SDA MISSION CORRUPTION PUAHPHAT HUN. ( iii )

LUNGDAMNATHU LEH MINAM.

Leitung mawhna hong khanciangin, lampialna zong thahaat hi. Uk-haksa ahih ciangin Pasian in Babel-tausaangpi supai-in kam-namtuamtuamin khenkham hi. Pau kitheiteng minamkhat suak pah hi. Pau kitheite teengkhawm uh hi. Khuapi saat uh hi. A khenkhenin, a kuamkuamin gamsaatin khuapi phut uh hi. Hih minamte tungah Lungdamnathu puakkim dingin Pasian geelna om hi. Pau namkhat bek leh gamkhat bek sepna tawh kizolo ding hi. Pasian in minam khempeuh sungpanin ama naseem ding teelkhia hi.

Minam itte mithupi ahi hi. Ama minam itlote in midangte itding lamet omlo hi. A innvengte itlote in muhloh Pasian it taktak lo ding hi. Lungdamnathu puaksawn dingaa thuzeekte in minam deidante hilo ding uh hi. Union Officer te nasep pen vanlian mahmah hi. " Minam khat leh khat kidaalna kawmpi sukham masa ding hi. Minamte tungah hih Gupnathu a tunkimna dingin Jesu sisan tawh pumkhat suaksak kul masa hi. " Acts of Apostles pg 20. Ephes 2: 13-14. Acts 17: 26---.

Union of Burma kici Kawlgam aading Pasian ngimna taangtawng pekin om khin hi. American Baptist in Judson hong puak hi. Gentheihna leh bawlsiatna namkim thuakin Lungdamnathu hangin a nuntakna hong pia hi. Tui kiphum masa pen U Naw kici Kawl khat Khasiangtho in teelkhia hi. Vantungmi-3 taangkona thupuak laibuzuak Colporter te Kawlgam hong lut hi. Kumpinam ahi, Tarrawadi Siahkaipa U Mg Mg in Sabbath thuman nasang hi. Tua zawh ciangin General Conference of Seventh-day phualpi panin missionaries hong puak uh hi. Kawlgam laizang Meiktila khua-ah Bible High School hong hong uh hi. Kawlgam minam khempeuh aadingin munhoih mahmah khat ahi hi.

Tua Saangpi panin Kawlsia muanhuai honkhat SDA Pastor leh Teachers, Corporter seem hong om hi. Elder Ba Tin, Freydy Ba Tin, Edward Ba Tin, U Hla Pe cihte tua saangpi pan hidingin ka um hi. Ken U Hla Pe kalaplai hi. Colporter seem hi. Kawlgam sungah ama laihawm a simkha tammahmahin ka um hi. Tua Saangpi kikhinkhialo hileh Kawlte bangzah tamkhin ding hiam, ci-in kangaihsun zelzel hi.

Union Committtee nasep pen Division pan hong kipia Appropariation budget zeekding bek hilo hi. Kawlgamsung minam khempeuh tungah Lungdamnathu bangci puakding cihthu hizaw hi. A khangtote thapia a, a zawngkhalte domtoh ding nasep ahi hi. Union committee member 30 lakah Upper Myanmar representatives 5 khawng kipha hi. Kawlgam Lungdamnathu pen Karen minamte khutsungah humcipin om hi.

Thandaung Union khawmpi thukikupna aa khensatna khawng kazakzak ciangin, Kawlgam Pawlpi masuan dahhuai kasa hi. Vantungmi-thum thupuak tangko ding kimlai KNU nasep tawh ih sawhpawi dikdek pen Babylon is fallen acihtawh kilamdang kasa kei hi. Thautawi minam itte nasep leh Laisiangthotawi minam itte kalsuanzia kilamdang zekleh hoih ding hi. Pawlpi Organization leh KNU organization kisawhpawi keileh hoih ding hi. Amau mimal aa kipiaknate pen ei saitheih hilo hi. GC inzong galet bek lo-in Pasian Pawlpi anaizaw-in hong mutel leh hoih kasa hi. Union leh Mission zum pan aa kipuak information tungah akingaklaiteng thulanggen bek za ding hi. Union te nasep pen thanemna mawk hilo hi. Namdangte nencipna ding strategy tawh kalsuan uh ahi hi.

