seemin om ngei hi. Pawlpi upa a teel ciangin hoih a saktengmin la-in, thungenin mesawk (lai-ai saan) uh hi. Tangval hi-hithiat paunel ngeingei khat in ngah hi. Tua laitak tei kisasim upa pawlkhat anuihza uh hi. Ahih hangin ama sepsung thusia neukha zong omlo hi. Pawlsung nuam mahmah hi. Hihthu kagen ciangin tuaci teel ding cihna hilo hi. Khasiangtho tawh kidim kisam hi. Policy ngeina tawh kidawmtakin kalsuan leng Khasiangtho epmawh omlo hi.

Pawlpi hong khangsemsem a, kiphunsanna hong om hi. "Note lakah Khasiangtho tawh kidim mi-7 hong teng un, acih ciangin Stephen, Phillip, Procholus, Nicanor, timon, Parmenas, leh Nicholus te paiphih uh hi. Nungzuite in khutnga-in thungetsak hi. Acts 6:15. Laisiangtho sungah makai a teel ciangin, upna tawh kidim, khasiangtho tawh kidim cih kammal zang tawntung hi. Eizong tuhunin upna leh khasiangtho ompihna bulphuhin makai teel hileng Pawlpi pen nisimin a tul a za-in hong kibehlap ding hi. Phelzawhloh dongin buaina omlo ding hi.

Khasiangtho leh Jesu.

Jesu vantung kilato hi. Thu-um 120 bek pha uh hi. Makai ding lamlak ding omlo hi. Kumpite leh biakna makaite a langkhatah laang mahmah uh hi. Thu-umte suntawh zantawh omkhawmin thungen uh hi. Pasian ompih ding longal lamet beizo hi. " Jesu in Huhpa Khasiangtho kongpia ding," acih kamciam phawkin lametna lianpi tawh thuum uh hi. " Penticost pawi hong tun ciangin amaute lungsim kikhatin om uh a, Khasiangtho meikuang bangin awlianpi tawh hong tuaksukin, amaute tungah hong om hi," Acts2:1. Officers te hagawisa aa hawkbaba-in pulpit tungpan hong kitom keizaw henla, Pasian Khasiangtho hawkbeba-in hong tuaksuk leh uthuai mah si e.

Meikuang tawh hong kumsuk Khasiangtho ih mu ngei hiam? Awlianpi tawh ging heethaat aa hong kumsuk ih za ngei hiam? Midangte kikhelna ding thungenin nang na kiphawk ngei hiam? " Jesu sihna leh a thugente in amaute lungsim vut," ci hi. Nang lungsim hong vut bang hiam? Amaute lungsim khat aa omna pen singlamteh tungaa kikhaipa hangbek ahi hi. Leitung kipawlna mawk hilo hi. Sum leh paai thu hilo hi. JESU, JESU, JESU, sihna thu bek ahi hi.

Khasiangtho tawh tonkhawm uh

Leitungbup aa kikhenthaang Jews minamte Jerusalemah kikhawm uh hi. Amaute Jews kampau nawnlo uh hi. Amau omna minam kam ciat zang uh hi. Pasian in amaute tungah Khasiangtho buasuk a, a kigenthu khempeuh amaupau ciat tawh za uh hi. Khasiangtho sungah namkhat paukhatin om uh hi. Ei Myanmar Union in zong Khasiangtho ompihna ngah hileng, kideidanna omlo ding hi. Union makaite khawi mituam omlo ding hi. Sakmi khangmi omlo ding hi. C leh M kilungtang neihna bei ding hi. Jesu hong sihnathu bek thupi-in kigen ding hi.

Peter in a namsau suahkhia

Jesu nungzuihkawm mahin Peter in a tempaai kuah den hi. Siampilianpa bil zong haangtakin satkhia ngei hi. Tu-in a tempai suahkhia hi. Khasiangtho haatna longal deih muandang omlo hi. Penticost ni-in Peter dingto a, " Pasian in hibangin gen hi. Nitawpni ciangin mikhemppeuh tungah ka Kha kabua ding a, na tanute uleh na tapate un, Keimathu gen ding uh hi. Na tangvalte un mangmu ding uh a, na puteekte un Mangman ding uh hi. Tua ni ciangin na naseem numeite leh na naseem pasalte tung nangawn ah, ka Kha kabua ding a, kamsangpa bangin Keimathu gen ding uh hi." Acts 2: 17.

Myanmar Union ki-ukna sungah bangthu kigen hiam? Amaute lunglut bang hiam? Kikhopna munte ah Jesu thu a gen uh hiam? Jesu hong itna leh hong sihnathu in a lungsim uh a vut hiam? Makaite hangin Jesu amuhlawh mi bangzah a om diam? Ih Pawlpi in Jesu a langsak hiam? Kikhelna zongte a kikhelzo diam? Nupa omziate in Jesu limciingin Jesu leh Pawlpi kizopzia a ciingtaktak diam?

Nungzuite nuntakzia

" Sawltakte in lim leh nalamdang tampi bawl uh a, mikhempeuh in lamdangsa mahmah uh hi. Thu-um khempeuh kikhawlin omkhawm uh a, aneihsa khempeuh nekhawm uh hi. Amaute in aneihsa khempeuh zuak uh a, a kisapna zui-in hawm uh hi. Lungsim kituaktakin biakinnah kikhawmin lungsim pumkhatin innah khomun balnenin nekhawm dawnkhawm uh hi. Pasianmin phat uh a, mite mai-ah maipha angah uh hi. Gupna a ngah mite nisimin kibehlap hi. Acts 2: 43-47.

Nungzui hunin sumpi pen kidongtawm selo hi. Biakinnpi kong gei-ah kuangkhat koihin khia uh hi. Promotion bawlin nget kullo hi. Lawpna tawh aneihzahzah uh itsiklo-in pia uh hi. Bang hang hiam, cihleh hih sumte bangci-zat cih thei uh hi. Amaute neihsate zuakin nungzuite kiangah aap uh hi. A zawng leh a haute neek kibang uh hi. Aneite vaallo, a zawngte kisamlo-in a kibangin nekhawm uh hi.

Thumaanlo hong lut hi. Satan in naseem hi. Ananias leh Sapphira te nupa ahi hi. A neihsa zuak uh hi. Midangte mah bangin dikna laknuam uh hi. Khenkhat seel uh hi. Khenkhat paipih hi. Khasiangtho in Peter tungah nahilh khin hi. Peter mai-ah tukin kipuakhia hi. Pawlpi member te kiangah Tithes ih nget ciangin ei siate ih thumaan hiam? Tithes puaklote hawlkhia zah dongin kuhkal a, ih side-incomes ahi khasum sanga tamzaw ih ngahte ih pia hiam? Ananias leh Saphira lungsim ih vomlai hiam?

Nalamdang leh Gupnathu.

Nalamdang pen huhna kisam dongtangte leh khalam muhna tawmlaite khuamuhna ding ahi hi. Nungzuite teti panna thumaan hi, cih kilangsak hi. Jesu pen Pasian Tapa hi cihthu telmuh sak hi. Naseemte sungah Jesu Khasiangtho a om keileh nalamdang in zui ngeilo ding hi.

Peter leh John thugen dingin Beautiful Gate kici biakinn ah pai uh hi. A pianpih khebai khat khutdawh ngenin kong gei-ah om hi. Peter leh John amuh ciangin khutzalin sum ngen hi. Peter in limtakin en a, "Keimah in ngun leh kham kanei kei hi, keima neih kong pia hi, Nazareth mi Jesu mintawh tho inla, pai in, " a ci hi. Tuapa akhete thadimin diang a, amau tawh biakinn sungah lut-in Pasian min a phat uh hi.

Tuhun Pawlpisung sumzonna aa nei mi tam mahmah hi. Pasian naseemte in amaute sum pialo-in Nazareth khuami Jesu mintawh a thapiak ding kisam hi. Tua vangletna koi-ah om hiam? Ih neihloh ih pia thei diam? Tua vangletna omlo-in Pasian sawltak ihi taktak diam?

Peter liimah.

Thu-um mitampi kibehlap hi. " Peter hong pai ciangin a liim nawkhak dingin lamlai-ah cinate a lupna utawh zawngin nakoih uh hi. Jerusalem khuapi sungpan mikhempeuh hong kihawkkhia uh a, cinate leh kha-gilo bawlsiatte paipih uh hi. Amaute in damna ngah uh hi." Acts 5: 15-16. Topa Jesu in, " Kei sungah na om uleh kei bawl sangin nalamdang a lianzaw nabawl ding uh hi." ci hi. Ei tungah vangletna hong ciangtan tuanlo hi. Lungdamnathu tawh a nungta khempeuh in nungzuite bangin kingah thei hi.

