THANG SIANGH KHANSUNG TAANGTHU. [ iii ]

PASIAN OMPIHNA LEH DAWI HAVANGKAAL PAN SUAHTAKNA.

Ngaphyat khua-ah Phaivat-tem.
1985 kumin Sia Suan Cin Pau mundangah transfer hi. Mandalay ah UET nasep tawh ka om hi. Circle Leader tawh hong thuah sak hi. Ngaphuet Pawlpi pen Mandalay pastor in keem hi. Ngaphyet te Ma Nwe pen Laisiangtho sin hong ciah ciangin a khua Ngaphyet ah laihilh sia seem hi. A saangkahna ah lawmngaisa-in hong ciah hi. Apa U. Chitty in a lawmpa tawh awilo hi. Mandalay katunma-in Section meeting kibawl a, Ma Nwe lawmpa Ngaphyet puak uh hi. Tua thu a zak ciangin U. Chitte in zadah mahmah hi. Kei vaihawmsa hi. Hih taangthu theilo-in Ngaphiat pawlpi veh dingin kapai hi. U Chitty logiahna dong ka vadelh phet hi.

" Pastor hong paileh, bantan ning " ci-in kiciam tawntung hihtuak hi. Tua thu khempeuh za kha lo-in kisuanglo hialin, a lobuuk dong kadelh leh, hong muh ciangin phaivaat-tem zamin viikzaza-in hong kitom hi. " U le, Bang thu om hiam, damin kikum ni," ci-in kathuum hi. Katonpih sia pan, " Sia lui pan thaang hong siah ahive, dohkhah be," ci hianghiang bek hi. Ma Nwe a lawmpa tawh a koihkhop pen Sia Siangh vaihawm hi, naci hihtuak sawnsawn hi.

Tua ni thupiang khempeuh pen dipkuathuai beklo-in, ka omna zong kathei kei hi. Amah lah zukhamhai bang hi. Keilah laulua-in ka-amkham hi. SDA kasuah cilin pawlpi sungah hibang a om theilo ding kasa hi. Tun ahihleh SDA khempeuh khatawh omkimlo kathei hi. Khasiangtho taikhiatna munah Dawi azah sagih lut thei cih zong Jesu gentehna kaphawk kikkik hi.

Mualpi Hausapa innah.
1974 kumin Sia Lang Sawm Mang, Sia Thang Khan Dal, Siama Nian Khan Man tawh Mualpi khua ah effort kanei uh hi. Kilungtuakin nasep nuam mahmah hi. Sia Mang pen thugen siam hi. A aw hoih a, lasak siam hi. Sia Dalpu pen thugenlam valualo ho. Lasak zong nasia lua lo hi. Ahih hangin leengla do siam mahmah hi. Laihawm a misap hanciam mahmah hi. Meivak leh nazat nengneng kemsiam puahsiam hi. Manno in naupang makaih a, anhuan hi. Tua ahih ciangin vaikhempeuh mavang hi. A tawpna ah mi-30 tui kiphuum hi. Sabbath School member 90 khawng hong pha hi.

Sialsawm Lawm-an neekhun hi a, khuazang in Sialsawmin ciaksuk khengkhang hi. Sabbath zingsang anneekma-in Hausapa innah kavahawh hi. Hausapa pen lawp mahmah hi. Sabbath thu-ah lunglut mahmah hi. Laisiangtho kikumin katu uh hi. A pa pen zingmeh ding voksa semsemin kapam vuah om hi.

Hausapa in, Tu-in innkuan kithutuak nailo kahih u ciangin, damdamin hong khensat ning," hong ci hi. Ken bel, " Hilo e, a kipiazo nailote ngaakngaak leeng, ei nangawn gupna kitaanlawh thei hi, amau damdamin hong pai henla nang tun hong kisin hoh in," kacih ciangin, " Ko innkuan khenkham ding a hong pai maw, nang nang," ci-in a sa-aatna temta zum ngatin hong leengphei hi. A tapa in, a temta naman a, " Hilo e pa, khawl o, khawl o," ci hi. Heh lua-in a pumpi-in kisatin liing keuhkeuh bek hi. Hong keem omlo hileh temtawh nihvei hong kivau khin hi.

Mualpi ka omsung uh Gaalkap Company khat leh amau vanpua mi-100 tawh Naga gamsung mite delh hong tun laitak ahi hi. Mualpi-ah nipikaal-3 khawng taam uh hi. Gaalkap Captain pa Story of Redemtion bukhat letsongin kapia hi.