Yangon SDA Headquater pen Pasian Lungdamnathu nasep kipawlna ahihleh political movement organization tuamtuam tawh kisawhkhawm keileh hoihzaw ding hi. Pasian thupha kisaangzaw ding hi. Vantungmi thum taangkona a gin ngaihzaw ding hi. Thumaan-thutak kizeelbaih zaw ding hi. Tu-in ih Pawlpi pen KNU kipawlna hiam, Biakna kipawlna hiam, ci-in kumpite nangawn in tello ahihmanin galkap cingsak ahi hi.

Kawlpi Sanpya Clinic hunlai-in Dr Po Tota in term khatsung hong huh hi. Amah pen lungsim picingmahmah leh siammahmah ahih ciangin, Zato nasep hong khang hanhan hi. Union meeting katu uh hi. Siap ten " Dr Po Tota khahkhia in, gamsung aaten sam hi," hong ci uh hi. Amau ngaihsutna theilopi-in " Kumkhat beek hong ompihlai hen," ci-in kathuum hi. Khathum khit ciangin meeting kitukik hi. Tualai-ah Dr Po Tota zi hong pai hi. Meeting sungah hong haanggawp hi. A paudan pen Doctor pa utlopi aana tawh a zang bang khawngin hong pau mawk hi. Uliante lungsim bang himawk hiam, cih simloh lawhnang kathei kei hi. Meeting katuah ciangin pastor khat in hong nungzuih a, " Sia, hi nu nathei na? Karen minam makaipi Bo Choke Mya tunu hilo maw? nang kihta lo maw, a pasal khawlsak lel in, Siavuan a omkeh zong na Zato phiat in," hong ci hi.

Doctor pa pen pillua, siamlua ahihmanin itpii-in ka it hi. Tudong Pawlpi sungah naseem dingin deihhuai lua kasa hi. Ama sangaa pilna tawmzaw, experience nei ngaplo khawng, president leh manager khawngin ki-om a, nui cicitin hong genthei zel hi. Tudongin kangai ngeungau hi. A sawtlo-in Pr Samuel Po in hong samkhia a, gamsung tungsuak ci-in kigen hi. Pasian nasepna pen minam leh singnuai nasep tawh kisawhpawi dikdek hi.

Padu Aung San hong ciahkik a, kumpi ah hong surrender hi. SDA Headquqter thupiakna tawh Conference makai Sia Kai Za Dal mannuamin eimi Pastor khattawh kumpizum phukawikawi hi. Union Headquater panin KNU power zangin a Pawlpi ukcip sawm uh a, hong vau thapai mai uh hi hi. Sia Kham KHen Pau zong tuamah tawh vau thapai hi.

Ei SDA te in minam ih itleh Jesu musakzo lengla Gupnathu theisak leeng manpha hi. Myanmar Union makaite paizia pen khalam kingak ngamna ding hilo hi. Hih dinmun tawh hong makaihlaiteng, Kawl Budhist lak ahizongin, minority Tribals group sung ahizongin Lungdamnathu kipuakzo ngeilo ding hi. GC leh Division in hih dinmun atheih ding thupi hi. Kawlpi a numei khat in," Ko, Bo Mya khutsung ut kei ungh, " acihpen, " Myanmar Union khutsung ut kei ungh," acihna hilo hi. Myanmar Union of SDA pen gamnuai aate khutsungah om hi," cinuam hizaw hi. Minam hua hilo hi. Amau kalsuan zia hua ahi hi.

US SDA pawlpimi citakte in thautawi nuamlo hi. Galkap tumnuam lo uh hi. Thautawi genloh me khiat zong ut lo uh hi. Kawlgam SDA sung buaina pen abul-abaalin GC in teltaktak leh cikze lua-in ka um hi. Union officer te minam it kimawhsak kikeuhlo hi. Tua minam itna pen Khagupnalamah zang leh hoih ding hi. Gamnuai thautawite tawh nasepkhopna ciangin Kawlgambup mission hong kalsuanpih kei beekleh hoih ding hi. Bangzah gamla kipial khin hiam?

Kiteelna leh Za kituhna.

Tulaitak kimawhsakna leh dikzuulna khempeuh pen amalmal aa tawm a, sukmai ( solve ) theihding hilo hi. Thupaipi khat om hi. Thu kipatna theilo a,laigelh tamzaw-in ka um hi. Amau kivaakna zong a, ameetzaw lam peuhpeuh a pumgup omding hi. Theilo lua ahihmanin gupna tanding lauman aa patau zong om ding hi. Gupnathu tellote kigengen thei a, khatpeuh langpan nuamte kihilh theilo hi.