Bang hangin Khasiangtho khindai hiam? Bang hangin mite in thumaan mutheilo uh hiam? Khasiangtho a daal a khak kua hiam? Sumtha sangin Khasiangtho thahaat zaw hi. Ih galhiam laih kul ding hi.

Thang Siangh. zogampalpi@yahoo.com

SDA MISSION CORRUPTION PUAHPHAT HUN. ( iii )

LUNGDAMNATHU LEH MINAM.

Leitung mawhna hong khanciangin, lampialna zong thahaat hi. Uk-haksa ahih ciangin Pasian in Babel-tausaangpi supai-in kam-namtuamtuamin khenkham hi. Pau kitheiteng minamkhat suak pah hi. Pau kitheite teengkhawm uh hi. Khuapi saat uh hi. A khenkhenin, a kuamkuamin gamsaatin khuapi phut uh hi. Hih minamte tungah Lungdamnathu puakkim dingin Pasian geelna om hi. Pau namkhat bek leh gamkhat bek sepna tawh kizolo ding hi. Pasian in minam khempeuh sungpanin ama naseem ding teelkhia hi.

Minam itte mithupi ahi hi. Ama minam itlote in midangte itding lamet omlo hi. A innvengte itlote in muhloh Pasian it taktak lo ding hi. Lungdamnathu puaksawn dingaa thuzeekte in minam deidante hilo ding uh hi. Union Officer te nasep pen vanlian mahmah hi. " Minam khat leh khat kidaalna kawmpi sukham masa ding hi. Minamte tungah hih Gupnathu a tunkimna dingin Jesu sisan tawh pumkhat suaksak kul masa hi. " Acts of Apostles pg 20. Ephes 2: 13-14. Acts 17: 26---.

Union of Burma kici Kawlgam aading Pasian ngimna taangtawng pekin om khin hi. American Baptist in Judson hong puak hi. Gentheihna leh bawlsiatna namkim thuakin Lungdamnathu hangin a nuntakna hong pia hi. Tui kiphum masa pen U Naw kici Kawl khat Khasiangtho in teelkhia hi. Vantungmi-3 taangkona thupuak laibuzuak Colporter te Kawlgam hong lut hi. Kumpinam ahi, Tarrawadi Siahkaipa U Mg Mg in Sabbath thuman nasang hi. Tua zawh ciangin General Conference of Seventh-day phualpi panin missionaries hong puak uh hi. Kawlgam laizang Meiktila khua-ah Bible High School hong hong uh hi. Kawlgam minam khempeuh aadingin munhoih mahmah khat ahi hi.

Tua Saangpi panin Kawlsia muanhuai honkhat SDA Pastor leh Teachers, Corporter seem hong om hi. Elder Ba Tin, Freydy Ba Tin, Edward Ba Tin, U Hla Pe cihte tua saangpi pan hidingin ka um hi. Ken U Hla Pe kalaplai hi. Colporter seem hi. Kawlgam sungah ama laihawm a simkha tammahmahin ka um hi. Tua Saangpi kikhinkhialo hileh Kawlte bangzah tamkhin ding hiam, ci-in kangaihsun zelzel hi.

Union Committtee nasep pen Division pan hong kipia Appropariation budget zeekding bek hilo hi. Kawlgamsung minam khempeuh tungah Lungdamnathu bangci puakding cihthu hizaw hi. A khangtote thapia a, a zawngkhalte domtoh ding nasep ahi hi. Union committee member 30 lakah Upper Myanmar representatives 5 khawng kipha hi. Kawlgam Lungdamnathu pen Karen minamte khutsungah humcipin om hi.

Thandaung Union khawmpi thukikupna aa khensatna khawng kazakzak ciangin, Kawlgam Pawlpi masuan dahhuai kasa hi. Vantungmi-thum thupuak tangko ding kimlai KNU nasep tawh ih sawhpawi dikdek pen Babylon is fallen acihtawh kilamdang kasa kei hi. Thautawi minam itte nasep leh Laisiangthotawi minam itte kalsuanzia kilamdang zekleh hoih ding hi. Pawlpi Organization leh KNU organization kisawhpawi keileh hoih ding hi. Amau mimal aa kipiaknate pen ei saitheih hilo hi. GC inzong galet bek lo-in Pasian Pawlpi anaizaw-in hong mutel leh hoih kasa hi. Union leh Mission zum pan aa kipuak information tungah akingaklaiteng thulanggen bek za ding hi. Union te nasep pen thanemna mawk hilo hi. Namdangte nencipna ding strategy tawh kalsuan uh ahi hi.

Yangon SDA Headquater pen Pasian Lungdamnathu nasep kipawlna ahihleh political movement organization tuamtuam tawh kisawhkhawm keileh hoihzaw ding hi. Pasian thupha kisaangzaw ding hi. Vantungmi thum taangkona a gin ngaihzaw ding hi. Thumaan-thutak kizeelbaih zaw ding hi. Tu-in ih Pawlpi pen KNU kipawlna hiam, Biakna kipawlna hiam, ci-in kumpite nangawn in tello ahihmanin galkap cingsak ahi hi.

Kawlpi Sanpya Clinic hunlai-in Dr Po Tota in term khatsung hong huh hi. Amah pen lungsim picingmahmah leh siammahmah ahih ciangin, Zato nasep hong khang hanhan hi. Union meeting katu uh hi. Siap ten " Dr Po Tota khahkhia in, gamsung aaten sam hi," hong ci uh hi. Amau ngaihsutna theilopi-in " Kumkhat beek hong ompihlai hen," ci-in kathuum hi. Khathum khit ciangin meeting kitukik hi. Tualai-ah Dr Po Tota zi hong pai hi. Meeting sungah hong haanggawp hi. A paudan pen Doctor pa utlopi aana tawh a zang bang khawngin hong pau mawk hi. Uliante lungsim bang himawk hiam, cih simloh lawhnang kathei kei hi. Meeting katuah ciangin pastor khat in hong nungzuih a, " Sia, hi nu nathei na? Karen minam makaipi Bo Choke Mya tunu hilo maw? nang kihta lo maw, a pasal khawlsak lel in, Siavuan a omkeh zong na Zato phiat in," hong ci hi.

Doctor pa pen pillua, siamlua ahihmanin itpii-in ka it hi. Tudong Pawlpi sungah naseem dingin deihhuai lua kasa hi. Ama sangaa pilna tawmzaw, experience nei ngaplo khawng, president leh manager khawngin ki-om a, nui cicitin hong genthei zel hi. Tudongin kangai ngeungau hi. A sawtlo-in Pr Samuel Po in hong samkhia a, gamsung tungsuak ci-in kigen hi. Pasian nasepna pen minam leh singnuai nasep tawh kisawhpawi dikdek hi.

Padu Aung San hong ciahkik a, kumpi ah hong surrender hi. SDA Headquqter thupiakna tawh Conference makai Sia Kai Za Dal mannuamin eimi Pastor khattawh kumpizum phukawikawi hi. Union Headquater panin KNU power zangin a Pawlpi ukcip sawm uh a, hong vau thapai mai uh hi hi. Sia Kham KHen Pau zong tuamah tawh vau thapai hi.

Ei SDA te in minam ih itleh Jesu musakzo lengla Gupnathu theisak leeng manpha hi. Myanmar Union makaite paizia pen khalam kingak ngamna ding hilo hi. Hih dinmun tawh hong makaihlaiteng, Kawl Budhist lak ahizongin, minority Tribals group sung ahizongin Lungdamnathu kipuakzo ngeilo ding hi. GC leh Division in hih dinmun atheih ding thupi hi. Kawlpi a numei khat in," Ko, Bo Mya khutsung ut kei ungh, " acihpen, " Myanmar Union khutsung ut kei ungh," acihna hilo hi. Myanmar Union of SDA pen gamnuai aate khutsungah om hi," cinuam hizaw hi. Minam hua hilo hi. Amau kalsuan zia hua ahi hi.

US SDA pawlpimi citakte in thautawi nuamlo hi. Galkap tumnuam lo uh hi. Thautawi genloh me khiat zong ut lo uh hi. Kawlgam SDA sung buaina pen abul-abaalin GC in teltaktak leh cikze lua-in ka um hi. Union officer te minam it kimawhsak kikeuhlo hi. Tua minam itna pen Khagupnalamah zang leh hoih ding hi. Gamnuai thautawite tawh nasepkhopna ciangin Kawlgambup mission hong kalsuanpih kei beekleh hoih ding hi. Bangzah gamla kipial khin hiam?