" The Mark of the Beast " tawh kisai genni ciangin, nuaicip dingin, RC te kiciam uh, cihthu Captain pa kiang kitun hi. Tua nitakin Effort bawlna kongmaite inntual ah, RC khangnote in meipi sepin suangtum kaikhopsa-in koih uh hi. A zaan nitakin Sabbath taangthu kisuut a, innteekte inn siikkaang denglet dongin hong sim khin uh ahi hi.

Tun Sunday piankhiatna thu kigen ding hi-a, Gaalkap Captain pa pen galkap section khat tawh hong pai uh hi. Innnung innmai leh sialkong leh innka ah, gaalkapte panmun la-in thau tawh ding sinsen uh hi. Cpt pa leh kei katukhawm uh hi. Thugen kipatma-in thugen a, " Kumpi in, tuni dongin ut bangbang biak theihna leh gentheihna hong pia hi. nazak nop kei uleh innah om un.nawngkai sak kei un. ," acih khit ciangin, " nagennop bangin nadeih bangbang gen in"hong ci hi.

Anti-Christ thu nuamtakin kagen hi. A siahuai pen hunin a kisap ciangin Kumpi gaalkapte nangawn Topa in zangin nuntakna lehAma Lungdamnathu huu ahihlam katel mahmah hi. RC khangno makaipa pen keima lawm Khup Do Lian ahi hi. Inn zong hong tung ngei hi. " Lawmte lawm, biakna biakna ," cilaulau in, nuaicip dinga kiciam ahi hi. Kachin gamah pai a, gamsung mite in, manin nasia takin asih dongin bawlsia hih tuak hi. Pasian Ama Lungdamnathu taangkote pen nusia mawk ngeilo hi.

Thalmual khua Effort ah, Suangtum guahzu.
Thalmual khua ah crusade kabawl uh hi. Tua pen a nihveina ahi hi. Sia Pum Za Lian lam biakinn sungah konghon ma akibawl ahi hi. Sia Khan Cin Zam Vung, Sia Gin Lian Pau leh khangno honkhat hong kihel hi. RC pawlpi in nisim phialin hong nawngkai sak tawntung hi. " The Mark of the Beast" kagen nitak un, RC upapa leh khangnote suangtum tawikhopkhop laitawh tuunin hong pai uh hi. Tunin Letsong hong puak hi ung," ci-in biakinn mai phei dimin hong kigual uh hi.

RC Pope taangthu kagen ciangin, biakinn sung suangtawh hongsim uh hi. Inntungah suangtum dim hi. Innsung sualdimin suangtum dim zihziah hi. Tai lo-in platform tungah kading hi. Kei taktak hong deng ngamlo sam hi. Innmai a, Saipimualte sangnaupang khat nong velhgawp sak hi. Sia Lian Paute, Sia Khan Cin Zam Vung te a tun abanna kimu nawnlo uh hi. Sia Vung pen a kaallakin mihanthawn siam mahmah hi. Tawsawn siam hi. Launa neilo in pau thei hi. Tun ahihleh lungsim omzia kitelgai maita hi.

Sabbath hong tun ciangin khual panin pawipi siimte kikhop kipan hi. Tua zanin Khuapiguah zu a, huihpi nasia mahmah hi. RC siapa inntung khuhna siikkaangte innsun tawh domkhia-in a galmual denna hi. Singtehnuai bang a, zuunkik theih hilo hi. Pawlpi upapa pen a gilzang muatin Tedim Zato kipuak a, hong ciah ciangin si se se hi. Khangno makaipa sakol tal hoih mahmah , nih pen natna kitheilo-in thakhatin simawk hi. A khua a tui in, mi biakna bang cih theilo, nasim mawh uh, natuak uh hiam, a cihsan zong om hi.

Tua zawh a kumkik ciangin Thalmual khuasung mincim a, SDA Biakinnpi bek ding a, tualo khempeuh buantang tawh kihawkkhia mang hi. Adra huhna ngenin, innkhat Puanzapi khatciat kapia uh hi. " SDA te nabawlsiat uh, nalawp uh phata inteh maw? " kici bek uh hi. Zong mawhsak thamcing kasa veve hi.