Keima phulkhak thute kong pulaak nuam hi. Khangkikte aadingin taangthu ahi hi. Conference Movement pen 1987 laipeek aa kipan ahi hi. Kei UET kasep laitak ahi hi. Tuamalai hunin Conference min kilo ngeilo hi. Ei leh ei aa dingzo ( Self-support ) kici bek hi. Kumpi in gamdang visa khakcip ahihmanin workers Union officers aa kipan mission officers dongin kizinkhia lo hi. Ei Pawlpi sungah kikhumcip uh hi. Gamdangte nasepzia kalsuanzia, khantohzia, ki-ukzia cihte kimukha lo hi. Conference ih Move ciangin Pawlpi langpan aa hong ngaihsun zong hitheimai ding hi. Thei napi a, hih vamim ne Chin leltak ei mainuai a khangkhia hi, cihtawh amau mai aa Conference din ding thuakzolo zong hiding hi. Bang hileh a tomin hong pianuamlo uh hi.

Kei Section President-in hong koih uh hi. Conference Movement pen zadah lua kisa Union meeting omsimin hong tawng den hi. Sum tamlua aa Conference Status uut nahih uleh UMM appropariation pen Mission dangte pia ding ci-in Ba Khin in hong lakkhiatsak hi. " Conference Movement nadeih bangin handle in, division in hong ci hi," cingiau hi. " Na projects khempeuh phiat ding hing, " ci-in hong tawng a, " Kei projects pen Pasiangam aading kangaihsutna hi, naphiat nopleh ahiveh," kaci kik hi. Meeting kik ciangin , " Union makaihna nong comply zawh keileh worker pani resignation laikhia in ," hong cileuleu hi. " Kei nasep pen Pasian aading ngimna hi, khagupna ding bek hi, nong bawl nop bangin hong bawl in, vantungmi kuamah ki-om lo hi, mihing ngentang hihang, kei kakiatleh nang zong kia thei kacihleh, Sia Henpi in cingam hong sak tuakin amai hong santeitai a, a khedawn hong pei velvel hi.

Local pan a kiteelto Lay-representatives committee in a teelsa officers khatpeupeuh pen thukham palsatna a lantang a om keileh, muhdahna bektawh term cinglo-in kilakhia ngeilo hi. Union meeting samin kiteelni ding hong seh uh hi. U Ba Khin leh Sia Do Hen Pau in mission committee member teng Ba Khin innah an hong vaak hi. Anneek thungetma-in Ba Khin hong dingin, " Hih anneek pen, Sia Thang Siangh mangpha khakna hi<" hong ci hi.

Pawlkhat ten kiteelna lungkimlo a Conference Move acihpen kilehbulh hi. Conference movement hangaa hunlopi aa kiteelna bawl hizaw hi. Union makaite leh zasuannuam aa maivil ideology natna neite nasep ahi hi. Ukcip nopna hangin policy khat khit khat hong palsatto ziahziah uh hi. Ahih hangin Karen minamte tungah hih ngeina( practice ) zang ngeilo uh hi. Chin minamte tung bekaa kizang ahi hi.

Kiteelni ciangin Section kim in delegate kipaipih hi. Amau deih thunzolo ding lau ahih ciangin Upper Burma teellohpi-in Union power tawh U Kan Ngyunt sam in avalin lutsak hi. Hibang dan aa kihuiheek ngeina pen Ba Hla Thein leh Ba Khin hong kithuah aa kipan ahi hi. Pasatna abanbanin lauhetlo-in seemto ziahziah uh hi. Upper Burma movement khempeuh khindai sak dingin UMM ah Sandy Dee hong koihto hi. Onlo cih thadah Section van leh tawh khempeuh hoihtakin ka-aap hi.

Amipihte zuak a Unionlam lehtai pawlkhat kagal sehuaipen hong suak hi. Mawhna khempeuh kei tungah hong suan uh hi. " Tutna awnlo ding , ci hi, " hong cisak uh hi. Kei tua bangin kapau kei hi. Tuahun a hong support lawmte khat kampau hi a, amautawh alehtai khat kampau hi a, keipau hilo hi. Amin kagen nuam kei hi. Tulaitak bangbang ahizongin tualaitak hong itluatman ahi hi. Delegate teng lungkimlo-in Paupu innah kikhawm uh hi. Tua lai-ah kei ka kihel kei hi. Department hong piakpeuhpeuh lungton hetlo-in kaseem hi. Division tawh kasepkhoptheih pian ciangin patau-in kihuau thualthual uh hi. Department popular lo tata hong pia uh-a, ahih hangin tua Departmentte hong kithupisakto zel a, hong lakkhiatsak nuam zel uh hi. Pasian nasep nuam mahmah napi thongkia bangin hong cing uh hi. Pasian Pawlpi makaite bangzahin tatsia hiam?