Kiteelna leh Za kituhna.

Tulaitak kimawhsakna leh dikzuulna khempeuh pen amalmal aa tawm a, sukmai ( solve ) theihding hilo hi. Thupaipi khat om hi. Thu kipatna theilo a,laigelh tamzaw-in ka um hi. Amau kivaakna zong a, ameetzaw lam peuhpeuh a pumgup omding hi. Theilo lua ahihmanin gupna tanding lauman aa patau zong om ding hi. Gupnathu tellote kigengen thei a, khatpeuh langpan nuamte kihilh theilo hi.

Keima phulkhak thute kong pulaak nuam hi. Khangkikte aadingin taangthu ahi hi. Conference Movement pen 1987 laipeek aa kipan ahi hi. Kei UET kasep laitak ahi hi. Tuamalai hunin Conference min kilo ngeilo hi. Ei leh ei aa dingzo ( Self-support ) kici bek hi. Kumpi in gamdang visa khakcip ahihmanin workers Union officers aa kipan mission officers dongin kizinkhia lo hi. Ei Pawlpi sungah kikhumcip uh hi. Gamdangte nasepzia kalsuanzia, khantohzia, ki-ukzia cihte kimukha lo hi. Conference ih Move ciangin Pawlpi langpan aa hong ngaihsun zong hitheimai ding hi. Thei napi a, hih vamim ne Chin leltak ei mainuai a khangkhia hi, cihtawh amau mai aa Conference din ding thuakzolo zong hiding hi. Bang hileh a tomin hong pianuamlo uh hi.

Kei Section President-in hong koih uh hi. Conference Movement pen zadah lua kisa Union meeting omsimin hong tawng den hi. Sum tamlua aa Conference Status uut nahih uleh UMM appropariation pen Mission dangte pia ding ci-in Ba Khin in hong lakkhiatsak hi. " Conference Movement nadeih bangin handle in, division in hong ci hi," cingiau hi. " Na projects khempeuh phiat ding hing, " ci-in hong tawng a, " Kei projects pen Pasiangam aading kangaihsutna hi, naphiat nopleh ahiveh," kaci kik hi. Meeting kik ciangin , " Union makaihna nong comply zawh keileh worker pani resignation laikhia in ," hong cileuleu hi. " Kei nasep pen Pasian aading ngimna hi, khagupna ding bek hi, nong bawl nop bangin hong bawl in, vantungmi kuamah ki-om lo hi, mihing ngentang hihang, kei kakiatleh nang zong kia thei kacihleh, Sia Henpi in cingam hong sak tuakin amai hong santeitai a, a khedawn hong pei velvel hi.

Local pan a kiteelto Lay-representatives committee in a teelsa officers khatpeupeuh pen thukham palsatna a lantang a om keileh, muhdahna bektawh term cinglo-in kilakhia ngeilo hi. Union meeting samin kiteelni ding hong seh uh hi. U Ba Khin leh Sia Do Hen Pau in mission committee member teng Ba Khin innah an hong vaak hi. Anneek thungetma-in Ba Khin hong dingin, " Hih anneek pen, Sia Thang Siangh mangpha khakna hi<" hong ci hi.

Pawlkhat ten kiteelna lungkimlo a Conference Move acihpen kilehbulh hi. Conference movement hangaa hunlopi aa kiteelna bawl hizaw hi. Union makaite leh zasuannuam aa maivil ideology natna neite nasep ahi hi. Ukcip nopna hangin policy khat khit khat hong palsatto ziahziah uh hi. Ahih hangin Karen minamte tungah hih ngeina( practice ) zang ngeilo uh hi. Chin minamte tung bekaa kizang ahi hi.

Kiteelni ciangin Section kim in delegate kipaipih hi. Amau deih thunzolo ding lau ahih ciangin Upper Burma teellohpi-in Union power tawh U Kan Ngyunt sam in avalin lutsak hi. Hibang dan aa kihuiheek ngeina pen Ba Hla Thein leh Ba Khin hong kithuah aa kipan ahi hi. Pasatna abanbanin lauhetlo-in seemto ziahziah uh hi. Upper Burma movement khempeuh khindai sak dingin UMM ah Sandy Dee hong koihto hi. Onlo cih thadah Section van leh tawh khempeuh hoihtakin ka-aap hi.

Amipihte zuak a Unionlam lehtai pawlkhat kagal sehuaipen hong suak hi. Mawhna khempeuh kei tungah hong suan uh hi. " Tutna awnlo ding , ci hi, " hong cisak uh hi. Kei tua bangin kapau kei hi. Tuahun a hong support lawmte khat kampau hi a, amautawh alehtai khat kampau hi a, keipau hilo hi. Amin kagen nuam kei hi. Tulaitak bangbang ahizongin tualaitak hong itluatman ahi hi. Delegate teng lungkimlo-in Paupu innah kikhawm uh hi. Tua lai-ah kei ka kihel kei hi. Department hong piakpeuhpeuh lungton hetlo-in kaseem hi. Division tawh kasepkhoptheih pian ciangin patau-in kihuau thualthual uh hi. Department popular lo tata hong pia uh-a, ahih hangin tua Departmentte hong kithupisakto zel a, hong lakkhiatsak nuam zel uh hi. Pasian nasep nuam mahmah napi thongkia bangin hong cing uh hi. Pasian Pawlpi makaite bangzahin tatsia hiam?

Tuni dongin makaite in Pawlpi khanohna ding ngim kikeuhlo ahihlam katel hi. Pawlpi Upna leh Policy langpang kahi kei hi. Ngeina palsat makaite gitlohna langpang kahi hi. Amau ka mudah kei hi. Minamin zong ka-el kei hi. Amau mite lakah hih makaite a banglo Pasian kihta omlai dingin kalamen hi. Tua ten seemleh kamkhat zong kagingkhia kei ding hi. Amau gamtatnate leh ih Lungdamna thupuak tawh kituak kasa kei hi. Amau nungzui-in khalam nasep khantoh ding lampi kamu kei hi.

Mission khalam makaite sangin ih kihtak mahmah kumpite thudikzaw laimawk uh hi. Lay-member te hanciamna tawh Tedimah kumcin kikhop bawl uh hi. Tua circle Pastor seempa pai-in Galkap kumpi kiangah huhna ngen a, " Hih kikhop hong khaamsak un," acih ciangin, " Biakna kikhawm hilo hiam, aman dongin hih hen," nalehcih zawsop hi. Galkap ten a khaam hihenla, pastor pa a vathuum hileh, kilawm zaw het hiven. A gamtat khempeuh uh aleh amak.

Conference Movement hong sosuah kikna.

Conference langpanna pen Mission siate sungah tawlnga lo hi. Eimi sungah siate pawlkhat in zatopna politic khatin hunhoih la uh hi. Tuapa, tuapa conference support hi, cihtawh Union uliante maivilna -in heekin nuainen uh hi. Kei nungah Sia Sandy Dee kum-4, Sia Thangpu kum-4, Sia kham Khen Pau kum-4, kum-12 sung hong sawtto hi. Member te zong a kilawmciang ngaihsunin thuaksiam mahmah uh hi.

Pastoe Suan Za Nang hong koihto leuleu hi. Amah pen hahkat phulzo nawtzo aa pahtakhuai mun zong om hi. Ahih hangin a tem hiam lua ahih ciangin a sukkhak khempeuh kitan leuleu hi. Tamliamlua aa kuaman thuakzo lo hi. Projects kiseemsa khempeuh hong phialvatto hi. Mission gimpih kikeuhlo Lay Activities hanciamna tawh a kiseem Saangpite nangawn khintawh phiattawh hong thuah hi.


Kumkhat cinglo-in amahtawh a kibangaa Lay-representatives tawh kiteel Secratery pawlkhat Conference support ci-in nilkhia mang hi. Tua pen member ten nasa lua khin hi. Upper Myanmar aa Evangelist hanciam mipi tawh a kisukha pen Pastor Gin Lian Pau pingpei mang hi. Conference lamlawp a sakkhempeuh gamlapi piangsakin transfer expense pialo hi. Tua bang zawzen itna omlo, hehpihna neilo mikhat pen banghang Pasian naseem suak thei ding hiam? Humpi sahang inzong a gilkial lo-in gamsate mawkthah lo buang hilo hiam? Humpi sangin ei SDA ordained pastor te hiamgam zawlai ding ihi hiam? Kiciliap mahmah hi. Hibang mihingte makaina kua in sumpi puaknuam nawn mawk ding hiam?

