BANG HANGIN SIALSAWM KICI.

TUALBIAKNA LEH SIALSAWM

Tualbawl kici Tualbiakna leh Sialsawm Lawm-an pen kikhen ngeilo hi. Sialsawm Lawm-anneek kipat nadingin Tualbiakna kibawl masa hi. Tua ciangin Sialsawm Lawmanneek tawh kizomsak tawntung hi. Khangluimite in Tualbawl cih ahizongin, Sialsawm cih ahizongin, tua kammal khatpeuh a zak ciangin, a kibangin saangpah lian lel hi. Tuathu itel nadingin Tualbawl hong kipatna tawm sutmasa leng hoih ding hi.

Tualbiakna.
Khuasaat ciangin kimawksaat lo hi. Siampi, Hausa, Taangko, Tuinaakkhuat, Tualteek, Siikseek leh Khuangtum omlo-in khua saat ngeilo uh hi. Tuikhukkhuatte kisawl masa a, tuihoih-tuilim amuh ciangin khuasaat kipan uh hi. A masapenin Khuasiam ding leh ahuu' a keem ding kisam( hong ompih nangin ngen) masa a, tua pen Tualbawl or Tualbia kici hi.

Tualbiakna dingin Vok zang uh hi. Tua biakna pen khuataangpi aa hi-a, lawhta-in zu dong uh hi. Tua vok leina dingin lawhta mahtawh an dong uh hi.A beikhempeuh taangpi sikh ahi hi.

Khua dingin gamtaak leihoihna kizuan hi. A lauhuai sapite leh dawi, kau, gulsia-tangsia, ngia, vompi leh sahangte, pulnatna tuamtuamte nawkkhakna panin ahu-akeem dingin, Asiam ahi Khuasiam khai masa uh hi. Khai, cih ciangin bia, thoih, lungkimsak cihna ahi hi. Tua pen Tualbiakna ahi hi.

Tualbiak leh Sialsawm Lawm-anneek kizom tawntung hi. Tualbia masa uh hi. Sialsawm pawi tawh kizomsuak hi. Tuabiakna-ah khuasungmite cidamna dingleh kithuhualna ding, guahtuiluan hoihna ding, ankung susiathei lungnote omlohna ding, gah leh pak hoihtak aneih nangin kingen hi.

Zehtang.
Tualbiakni a zingciangin Zeh tang uh hi.Christian te nipitan mah bangin Lawki tenzong nipitang ahi hi. Amau Zehtang ci uh hi. Leigil suaksak lo hi. Singno leh lohing sihsuah lo uh hi. Kahna leh gamlumna bawllo uh hi. Kahna bawllo cih ciangin, tuani-in misi guilo uh hi. Gualnopna khuang leh zam gingsak lo uh hi.

Zehphi kici thukhampalsat a om ciangin, guahtui-luan hoihlo hi. Ngalhawk in lolai ankungte nawksia thei hi. Khuasungah thusia-lasia piang thei hi. Pulnatna tuamtuam in nawk thei hi. Zehphi a om ciangin abei khempeuh lohsak a, Tualbawl kik hi. Tualbawl-kha sung saman a om ciangin, Asiam lungdam hi, kumpha ding hi, ci uh hi. Tua sungaa sa kiman khempeuh pen Sawngman kicise hi.

Bang hang Sialsawm kici.
Banghangin Sialsawm ci uh hiam, katheician kei hi. Tualbiakna bawlmasa a, Lawman tawh kizom den ahihmanin, a kisaina khat peuhpeuh om hidingin ka um hi.

Nidang Khangmasa pupate hunlai-in Khamtung Zogamah ganhing lianpen Sial ahi hi. Sial pen Zoleitang aapiang Pasian in a tuamvilvel a hong piak ahi hi. Zomite tenna Khamtung bekah om hi.

Nidanglai Thawmte khanlai-in Dawi-nungak mo-in nei uh hi. A sialte pungmahmah a, nisimin kibehlap hi, ci uh hi. A Mo mining takpi hiam, hilo hiam,cih tello uh hi. Muangmawh den uh hi. A Teeknu in, a zahmawh muhsimsak a, kipheikhiit' hi ci hi. Tua ciangin, maa' uh hi.

A Mo nuakik hi. A sialte zong mualdung zui-in meiilom tawh mangkhawm uh hi, ci-in kigen hi. Sial pen leitungdangah kimu lo hi. Ei Zogam bekah om hi. Zomite aadingin hong kipia ahih ciangin a cimanloh nangin kephuai hi.

Tualbawl ciangin, innsimah tungmansial khatciat bawlin innpi-ah puak uh hi. Siampipa in kaikhawmin ciangdimin koih hi. Tangho tumtanin koihkhawm hi. Zuhaa' koih uh hi. Tualbiakna voksi pen tungmansialte tungah theh hi. Tua tungmansial limte pen innkhat in khatciat pia uh hi. Dawi khemna-in tungmansial kipia hiam, ahih keileh sial ngetna hizaw hiam, katheician kei hi. Tungmansial zangin Tualbiakna bawl ahihmanin Sialsawm pawi ci hikha ding hi.