Tuni dongin makaite in Pawlpi khanohna ding ngim kikeuhlo ahihlam katel hi. Pawlpi Upna leh Policy langpang kahi kei hi. Ngeina palsat makaite gitlohna langpang kahi hi. Amau ka mudah kei hi. Minamin zong ka-el kei hi. Amau mite lakah hih makaite a banglo Pasian kihta omlai dingin kalamen hi. Tua ten seemleh kamkhat zong kagingkhia kei ding hi. Amau gamtatnate leh ih Lungdamna thupuak tawh kituak kasa kei hi. Amau nungzui-in khalam nasep khantoh ding lampi kamu kei hi.

Mission khalam makaite sangin ih kihtak mahmah kumpite thudikzaw laimawk uh hi. Lay-member te hanciamna tawh Tedimah kumcin kikhop bawl uh hi. Tua circle Pastor seempa pai-in Galkap kumpi kiangah huhna ngen a, " Hih kikhop hong khaamsak un," acih ciangin, " Biakna kikhawm hilo hiam, aman dongin hih hen," nalehcih zawsop hi. Galkap ten a khaam hihenla, pastor pa a vathuum hileh, kilawm zaw het hiven. A gamtat khempeuh uh aleh amak.

Conference Movement hong sosuah kikna.

Conference langpanna pen Mission siate sungah tawlnga lo hi. Eimi sungah siate pawlkhat in zatopna politic khatin hunhoih la uh hi. Tuapa, tuapa conference support hi, cihtawh Union uliante maivilna -in heekin nuainen uh hi. Kei nungah Sia Sandy Dee kum-4, Sia Thangpu kum-4, Sia kham Khen Pau kum-4, kum-12 sung hong sawtto hi. Member te zong a kilawmciang ngaihsunin thuaksiam mahmah uh hi.

Pastoe Suan Za Nang hong koihto leuleu hi. Amah pen hahkat phulzo nawtzo aa pahtakhuai mun zong om hi. Ahih hangin a tem hiam lua ahih ciangin a sukkhak khempeuh kitan leuleu hi. Tamliamlua aa kuaman thuakzo lo hi. Projects kiseemsa khempeuh hong phialvatto hi. Mission gimpih kikeuhlo Lay Activities hanciamna tawh a kiseem Saangpite nangawn khintawh phiattawh hong thuah hi.


Kumkhat cinglo-in amahtawh a kibangaa Lay-representatives tawh kiteel Secratery pawlkhat Conference support ci-in nilkhia mang hi. Tua pen member ten nasa lua khin hi. Upper Myanmar aa Evangelist hanciam mipi tawh a kisukha pen Pastor Gin Lian Pau pingpei mang hi. Conference lamlawp a sakkhempeuh gamlapi piangsakin transfer expense pialo hi. Tua bang zawzen itna omlo, hehpihna neilo mikhat pen banghang Pasian naseem suak thei ding hiam? Humpi sahang inzong a gilkial lo-in gamsate mawkthah lo buang hilo hiam? Humpi sangin ei SDA ordained pastor te hiamgam zawlai ding ihi hiam? Kiciliap mahmah hi. Hibang mihingte makaina kua in sumpi puaknuam nawn mawk ding hiam?

Tua bektawh khawllo hi. Self-support tawh kiseem sangte khak sak, laihuan saklo ding, cih thutuamtuam tawh khaktan leuleu hi. Hibang ciangin memberte khut leh ban sattan, a kambal, a ngawngtan tawh kilamdang lo hi. " No sumpi nong puak kei u zongin khasum taan kei nung, GC pan a hongpai appropriation omlel," ci-in tawngngam mawk uh hi. Pasian nasepna dingaa GC Appropriation Budget pen Pawlpi mite zawhthawhna hong suak hi. Ei aadingin tua Fund pen samsiatna taktak hizaw hi. Migilo thapiakna sum suak mawk hi. Pawlpimite kigamtaang theilo ahihmanin sumpi kipuak nawnlo ahi hi. Conference Movement hong thaksuak kik hi.

Kuamah in Sia Kenneth Thang hualo hi. Ama hong sepkhiatte bek kihua ahi hi. Pasian in Hell sung tungte hualo hi. Amau gamntatna in amau haal ahi hi. Zomite lakah Sia Suan Za Nang huading kahawi kei hi. Ama khuttum thuakte lau aa kihem hidingin ka um zaw hi.