Tua bektawh khawllo hi. Self-support tawh kiseem sangte khak sak, laihuan saklo ding, cih thutuamtuam tawh khaktan leuleu hi. Hibang ciangin memberte khut leh ban sattan, a kambal, a ngawngtan tawh kilamdang lo hi. " No sumpi nong puak kei u zongin khasum taan kei nung, GC pan a hongpai appropriation omlel," ci-in tawngngam mawk uh hi. Pasian nasepna dingaa GC Appropriation Budget pen Pawlpi mite zawhthawhna hong suak hi. Ei aadingin tua Fund pen samsiatna taktak hizaw hi. Migilo thapiakna sum suak mawk hi. Pawlpimite kigamtaang theilo ahihmanin sumpi kipuak nawnlo ahi hi. Conference Movement hong thaksuak kik hi.

Kuamah in Sia Kenneth Thang hualo hi. Ama hong sepkhiatte bek kihua ahi hi. Pasian in Hell sung tungte hualo hi. Amau gamntatna in amau haal ahi hi. Zomite lakah Sia Suan Za Nang huading kahawi kei hi. Ama khuttum thuakte lau aa kihem hidingin ka um zaw hi.

Conference Status pen bangbang lampitawh ngahtaleeng kadeih tawntung hi. Mihing tangkhat a omlai teng moral-support kapia nuam hi. Conference pen ei leh ei kipiakkhiatna tawh na kiseem hi a, Pasian mai-ah namtui tawntung hi. Amau kivaakna hi a, tuucingte in tuute hong limbawlin hong khoi ding uh hi. Tuute cidam dingaa kipumkhatna hoih ding hi. "No sumpi tawh kivaak hikeng, no omloh hangin hong paipai lel ding hi, " cih kammal kiza nawnlo ding hi.

General Conference of SDA khutnuai aa om Union Conference/ Mission, Local Mission/ Conference khempeuh khalam dinmun kibang kimlo ding hi. Adiakdiakin Mission minpua organization ahoihdeuh leh ahoihlo deuh om ding hi. Ei mYanmar mission thanemna pen gamdang tawh tehkak ngam ding zong hilo hi. Mision minpua makaite hoih keileh, memberte a neupen dongin khalam nuntak sukha suk hi. Kha khempeuh lampialpih thei hi. A tunglampan Pawlpi mimal dong uksuk ahihman ahi hi. Delegate a teel ciangin power zangin amaudeih tangsawk ahih ciangin Administration siatna puahzawh ding hilo hi.

Conference tawh dingte pen makai hoih keileh Lay-delegate te in ahoihzaw tawh kheek thei a, Pawlpi selua theilo hi. Tua hangin Conference kilunggulh hi. Pasian in Conference ngeina leh Local pan aa kiteel representatives system tawh kalsuan ding deih hi. Conference tangdo mawk pen lauhuai lahlo hi. Pawlpi khantohna khaktan ahi hi. Pasian mittnauta sawk ahi hi.

Legal Filing tawh Conference ih ngen aa hong khaktan uh hi. Tua khaktanna nial aa ih paiteitei pen lungkimlo uh hi. Amau lungkim zui leng cikmahin Conference Status tawh kiding ngeilo ding hi. Minam,lianin kingaihsun a, minority te gawina tawh Lungdamnathu hong sukkhak leh Pasian in naseem lel ding hi. Nidang leitungbup a uk Rome tu-in kimu nawnlo hi. Vantungmi-3 taangkona masuan aa ih neih laiteng hong nawngkaisakte ciangzumsui bang ding uh hi.

Ih do gal pen muhtheihloh te ahi hi. Uniform silh aa hong paite, thukhenzum aa hong kawikaihte, gamnuai power lak aa hong vauvaute, mi nasak uleh hilo hi. Amau ompihpa pen, Jesu a thahnop man a, naungeek khempeuh a that Herod kumpipa a zangpa, Jesu thahna dingaa Zuda-siakaazoh sumip lakaa a zang Siampite leh Pharisees te nungaa ompa, Christiante vaatmai dinga Rome Christian kumpi a zangpa, tua pa in nidang a azat ngei tengmah zangin naseem hi. Muhtheihloh vantungmite in nadodo lel ding hi.

Deihngen aa awng awng a tano pialo bek lo-in, thatlai mawk leh kilawm buang ding hiam? " Natate un, anlum hong nget ciangin suangtum a pia ding, nga hong nget ciangin guul a pia ding, note lakah om nahi uh hiam? Aaktui hong nget ciangin mom-aai pia ding kua om hiam? " Luke 11: 11. Tu ciangciang Union in hong pialo thamlo-in migilo teng molhtumin zangin vaatmai a sawm laitak ahi hi.

Ei Myanmar Union sungah Doctrines puahphat kisamlo hi. Constitutions leh Policy zong hilo hi. Pasian thumaanna leh Jesu hoihna a khuhcip puandalpi lakhiat ding bek ahi hi. Jesu khuavak khuhna lawh hepkhiat ding ahi hi. Paunamkim, minamkimte tungah tawntung Lungdamnathu a puakding thu-um khempeuh in, kidaalna kawm khempeuh sukkhap masak ding ahi hi. Tua nasep a zeek ahawm Administration naseemte in, Monopolism kici Mitamzawte in namneu mitawmzawte ukcip ding hanciamna paikhiat masak kul hi. Pawlpi khel ding hilo hi. Makai gilo khel ding ahi hi. Hong puakoih khiat uh zong hamphatna khat ahi hi. Zukham khat hawl mawtaw tungaa tuangkhalote pen mihampha ahi hi.

A kicial naseemte leh Ukna aana puah kul.

Pasian in Amamin thangsak ding leh teti dingin Israel teelkhia hi. Ama lamet banglo hi. Midangte tungah khuavak ding ahi hi. Ahih hangin mite palkhaktheih sozum tawh kibang hi. Kidaalna kawmpi suak khong hi. Nunna luitui luang bang dingin deih hi. Ahih hangin Marah tuikhuktui bangin kha hi. Sii tuipi bangin a nungta ganhingte in beel theilo hi. Leitung minam khempeuh aading a kiteel Israel leh Jerusalem khuapi susia-in paisan loh phamawh hi. Lampidang zonkul hi.

Pawlpi pen amakep Upna thuguilette leh Constitutions tawh kip ngiungeu aa om ding ahi hi. Thu-um mimal khempeuh leh administration lama naseemte in tua sihsanin kalsuan ding hi. Upna leh ki-ukna thukhunte ngeinakip bangin zang ding hi. Tua tungtawnin Lungdamnathu awkhatin kitaangko ding hi. Pasian leh a Tapa, Topa Jesu leh ama doctrines pen a kikheel theilo, a puk theilo infaalible hi a, a kicial naseemte pen infallible a puktheilo hilo hi. Puah kul a a kipuahzawh keileh laih kul hi. Reformation kici kipuahphatna pen khang tawntungin om hi. Martin Luther te hunin upna puahpha uh hi. Pawlkhatte in Constitutions puahpha uh hi. SDA sung puahphatna pen adang kisamlo hi. Corruption puahphat ding ahi hi. Ngiate in tuucingte omna aluahloh ding bek thupi hi.

Jesu ngeina ah ciahkik ni.

" Jesu in ama naseem dingin pilnasaangte leh mithupite teello hi. Thumaan taangko dingleh leitung lok aa lumlet dingin Siampi-laitheite paisanin mizawngkhalte leh mi kiniamkhiate teel hi. Amaute in tua na a sepzawhna dingin Khasiangtho kipia ding hi. Hih Lungdamnathu pen mihing thahaatna leh mihing pilna tawh hilo Pasian vangletna bektawh kitaangko ding ahi hi." Acts of Apostles. pg 17.

" Tawntung Pasian hong paina ding lam bawl un. Eite Pasian lampi zanglei tawnin tangtakin kha un. Muniamna khempeuh vuk un. Mualian mualneute totam un. Lamkawi khempeuh tangsak un. Lamlai aa om suanghuum khempeuh hemkhia un. Hong kilang Topa vangletna mikhempeuh in muta hen. " Isaiah 40: 3-5.

Mimasa hihna kisaktheihna, minamlian hihna kisaktheihpihna,pilnasaang kisaktheihpihna, Pasian siampi hiing ci a, a puk theilo bang a aana zatna, mualsang mualniam khempeuh phukin totam ding ahi hi. Minam khempeuh muhtheih dingin Topa Jesu saangkhai dinga pahtawi ding ahi hi. Ama hoihna leh alna mikhempeuh ciamsak ding ihi hi.