Kapai masak lai-in khangno te hong pai a, laihawmte la-in kamai-ah haaltum sese uh hi. " Hite a ciah ciangin luikan sak kei nung" ci-in kiciam uh hi. Tua bang a hangsan tangval thum pen Tung Zang ah bawlungsui-in vapai uh hi. Ngal kitan, Siakmit kitam, khepi kitan tawh kipua-in hong tungkik uh hi. Tua hun pekin Pasian in SDA Pawlpi pen simmawh ding ahihlohna lak khinzo hi.
Ahoih penpen Pasian thuhilhna ih thuakma-in kikhel thei leeng uthuai pen hi.

Phultuan kici Anlun khua ah dialsan khimte hong diang.
Mualpi kaman khit uh a sawtlo-in a kigamlalo Anlun khua ah Crusade kaneikik uh hi. Tua lai-ah a kithuahngei tengmah kapai uh hi. Khuaneu khat ahihmah bangin khuazangin hong kihawk uh hi. Nisim thungai tam mahmah hi. Nilai kikhop, sani kikhop, nitakhun zatna peuhmah kuamah a biakinn pailo ahihmanin makaite heh mahmah uh hi. Tangvalno teng kaikhawmin thuhilh uh hi. Dialsan khimsa-in hong pai uh hi. Mipi kikal ah hong kihelhkim uh hi.

Thugen nuam mahmah laitak leh thungaite lunglut mahmah laitakin pasal khat hong kitom hi. Innteekpa kiangah, " Bang hangin na inn ah mi kaikhawm na hiam? hawlkhia in," ci-in tawng hi. Tua laitakin dialsan khim khempeuh dingin mipite notkhia se uh hi. Mipite taanglo-in om hithiat uh a, heh semsem uh hi.

Tua ciangin innteekpa heh a, " Kei inn hilo hiam,kei thu hilo hiam, kei inn leh kua dang kisai hiam? A ngaap na om uleh kamai ah hong ding un,," ci-in zothau khat khinpi tungpan dokkhia in kek a, a ngiim leh laulua kisa-in delgega-in tai uh hi. Tua lai-ah galkaplui Pa Lang Mang leh a zi Dim Theih Niang tui kiphuum hi.

Tuikhal khua Effort.
Khampat circle katunzawh mipi kaihkhopna masapen Tuikhal ahi hi. Kei maidiak ah Sia Zen Do Lian napai khin hi. Nitaksimin tangval gilo khat in nawngkaisak den hi. Lawhcing zolo-in ciahkik hi. Kei katun ciangin, kalungsim sitheilo banah eikam tawh thugenna munkhat neinuam lua kahih ciangin kadawp kik hi.

Elder Thang Lian Kham kadot leh , " Thei mawk khang ei sia, khatvei diakin Sia Ngeekta guaksuak hiven, tangval ten thugen theilo-in khah hiau veh e, bangbang ahizongin, dawp limlim ni e maw," hong ci guaiguai hi. Khuasung inn-awng kazon u ciangin, tuapa inn tektek na awng citciat hi. Khakhat sung zat dingin ka thukim uh hi.

Pawlpi upa ki-aapzo teng tawh puanlom zialin kagiahden pah uh hi. Nasiatakin thungenin nitaksim kataangko uh hi. Thungai hongpai mipi tam mahmah hi. RC pawlpi lampan hong nawngkaisak nuam om, ci-in kaza uh hi. Nidang aa hong nawngkaisak penpa tu-in mipi cingin manlah mahmah hi. Pasian minphatin kanuam mahmah uh hi. Kaman ciang un, mi-11 tui kiphuum hi.

Mualkawi pan a hong peem Pawlpimi omsa tengtawh Church Organization kibawl a, pawlpi kiphut hi.

Tua zawh kumthum khit ciangin pasalno khat khagilo in nungzuih hi. A khelkhelin gamtaang hi. Amin Hang Khan Zam ahi hi. Ama paina khempeuh nungzuih hi. Elder Thang Lian Kham tawh logiakin kuan uh hi. Zanlaitakin. buukmai a, baalke lawhdim aa kikoih tawh a beidongin deng hi. Zanthapai-in ihmu lo-in koih hi. A ciah ciangin lamtawntungah suangin deng hi.

Beel sungah ek koihsak, lupna tungteng zunpek cih bangin gamta mawk hi. AG, Baptist,SDA leh pawlpi tuamtuam panin ki-aapsa-in dawi hawlkhia nuamin pai uh hi. Bangmah lawhzo lo uh hi. Vaimiimkung khawngtawh nadenggawp lel hi.

