THANG SIANGH KHANSUNG TAANGTHU. [ v ]

MANGNGILH THEIHLOH THU PAWLKHAT.

Tunnu Luankhi.
Zo-inn kici nidanglai innte pen laam-7, laam-8 bangin kilam hi. A laizangah deitan aa innsung leh innliim-in khen hi. Tapkualgei innsung laizang takah Lupnapi kikoih hi. Innkuan teekpente lupna ahi hi. Lupnapi lukhungnuai phei teng pen Pialkhang kici hi. Tualai-ah pheek phahin naupang teng kalum uh hi. Meipaam ci-in meigei zuak tawh kikalah lupna khat kidawh hi. Ta-nungakte kilumsak hi. Tangvalte pen Dawhdan tungah tuamlup uh hi.

Lupna zuankim khin, ihmu nailo deuhin ka Nu hiam, ka Pa hiam khat in taangthu hoihnono hong gen uh hi. Tua tawh a tate hong khim uh hi. Ka Pa in, gaalvai savai leh pasal galhang, pasal thahaat, pasalpilte taangthu, " Gal Ngam leh Haang Sai " cih taangthu lamsang ahi hi.

Ka Nu hong gente pen, " sanggam ki-itna, sanggam khat leh khat kineekngaihna," ahi Thang Ho leh Lian Do taangthu, Nu'nu kici nukik ginalo taangthu, cih khawng hong gen thei hi. A khasiathuai taangthu hong gen ciangin ka uunau khawngun kidiikthepthepin ka ihmu suak uh hi. A gen taangthute lakah kabengkha ah mang ngeilo pen, " Miim tangkhat muleh phalhawm, taang tangkhat muleh phalhawm, hawmthem nungta nebum si," cih tangthu ahi hi. Tudongin kabil sungah kanu awging kazaza lai hi.

Mizawng leh mizawng kihehpih.
Ka Pa pen zikik tawh inntuan ahih ciangin pulam-palam logam leitang gina hong kikhenlo hi. Anne thei naupangneu nono kua kapha uh hi. Ankhing kham zawdeuh sanggam ten hong huh sangsikin, " uino bucing" ci-in hong huatsah mahmah uh hi. Huangsak huangkhang luikawm ah neekding mangteh kaikhawmin vaak le-ung, " thadah vakvai " min hong opuasak hi. Logam leitang kanei kei uh hi. Tu leh hei gina kanei kei uh hi.

Komah bang naupang honcing ka Nipi om hi. Amau zong nauzaw inntuan hi-a zawng mahmah hi. Nitakkhat kanu in hong pua a, ka Nipi kiangah kahawh uh hi. Hong kihuau uh a, " Uu aw, kameikhu paisuak ding hi, kahuan ding an tangkhat zong omlo hi," ci-in gen hi. Keipen kumnih kapha nai kei hi. Ka Nu liangko pangpanin a gen khempeuh kaza hi. Ka mangngilh kei hi. Tua bang acih ciangin ka Nipi in huankhat bek aneih khennih suahin hawm uh hi. Anteh bupi leh tuitawh pawmni kici uh hi. A kik ciangaa huan ding bangci zon ahitam kathei nawn kei hi.

Sanggam numei nih leh ka uupa tawh
Ka uu numeinih thaneekpi-in kanei uh hi. Tawhte khua-ah antaw-in kapai uh hi. Munluah khua ah peemta Tedimmi inn thum khawng om hi. Tualai-ah van nga-in Tawhte khua kapaisuak uh hi. Tawhte khua ah taamlo-in Munluah kadelh kik uh hi. Tawhte khua pan kataikhiat laitak un khuapaang san lela a, khuamial ding kipan hi. Ka uu tawh pasalno saili tawi thei pan kihi a, an leelkhat leelnih kan kapuazo kei uh hi.