Jesu hoihna ih lak hiam? Nang sungah Jesu a mu diam? Jesu laamto lo-in nang leh nang na kilaam hiam? Bang tawh teti pang ding nahiam? Ci bangin ih al hiam? Midangte pukna mangpa ihi hiam/ Pasian Pawlpimaan hihna bektawh khanlawhna hong piang diam?

" Kei, leipanin hong kisaangkhai leh, mikhempeuh kahuup khin ding hi." John 12:32.

Mihingte huupna pen Jesu bek ahi hi. Jesu hoihna hi. Jesu alna hi. Hih a tungaa thuhilhna bangin Pasian hoihna hong kimuh mateng midangte kikaizo lo ding hi. Pasian naseem pawlkhatte in khamangthang a zon sangin a omsa hawlkhiat baihsa zaw uh hi. Amau hangin kha tampi khuamialsungah mangthang khinzo hi. Ama tungtawnin kuaman khuavak mulo uh hi. Pasian Pawlpimaan nalah sangin ama hoihna leh dikna lak lecin hong kinaii zaw ding hi. Logo tawh na kidaal sangin Jesu alna limna ciamsak lecin kipzaw ding uh hi. Pawlpi a khanna ding leh mainawtna dingin, Jesu sangkhai ding longal thudang omlo hi."

Thang Siangh. zogampalpi@yahoo.com

SDA MISSION CORRUPTIONS PUAHPHAT HUN. ( ii )

PASIAN PAWLPI LEH AMA NASEP.

Bang hangin Pawlpi piang hiam? Pawlpi icih bang hiam? Pawlpi nasep bang hiam? Pawlpi in bang power nei hiam? Pawlpi ukte in vantung kongkhak honna tawh nei uh hiam? Hih dotnate pen tuhun Pawlpisung aa om thudotna theihhuai poimawh hong suak mawk hi. SDA makai sia tampite in amau dinmun leh a kipia nasep telzo nailo uh hi. A panna leh a zat aanate alehlam vive ahi hi. Pasian ngiimnalam manawh lomawk uh hi. Tua thu tuni-in i kikum ding hi.

Pawlpi bang hiam?

" Pawlpi" cih ciangin Organization khatpeuh gen hilo hi. Pasian deihna tawh kituak sapkhiatna ngah mihonte cinuam ahi hi. " Khuamial sungpanin alamdang khuavak sungah a sapkhiat ahi, Pasian Pawlpi mite in, Ama thupina leh vangletna minthanna puaksawnin lak ding uh hi. " Acts of Apostles pg9.

Laisiangtho sungah Pawlpi cihna kammalnih om hi. Khat pen Hebrews kamin QAHAL ( Qahillah ) hi a, Greek kamin Ekklesias ci-in na teikhia hi. [ Greek Septuagint LXX]. Mihon omkhawm cihna ahi hi. Saptuamte or teeltuam mipawlte cihna zong ahi hi. (Concise Dictionary of the World in Hebrews Bible. Sv " Church" 102. )

Pawlpi leh Biakinn cihna " Church " pen English kici mikaangpau ahi hi. Scortish kam KERK kammal pan aa a lak uh ahi hi. Scortish te in tua kammal pen Germany kam " KERCHE" ( Kyriache) pan a a ngah ahi hi. Germany te in Greek pau " KURIOKOS " (Kuriocon) pan nangah uh hi. Topa neihtuam or teeltuam mihonte cihna ahi hi. Tua ahih ciangin Pawlpi pen mihing thu-umte hizaw a, Organization kipawlna leh Building gennuam hilo hi. Khua khempeuhah biakinn a om hangin, thu-um mimal khatbeek omlo-in Pawlpimin kivawh theilo hi.

Jesu in Ama-pumpi pen Biakinnpi tawh nasaikak hi. Jesu upna tungtawnin Abraham suan Israel mi taktak kila ding hi, acih ciangin, Jews te in nathuakzo lo uh hi. Jesu umkhempeuh Pasian pawlpimi-in kiciamteh khin a, mimalin a om zongin, mihonin a om zongin, vansinnuai aa om Pasian pawlpimi lakah kihel ahi hi. Jesu in, " Pasian biate in Jerusalem naih kullo hi, mun khempeuh ah biaktheihhun hong tungzo hi, ci-in gen hi. Pasian ciaptehna pen leitung laibu sazian hilo hi.

Pawlpi Khennih aa etna.

Pawlpi pen thunih or khennihin ki en thei hi. Tuapen ( Vissible Church ) Muhtheih Pawlpi leh ( Invisible Church) Muhtheihloh Pawlpi ahi uh hi.

Muhtheih Pawlpi cih ciangin Lungdamnathu taangkona thahaat zawkna dingleh, thu-ummite kizopna kipanpihna a olzawk nang ngimna tawh kipawlna ahi hi. Hih kipawlna sungah tanghum leh taang pokhawm hi. Tuu leh keel omkhawm hi. Ansii leh antak kiseng khawm hi. Pawlpi sazian sungah ih om hangin gupna kician nailo hi. Khensatsa hilo hi.

" Muhtheihloh Pawlpi icihpen Pasian khuavak a muhzahzah tawh kalsuan Christian picingte, leipiancil aa kipanto tatsat lo-a Pasian tanu-tapa te ahi uh hi. Leitung mihingte theihpih banloh Christ tawh a kiciamteh Christian te ahi uh hi. Hih misiangthote pen Pawlpimin tawh kiciangtan lo hi. Muhtheih Pawlpi sukkhak theih hilo hi. Zong sakha thei lo uh hi. " John 1: 9, 3: 3, 6: 37-38. Matt 18:3, Luke 14:27. SDA Believe 142. A Handbook of SDA Theology, George W Reid. Edited ( Haggerstown: R&H 2000) 545.

Gupna pen theihna sangin neihna hizaw a, lungsim sawkkha Pasian tawh kizopna tungtawnin kingah hi. Milim bia, dawibia icih biakna namkim pan aa hong pai mihon pawlkhat ten zong mu ding uh hi.

Ellen G White comment: " Those whom Christ commends in the judgement may have known little of theology, but they have cherised his principles. Through the influence of the devine Spirit they have been a blessing to those about them. Even among the heathen are those who have cherished the spirit of kindness; before the words of life have fallen upon their ears , they have befriends, the missionaries, even ministering to them at the peril of their own lives. Among the heathen are those who worship God ignorantly those to whom the light is never brought by human instrumentality, yet they will not perish. Through the ignorant of the written law of God, they have heard His voice speaking to them in nature, and have done the things that the law required. Their works are evidence that the Holy Spirit has touched their hearts, and they are recognized as the children of God." The Desire of Ages pg638, 2.

Pasiangam cihleh Pawlpi kilamdang hi. Pawlpi pen Pasiangam hilo hi. Pasiangam pen Pasian ukna ahi hi. Pasiangam pen Christ tungtawn a Pasian sepkhiat gupna ahi hi. Mawhbanglo, pauban omlo nuntakzia pen vantung tunna dingin Pasian in hongkal masa lo hi. A kisam poimawh pen hizenzen lo hi. Pasian in a khawnkhong aa hong piak ahi, Jesu-dikna saan masak kul a, tua Jesu neihna hang a ih ngah dikna sungah ih om ciangin Pasian gam a kitung zo ahi hi. Pasian pen kumpi-in kineita a, silehsa deihna nusia-in Christ haatna leh dikna pen ei-aa ahi hi.

Pawlpi pen Lungdamnathu hang aa kipawlna ahi hi. Tua Pawlpi sungah min omkhempeuh Pasian ukna gam sungah kihelkim lo kha ding hi.

Seventh-day Adventist ten bangcisaan.

" God is not own by anyone. God is a god for all people and His saving love goes to all." Jen Paulsen, GC President of SDA, " Sermon at GC session, July9, 2005. (Adventist World. September, 2005)

" Bangzahin i thupuak ihkiplet zongin cikmah hunin ei SDA te bek in gupna ngah ding hi, cih i len kei hi. Hibang upna in tuhun leh mailamah zong SDA te thuguilet maantak hingeilo ding hi. Christ in gumpa hi, ci-a alaamsaang naseem khempeuh zong, gupding aa Pasian geelna sungah kihel a, naseemte ahi hi, ci-in ih pom hi. Khate Christ kiang puakding nasep a seemte nakpi-in thupi ih sa hi." " Christ's Other Sheep" Lesson 8. Adult SS Lesson, July , Aug, Sept, 2004.