Tuabawl Zehtanni pen Dai-an bawlni hi a, Sialsawm Lawman tawh zomsuak uh hi. Sialsawm kha pen Khuakhal hun ahi hi. Lopawi mankhit ciangin Lawman kine hi. Zo leh sim khuahun kibanglo ahihmanin khua khat leh khat ahun kibanglo hi. Kumpi naseemte leh Hausa upa vaihawmin, sangnaupante leh Sangsia a tamzaw a kiheltheihna dingin, April sangkongkhakhun zat dingin kithukim uh hi.

Pawi-anneek dan khempeuh pen Khuado pawi mahbang ahi hi. Pukhat suan tengOr Pakhat sungaa piang sanggam teng kipawl thei hamtang hi. Amau neihzah zui-in a limthei pen ne uh hi. Ahih hangin Khuado hun sangin kikialzaw hi. Aneite in, bawng, vok neih bangbang go uh hi.

Mikhempeuh amau khilciat zui-in omkhawm a, gamlum uh hi. A zawngte zong amau hihzawh zahzah tawh hanciam ve uh hi. " Sialsawm cihbuang sial zong sawmzolo akta beek kikum ve ni e," ci-in la nangawntawh sutin hanciam uh hi. Tuazahin ih Pu ih Pate in Ngeina limci, ci-in hamsa bawl uh hi.

Eizong tuate nusiasia mawk lo-in, ei biakna tawh kizawitawnin zathuai hi. Tuhunin sanggam kikaikhawmin gualnuam kitawm mahmah ta a, ki-itna zong kiamkiamin kangkang mai hi. Pute Pate nuntak khuasakziate pen sanggam ki-itna khangsak hi. Bangkuasung kikep kihuaina thahaat sak hi. Khangnote in mangngilh kei ni.

Pawisung kisa late.
Khuakhal hi. Cimsel khin hi. Singtehte niim dildial hi. Nisa mahmah hi. Khalhuih nungin lumhithit tawntung hi. Mualmong khempeuh khuamui in tuam hi, mang ciciai a lungzuan huai mahmah hi. Vasate huuk kipanin kideldelh uh hi. Hamnam tuamtuam tawh hamciauciau hi.

Sialsawm hunsung la kisate pen, ki-itna ngentang ahi hi. Sanggam itna, Nu leh Pa itna leh pahtawina, Pute pahtawina, nungak tangval kingaihna, lawm lehgual kingaihna labek kisa hi.

Tua late pen.
a. Kazua sausak simsinggil phuh cial dawhnem ngai naveng e.
b. Huangzawl gawl bang hong um ding aw phung nihthum ngai naveng e

a. Katun ningsak khuai bang khum lawmlawm len a khuaipi zu a lak
hiam aw.
b. Len aa khuaipi zu lah la lo-a, katun ningsak khuai bang a khum aw e

a.Pha laang ee phalaang zua aw nalam sawmsial phalaang e
b. Khuplang e khuplaang, sawmtaang khawh a, nutun khuplaang e.

a.Katunnu ka ngai zawm aw e kazua minthang va bang pau kangai zawm
aw...
b. Katun in ningtui hong thuan a, tunnu mah ngai tazawng e.

a. Thei bang sen in tun leh kazuan phelgua hongot sa hing e.
b. Phelgua got kan in kheng in e khaimu nalaam zil ing e.

a. Ih phunglai-ah a hawmsiam bel damdial a, zuih aa pha e.
b. Khattang va bang ih pau hangin gualtung tuanna omlo e.

a. katun vang a thangzawm aw e kazua vang a thangzawm aw
b. Von hehnem lum bang hong sun nakamin ciau gal kaita e.

a. Tualnuam e tuial nuam e pute sumtual tualtung tualnuam e.
b. Gam nuam e gam nuam e, pute gamzang gamnem gamnuam e.

a. Ami pau ven sumkholh gual aw nazua khakia nun aa anuam lua ci e.
b. Nun aa nuamlua sanggah hing e, kazua langlam zamluang kasai cimlang e.

a. Lungzuan tanglo bang hong phong aw len khuamui leh zangvaiva
aw e..
b. Len khuamui in mualcinsaang zuan a, thangvan zawlzui zangvaiva
nuaisimlei zuan e..

a. Sinlai aa giak mualtumtai aw Zokuam thuk a, deihheino aw e.
b. Zokuam thuk aa deih heino aw siatlei daidam zuanmualno aw e.

a. Pupa langlam lenkhuang leh sialki betlohin tul keileh kilawm e.
b. Betlohin tul keileh kilawm sailoh in khuang keileh kilawm e.

a. Tukawltawi kumkhua ih khenna ningzu khum leh aisa aw e.
b. Ningzukhum leh aisa aw e khan kumsawt ciam laileng aw e.

a. Eiteng khawlkhawm khawlkhawm nuamlai khawlkhawm in sawm sial man e lawm e.
b. Khawlkhawm in sawm sial man ei lawm zalkhawm in hen luang man ei lawm e.

Christian lamte pawlkhat in Zola sa nuamlo thei uh hi. Sanggam Luseite in Leengkhawmla ci-in solfa mahtawh laphuakin omkhopna munkhempeuhah sa uh hi.Tedim labute zong khuangtawh kituak petmah a,tutsa in kisa thei a, laamla-in nuamzaw kan hi. Zokam Zola tawh Pasian kiphat thei a,ei ngeina ciat tawh Pasian pahtawi pen Lawki suahna hilo hi.

Thang Siangh. zogampalpi@yahoo.com