Conference Status pen bangbang lampitawh ngahtaleeng kadeih tawntung hi. Mihing tangkhat a omlai teng moral-support kapia nuam hi. Conference pen ei leh ei kipiakkhiatna tawh na kiseem hi a, Pasian mai-ah namtui tawntung hi. Amau kivaakna hi a, tuucingte in tuute hong limbawlin hong khoi ding uh hi. Tuute cidam dingaa kipumkhatna hoih ding hi. "No sumpi tawh kivaak hikeng, no omloh hangin hong paipai lel ding hi, " cih kammal kiza nawnlo ding hi.

General Conference of SDA khutnuai aa om Union Conference/ Mission, Local Mission/ Conference khempeuh khalam dinmun kibang kimlo ding hi. Adiakdiakin Mission minpua organization ahoihdeuh leh ahoihlo deuh om ding hi. Ei mYanmar mission thanemna pen gamdang tawh tehkak ngam ding zong hilo hi. Mision minpua makaite hoih keileh, memberte a neupen dongin khalam nuntak sukha suk hi. Kha khempeuh lampialpih thei hi. A tunglampan Pawlpi mimal dong uksuk ahihman ahi hi. Delegate a teel ciangin power zangin amaudeih tangsawk ahih ciangin Administration siatna puahzawh ding hilo hi.

Conference tawh dingte pen makai hoih keileh Lay-delegate te in ahoihzaw tawh kheek thei a, Pawlpi selua theilo hi. Tua hangin Conference kilunggulh hi. Pasian in Conference ngeina leh Local pan aa kiteel representatives system tawh kalsuan ding deih hi. Conference tangdo mawk pen lauhuai lahlo hi. Pawlpi khantohna khaktan ahi hi. Pasian mittnauta sawk ahi hi.

Legal Filing tawh Conference ih ngen aa hong khaktan uh hi. Tua khaktanna nial aa ih paiteitei pen lungkimlo uh hi. Amau lungkim zui leng cikmahin Conference Status tawh kiding ngeilo ding hi. Minam,lianin kingaihsun a, minority te gawina tawh Lungdamnathu hong sukkhak leh Pasian in naseem lel ding hi. Nidang leitungbup a uk Rome tu-in kimu nawnlo hi. Vantungmi-3 taangkona masuan aa ih neih laiteng hong nawngkaisakte ciangzumsui bang ding uh hi.

Ih do gal pen muhtheihloh te ahi hi. Uniform silh aa hong paite, thukhenzum aa hong kawikaihte, gamnuai power lak aa hong vauvaute, mi nasak uleh hilo hi. Amau ompihpa pen, Jesu a thahnop man a, naungeek khempeuh a that Herod kumpipa a zangpa, Jesu thahna dingaa Zuda-siakaazoh sumip lakaa a zang Siampite leh Pharisees te nungaa ompa, Christiante vaatmai dinga Rome Christian kumpi a zangpa, tua pa in nidang a azat ngei tengmah zangin naseem hi. Muhtheihloh vantungmite in nadodo lel ding hi.

Deihngen aa awng awng a tano pialo bek lo-in, thatlai mawk leh kilawm buang ding hiam? " Natate un, anlum hong nget ciangin suangtum a pia ding, nga hong nget ciangin guul a pia ding, note lakah om nahi uh hiam? Aaktui hong nget ciangin mom-aai pia ding kua om hiam? " Luke 11: 11. Tu ciangciang Union in hong pialo thamlo-in migilo teng molhtumin zangin vaatmai a sawm laitak ahi hi.

Ei Myanmar Union sungah Doctrines puahphat kisamlo hi. Constitutions leh Policy zong hilo hi. Pasian thumaanna leh Jesu hoihna a khuhcip puandalpi lakhiat ding bek ahi hi. Jesu khuavak khuhna lawh hepkhiat ding ahi hi. Paunamkim, minamkimte tungah tawntung Lungdamnathu a puakding thu-um khempeuh in, kidaalna kawm khempeuh sukkhap masak ding ahi hi. Tua nasep a zeek ahawm Administration naseemte in, Monopolism kici Mitamzawte in namneu mitawmzawte ukcip ding hanciamna paikhiat masak kul hi. Pawlpi khel ding hilo hi. Makai gilo khel ding ahi hi. Hong puakoih khiat uh zong hamphatna khat ahi hi. Zukham khat hawl mawtaw tungaa tuangkhalote pen mihampha ahi hi.