" Seventh-day Adventist Pawlpi ngimna in Lungdamnathu ahi, ih thupuak hilh dingin vaihawmna hi a, gupna ngah leh ngahlo thukhen ding a kisamkhia hilo hi. Protestants te sungah Pasian in ta tampi nei a, Catholic Pawlpi sungah tamzaw kan lai hi. Tua te in kiciantak a, thumaan thutak a zuingaplo (Sabbath-keeping-Adventists ) Sabbath tang SDA te sangin thumaan amuh zahzah mangin azui tintente ahi uh hi. " Ellen G White Selected Messages Book 3. 386.

" Mikhat SDA asuahna dingin Upna thuguilet ahi, Fundamental Beliefs teng umphot ding hi. Tua tengpen thudangtawh sawhpawi theih Pawlpi let Doctrines ahi hi. Christian nuntak khantoh nang thuhilhna tuamtuam a om hangin tuate pen pomloh phamawh thu hilo hi. Tua thuhilhna tuamtuamte in, saneeklohna, Christian pilnalam, ( Seperation of Church and State) Pawlpi leh Kumpi kikhenna, kitenna ah zungbuh zat leh zatloh vai, galkap lut leh lutloh vai, me khiat leh khiatloh vai, cihte ahi uh hi. Tuhunin buaina tam ahih ciangin ziat leh vei-ah a pial omthei a, ziatlam nehlua leh legalism kitungpak thei a, veilam nehlua leh Liberal lua, suakta lua-in kipeeklen zel a leitung tawh kibang hi. ( Carlos G. Martin, Adventist Church Growth: Procedure of Church Growth, ALLAS, 1998. p33.)

Vantungmithum taangkona.

"Note in Keima aading teti nahi uh a, Kong teelkhiat naseemte nahi uh hi. Kei bekbek tawntung Pasian kahi a, Kei longal Pasian dang omlo hi. " Isaiah 43: 10-13.

" Keimah tawntung Pasian in thumaan tawh hong samkhia khinzo kahih ciangin nakhut lenin kong dom ding hi. Nang in mittawte mit honsak a, a kihen a kikhihte na suakta sak ding hi. Khuamial sung a omte khuavak sungah nakaikhiatna dingin minam khempeuh khuavak dingin kong koih hi. " Isaiah 42: 6-7.

" Hih tui in nisuahna lampan manawhin gamsungah luang ding a, Bualtui sung a lut ciangin Bualtui khumsak ding hi. Tua luitui tunna khempeuh ah a nungta ganhing khempeuh in, nungta ding a nga tam mahmah ding hi. ...Lui langtuakah neektheih singno tuamtuam po ding hi. A tehte hul theilo ding a, a gah tatsat ngeilo ding hi. Khasimin gahno tawntung ding hi. ..Bang hang hiam cihleh tua luitui in a siangthomun pan hong paikhia ahi hi. Agahte pen neek ding ahi hi. Atehte pen natna damsakna ding ahi hi. " Ezekiel 47: 8-12.

Seventh-day Adventist Pawlpi in Lungdamnathu taangko ding simloh masuan dang i nei kei hi. Pasian tate omna khempeuh Nunna luitui bang ding hi. Mikhempeuh dawn ding leh nuntak pih ding ahi uh hi. Teti ding leh khuavak puak ding aa kisamkhia ahi uh hi. Note acih ciangin Pawlpi deidan omlo hi. Amun agam ciangtan omlo hi. Minam a vom a kaang deidan omlo hi.

Pasian tokhom pan aa hong luangkhia nuntakna khuavaak puak dingin hong kikoih hi. Ih nasep thupi-in vaanglian a, sepzawhna ding Khasiangtho haatna leh pilna, leitung hauhna sum zong kicingtakin hong pia hi. Ama sehna bangin ih zangsiam hiam?

Biakinn munkhat kavak leh, Lan ( flag) namli khawng phezangzangin kikhai hi. Biakinnpi za kizuutin san zeza hi. A galva panin tha ngah huai petmah hi. Mite pen Sabbathsuits tawh ding sitset uh hi. Sabuaite puanneel mahmah tawh kituam hi. Pakhoihpente kisuang hi. Pangkate tawlnga lo-in kipei a mite mut hithit hi.

Ahih hangin a dipkuathuai thukhat hong om hi. Galkaap honkhat mission huang sungah giahphual saatin tenden hi. Tuma kum-25 hunlai pawl aa kipan ahi hi. " Gamnuai aate sumtawh huh hi, ci-in Pastor nih hong kiman hi. " Pawlpimi nih leh thum holimna munah, "Guai, hih sumte koipan ahitam, siapi ten sum khonsak ahitam, mission sumpi khawng ahimai tam," ci-in kihuau thapthap uh hi.

Pawlpi in Pasian hongsawlloh nasep khatpeuh kopkha ihi hiam? Pasian minthanna ding a hong koih Pasian mipawlte in Pasian aading teti pang nawn se lo uh hiam?

Leenggahlo cingte leh Galvilte lusu.

Pasian in thumaan-thutak cing dingin hong koih hi. Ama hoihna teti pangin nuntakna tawh lak dingin hong bawlpha hi. Ama dikna leh sianthona a-alna leh alimna hawmsawn dingin hong koih hi. Tu-in midangte in hong bangcimuh uh hiam?

" Ciampeello cihtakna ahi kawnggak gaak unla, thumaanna ahi awmdal bulh unla, Lungdamna leh kilemnathui taangkona lim ahi khedap bulh unla, kidalna lum ahi upna nei un. Hot khiatna sik-lukhu khu unla, Pasianthu ahi Khasiangtho tem tawi unla, lawpna khindai lo-in thungetna namkim tawh thungenin do un." Ephesian 6: 12-20.

Pasian naseem Israel minam siampi laitheite Khalam mittaw khin uh a, amau sepding aa kipia nasep seemlo uh hi. " Amaute in amah pen Pasian bangin pahtawi lo uh hi. ..amau haina in a lungsim mialsak hi. " Rome 1:21. Israel tungaa kipia nasep, amau seploh seem dingin Jesu in Nungzuipite hong teel khia hi. Tua nasep mah Pawlpi tungah hong kipia hi. Mission in tua nasep a zop kei uleh, suangtumte kiko sak ding hi. Mission sazian sungaa omlote kiko sak ding hi.

Siampi uliante leh tuhun biakna makaite pen biakpiak ngeina tawh lungkim lel uh hi. A piaksawn ding nuntakna tui mau sungah phul lo hi. Ameivaaktui kangzo hi. Amaute kicingzo lua kisa ahihmanin vantung Huhpa Khasiangtho in mun ngajhlo hi. Lungdamna thu pen mawk khawllo ding hi. Biakna aana tawh khaktan zolo ding uh hi.

Leenggah munah Thaanglingkung.

" Leengkung hoihpen ahi note kong suan hangin, nang pen ciampelin Kei mai-ah leengkung hoihlo pen suak mawk hilo nahiam? " Jer 2: 21.

" Ka Leengguilo aadingin kahih dingaa kilawm kahihnailoh bang om ahi hiam? Leenggahhoih gah ding ka lamet laitakin, bang hangin gamleenggah hong gah mawk hiam? Isaiah 5:4.

" No leh no na kivaak uh a, tuute na don kei uh hi. Tuumul meetin tuumulpuan nasilh uh a, tuuthaute go-in a sa nane uh a, ahi zongin tuute navaak kei uh hi. Tuu zawngkhalte na khoi kei uh hi. A cinate na bawldam kei uh hi. A liamma te natuamsak kei uh hi. A kinotkhiate nakhawmkik kei uh hi. A lampialte nakhiang kei uh hi. Tua hilo-in ngong bawlin na ukcip zawsop uh hi. ...Tua ahihmanin no, tuucingte aw, keima thugen ngai un. Topa Pasian in, note lang kahihnathu tu-in kong pulaak hi. Note khutsung panin ka tuute ka lakhia ding a, tuu donlo-in note bek a kidon, no tuucingte khut sungah ka tuute ka omkiksak ngei nawn kei ding hi...." Ezekiel 34: 2-10.

Tuucing gilote tawh kithutuak pen dikna hilo hi. Thanemna namkhat hi a, mawhna gilo sihpihngam ahi hi. Tuucing gilote tawh kikhen pen Pasian ngimna hizaw hi. Amau seploh Lungdamnathu leh Teti pang dingin kipumpiak kul ding hi.