Kei hongsam uh hi. Thungen kawmkawmin kapai hi. Tukhawm pimpem laitakin meikhua-am khat hong leng a, suakpi puakdaapin hong khaphei hi. Thungen mankhin phet kadin khiat laitak un, tuivotbeel tawh kithuah galkaphai eng khat hong kilawn a, Kham Hau biang puakbakin khaphei leuleu hi. Ciah dinga paikhia varanda katun laitakin Bikhanuai aa kuangzawn tawh tui kikoih pen, a kuangtawh inntung hong denna leuleu hi. Kimu theilo ahih ciangin omdan nuam hetlo hi. Hang Khan Zam om keileh bel bangmah a gamtaang omlo hi. Amah hiam cilenglah hilo zel mawk hi. Kha gilo tua bang aa gamtaang thei pen Kapteel khua ah zong om ngei hi.

Amah kibialo ahih ciangin hunkhat ciangin daai lel hi. Tuikhal pawlpi pen kangaih mahmah pawlpikhat ahi hi.

Sawbuazishin B.
Sawbuazishin pen A leh B in kikhen hi. " A " pen a tengmasa Lusei hi a, Luseikam tawh hunzang uh hi. " B " pen Tedim mite khuasaatna ahi hi. Lusei vengah pawlpi a om sawt ta hi, ahi hangin khangkhia lo hi.

" B " veenglam ah Sia Mal Sawma, Sia Biaklianna tawh khakhatsung taangkona kabawl uh hi. Mawtawlam gei inn-awng khatsung hi a, lamdung dimin thungai tatsat lo hi. Pawlpi tuamtuam panin khangno lasa-siam hong pai a, nasepna picing mahmah hi.

Nitak khatvei suang tawh hong kisim hi. Suangcip khuttumcia hong leng a, kei leh Sia Malsawm kikal a khuam puakngau-in hong kha hi. Thudon lo-in thugen kazom suak hi. Lamdungah tangval honkhat tungdian uh hi. A zing ciangin zingtungin kavak uleh, zan nitak a hong dengte inn teng nahi citciat hi.

Laisiangtho kasim khit uh ciangin thungenin ka nusia uh hi. Nitak ciangin la hongsa un, ci-in huhna kangen uh hi. Khuasung khangno Guitar siam leh lasa siam teng nahi hi. Tua ni aa kipan nitaksim la hongsa uh hi. Mipite lawp mahmah a khuasungbup koilok ziahziah hi. Baptist biakinn Signboard laihziau ni , ci-in kun uh hi. Platform panin ki-aapna kasam uh hi. Tua khangno khempeuh kisiitlo-in hong ding hi. Mi-28 tui kiphuum a, SS member 80 kiim hong pha hi.

Lamdung aa neektheih zuak nupite in nahtang, lengthei, aktui, tuu hong puak uh a, katai mahmah uh hi. Kawlpi pan aa hong pai mawtawpi khat Maandaat mai-ah hong khawl hi. Mikhat hong tuakkhia a, 75lai dalnih hong pia hi. Milim biate nangawn zangin Pasian in a naseemte hong vaak hilo hiam, bang lung himawh kul se ding hiam, ci-in lungmuanna lianpi kangah hi.

Nangkateik khua ah.
Nangkateik pen Khampat phak madeuh ah om hi. Zo sanggamte khuasaatna ahi hi. Nidangin Sia Khai Meng in cottage meeting bawlngei hihtuak hi. Sia Kham Khen Pau tawh, Heleni tawh keitawh nitak 30 hunzangin taangkona kinei hi. Inntual ah sabuai phahin mawtaw lampi dungteng mipi khawlna dingin kazang uh hi. Khuazangbup-in hong kihawk den hi.

666 kagen uh ciangin RC khangno thum khawng singkhuah tawi-in hong diang uh hi. Lamdung zui-in mihon lakah hong kitom hi. Kikho kho aa kikho zolo hi. Hausapa hong pai a, <" no zong amau gen bangin gen vevua, tua hikei zaw, ci vevua, " ci-in amatawi singkhuah sutin vaatgawp hi. Tua laitak ah mi-11 tui kiphuum hi. Sangam Pawlpi thahaatnamun ahi hi.

Mun khat leh munkhat Pasian hong ompihdan kibanglo hi. Ih biak Topa muanlah huai lo hi.

Thang Siangh.