Khataang nuai-ah kapai uh hi. Naupanglai lua kahih uh ciangin khuazing nangawn kikihta mahmahlai khong hi. Kagaal khatah sakhi hawk lala hi. Sahawk khempeuh sahang dingin kingaihsun ahih manin kalau mahmah uh hi. Ka uu numei neuzaw in a kenghek sawnsawn hi. Van khoptakin kipua a, kap hathat sa-in kapaipai uh hi. Ka u kahna khitui leh kidiikna aw kamangngilh ngei kei hi.

Kapailam un Munluah khua phakma in builamvaak khat katuak uh hi. Sasia hiding hi, ci-in lungsim hong lawng sim gige hi. Nitak katun ciang un, Munluah-vaimiim kici a, tanggol mahmah hi. An pen limlo paklehlah hi. Huanpih ding anteh omlo, be omlo, amah guakin paaklela-in kihuan hi. Lampi aa kamat uh buisa emminin vaimiim tawh kameh uh hi. Gilvah takin kanezo uh hi. Sasia hilo-in Pasian in hong pia hi-in ka um hi.

Ka u Nu thuakna gimnate ko hongvakna hilo hiam? Kpa kawmkawmin zanthapai khuamialpi aa lampai pen cikciang mangngilh thei ding kahiam?

Kolbulh khauhen katuah laitak.
1963 kum October kha-in Galkap kumpi langpangin hong kiman a, Monywa thong katung hi. Kum 31/2 sung Detention in hong koih hi. Mi-30 khawng kapha uh hi. Lawmte pen a sanggamte un thongah hong veh uh hi. Kei sanggam hong dawk hong vil omlo hi.

Lawmte pen innlam aate in Attorney la-in, suakta dingin kilamen lua uh hi. Ko attorney kawmzolo mi-6 kapha uh hi. Lungsim sungah sitni kawmzote ki eng veve a, ngaihsut tamin, king kimawl kawmkawmin lakhat kasa kha hi.

a. Ningneek sul aa pianpih kalaizom tam ei takin sial leng sumtual tulsing khat a po aw e
b. Sumtual tulsing khat a po aw phuigua khat a sawmsial kai e sawmsial kai aw e.... kaci hi.

a. Kei ding sesum malo bangsam teel dih vaw, sesum leh laizom kikhaikhawm e.
b. Sesum minthang gualngaih siangkawm lo bang tulmawh tanglaizom kenlah teel zawng e....

Ko attorney sitni lazolo teng in kasa ziahziah uh hi.

Nitak nikaikuanin Thongpaipa hong pai a, Thukhente khensatna hong sim khia hi. A pualam azuukhan ko attorney lazolo gukte min hong simkhia-in, ciah thei ta, hong cih ciangin, sitni lazote a lel ding kisa-in maimuatdemdamin dah mahmah uh hi. Tua khit ciangin amau zong abanbanin amin simsuksuk a, ciah un, hong ci hi. Leitung kalungnoppen nite lakah thongpan kasuahtakni kihel hi. Kulhpi kaangpempam tawh kum31/2 hong kikhumcip a, a pua katun uh ciangin singkung lopa hing dikdekin Paradise tawh kibang hi. Leitungah tua sangin kilungdam theizaw-in ka um kei hi.

Tuimawtaw neu khat tuangin Gunkhawm kamanawh uh hi. Boat zekailua sa-in kahawmthawh mahmah uh hi.
a. Kui neilo va bang laam ing Kaangtui tung a, kakeng kakeng kaikuang keng aw e.
b. Kakeng kakeng kaikuang keng aw, kadeih angah lung muang in kazaal zo diam aw.

Tuihual leh mawtaw set ging khuang leh zamin ngaihsunin lasa-in kaciak ziahziah uh hi. Ka tonpih uh Kawlten zong hong lungdampih mahmah uh hi. Kasanggampa aw kaza nuam hi. Thong nongtuah lungdam cih kammal khat tuni dongin kaza nai kei hi.