Pasian galvil ahi eite in, vangletna mitsuan kawmkawmsa-in kha mangthang ih zong ding hi. Ih tunna khempeuh Nunna luitui, ngasa tampite bualna Bualtuikhum bangin , minam khempeuhte nopsakna hinna tuilii ih suak ding hi. Ih khuavak taangsakin namgimtui tatsat lo-in ih thun ding a, taauna tawh thu ih ngen tawntung ding hi.

" Leitungah Christ Pawlpi pen Lungdamna thupuak ding ngimna tawh kiphut ahi hi.....Pasian Pawlpi icih pen mihingte gupkhiatna taangko ding sawltak aa kizang ahi hi. Tua seem dingin kipawlkhawm hi a, Lungdamna thupiak pen ama masuan ahi hi." Testimonies 6. 29. 72. Acts of Apostles 9, 15.


Thang siangh. zogampalpi@yahoo.com

SDA MISSION CORRUPTIONS PUAHPHAT HUN. i.

TUUCINGTE LEH TUUTE.

Pawlpi khempeuh in amau bulphuh a tawm-atam neiciat uh hi. Tua upna bulphuhte i saan manin Jesu kineizo takpi hi, nuntak tawntungna hong pia zo hi, ci-in um ihi hi. SDA pen ih Pawlpi hi-a upna bulphuh kiptak kinei hi. Hiteng omlo-in Lungdamnathu bucinglo hi. Hih Lungdamnathu taangko nangin sumpi tuamtuam tawh kihuh hi. Lungdamnathu taangkote cialna ahi hi. Tua bang naseemte pen Pasian in Tuucing minvawh se hi. Tuucing kammal i zak phetin bangzahin midik tuak, bangzahin lungduai-in thuakzo leh kilawm, bangzahin tuute hehpihin khoi leh kilawm, a gaalte nangawn bangzah ciang thuakzo a, bangzah ciangdong mawhmaisakzo leh kilawm cih, lungsim sungah hong pusuak pah zangzang hi.

Tuukhumna Buuk.

Pawlpimi ihih kimciat hangin tuu le keel om hi. Taangkung leh tanghumkung om hi. Tuucinghoih leh tuuvunsilh ngia om hi. Honkhatin a ki-om hangin namnihin kikhen tawbntung hi. Tuu leh Keel ih khen theihna dingin Tuukhumna buuk bang hiam, cih tel masak kul in ka um hi. Tuukhumna-buuk pen mihingtelam zum leh innpi gennuam hilo hi. Jesu pumpi tawh a kikim upna ahi, Fundamental Beliefs tungaa kingakna, omkhopna gennuam hizaw hi. Eite dinpih Pawlpi pen Denomination tungah kingalo hi. Fundamental Beliefs tungah kinga zaw hi. Church member khempeuh mipumin omkhawm theilo ahih hangin, upna sungah pumkhatin ki om tawntung hi. Member te pen Organization makaite tungah kingalo-in Jesu tungah kinga zaw hi.

Tua ahih ciangin Pawlpi pen thunih-in kikhen thei hi. Khat pen Muhtheih Pawlpi [ Visible Church ] hi-a khat pen Invisible Church [ Muh theihloh Pawlpi ] ahi hi. Muhtheihloh Pawlpi member sunga om khempeuh pen gupna taang theilo dingte ahi hi. Muhtheih Pawlpi memberte pen gupna ngah tawh a ngahlo tawh kihelzau hi. Pawlpi member hihna bektawh gupna kingah lo hi.

Laisiangtho sungah Pasian Pawlpi a cih ciangin Denomination gennuam hilo hi. Jesu kamsungpan a pusuak thumaan-thutak sungaa kigawmna gennuam ahi hi. Tua upna nakhahsuah matengin koikoi ah na om zongin,khatguak nahi a, mihonpi a na om zongin, kuamah tawh kithuzaklohnamun gamsimthamah na om zongin, ngapi gilsung natung zongin, Pasian Pawlpi mi nahi hi. Pasian Pawlpi pen thuthukpi hi-a leitung kipawlna bang bek hilo hi. Upna kiptak nalet laiteng Pasian tanu-tapa nahihna pan kuaman hong lakhia theilo ding hi. Vantung innkuan tawh kizom den nahi hi.

Jesu in, " Keimah in tuukhumna kongkhak kahi hi, " a cih ciangin, Denomination zumpi kongkhak nasak khak ding lauhuai hi. Vantungah Pasian leh Jesu pen eite biakinnpi hita ding hi. Jesu tawh na kizop laiteng vantung biakinnpi kong khak aa lutlut nahi hi. SDA upna Fundamental Beliefs khotak a nalet laiteng, Jesu tawh kizom nahi hi. Hih upna pen laibu aa kitawi mawkbek hilo-in Khasiangtho hong sukkhakna tawh Jesu limsun a kinungta ding ahi hi.

Tuu leh Keel a khendingkua?

Leitung mihing tuu leh keel khennuam aa hong kipan ngamte haang kasa mahmah hi. Topa Jesu bek ii septheih ahi hi. Jesu lo a seemdang a omleh Blasphim mawhna palsat ahi hi. Pasian bang aa kibawl Biakinn sungaa tupa nasep ahi hi. Anti-Christ kha bek ii sepngam ahi hi. Keel khenkhiathun pen Jesu hong paihun bek ciang ding ahi hi. "Tanghum leh taang pokhawmsak un, " ci hi. Kuapen tanghum hi a, kuapen taangkung cihpen leitung mihingte khen theihnam hilo hi. Pawlpi a neupen panin GC president dongin tuu leh keel khenna tawh kipelh kuamah omlo ding uh hi. Tuu leh Keel khenna pen leitungbup aa thupiang ding ahi hi. Union officer te leh UMM siate tuu leh Keel khen ding aa hong kipat ngangtang pen SDA taangthu sungah thulamdang mahmah hi-in ka um hi.

Pawlpi dinpih thukhunpi nam-2 om hi. Khatpen pawlpimi suah ciang aa kisam upna bulpi teng a hi hi. Kamsangnu omlai a omsa upna-27 hi a, khatvei diak a hong kibehlap khat zong om hi. Membership suahna dingin hiteng saan kul phot hi. Memberhoih suahna dingin hitengmah tawh thapia-in kihanthawn hi. Hi upna tengmah tawh kisukip hi. A ummite aadingin zuihhaklo thamlo-in hong lungnuamsak mahmah se hi.

Zatdan maanlo.

SDA doctrines pen ama-munah zang leng nuntakna khuavak leh nuntakna lampi hi-a, Jesu tektek tawh lamtonkhawm ihi hi. Lampimaan tawnte pen lunggimna leh patauhna tawh kipelh hi. Ih zatsiam keileh Legalism paizia hipah lian hi. Pharisees dinmun hong tun pah hi. Samsiatna tawh kizom hi.

Matt 23: 1-36:
Vantung paina lampi aa kibawl pen Biakinn kongkhak tawhkalhna upadi hong suak hi. Gaalkapbu power tawh Pasian Pawlpi i veh sangin Pasianthu mahtawh veh leng tuucinglim suunzaw buang hi. Upna-thukhunte pen Palik thukante upadi zat banga zatding hilo hi. Churchboard pen thukhenzum hilo hi. Khagup khiatna bord ahih ding thupi hi. Pawlpi thanemte thusit a, church mannual sihsan a hawlkhiat pen Pasian ngimna tawh kilehbulh hi. Upna thukhunte pen thanemte saatna ding a kibawl hilo hi. Khuavaak lakding hizaw hi.

Mipilgam Conferece Pastors te in thanemte hawlkhia ngeilo uh hi. Thunget sakin tha pia hi. A hawlkhiatte pen doctrines langpangte bek thupiseh-in hawlkhia hi. A langpang ahihkei ngal leh zuunding puahding bekin ngaihsun lel uh hi. A langpangte nangawn saupi hunla-in hilhhilh phot hi. Pasian in nusiabaih lua teh, a cih lohna dingin hilhilin vehveh hi. A zawhzawh het keileh thungenin paikhia pan hi. Khat veivei amathu aa paikhia khin hizaw a, hunsaupi la a, kho hizaw thei hi.