A kicial naseemte leh Ukna aana puah kul.

Pasian in Amamin thangsak ding leh teti dingin Israel teelkhia hi. Ama lamet banglo hi. Midangte tungah khuavak ding ahi hi. Ahih hangin mite palkhaktheih sozum tawh kibang hi. Kidaalna kawmpi suak khong hi. Nunna luitui luang bang dingin deih hi. Ahih hangin Marah tuikhuktui bangin kha hi. Sii tuipi bangin a nungta ganhingte in beel theilo hi. Leitung minam khempeuh aading a kiteel Israel leh Jerusalem khuapi susia-in paisan loh phamawh hi. Lampidang zonkul hi.

Pawlpi pen amakep Upna thuguilette leh Constitutions tawh kip ngiungeu aa om ding ahi hi. Thu-um mimal khempeuh leh administration lama naseemte in tua sihsanin kalsuan ding hi. Upna leh ki-ukna thukhunte ngeinakip bangin zang ding hi. Tua tungtawnin Lungdamnathu awkhatin kitaangko ding hi. Pasian leh a Tapa, Topa Jesu leh ama doctrines pen a kikheel theilo, a puk theilo infaalible hi a, a kicial naseemte pen infallible a puktheilo hilo hi. Puah kul a a kipuahzawh keileh laih kul hi. Reformation kici kipuahphatna pen khang tawntungin om hi. Martin Luther te hunin upna puahpha uh hi. Pawlkhatte in Constitutions puahpha uh hi. SDA sung puahphatna pen adang kisamlo hi. Corruption puahphat ding ahi hi. Ngiate in tuucingte omna aluahloh ding bek thupi hi.

Jesu ngeina ah ciahkik ni.

" Jesu in ama naseem dingin pilnasaangte leh mithupite teello hi. Thumaan taangko dingleh leitung lok aa lumlet dingin Siampi-laitheite paisanin mizawngkhalte leh mi kiniamkhiate teel hi. Amaute in tua na a sepzawhna dingin Khasiangtho kipia ding hi. Hih Lungdamnathu pen mihing thahaatna leh mihing pilna tawh hilo Pasian vangletna bektawh kitaangko ding ahi hi." Acts of Apostles. pg 17.

" Tawntung Pasian hong paina ding lam bawl un. Eite Pasian lampi zanglei tawnin tangtakin kha un. Muniamna khempeuh vuk un. Mualian mualneute totam un. Lamkawi khempeuh tangsak un. Lamlai aa om suanghuum khempeuh hemkhia un. Hong kilang Topa vangletna mikhempeuh in muta hen. " Isaiah 40: 3-5.

Mimasa hihna kisaktheihna, minamlian hihna kisaktheihpihna,pilnasaang kisaktheihpihna, Pasian siampi hiing ci a, a puk theilo bang a aana zatna, mualsang mualniam khempeuh phukin totam ding ahi hi. Minam khempeuh muhtheih dingin Topa Jesu saangkhai dinga pahtawi ding ahi hi. Ama hoihna leh alna mikhempeuh ciamsak ding ihi hi.

Jesu hoihna ih lak hiam? Nang sungah Jesu a mu diam? Jesu laamto lo-in nang leh nang na kilaam hiam? Bang tawh teti pang ding nahiam? Ci bangin ih al hiam? Midangte pukna mangpa ihi hiam/ Pasian Pawlpimaan hihna bektawh khanlawhna hong piang diam?

" Kei, leipanin hong kisaangkhai leh, mikhempeuh kahuup khin ding hi." John 12:32.

Mihingte huupna pen Jesu bek ahi hi. Jesu hoihna hi. Jesu alna hi. Hih a tungaa thuhilhna bangin Pasian hoihna hong kimuh mateng midangte kikaizo lo ding hi. Pasian naseem pawlkhatte in khamangthang a zon sangin a omsa hawlkhiat baihsa zaw uh hi. Amau hangin kha tampi khuamialsungah mangthang khinzo hi. Ama tungtawnin kuaman khuavak mulo uh hi. Pasian Pawlpimaan nalah sangin ama hoihna leh dikna lak lecin hong kinaii zaw ding hi. Logo tawh na kidaal sangin Jesu alna limna ciamsak lecin kipzaw ding uh hi. Pawlpi a khanna ding leh mainawtna dingin, Jesu sangkhai ding longal thudang omlo hi."

Thang Siangh. zogampalpi@yahoo.com