Zi kaleini Lungdampih ding sanggam.
1974 kumin ka Zi leidingin Tonzang pan Tedim kadelh uh hi. Ka uu Tedim a manawhin zankhat katam uh hi. Kuaman hong zuilo hi. A zi beek hong kithawi tam ci-in kangak uh hi. Kikupin zong hong neihpih lomawk uh hi. Lungsim hawm hiuheu-in ko nupaguak kaciah uh hi. Kapteel katun ciangin hong uap ding, innpi bangkua mokhak teng leh kanau Cing Lian na om hi. Tua tengin vai khempeuh a man dongin hong uap uh hi.

Zo-ngeina bangmahin khuang leh zam tatin la kisa ziahziah a, zubeel lianpipi tawh kamaimial hetkei uh hi. Tua ni-in kalungdam pih ding ka uu Vung Za Tung kangai petmah hi. Dahni bekin hong uap kisam hilo hi. Lungdamni in zong hong uap a omlohin picingzo lo hi.

Ka uu zi ding kaleisak hi. Tanu-tapa kakaihkhop sak hi. Moman ding nihvei vilvel kapiaksak hi. Zo-ngeina leh Christian ngeina kalkaakin a kisam khempeuh kahanciam hi. Kei pen naungeek bangin katei thei kei hi. Ka NU leh ka Pa leh kasanggamte kakhengzo mahmah kei hi. Ka uu pen a Zi sanggamte thupi seh zaw a, ama pianna sanggamte hong nungngatsan hi. Amah pen teitangin sanggam kisamlo bangin om thei hi. Sanggam panna nangawn thudonlo dongin omthei lel hi.

Ka Pa gui ding kua.
1980 kumin Chanthagyi khua-ah ka Pa in hong nusia hi. Nipi kaalkhat sapin sanggam teng thu kaza sak hi. Tedim aa om ka uu zong sikkhau kasaat khol hi. Tedim leh Kawlpi pen motor nilehna ahih ciangin hong lap mahmah dingin kalamen hi. A kiguini dongin ka uu Vung Za Tung leh kanau Lang Sawm Lian hong om theilo hi. Pa tanghial si himawk pen hong ciahnuam mahmah dingin kalamen hi. Ka Pa luang kapaihkhiatni dongin," Zangpeh miimkhau ging naza nam vonkop aw ih zua vai vut suak aw e," ci-in lasa kawmkawmin konglam mitsuanin ka enen hi. Tua ni-in kasanggamte kaphawk mahmah hi. Kong hong suakmasa sa kua cih katel vilvel hi.

a. Zua pham in ka lai hong kuai e ciin tawh kopin sial ing e
b. Phamlo buang nau bang hong awi ing e, koi ah munmuang nahiam aw.

Pasian naseemte khat leh khat.
Nidangin naseem siate pen degree nei tamlo hi. Nasep khempeuh practical tawh promotion kipia a, citak thei mahmah hi. Sia Do Hen Pau, Sia Thangpu, Sia Sangvunga hunlai-in pauban omlo hi. A khialh leh a khial takpimah ahi hi. Puahkik haksa lo-in kitelkhialhna zong omlo hi.

Amaute nungah Spicer Master Degree holder vive in hong seem uh hi. Cikmah hunaa leiba ngeilo pen tulnih tulthum leiba neitek mawk uh hi. " Sia kenlah sum batneek ngeilo a, hih leibate koipan hong pai hiam
A tawpna ah Sanpya Clinic aading aa Kai Khan Khual in Yangon aa hong lak Ks 50,000/- kei leiba ah hong koihsak hi. Tua pen kiamna leh zawngkhalmna in kaneihloh hangin mangngilh theih ding nam hilo hi. Pasian inzong nuammawh sa mahmahin ka um hi. " Topa natheih hilel, kei guak in puazo lo ding kahih ciangin hong puakpih in", ci-in thu kangen hi. Pasian tungah ka-aap hi. " Amau pen a dau paipai lai mah maw ?"

USA katun khit ciangin ka zi in kapkawmkawmsa in Muller Kyaw kiangah loh hi." Zawhthawhna tawh taikhat hong kipaipih leh tainih pai in, napaang langkhat hong kibet leh a langkhat zong dawh in, " acih pen kathuaknate tua tawh lamdanglua-in ka um kei hi.

Thang Siangh