A paikhia nuamlopipi aana tawh ih nilkhiat pen Pasian ii ngimna leh gupnathu tawh kilehngat sinsen hi. Thamlo-in Biakinn nangawn phallo-in tawhkalh lailai cihpen, Christian tatsia tua tungkan omlo ding hi. Nidang Khamtung SDA sia semmasa sia Phung Kai in, Pawlpimi nungtolhsa mite simding Sabbth-school lesson tasakin pia ngiatngiat hi. Tuhun aate leuleu in, Quartery nangawn lasak nuamlo uh hi. Conference deihte sabbath biakinn hong pai khakleh ci-in singkhuahtawh pang dingin Laisiangtho sangnaupangte cial uh hi. Hih Laisiangtho sangnaupangte in Christianity bang a cisin zen tam, ci-in kangaihsut ciangin adeihna katelzo nawn kei hi.

Pulpit tungah Pasian hoihna kipulaak nawnlo hi. Jesu in mawhneite hong itna kipulak lo hi. Hehpihna leh mawhmaisaknathu kitaangko lo hi. Moses langpangte dantuahna thu ngentang gen uh hi. Gupnathu ngainuam aa hong hawhte awnkhiankhianin ciahkhia uh a, hong kilakkik nawn lo uh hi.

Tithes and Offerings

SDA Pawlpi nasep leh Organization ii ngimna pen Lungdamnathu longal a dang omlo hi. Jesu hoihna gengen dingin Pawlpi kiphut ahi hi. Tua Lungdamnathu hilh dingin naseem kicial hi. Sumpi tawh nungta uh hi. Tua sumpi pen Pasian kiang atun ding kisam hi. Lungdamnathu taangko na, khamangthangte kaihkhopna dinga kizang sumte pen Pasian kiang tung ahi hi. " Hih a neupen tung aa nabawl thupha khempeuh keitung aa bawl nahi hi." ci hi. Tua ahih ciangin Lungdamnathu hangin sumpi kidong a, Lungdamnathu hangin Pawlpi kiphut hi. Tua sumpi a zekkhia taktak pen Union mission/Conference leh local mission/local conference te hi a, naseem siate kiguai ahihi. Mikhemnpeuh in amaute nasepzia mitsuan uh hi. Pasian aading a piakkhiat nate kizatdan munuam uh hi. Tuute tawh a kizopzia munuam bek lo-in a khum a kha ciamnuam uh hi. Tuucingte ahoihte in a mul meetin pia uh hi. A nawi sukin nesak uh hi. Tuute cidam a, tuucingte zong vantung daitui tawh kidiah pihpiahin thupha ngah uh hi.

Tuucing hoih keileh nawizu kang hi. tuumul pulhin met ding omlo hi. Tuute kikhen hi. Namsau tawh a delh hangin tuute kiangpanin a ngah ding piasan khatzong omlo hi. Sawbua B ah pawlpi kiphuhma-in Sia Malsawma leh Sia Biakliana tawh crusade kabawl uh hi. Mawtawlam gei ahih ciangin a paisuk a paito in hong nawk hi. Maandat mai-ah motor khat hong khawl hi. Mikhat hong tuakhia-in Ks 75 dalnih hong pia hi. Kawl Budhistte ahi hi. Pasian Lungdamnathu taangkote Pasian in guaksuak sak lo hi. An ngawlsak ngeilo hi. Milim biate naleng an pia dingin sawl hi. Sia Biaka in, " Pu Siangha nen na kanthawh chuan, cawmeh tuitak kan ei thin," ci ngei hi. Tua ahih ciangin sumpi kipuaklo khawng kua kisam hiam? Kha mittang tawh enleng kitel mahmah lel hi.

Corruption nasia tektek.

Leitung pen sia mahmah ta a, Pawlpi pen leitung tawh tonkhawmin paipai hi. Ki-ukna Upadi hoihnagamte hoih zawdeuh a, ki-ukna hoihlo gamte sediak pah hi. A zawdiakin Communist gam leh Socialist gam ahi Dictator Leadership omna khempeuh genzawhloh zah dongin siahuai mahmah hi. GC Administration Officers te mitpil sitset leh lusu a, amau naseemte buaina kantel kawmkawmin a tuute uh vaanding kisam hi. Thukante in corruption nasiat zia lehamaute bangtawh zindo uh hiam cih zong theih huai hi. Tuhun ulian muakna leh pahtawina khempeuh vantungin deihpih kimlo kha ding hi. Khalam makai om ding a, silehsa bekmah tawh a kidim makai zong om ding hi. Khalam makai ahite in leitung position leh letsong tuamtuam sangin khamangthang hong khual masa zaw ding uh hi. Constitutions leh Bylaws tawh khamangthang hong zonglo ding uh a, Uncoditional Jesu hong itna bulphuhin hong zong ding uh hi. Organization in sumtawh a kiguai naseemte omzia hong telmuh mahmah ding uh hi.


Pawlpi thuneihna.

Pawlpi hong thahaat semsem a, kumpi tawh kibang tektek hi. Makaite in a tokhom nuam hongsa tektek hi. Tua tokhom tawh kikhen ding ngaihsun zo lo uh hi. Dictator lungsim hong lut hi. Kha manphatna hong kiam a, leitung aana hong uang semsem hi. Seveth-day Adventist ki-ukna sungah power lianpen leh thuneihna saangpen General Conference hilo hi. Union mission/coference, local mission/conference hilo hi. Church pastor zong hilo hi. Local Church te ii Church Board ahi hi.

Pawlpimi khat suahna dingin Churchboard thukimna kila hi. Paihkhiatna dingin Churchbaord mattawh kipaikhia hi. Churchboard in upna bulphuh sihsanin Pawlpi khantohna leh gualzawhna khempeuh semkhia hi.

Pawlpimi suahna leh lakkhiatna pen localchurch tungah kinga hi. Professional of faith tawh ahizongin tuiphumna tawh ahizongin kila thei hi. Pawlpimi muhna ah mihoih ahihleh a gaalva pan aa kawkawk mawk ding hilo hi. Taangthuluite sihsanin kinial theilo hi. Tuni a Jesu leh ama kizopna tawh kisai zaw hi.

Pawlpi kiohuhcilin Pawlipi makai dingte pen thu-ummite khutngakna tawh ordained kipia hi. Mi a kicin semsem ciangin ordained ngahsate in mithakte khutngak pia uh hi. Khalamthu ah President, Secratary, Treasurer te in aana neilo uh hi. Thu-um mite tungpan a Ordained kipia Ordained Minister te pen khalam thuneihna saangpen ahi hi. GC in Pawlpi ngimna teltaklo, zangsiamlote sittelna neilo a, makai ding a aana a piaklaiteng Pasian pawlpi pen khalamah deih banglo ding a, leitung business kipawlna bangbek hiding hi.

Nidangin Pastor khat US pai hong ciah hi. Yangon Central Church ah thuhilh hi. US pen khalam hoih hetlo hi, eikiangmah hoihzaw, ci-in ciltuikai zenin gen hi. Hilai katun ciangin nahi deksuai lo hi. Ki-aapzawh zia, Christian nuntakzia khempeuh nasia lua kasa hi. Kawlgam taw panin Kachin gam dong kaphaklohna omlo hi. Kikhai lua mai hi hang. Khatveivei keiguak kiho-in, " Hau si, pil si, hizah aa nuam gam, khalam ei sang a hoihzaw pek sawnsawn, hampha si e, " kaci ngaungau thei hi. Tua siapa in kitelhun sung politic tawh kinawk ziahziah GC kikhop khawng bek mu hi-in ka um hi.

Kawlgam Conference zong Pasian in hong nusia ngeilo ding hi. Mungno in, " Ngah ngei kei nuteh, " acih pen tulaitak makaite kamsungpan a zakthu zong hi ding hi. Pasian in hun a sak ciangin lumlet zawhloh neilo hi. Pasian in hun a sak ciangin a dalzo ding leitung ulian khatzong omlo hi. Tuni dong hong dinpih Pasian in atawntung hong dinpih ding hi. Kiim leh paam ense lo-in Tuucingmangpa hong kilatni dong phunlo taulo-in ih ngak ding hi. Tua ni ciangin Conference ten Pasian naseem zaw mawk mah ei, Topa hong piak lawpna leh hanna manpha si e, kici ding hi. Mission te sangin Conference a kicite tuucing hizaw mah ei, naci ding uh hi.

Gulpi bangin pil unla, vakhu bangin guneilo-in om un. Laisiangtho lei-ah khia ngei kei un. Lungdamnathu tawlnga lo-in gingsaksak un. Tuucing mangpa hong kilat ni ciangin, " a diktat naseempa" cihna gualzawhna lukhu hong kikhu sak ding hi.


Thang Siangh. zogampalp@yahoo.com